Iˇ cuꞈ shawˇ˗eu deuˬ nehˬ˗ehˇ kawˆ shawˆ˗ehˇ ja sawˇ˗eu jeˬ

Aˬ myah myah naˇ Yeˬhawˇbaˬ˗euˬ Saˇ kiˇ deuˬ˗euˬ tiˬ nah mehˬ bawˬ˗ahˇ hawˇ˗eu smˬ nah mehˬ bawˬ˗ahˇ iˇ cuꞈ shawˇ˗eu jeˬ jaˆ˗eu meh. Iˇ cuꞈ shawˇ˗eu dawˬ mehˬ mehˬ˗eu jiˇ leˇ dzaˬ˗ahˇ dawˬ mehˬ mehˬ˗eu gʼaˬ iˇ cuꞈ shawˇ˗eu lehˇ gʼeh˗eu deuˬ˗ahˇ bi tuˇ˗awˇ, laꞈ oˆ jaˆ˗eu naˇ haˬ˗eu jeˬ heu 2 kawˆ˗ahˇ naˇ haˬ˗awˇ teˇ saˇ yaw kʼaˆ kʼaˆ lehˇ maˇ jawˆ ni dawˬ kʼoꞈ bi biꞈ˗eu meh.

1. Nawˇ yawˬ ha˗euˬ iˬ baˇ noeˬ poˆ noeˬ paˇ˗awˇ, Yeˬhawˇbaˬ˗ahˇ a nehˬ˗euˬ uˬ taꞈ, aˬ yawꞈ neh Yeˬsuˇ Ka li˗ahˇ neh nawˇ ya buˬ˗iˇ ni caw ba nehˬ laꞈ˗euˬ jeˬ˗ahˇ nawˇ ha geuꞈ ma loˇ?

2. Nawˇ iˇ cuꞈ shawˇ˗eu teu naˇ, Yeˬhawˇbaˬ˗euˬ Saˇ kiˇ tiˬ gʼaˬ pyeuꞈ laˇ˗awˇ, Yeˬhawˇbaˬ˗euˬ aˇ maꞈ aˇ muˇ nehˬ˗ehˇ tiˬ kawˆ loꞈ˗ehˇ gaˇ mˇ laˇ˗eu lehˇ nawˇ gʼoˆ shaw maˬ loˇ?

Naˇ haˬ taˬ˗euˬ jeˬ heu 2 kawˆ˗ahˇ maˇ jawˆ ni dawˬ kʼoꞈ biꞈ˗eu heu naˇ, iˇ cuꞈ shawˇ˗eu gʼaˬ ka kʼoꞈ˗eu jeˬ˗ahˇ jah˗awˇ, Yeˬhawˇbaˬ˗ahˇ a nehˬ dzeuˇ˗euˬ lehˇ baˬ maꞈ˗euˬ mehˬ shi “saˇ kiˇ kamˬ˗euˬ” jeˬ pyeuꞈ meh. (Loˇmaˆ 10:9, 10) Iˇ cuꞈ shawˇ˗eu lehˇ gʼeh˗eu deuˬ maˇ jawˆ ni dawˬ kʼoꞈ biꞈ nya˗eu gʼaˇ duˬ, naˇ haˬ taˬ˗euˬ teu 2 kawˆ˗ahˇ guiˬ lahˬ shaˇ˗eu laꞈ kʼoeˇ maˬ keuˆ laˇ mi naˆ˗ehˇ yaw muiˬ˗ehˇ ya shaˇ noeˬ ya shaˇ sawˇ taˬ˗eu meh.

Nawˇ Yeˬhawˇbaˬ tiˬ gʼaˬ˗ahˇ tehꞈ˗ehˇ uˬ duˬ tahˬ˗awˇ, aˬ yawꞈ nui kʼahˇ shiˇ˗eu jeˬ nawˬ˗euˬ dehꞈ ziˇ laꞈ kʼoeˇ aˇ yeˇ huiˬ dzehˬ˗eu jeˬ bi pyeuꞈ ma lehˇ guiˬ lahˬ shaˇ˗awˇ a nehˬ dzeuˇ maˬ loˇ?

Nymˬ˗mˇ nawˇ iˇ cuꞈ shawˇ˗eu lehˇ maˇ diˇ noeˬ tsehˆ maˬ loˇ?

Iˇ cuꞈ shawˇ ngeh mehˬ tsoeˬ aˬ joˆ˗ehˇ dm paˬ˗ehˇ gʼeh˗eu nga? (1 Tiˆmoˇseˬ 2:9, 10; Yoˇhaˬ 15:19; Piˇliˇpiˆ 1:10)

Aˬ dui “Miˬyehˇ˗ahˇ yaw zeu baw˗eu” lehˇ mˇ mawˇ˗eu gʼaˇ duˬ, mehˬ tsoeˬ “nui ma nahˬ yu ni taˬ˗awˇ aˬ cawˬ haw muiˬ ni” ya dm˗eu meh. Teu miˇ neh iˇ cuꞈ shawˇ˗eu lehˇ gʼeh˗eu deuˬ, baˬ zaˇ ni gʼeh˗eu mehˬ tsoeˬ maˬ ehˇ, sahˬ boꞈ hawˇ˗eu aˇ baˇ lawˬ muˇ ahˇ˗eu mehˬ tsoeˬ maˬ ehˇ, dm paˬ˗ehˇ maˬ gʼeh˗a. Aˬ yawꞈ maꞈ yaw buˇ yaw shawˇ shawˇ lehˇ gʼeh˗eu mehˬ tsoeˬ hawˇ˗eu aˇ yamˬ nehˬ˗ehˇ tsaˬ leˇ˗eu mehˬ tsoeˬ dm paˬ˗ehˇ gʼeh˗eu meh.

Iˇ cuꞈ shawˇ luꞈ ngeh aˬ joˆ˗ehˇ jahˇ paˬ˗ehˇ gʼeh˗eu nga? (Luˇkaꞈ 3:21, 22)

Yeˬsuˇ neh iˇ cuꞈ shawˇ˗euˬ jeˬ, nymˬ˗mˇ iˬ nah Ka li zaˬ deuˬ iˇ cuꞈ shawˇ ngeh bi dzaw geuꞈ˗eu gʼaˇ duˬ meh. Yeˬsuˇ noeˬ˗eu jeˬ hawˇ˗eu mˇ˗eu jeˬ˗ahˇ haw ngeh, aˬ yawꞈ iˇ cuꞈ shawˇ˗eu jeˬ heu naˇ aˇ yeˇ huiˬ˗eu jeˬ pyeuꞈ˗eu lehˇ gʼoˆ shaw taˬ˗euˬ lehˇ siˬ laˇ˗eu meh. Teu miˇ neh iˇ cuꞈ shawˇ duˬ heu naˇ, ngehˬ niˇ gʼa˗eu, iˇ diˬ diˬ niˇ gʼa˗eu jawˇ duˬ maˬ ngeuˇ˗a. Iˇ cuꞈ shawˇ˗eu jeˬ˗ahˇ aˇ yeˇ maˬ bi taˬ huiˬ ni bi pyeuꞈ iˇ˗eu jeˬ mˇ˗eu aˇ yamˬ maˬ ngeuˇ˗a. Nymˬ˗mˇ hawˇ˗eu iˇ cuꞈ shawˇ˗euˬ gʼaˬ, huiˬ dui dui˗eu tiˬ jeˬ na˗ahˇ gʼaˬ leˇ˗euˬ loꞈ˗ehˇ aˇ dzehˬ dzeuˇ ni mˇ doˆ laꞈ paˬ˗ehˇ maˬ gʼeh˗a. Iˇ cuꞈ shawˇ˗eu aˇ yamˬ laˬ kʼaˬ cehˇ˗eu aˇ yamˬ pyeuꞈ kʼawꞈ ni, yaw zeu baw˗eu jeˬ˗ehˇ ya bi pyeuꞈ˗eu meh.

Aˬ myah luꞈ mehˬ bawˬ˗ahˇ laˇ˗awˇ aˇ muˇ nehˬ˗ehˇ gm leˇ˗eu heu naˇ, nawˬ neh Yeˬhawˇbaˬ˗ahˇ a nehˬ˗euˬ loꞈ˗ehˇ dehꞈ caw nya ni aˬ joˆ˗ehˇ caw ba nehˬ˗eu nga?

Iˇ cuꞈ shawˇ gʼaˬ naˇ, aˬ myah luꞈ yawˬ haˇ yawˬ ha Jaˇliꞈ pyehˆ tseˇ˗eu aˇ yamˬ biˇ taˬ˗eu hawˇ˗eu aˬ myah luꞈ tsaꞈ gaˬ˗iˇ˗eu heu naˇ, aˬ jeˬ miˇ neh aˇ yeˇ huiˬ˗eu nga?

Aˇ muˇ˗ahˇ sheuˬ gʼeh˗eu deuˬ˗ahˇ biꞈ˗eu nui noeˬ nui duˇ

Iˇ cuꞈ maˬ shawˇ˗euˬ tsaꞈ gaˬ˗eu gʼaˬ iˇ cuꞈ shawˇ mawꞈ nya lehˇ ehˇ ngeh, aˬ yawꞈ˗ahˇ paˇ dmˬ heu dmˬ˗euˬ sahˬ boꞈ myaˆ pyawˬ 12-49-ahˇ ahˇ˗eu “Iˇ cuꞈ shawˇ˗eu deuˬ˗ahˇ naˇ haˬ˗eu jeˬ” lehˇ ehˇ˗eu tsahˇ˗ahˇ yaw muiˬ˗ehˇ haw poˆ kʼoꞈ˗iˇ lehˇ gʼaˬ biꞈ. Aˬ yawꞈ aˇ muˇ˗ahˇ sheuˬ gʼeh˗eu deuˬ nehˬ˗ehˇ maˬ ja sawˇ mi naˆ˗ehˇ aˬ joˆ˗ehˇ ya lehˬ hmˬ˗eu lehˇ dzawˇ nehˬ taˬ˗euˬ, sahˬ boꞈ myaˆ pyawˬ 7-ahˇ neh dahˬ beh˗eu “Iˇ cuꞈ maˬ shawˇ˗euˬ tsaꞈ gaˬ˗eu deuˬ˗euˬ gʼaˇ duˬ” lehˇ ehˇ˗eu tsahˇ˗ahˇ gui paˬ˗ehˇ gʼeh˗eu meh. Teu gaˇ ehˇ taˬ˗euˬ loꞈ˗ehˇ, iˇ cuꞈ shawˇ˗eu lehˇ gʼeh˗eu gʼaˬ yawˬ ha neh boꞈ taˬ˗euˬ paˇ dmˬ˗ahˇ haw nya˗eu uˬ taꞈ, ja sawˇ luꞈ ngeh paˇ dmˬ heu dmˬ˗ahˇ jiˇ haw nya meh. Ehˇ kʼawꞈ aˇ muˇ˗ahˇ sheuˬ gʼeh˗eu deuˬ nehˬ˗ehˇ maˬ ja sawˇ mi naˆ˗ehˇ, naˇ haˬ˗eu jeˬ˗ahˇ tiˬ gʼaˬ paˬ neh bi ja sawˇ˗eu maˬ loˬ˗a.

Iˇ cuꞈ shawˇ mawꞈ˗eu deuˬ yawˬ gʼaˬ na luꞈ aˇ muˇ˗ahˇ sheuˬ gʼeh˗eu deuˬ˗ahˇ ja uˇ˗eu gʼaˬ˗ahˇ ya ehˇ nehˬ˗eu meh. Iˇ cuꞈ shawˇ˗eu gʼaˬ “Iˇ cuꞈ shawˇ˗eu deuˬ˗ahˇ naˇ haˬ˗eu jeˬ” lehˇ ehˇ˗eu tsahˇ˗ahˇ gui gʼaˬ˗euˬ naˇ, aˇ muˇ˗ahˇ ja uˇ˗eu gʼaˬ, iˇ cuꞈ shawˇ˗eu gʼaˬ˗ahˇ nawˇ Yeˬhawˇbaˬ˗euˬ nui kʼahˇ mˇ ma lehˇ yawˬ haˇ yawˬ ha guiˬ lahˬ shaˇ˗awˇ Yeˬhawˇbaˬ˗ahˇ a nehˬ dzeuˇ maˬ loˇ lehˇ naˇ haˬ˗eu meh. Aˬ yawꞈ a nehˬ dzeuˇ shaw˗euˬ naˇ, “Iˇ cuꞈ shawˇ˗eu deuˬ˗ahˇ naˇ haˬ˗eu jeˬ” lehˇ ehˇ˗eu gaˇ kawˆ˗ahˇ ja sawˇ˗eu gʼaˇ duˬ, aˇ muˇ˗ahˇ ja uˇ˗eu gʼaˬ aˇ muˇ˗ahˇ sheuˬ gʼeh˗eu 2 gʼaˬ˗ahˇ a nehˬ˗eu meh. Aˇ muˇ˗ahˇ sheuˬ gʼeh˗eu aˬ yawꞈ gʼaˬ yawꞈ, aˇ tsehˆ tiˬ gʼaˬ tiˬ tsehˆ˗ahˇ ya ja sawˇ˗eu meh. Teu˗ahˇ ja sawˇ˗eu gʼaˇ duˬ, tiˬ nah mehˬ bawˬ maˬ ngeuˇ naˇ smˬ nah mehˬ bawˬ aˬ geu ngeh keuˆ laˇ˗eu lehˇ tsaꞈ gaˬ gaˇ loꞈ˗eu maˬ loˬ˗a.

Aˬ myah mayh naˇ, aˇ tsehˆ teu 2 tsehˆ˗euˬ aˬ yawꞈ tsehˆ yawꞈ˗ahˇ aˇ yamˬ naˬ liˬ tiˬ laꞈ ehˇ gʼaˬ ni zmˬ˗eu meh. Ehˇ kʼawꞈ loˬ naˇ aˇ yamˬ teu naˆ maˬ tseˇ ga leˇ nya˗eu meh. Aˬ yawꞈ tsehˆ yawꞈ˗ahˇ ja sawˇ ngeh, dahˬ beh ngeh maˬ ehˇ, jiˇ ngeh maˬ ehˇ, guiˬ lahˬ shaˇ paˬ˗ehˇ gʼeh˗eu meh. Iˇ cuꞈ shawˇ˗eu gʼaˬ maˬ ehˇ, aˇ muˇ˗ahˇ sheuˬ gʼeh˗eu gʼaˬ maˬ ehˇ, naˇ haˬ˗eu jeˬ˗ahˇ ja sawˇ jiˇ˗eu teu naˆ naˆ˗ehˇ tehˬ paˬ˗ehˇ maˬ gʼeh˗a. Gaˇ heu˗ahˇ doˇ˗eu aˇ muˇ˗ahˇ sheuˬ gʼeh˗eu gʼaˬ, gaˇ kawˆ heu˗ahˇ gaˇ kawˆ nui deuˬ naˆ maˬ tseˇ jeˬ hu taˬ paˬ˗ehˇ gʼeh˗eu meh.

Aˬ myah mayh naˇ naˇ haˬ˗eu jeˬ˗ahˇ ja sawˇ ngeh aˇ muˇ muˇ leˇ˗awˇ neh maˬ ngeuˇ˗eu, iˇ cuꞈ shawˇ˗eu deuˬ˗ahˇ aˬ yawꞈ gʼaˬ yawꞈ˗ehˇ ja sawˇ˗eu muiˬ dzehˬ meh. Iˇ cuꞈ shawˇ˗eu gʼaˬ˗ahˇ naˇ haˬ taˬ˗euˬ yawˬ kawˆ na luꞈ˗ahˇ dawˬ kʼoꞈ bi biꞈ˗eu heu naˇ, aˇ muˇ˗ahˇ sheuˬ gʼeh˗eu gʼaˬ˗ahˇ aˬ yawꞈ Jaˇliꞈ laꞈ kʼoeˇ˗euˬ yaw tsaˬ yaw dawˇ gaˇ kawˆ aˇ naˆ ni siˬ nya˗awˇ, iˇ cuꞈ shawˇ˗eu maˇ diˇ dah laˇ ngaˇ laˬ lehˇ siˬ laˇ ni caw ba nehˬ˗eu meh. Kʼoeˇ naˇ, aˬ yawꞈ gʼaˬ yawꞈ˗ehˇ dawˬ kʼoꞈ bi biꞈ˗eu heu naˇ iˇ cuꞈ shawˇ˗eu gʼaˬ˗ahˇ dawˬ kʼoꞈ biꞈ peuˬ ni caw ba nehˬ˗eu meh. Miˬ sawˇ yo zaˬ deuˬ pyeuꞈ naˇ, gaˇ kawˆ teu˗ahˇ tiˬ kawˆ loꞈ˗ehˇ ja sawˇ nya meh.

Iˇ cuꞈ shawˇ˗eu gʼaˬ mehˇ nmˇ zaˬ miˬ aˬ buˇ pyeuꞈ naˇ, aˬ cawˬ˗ahˇ maˬ bi gaˬ˗iˇ ni ja sawˇ nya˗eu aˬ cawˬ mawˇ nya˗eu jawˇ duˬ˗ahˇ ja sawˇ paˬ˗ehˇ gʼeh˗eu meh. Tiˬ gʼaˬ paˬ kuˇ gʼeh˗eu loˬ naˇ, laꞈ oˆ deuˆ˗ahˇ ehˇ taˬ˗euˬ loꞈ˗ehˇ ja sawˇ˗eu aˇ tsehˆ˗ahˇ haw˗awˇ, aˇ muˇ˗ahˇ sheuˬ gʼeh˗eu gʼaˬ maˬ ngeuˇ naˇ aˇ muˇ˗ahˇ caw ba˗eu gʼaˬ kuˇ gʼeh nya meh.

Aˇ muˇ˗ahˇ sheuˬ gʼeh˗eu deuˬ gʼawˬ mya gʼaˬ maˬ jawˇ˗eu aˇ muˇ˗ahˇ, yaw muiˬ paˬ˗ehˇ tseˇ mˇ nya˗awˇ, noeˬ dahˇ doe laˇ˗euˬ aˇ muˇ˗ahˇ caw ba˗eu deuˬ neh, iˇ cuꞈ shawˇ˗eu lehˇ gʼeh˗eu deuˬ˗ahˇ “Aˇ tsehˆ 1: Ka li zaˬ deuˬ jah˗eu jeˬ” lehˇ ehˇ˗eu gaˇ kawˆ laꞈ kʼoeˇ˗euˬ naˇ haˬ˗eu jeˬ˗ahˇ bi ja sawˇ nya meh. Ehˇ kʼawꞈ “Aˇ tsehˆ 2: Ka li zaˬ˗euˬ dehꞈ ziˇ” lehˇ ehˇ˗eu jeˬ˗ahˇ naˇ, aˇ muˇ˗ahˇ sheuˬ gʼeh˗eu deuˬ neh tehꞈ˗ehˇ ja sawˇ paˬ˗ehˇ gʼeh˗eu meh. Aˇ muˇ laꞈ kʼoeˇ, teu˗ahˇ jahˇ nya paˬ˗ehˇ gʼeh˗eu mehˇ nmˇ zaˬ yo aˬ li deuˬ maˬ loꞈ leˇ naˇ, dawˬ peh dawˬ dzeˇ jaˆ˗eu aˇ muˇ deuˬ neh bi caw ba˗eu gʼaˇ duˬ, aˇ maꞈ˗ahˇ sheuˬ gʼeh˗eu gʼaˬ˗ahˇ ngehˬ cawˬ nya meh.

Iˇ cuꞈ shawˇ˗eu gʼaˬ zaˬ pyeuꞈ naˇ, aˬ yawꞈ tsehˆ yawꞈ ja sawˇ ngeh, Saˇ kiˇ pyeuꞈ˗eu aˬ da aˬ ma jiˇ jawˇ paˬ˗ehˇ gʼeh˗eu meh. Aˬ da aˬ ma maˬ laˇ nya naˇ, aˇ muˇ˗ahˇ sheuˬ gʼeh˗eu 2 gʼaˬ (maˬ ngeuˇ naˇ ja sawˇ luꞈ˗eu aˇ tsehˆ˗ahˇ haw˗awˇ sheuˬ gʼeh˗eu tiˬ gʼaˬ hawˇ˗eu aˇ muˇ˗ahˇ caw ba˗eu tiˬ gʼaˬ) jawˇ paˬ˗ehˇ gʼeh˗eu meh.

Sheuˬ gʼeh˗eu deuˬ iˇ cuꞈ shawˇ˗eu gʼaˬ Jaˇliꞈ laꞈ kʼoeˇ ya dzaw dahˬ beh˗eu gaˇ kawˆ deuˬ˗ahˇ tsaˬ tsaˬ ni gʼoˆ shaw ngaˇ laˬ lehˇ ya haw˗eu meh. Kʼoeˇ uˬ taꞈ, aˬ yawꞈ maꞈ iˇ cuꞈ shawˇ˗eu gʼaˬ yaw tsaˬ yaw dawˇ jeˬ˗ahˇ aˇ poeˬ aˇ naˆ ni taˬ baw˗eu nga, Yeˬhawˇbaˬ˗euˬ aˇ maꞈ aˇ muˇ˗ahˇ yaw zeu baw ngaˇ laˬ, lehˇ jiˇ ya haw˗eu meh. Aˬ yawꞈ Jaˇliꞈ laꞈ kʼoeˇ ya dzaw dahˬ beh˗eu gaˇ kawˆ deuˬ˗ahˇ maˬ gʼoˆ shaw naˇ, aˇ nah iˇ cuꞈ shawˇ nya laˇ˗eu gʼaˇ duˬ sheuˬ gʼeh˗eu deuˬ aˬ yawꞈ˗ahˇ caw ba˗eu jeˬ lehˬ hmˬ nehˬ˗eu meh. Tiˬ gʼaˬ na tsaꞈ gaˬ˗eu gaˇ˗ahˇ aˇ poeˬ taˬ baw˗eu gʼaˇ duˬ maˬ ehˇ, aˇ maꞈ aˇ muˇ˗ahˇ sheuˬ gʼeh˗eu jeˬ˗ahˇ mˇ caw˗eu gʼaˇ duˬ maˬ ehˇ, aˇ yamˬ ya zmˬ˗eu meh. Sheuˬ gʼeh˗eu deuˬ iˇ cuꞈ shawˇ˗eu gʼaˬ shawˇ nya laˇ ngaˬ˗aˇ laˬ lehˇ haw˗eu gʼaˇ duˬ, aˬ yawꞈ tsehˆ yawꞈ˗ahˇ ja sawˇ˗eu aˇ yamˬ aˬ joˆ˗ehˇ zmˬ˗eu lehˇ aˬ yawꞈ maꞈ˗ahˇ jaˆ˗eu tehꞈ meh. Naˇ haˬ˗eu jeˬ tiˬ kawˆ na˗ahˇ aˇ yamˬ ya zmˬ˗awˇ, tiˬ kawˆ na˗ahˇ yaw kʼaˆ˗ehˇ maˬ ya zmˬ kʼawꞈ, yawˬ kawˆ na luꞈ˗ahˇ ja sawˇ paˬ˗ehˇ gʼeh˗eu meh.

Iˇ cuꞈ shawˇ˗eu gʼaˬ nehˬ˗ehˇ ya ja sawˇ˗eu sheuˬ gʼeh˗eu deuˬ, aˇ tsehˆ 2-ahˇ ja sawˇ gʼaˬ ngeh, aˬ yawꞈ maꞈ bawˬ dzaˬ˗awˇ iˇ cuꞈ shawˇ˗eu lehˇ gʼeh˗eu gʼaˬ shawˇ nya ngaˇ laˬ lehˇ noeˬ tsehˆ˗eu meh. Sheuˬ gʼeh˗eu deuˬ iˇ cuꞈ shawˇ˗eu lehˇ gʼeh˗eu gʼaˬ neh dehꞈ laꞈ˗euˬ jeˬ hawˇ˗eu mˇ nya˗eu jeˬ uˬ taꞈ, gaˇ kawˆ nui deuˬ˗ahˇ jiˇ noeˬ keuˆ nehˬ˗eu meh. Aˬ dui aˬ yawꞈ Yeˬhawˇbaˬ nehˬ˗ehˇ cawˬ cawˬ˗eu jeˬ huiˬ laˇ mahˇ laˇ ni leh jeh˗awˇ, Jaˇliꞈ laꞈ kʼoeˇ ya dzaw dahˬ beh˗eu yaw tsaˬ yaw dawˇ˗ahˇ gʼoˆ shaw ngaˇ laˬ lehˇ siˬ nya mawꞈ˗eu ma. Gʼoeˇ˗eu gaˬ˗eu laꞈ kʼoeˇ nawˬ neh caw ba˗euˬ jeˬ heu naˇ, iˇ cuꞈ shawˇ˗eu lehˇ gʼeh˗eu gʼaˬ˗ahˇ laˬ kʼaˬ cehˇ˗eu guiˬ lahˬ dawˬ yaw muiˬ˗ehˇ tsaꞈ gaˬ˗eu gʼaˬ pyeuꞈ nya laˇ ni lehˬ hmˬ nehˬ˗eu jeˬ pyeuꞈ meh.

Kʼoeˇ naˇ, iˇ cuꞈ shawˇ˗eu gʼaˬ nehˬ˗ehˇ ya ja sawˇ˗euˬ sheuˬ gʼeh˗eu tiˬ gʼaˬ maˬ ngeuˇ naˇ nyiˬ gʼaˬ, iˇ cuꞈ shawˇ˗eu lehˇ gʼeh˗eu gʼaˬ˗ahˇ aˬ yawꞈ shawˇ nya laˇ ngaˬ˗aˇ laˬ, maˬ shawˇ nya nga laˬ lehˇ ya ehˇ nehˬ˗eu meh. Aˬ yawꞈ shawˇ nya laˇ˗euˬ naˇ, sheuˬ gʼeh˗eu gʼaˬ aˬ yawꞈ nehˬ˗ehˇ sahˬ boꞈ myaˆ pyawˬ 51-53 laꞈ kʼoeˇ ahˇ˗eu “Iˇ cuꞈ shawˇ˗eu deuˬ nehˬ˗ehˇ kawˆ shawˆ˗ehˇ ja sawˇ˗eu jeˬ” lehˇ ehˇ˗eu uˬ dzah˗ahˇ ja sawˇ paˬ˗ehˇ gʼeh˗eu meh. Iˇ cuꞈ shawˇ˗eu lehˇ gʼeh˗eu gʼaˬ Aˬ dui mˬ maˬ maˬ byaˆ zaˇ ziˇ laˬ kʼaˬ cehˇ nya lehˇ ehˇ˗eu paˇ dmˬ maˬ dzaw jiˇ˗euˬ siˬ naˇ, sheuˬ gʼeh˗eu deuˬ aˬ yawꞈ˗ahˇ iˇ cuꞈ shawˇ dzeuˇ˗euˬ miˇ tsa kʼawꞈ, dzaw daˆ leꞈ lehˇ gʼaˬ biꞈ paˬ˗ehˇ gʼeh˗eu meh. Iˇ cuꞈ shawˇ˗eu lehˇ gʼeh˗eu gʼaˬ˗ahˇ aˬ yawꞈ iˇ cuꞈ shawˇ˗eu aˇ nah hawˇ˗eu tsawˇ myahˇ Aˇ muˇ laꞈ kʼoeˇ˗euˬ tsaꞈ gaˬ˗eu deuˬ˗euˬ boꞈ taˬ duˬ˗ahˇ boꞈ taˬ ma lehˇ ehˇ nehˬ˗awˇ, sheuˬ gʼeh˗eu deuˬ aˬ yawꞈ˗euˬ gaˇ kawˆ shaˇ˗eu teu naˇ, aˇ maꞈ aˇ muˇ miˇ kʼahˬ doe ni jaˆ˗eu Yeˬhawˇbaˬ˗euˬ Saˇ kiˇ deuˬ˗euˬ zahˇ paw˗euˬ mˇ jeˬ shaˇ kawˆ deuˬ˗ahˇ haw piˇ nya˗eu gʼaˇ duˬ hawˇ˗eu, aˬ yawꞈ˗ahˇ jiˇ Ka li zaˬ deuˬ˗euˬ mˇ jeˬ shaˇ kawˆ˗ahˇ bi gm laˇ nya˗awˇ, aˬ yawꞈ˗ahˇ nui jah paw˗euˬ dzaˇ za nya ni caw ba nehˬ˗eu gʼaˇ duˬ ma lehˇ ya ehˇ nehˬ˗eu meh. Kʼoeˇ uˬ taꞈ, sheuˬ gʼeh˗eu deuˬ tsaꞈ gaˬ˗eu yaw shuiꞈ gʼaˬ˗ahˇ aˬ yawꞈ˗euˬ gaˇ kawˆ, jw.org laꞈ kʼoeˇ˗euˬ Yeˬhawˇbaˬ˗euˬ Saˇ kiˇ deuˬ˗euˬ miˇ kʼahˬ doe ni˗euˬ yawˬ ha˗euˬ gaˇ kawˆ˗ahˇ haw lahˇ nehˬ˗eu jeˬ nehˬ˗ehˇ tsaˬ leˇ ni zmˬ ma lehˇ ya ehˇ nehˬ meh. Heu kawˆ˗ahˇ ja sawˇ ngeh 10 peu taꞈ˗ehˇ maˬ ya bi dzehˬ˗iˇ˗a.

Tsaꞈ gaˬ˗eu gʼaˬ iˇ cuꞈ shawˇ˗euˬ tiˬ kʼoꞈ byah laˇ ngeh, sheuˬ gʼeh˗eu nyiˬ gʼaˬ aˬ yawꞈ˗ahˇ mawˇ dzoeˇ˗awˇ gʼaˬ hawˇ˗eu aˬ yawꞈ˗ahˇ caw ba˗eu nui noeˬ nui duˇ biꞈ paˬ˗ehˇ gʼeh˗eu meh. Teu laꞈ kʼoeˇ˗euˬ sheuˬ gʼeh˗eu tiˬ gʼaˬ, aˬ yawꞈ˗euˬ tsaꞈ gaˬ˗eu aˇ muˇ˗ahˇ sheuˬ gʼeh˗eu gʼaˬ pyeuꞈ paˬ˗ehˇ gʼeh˗eu meh. Tsaꞈ gaˬ˗eu yaw shuiꞈ teu gʼaˬ zaˬ pyeuꞈ naˇ, Saˇ kiˇ pyeuꞈ˗eu aˬ yawꞈ˗euˬ aˬ da aˬ ma jiˇ jawˇ paˬ˗ehˇ gʼeh˗eu meh. Aˬ yawꞈ nehˬ˗ehˇ ngehˬ cawˬ ngeh lawˬ ka ni gʼaˬ biꞈ˗eu jeˬ˗ehˇ ngehˬ paˬ˗ehˇ gʼeh˗eu meh. Sheuˬ gʼeh˗eu deuˬ aˬ yawꞈ huiˬ laˇ mahˇ laˇ˗euˬ gaˇ kawˆ˗ahˇ ngehˬ keuˆ˗awˇ, yawˬ haˇ yawˬ ha Jaˇliꞈ pyehˆ tseˇ˗eu, yawˬ nah na luꞈ Jaˇliꞈ gui˗eu, yawˬ jaw na luꞈ nymˇ jiˇ uˬ duˬ tahˬ˗eu, mehˬ bawˬ˗ahˇ oe˗awˇ teu˗ahˇ gm leˇ˗eu, yawˬ jaw na luꞈ tsaꞈ gaˬ˗iˇ˗eu, muiˬ˗eu mˇ jeˬ shaˇ kawˆ heu deuˬ aˬ joˆ˗ehˇ mˇ daˆ leꞈ nya˗eu lehˇ nui noeˬ nui duˇ biꞈ nehˬ˗eu meh. (Eˇpeˇsu 5:15, 16) Aˬ yawꞈ Aˬ dui mˬ maˬ maˬ byaˆ zaˇ ziˇ laˬ kʼaˬ cehˇ nya lehˇ ehˇ˗eu paˇ dmˬ maˬ dzaw jiˇ˗euˬ siˬ naˇ, sheuˬ gʼeh˗eu deuˬ aˬ yawꞈ˗ahˇ dzaw nehˬ˗eu tsawˇ haˬ lehˬ hmˬ nehˬ paˬ˗ehˇ gʼeh˗eu meh. Sheuˬ gʼeh˗eu deuˬ aˬ yawꞈ˗ahˇ ja ceuˬ dui dui nehˬ paˬ˗ehˇ gʼeh˗awˇ, aˬ myah myah naˇ aˬ yawꞈ˗ahˇ tiˬ tsahˇ nyiˬ tsahˇ tehꞈ˗ehˇ toeˬ ceh nehˬ paˬ˗ehˇ gʼeh˗eu meh.