Eŋɛnywiwema Maki Tɔ

8 Le ŋkeke ŋtɔ́wo mɛɔ, amɛahwa gangan ɖeka gbeva bɔ ke yí wodekpɔ ŋɖe aɖu o. Eyi taɖo Yesu yɔ yi nukplaviwo yí nu nɔ wo mɔ: 2 “Amɛahwa lɔ nu wa ŋshishi nɔŋ, ɖo ŋkeke amɛtɔn ke yí wole ŋgbɔ. Wodeɖu ŋɖe o. 3 Nɔ ŋtashi wo yí wokpe axwe shiveɔ, woavayi juin le mɔ ji yí fini mɛɖewo so can desɔ lɛ o.” 4 Vɔ yi nukplaviwo biɔɛ se mɔ: “Ci lɛtɔxu desɔ axwe gbɔ ɖe, fini mìakpɔ ŋɖuɖu le keke asun mɛ cɛwoɔ?” 5 Ébiɔ wo se mɔ: “Kpɔnnɔ nɛni yí le mí shiɔ?” Woɖo ŋci mɔ: “Amadrɛ.” 6 Énu nɔ amɛ lɔwo mɔ wo le nɔ nyinɔnɔ do nyigban. Yi goduɔ, ésɔ kpɔnnɔ amadrɛ lɔwo yí do akpe do wo ji, éŋɛ wo mɛ yí tɔ wo sɔsɔ nɔ yi nukplaviwo mɔ wo le ma wo. Eyi woma wo nɔ amɛahwa lɔ. 7 Kpavi hwɛhwɛ kankin le wo shi hɛnnɛ yí edo gbe ɖaɖa do wo ji* yí nu nɔ wo mɔ wo le ma wo hɛnnɛ. 8 Eyi woɖu nu yí xodu ɖɔ wo. Wolɔ kankan ciwo yí kpɔtɔ yí woɖɔ kishi gangan* amadrɛ. 9 Ŋsu ciwo yí ɖu nu lɔ hlɛnhlɛnmɛ ayi 4 000. Yi goduɔ, énu nɔ wo mɔ wo le yi.

10 Éɖo tɔjihun mɛ zeɖeka koɖo yi nukplaviwo yí wova Dalmanuta kan mɛ. 11 Farizitɔwo va gbɔ le nɔ yí tɔ enyɔ dɔndɔn koɖi. Wodui kpɔ yí nunuɔ mɔ yɛ le wa enujiŋ ɖeka so jeŋkwi mɛ. 12 Eyi taɖo ese hun yí nu mɔ: “Nyi yí taɖo egbɛvi cɛwo jijiɛ enujiŋ ɔ? Ŋnukɔ nɔ mí le nyɔnɔnwi mɛ mɔ, wodawa enujiŋ ɖe nɔ egbɛvi cɛwo o.” 13 Eyi eso le wo gbɔ yí gbeɖo tɔjihun mɛ yí yi ago xlɔtɔ ji nɔ axu lɔ.

14 Vɔ enukplavi lɔwo ŋlɔbe yí wodehɛn ŋɖuɖu o. Kpɔnnɔ kuɖeka yí le tɔjihun lɔ mɛ nɔ wo. 15 Yesu kanxle wo veviɖe mɔ: “Mínɔ zanŋte yí acɔ míwoɖekiwo le Farizitɔwo kpɔnnɔcike koɖo Erodi kpɔnnɔcike nu.” 16 Eyi taɖo wotɔ enyɔ dɔndɔn le wowoɖeɖewo mɛ nɔ ci wodehɛn kpɔnnɔ ɖe o. 17 Ci Yesu nya ahan ɔ, ébiɔ wo se mɔ: “Nyi yí taɖo mídɔndɔn nyɔ nɔ kpɔnnɔ ci mídehɛn ɔ? Mídese enyɔ ci ŋnukɔ mɛ hɔɖo o? Mídemɔŋje mɛ o, yi gɔnmɛsese kpɔtɔ gbɔngbɔnnu nɔ mía? 18 ‘Ci ŋkuviwo le te nɔ mí can ɖe, mídekpɔkpɔ nu ba? Yí ci etowo le mí shi can ɖe, mídeseseɛ nu ba?’ Míɖo ŋwia? 19 Ci ŋŋɛ kpɔnnɔ amatɔn mɛ yí sɔ na ŋsu 5 000 ɖe, kishi nɛni kankan ciwo yí kpɔtɔ mílɔ lɔwo ɖɔɔ?” Woɖo ŋci mɔ: “Wive.” 20 “Ci ŋŋɛ kpɔnnɔ amadrɛ lɔwo mɛ yí sɔ na ŋsu 4 000 lɔwo ɖe, kishi gangan* nɛni kankan ciwo yí kpɔtɔ mílɔ lɔwo ɖɔɔ?” Woɖo ŋci mɔ: “Amadrɛ.” 21 Eyi ebiɔ wo se mɔ: “Mídese mɛ hɔɖo o?”

22 Ecɛyɛɔ, wovaɖo Bɛtsaida yí wokplɔ ŋsu ŋkuvitɔnnɔ ɖeka vɛ nɔ Yesu le nɔ yí ɖe kuku ni mɔ yɛ le tɔ alɔ̀ yi. 23 Yesu le alɔ̀ nɔ ŋsu ŋkuvitɔnnɔ lɔ yí kplɔɛ ti le kɔxwi lɔ mɛ. Ci ecu tan do ŋkuviwo ji ni ɖegbɔɔ, étɔ alɔ̀ yi yí biɔɛ se mɔ: “Èkpɔkpɔ ŋɖea?” 24 Ŋsu lɔ fɔn ta yi ji yí mɔ: “Ŋkpɔkɔ amɛwo, vɔ wole shigbe aciwo nɛ yí zɔnkɔ zɔnlin.” 25 Yesu gbetɔ alɔ̀ ŋkuviwo nɔ ŋsu lɔ yí ekpɔ nu nywiɖe. Edɔ̀ lɔ mi ni yí etɔ nushianu kpɔkpɔ ceŋceŋ. 26 Yesu mɔ yɛ le yi axwe yí nu ni mɔ: “Ŋgbeyi kɔxwi lɔ mɛ o.”

27 Ci Yesu koɖo yi nukplaviwo so kpe Sezare kɔxwiwo mɛ le Filipi ɔ, étɔ wo biɔbiɔ se le mɔ lɔ ji mɔ: “Mi amɛwo nunɔ mɔ nyɛŋnyiɔ?” 28 Woɖo ŋci ni mɔ: “Ʒan Amɛʒindoshimɛtɔ, mɛbuwo nunuɔ mɔ Eli yí mɛbuwo gbenunuɔ mɔ enyɔnuɖɛtɔ ɖe.” 29 Eyi ebiɔ wo se mɔ: “Vɔ míwo ɖe, mi yí míwo nunɔ mɔ nyɛŋnyiɔ?” Piɛ ɖo ŋci ni mɔ: “Eo yí nyi Kristo lɔ.” 30 Eyi taɖo edo se nɔ wo veviɖe mɔ woŋgbenu mɛ ci yenyi nɔ mɛɖe o. 31 Gbesɔ kpe niɔ, étɔ enu kplakpla wo mɔ, Agbetɔvi lɔ ɖo akpe fun sugbɔ yí jumɛgawo, avɔnsatɔwo gawo koɖo esekplamɛtɔwo agbi yí awui. Vɔ woafuin do agbe le ŋkeke amɛtɔntɔ lɔ gbe. 32 Le nyɔnɔnwi mɛɔ, énu nyɔ lɔwo pleŋ nɔ wo yí dewla ɖe do wo o. Vɔ Piɛ kplɔɛ yi ekpa yí tɔ nyɔ gbegbe ni. 33 Yesu trɔ kpɔ yi nukplaviwo yí gbe nyɔ nɔ Piɛ yí mɔ: “Gboteyi ɖaa, Satana! Ðo de Mawu susuwo yí le eo shi o, vɔ agbetɔwo susuwo yɔ.”

34 Yesu yɔ amɛahwa lɔ koɖo yi nukplaviwo yí nu nɔ wo mɔ: “Nɔ mɛɖe ji mɔ yeakplɔ ŋdoɔ, le gbe yiɖeki yí asɔ efuntrenamɛci* yitɔ yí akplɔ ŋdo matrɔmatrɔ. 35 Mɛɖekpokpui ci yí ji mɔ yeahwlɛn ye gbe* gan ɔ, ásɔ bu. Vɔ mɛɖekpokpui ci yí bu yi gbe* do nyɛ koɖo eŋɛnywi lɔ ŋciɔ, ágbevanɔ agbe ke. 36 Le nyɔnɔnwi mɛɔ, nɔ mɛɖe je agbla yí ɖo ŋciwo pleŋ yí le xexeɛ mɛ gan yí sɔ agbe* yitɔ bu ɖe, nyɔna ci yí le mɛ niɔ? 37 Nyi agbetɔ atɛnŋ asɔ xwle yi gbe* teŋ ɔ? 38 Mɛɖekpokpui ci nyɛ koɖo anyi nyɔwo awa ŋkpɛn nɔ le egbɛvi egbejimanɔtɔwo* koɖo nuvɔnwatɔwo mɛɔ, amɛ lɔ nu can awa ŋkpɛn nɔ Agbetɔvi lɔ hɛnnɛ hwenu ava le Dalɔ ŋsɛn mɛ koɖo yi dɔla kɔkɔɛwo.”