Apotruwo Dɔwawawo
1 Oo Teofilu, le wema ŋkɔtɔ ci ŋŋwlɛ ɖaɖa eo mɛɔ, ŋxo nuxu so ŋciwo pleŋ Yesu wa koɖo ŋciwo pleŋ ekpla amɛwo, 2 keke je gbecigbe wosɔɛ yi jeŋkwi mɛ nu. Gbɔxwe ayi jeŋkwi mɛɔ, éto gbɔngbɔn kɔkɔɛ ji yí na emɔdasɛnamɛwo apotru ciwo ecan. 3 Ci ekpe fun goduɔ, éto kpeɖoji ciwo nu kankandoji le ji yí dasɛ yiɖeki nɔ wo mɔ yele agbe. Wokpɔɛ zenɛniɖe na nɔ ŋkeke 40, eyi exo nuxu nɔ wo so Mawu Fyɔɖuxu lɔ nu. 4 Ci edo go koɖo woɔ, édo se nɔ wo mɔ: “Míŋgbeso le Ʒerusalɛmu o, vɔ mínɔ te kpɔ ŋci gbe Eda ɖo yí ŋnu yi nyɔ nɔ mí. 5 Ðo eshi mɛ yí Ʒan ʒin amɛwo do, vɔ le ŋkeke ɖewo goduɔ, gbɔngbɔn kɔkɔɛ yí woasɔ wa ʒinʒindoshimɛ nɔ mí.”
6 Eyi taɖo ci wobɔ dojuɔ, wobiɔɛ se mɔ: “Axwetɔ, kakacɛ yí èjikɔ atrɔ aɖo fyɔɖuxu lɔ nɔ Izraɛlia?” 7 Énu nɔ wo mɔ: “Mídatɛnŋ ajeshi gaxoxo alo hwenu ciwo yí Eda ɖo ɖɛ le yiŋtɔ ŋsɛn mɛ o. 8 Vɔ míaxɔ ŋsɛn hwenu gbɔngbɔn kɔkɔɛ lɔ ava mí ji yí míanyi anyi kunuɖetɔwo le Ʒerusalɛmu, le Ʒude lɔ pleŋ koɖo Samari keke ayi nyigban lɔ sɛnxu.”* 9 Ci enu enyɔ cɛwo ɖegbɔ yí wogluigluiɛ kpɔɔ, wosɔɛ kpe eji yí azɔ ɖeka xe ŋmɛ nɔ wo. 10 Wokpɔtɔ glogloɔ jeŋkwi mɛ kpɔ truɖuɖu hwenu eyikɔ. Eyi zeɖeka tɔntɔn ɔ, ŋsu amɛve ɖekawo do awu ɣiwo yí vale te le wo gbɔ. 11 Ŋsu lɔwo nu nɔ wo mɔ: “Galile ŋsuwo, nyi yí taɖo míle te yí glogloɔ jeŋkwi mɛ kpɔɔ? Yesu cɛ ci wokɔ so mí gbɔ yi jeŋkwi mɛ agbetrɔ gbɔ ahan shigbe lé míkpɔɛ yí eyikɔ jeŋkwi mɛ nɛ.”
12 Eyi woso le Eto Olivuciwo tɔ lɔ ji yí trɔyi Ʒerusalɛmu. Sabati ŋkeke mɔzɔnzɔn ɖeka hanci yí woazɔn so Eto Olivuciwo tɔ lɔ ji ayi Ʒerusalɛmu. 13 Ci wovaɖoɔ, woyi shanŋ ji le exɔ ci mɛ wonɔnɔ. Mɛ lɔwo yí nyi: Piɛ, Ʒan, Ʒaki, Andre, Filipu, Toma, Batelemi, Matie, Ʒaki Alufe vi, Simɔ ci yí sɔnɔ zo do enu nu koɖo Ʒudasi Ʒaki vi. 14 Wo pleŋ bɔ doju yí dodoɔ gbe ɖaɖa veviɖe koɖo susu ɖekɛ ŋmɛ. Nyɔnu ɖewo le koɖo wo, Mari Yesu nɔlɔ can sɔ kpe nɔ Yesu nɔviɛwo.
15 Le ŋkeke ŋtɔ́wo mɛɔ, Piɛ so je te le dodomɛ nɔ nɔvi lɔwo (mɛ ciwo yí bɔ doju hlɛnhlɛnmɛ nyi 120 han) yí nu mɔ: 16 “Nɔviwo, ele veviɖe mɔ enyɔ ci gbɔngbɔn kɔkɔɛ na yí Davidi nu so Ʒudasi ci yí nɔ ŋkɔ nɔ mɛ ciwo yí va lé Yesu nu ajɔ do ji. 17 Ðo wohlin do mì mɛ yí wocin nɔ awa sɛnsɛndɔ cɛ. 18 (Ŋsu cɛ sɔ enumajɔmajɔwawa fɛncu xwle nyigban, eyi ci ejuin yí sɔ eta cu guɔ, xodu wo ni yí yi dɔviwo pleŋ kaka do nyigban. 19 Ʒerusalɛmutɔwo pleŋ yí se enyɔ cɛ. Eyi dɔ woyɔnɔ nyigban lɔ le wowo gbe mɛ mɔ Akɛldama ci gɔnmɛ yí nyi “Ehun Nyigban.”) 20 Woŋwlɛ ɖɛ do Ehajiji Wema mɛ mɔ, ‘Yi nɔxu atrɔ axwetugbe, mɛɖekɛ danɔ enɔ o’ yí ‘mɛbu le xɔ enujikpɔkpɔdɔ yitɔ.’ 21 Eyi taɖo ele veviɖe mɔ, ŋsu ciwo yí zɔnnɔ koɖo mì le hwenu ciwo pleŋ mɛ Axwetɔ Yesu nɔ koɖo mì yí wa yi dɔwo, 22 so hwenu Ʒan ʒin do shi mɛ keke je gbecigbe wosɔɛ so mì gbɔɔ, mɛɖeka le ŋsu cɛwo mɛ ɖo anyi kunuɖetɔ nɔ fɔnfɔnsoku yitɔ koɖo mì.”
23 Eyi taɖo wosɔ amɛ amɛve ɖo te: Ʒozɛfu ci woyɔnɔ mɔ Barsabasi ci yí gbenyi Ʒutusi sɔ kpe nɔ Matiasi. 24 Eyi wodo gbe ɖaɖa mɔ: “Oo Yehowa!* Eo ci yí nya enu ci yí le ji mɛ nɔ amɛwo pleŋ, sɔ mɛɖeka le amɛ amɛve cɛwo mɛ 25 keŋ nɔ axɔ sɛnsɛndɔ cɛ yí anyi apotru do dumɛ nɔ Ʒudasi ci yí gbe edɔ cɛwo keŋ yí lé yiŋtɔ mɔ.” 26 Eyi wosɔ enu kpɔ do wo ji yí eje Matiasi ji yí wohlin sɔ kpe nɔ apotru 11 lɔwo.*