Apotruwo Dɔwawawo
6 Enukplavi lɔwo vatɔ egbɔ susu doji le ŋkeke ŋtɔ́wo mɛ. Eyi Ʒuifu ciwo yí donɔ Grɛkigbe tɔ nyɔ toto do Ʒuifu ciwo yí donɔ Ebregbe nu; ɖo nɔ wole ŋkeke ɖekaɖeka ŋɖuɖu makɔɔ, wodekpɔnɔ wowo kposhuwo gbɔ nywiɖe o. 2 Eyi Amɛ Wive lɔwo yɔ enukplavi lɔwo pleŋ bɔ yí nu mɔ: “Desɔgbe mɔ* mìatashi Mawu nyɔ nunu keŋ avamama ŋɖuɖu le ekplɔn nu o. 3 Eyi taɖo nɔviwo, míkpɔ míwonɔnɔwo mɛ keŋ acan ŋsu amadrɛ ciwo nu woxonɔ nuxu nywi so* yí woɖɔ koɖo gbɔngbɔn kɔkɔɛ koɖo nunya keŋ nɔ mìaɖo edɔ vevi cɛ nɔ wo. 4 Vɔ mìwo ale bu do gbedoɖa koɖo Mawu nyɔ lɔ kplakpla amɛwo.” 5 Enyɔ ci wonu jɔ ji nɔ enukplavi lɔwo pleŋ. Eyi wocan Etiɛni ci yí ɖɔ koɖo xɔse koɖo gbɔngbɔn kɔkɔɛ, Filipu, Prokɔ, Nikanɔ, Timɔ, Pamenasu koɖo Nikola ci yí trɔ ji mɛ yí vanyi Ʒuifu yí so Antiɔshi. 6 Wokplɔ wo vɛ nɔ apotru lɔwo; eyi ci wodo gbe ɖaɖa ɖegbɔɔ, wosɔ wowo lɔ̀wo da do wo ji yí sɔ dasɛ mɔ yewosɔ wo.
7 Eyi Mawu nyɔ lɔ kakakɔ doji, enukplaviwo vasukɔgbɔ doji haan le Ʒerusalɛmu. Avɔnsatɔ sugbɔ can vatrɔ xɔsetɔwo hɛnnɛ.
8 Etiɛni ɖɔ koɖo xomɛvu Mawu tɔ yí Mawu gbena ŋsɛn gangan yi yí ele enujiŋ gangan hamɛhamɛwo wakɔ. 9 Vɔ ŋsu ɖewo so gbɛbɔbɔ ci woyɔnɔ mɔ Ʒuifu ciwo wona vovo nukplaxu mɛ yí va. Mɛɖewo so Sirɛnu, Alɛsandri, Silisi koɖo Azi juwo mɛ yí va koɖo wo hɛnnɛ. Wova mɔ yewoadɔn nyɔ koɖo Etiɛni. 10 Vɔ wodesun ji o, ɖo éxokɔ nuxu koɖo nunya sugbɔ yí gbɔngbɔn kɔkɔɛ can le koɖi. 11 Eyi wodɔ ŋsu ɖewo le bebemɛ mɔ wo le nu mɔ: “Mìse yí enunuɔ enyɔkpotuwo so Moizi koɖo Mawu nu.” 12 Eyi wona yí eʒin tɔn le mɛ lɔwo, jumɛgawo koɖo esekplamɛtɔwo mɛ. Wovayi gbɔ le avomɛ yí li akpasɛnsintɔ yí kplɔɛ vayi Sanhedrɛn lɔ. 13 Wokplɔ kunuɖetɔ ŋsukantɔwo vɛ hɛnnɛ yí wonu mɔ: “Ŋsu cɛ nunuɔ enyɔvɔnwo so texwe kɔkɔɛ cɛ koɖo Ese lɔ nu gbɛmɛgbɛmɛ. 14 Le kpɔwɛ mɛ, mìse yí enu mɔ, Yesu Nazarɛtitɔ lɔ agban texwe cɛ yí woaɖɔli kɔnu ciwo yí Moizi gbe ɖɛ nɔ mì.”
15 Ci mɛ ciwo pleŋ yí le nyinɔnɔ le Sanhedrɛn lɔ mɛ gluigluiɛ kpɔ juun ɔ, wokpɔ mɔ yi ŋmɛ le shigbe mawudɔla ŋmɛ nɛ.