Apotruwo Dɔwawawo
9 Sɔlu kpɔtɔ le dɔmɛzi ji do Axwetɔ lɔ nukplaviwo nu yí kankan adan mɔ yeawu wo. Eyi taɖo evayi kpɔ avɔnsatɔ gangantɔ lɔ 2 yí nu ni mɔ yɛ le ŋwlɛ wemawo ɖaɖa Ʒuifuwo nukplaxu ciwo yí le Damasi. Wema cɛwo ana acɛ yi nɔ atɛnŋ alé ŋsu alo nyɔnu ɖekpokpui ci yí le Axwetɔ Mɔ lɔ ji yí ablɛ ahin gbɛ va Ʒerusalɛmu.
3 Ci ele emɔ lɔ ji yí gogokɔ Damasi ɔ, klɛnklɛn ɖeka so jeŋkwi mɛ yí klɛn trɔdi zeɖeka le avomɛ. 4 Eyi ejuin yí se egbe ɖeka mɔ: “Sɔlu, Sɔlu, nyi yí taɖo èciciɛ yumɛ nɔŋ ɔ?” 5 Émɔ: “Axwetɔ, mi ènyiɔ?” Egbe lɔ ɖo ŋci mɔ: “Enyɛ Yesu ci ècikɔ yumɛ nɔ yɔ. 6 Vɔ sò je te keŋ ayi eju lɔ mɛ yí woanu ŋci èɖo awa nɔ eo.” 7 Enu lɔ jiŋ nɔ ŋsu ciwo yí zɔn koɖi keke wodegbesun ji yí xokɔ nuxu o. Woseseɛ egbe ɖeka vɔ wodekpɔkpɔ mɛɖe o. 8 Eyi Sɔlu so le nyigban, ŋkuviwo le te ni pɛɛ, vɔ detɛnŋ kpɔkpɔ ŋɖe o. Eyi taɖo wolé alɔ̀ ni yí kplɔɛ yi Damasi. 9 Degbekpɔ nu na nɔ ŋkeke amɛtɔn o, deɖu ŋɖe o yí denu eshi can o.
10 Enukplavi ɖeka le Damasi yí tɔ mɔ Ananiasi yí Axwetɔ lɔ yɔɛ le ŋtegannukpɔkpɔ mɛ mɔ: “Ananiasi!” Éɖo ŋci mɔ: “Enyɛ ke, Axwetɔ.” 11 Axwetɔ lɔ nu ni mɔ: “Sò yí ayi emɔ ci woyɔnɔ mɔ Emɔ Jɔjɔ ji, àkpɔ ŋsu ɖeka ci yí tɔ mɔ Sɔlu yí so Tarsi. Éle Ʒudasi xomɛ yí dokɔ gbe ɖaɖa. 12 Eyi ekpɔ ŋsu ɖeka ci yí tɔ mɔ Ananiasi le ŋtegannukpɔkpɔ ɖeka mɛ. Ŋsu lɔ sɔ yi lɔ̀wo da do ji keŋ nɔ agbetɔ enu kpɔkpɔ.” 13 Vɔ Ananiasi nu do nu mɔ: “Axwetɔ, ŋse enyɔ sugbɔ so ŋsu cɛ nu. Ŋse ŋciwo pleŋ ecu kpɔ koɖo ao mɛkɔkɔɛwo le Ʒerusalɛmu. 14 Éxɔ acɛ le avɔnsatɔwo gawo gbɔ hɛnnɛ keŋ alé* mɛ ciwo pleŋ yí yɔyɔ ao ŋkɔ le elɛ.” 15 Vɔ Axwetɔ lɔ nu ni mɔ: “Sò yi! Ðo ŋsu cɛ nyi edɔwanu ɖeka ci ŋcan nɔ aɖe kunu so anyi ŋkɔ nu nɔ jukɔnwo, efyɔwo koɖo Izraɛliviwo. 16 Ðo nadasɛ lé eɖo akpe fun sugbɔ do ta nɔ anyi ŋkɔ do ni.”
17 Eyi taɖo Ananiasi yi axwe lɔ mɛ yí sɔ yi lɔ̀wo sɔ da do ji yí nu mɔ: “Sɔlu, nɔvinyɛ, Axwetɔ Yesu ci yí dasɛ yiɖeki nɔ eo hwenu èle mɔ ji yí gbɔgbɔ yí dɔŋ ɖaɖa nɔ nàgbetɔ enu kpɔkpɔ yí aɖɔ koɖo gbɔngbɔn kɔkɔɛ.” 18 Eyi zeɖeka tɔntɔn ɔ, ŋɖekawo le shigbe kpavi kpa nɛ yí hlɛn so ŋkuviwo ji ni yí egbetɔ enu kpɔkpɔ; eyi eso je te yí woʒin do eshi mɛ. 19 Éɖu nu yí ŋsɛn ɖo lanmɛ ni.
Énɔ enukplavi lɔwo gbɔ le Damasi na nɔ ŋkeke ɖewo. 20 Eyi etɔ nuxu xoxo nɔ amɛwo so Yesu nu le Ʒuifuwo nukplaxuwo zeɖeka mɔ, eyi nyi Mawu Vi lɔ. 21 Vɔ ekpaca mɛ ciwo pleŋ yí ɖoɖoɔ to yi yí wonunuɔ mɔ: “De ŋsu cɛ yí tre fun nɔ mɛ ciwo yí yɔyɔ ŋkɔ cɛ le Ʒerusalɛmu ba? De va eva elɛ keŋ alé wo yí akplɔ* wo hɛn yi nɔ avɔnsatɔwo gawo ba?” 22 Vɔ Sɔlu wa ɖaŋ ɖeɖeɛ kunu doji nywiɖe. Kpeɖoji ciwo enana yí sɔ dredreɛ mɛ mɔ, Yesu yí nyi Kristo lɔ jiŋ nɔ Ʒuifu ciwo yí le Damasi.
23 Ci azanwo vayikɔɔ, Ʒuifuwo bla gbeju mɔ yewoawui. 24 Vɔ Sɔlu vanya mɔ wobla gbeju do ye nu. Eyi wonɔnɔ agbo lɔwo nu hɛnnɛ ezan koɖo kede yí trɔtrɔɛ mɔ yewoawui. 25 Eyi taɖo Sɔlu nukplaviwo kɔɛ do kishi ɖeka mɛ zanmɛ yí sɔ to flɛsɛ ɖeka tu yí ɖyiɖyi je nyigban.
26 Ci Sɔlu vaɖo Ʒerusalɛmu ɔ, éje agbla mɔ yeanɔ ju koɖo enukplavi ciwo yí le enɔ, vɔ wo pleŋ vɔnvɔn ni, ɖo wodekando ji mɔ yɛvatrɔ Yesu nukplavi o. 27 Eyi taɖo Barnabasi va kpedo nu yí kplɔɛ yi apotru lɔwo gbɔ yí dre lé ekpɔ Axwetɔ lɔ do le emɔ lɔ ji koɖo lé exo nuxu ni do nɔ wo hlɛnhlɛnhlɛn. Égbenu lé Sɔlu xo nuxu koɖo edɔngbegbe so Yesu ŋkɔ nu le Damasi nɔ wo. 28 Eyi enɔ wo gbɔ yí dannɔ to fishiafi le Ʒerusalɛmu fɛɛ yí xonɔ nuxu so Axwetɔ ŋkɔ lɔ nu koɖo edɔngbegbe. 29 Éxonɔ nuxu koɖo Ʒuifu ciwo yí donɔ Grɛkigbe yí dɔnnɔ nyɔ koɖo wo, vɔ wowo jijiɛ lé woawɛ keŋ awui swi. 30 Ci nɔvi lɔwo nya ahan ɔ, wokplɔɛ yi Sezare yí dɔɛ ɖaɖa Tarsi.
31 Eyi hamɛ ciwo pleŋ yí le Ʒude, Galile koɖo Samari kpɔ fafa. Wodo ŋsɛn wo, wosukɔgbɔ doji ci wokpɔtɔ yí vɔnvɔn nɔ Yehowa* yí gbɔngbɔn kɔkɔɛ lɔ can fafa akɔn nɔ wo.
32 Ci Piɛ totoɔ eju lɔwo pleŋ mɛɔ, éva amɛkɔkɔɛwo gbɔ le Lida hɛnnɛ. 33 Le enɔɔ, ékpɔ ŋsu ɖeka ci yí tɔ mɔ Ene ci yí ci ba ji so xwe amɛnyi ke, ɖo ékplibɔ. 34 Piɛ nu ni mɔ: “Ene, Yesu Kristo da edɔ̀ nɔ eo. Sò yí aŋwla ao ba.” Eyi eso zeɖeka kaka. 35 Ci mɛ ciwo pleŋ yí le Lida koɖo Sarɔn bali mɛ kpɔ Ene ɔ, woxɔ Axwetɔ lɔ ji se.
36 Enukplavi ɖeka le Ʒope yí tɔ mɔ Tabita ci gɔnmɛ yí nyi “Dɔkasi.”* Éwanɔ nunywi sugbɔ yí nanɔ nuwo amɛwo xomɛvutɔ. 37 Vɔ le ŋkeke ŋtɔ́wo mɛɔ, Dɔkasi ble yí ku. Eyi wole eshi ni yí sɔ da do exɔ ɖeka mɛ le shanŋ ji. 38 Lida dejinjin le Ʒope gbɔ o. Eyi taɖo ci enukplavi lɔwo se mɔ Piɛ le Lida ɔ, wodɔ ŋsu amɛve ɖaɖa yí wodo klo ni mɔ: “Mìɖe kuku, va mì gbɔ kaba.” 39 Piɛ so yí yi koɖo wo. Ci evaɖoɔ, wokplɔɛ yi shanŋ xɔ lɔ mɛ, eyi kposhuwo pleŋ va gbɔ yí le avin fankɔ yí dadasɛ awu koɖo awu lɛgbɛ* sugbɔ ciwo yí Dɔkasi wa hwenu ekpɔtɔ le agbe. 40 Yi goduɔ, Piɛ ɖe mɛshiamɛ ti. Éje klo ji yí do gbe ɖaɖa. Étrɔ kpanŋkɔ ecɔ lɔ yí nu mɔ: “Tabita, sò!” Eyi ehun ŋkuviwo. Ci ekpɔ Piɛ ɔ, éso yí nɔ nyinɔnɔ. 41 Piɛ le alɔ̀ ni yí fuin je te, eyi eyɔ amɛkɔkɔɛ lɔwo koɖo kposhu lɔwo yí wo pleŋ kpɔ Tabita yí ele agbe. 42 Enyɔ lɔ ɖyi le Ʒope ju lɔ pleŋ mɛ, eyi amɛ sugbɔ vaxɔ Axwetɔ lɔ ji se. 43 Piɛ ci Ʒope hwɛɖeka na nɔ ŋkeke ɖewo yí nɔ elangbazadɔwatɔ ɖeka ci woyɔnɔ mɔ Simɔ xwe mɛ.