Wema ci Woŋwlɛ aɖa Rɔmatɔwo
2 Eyi taɖo, Oo, eo mɛ ci yí ɖokɔ kojo nɔ amɛ, nɔ ègbenyi mɛɖekpokpui can ɔ, ao nyɔ dejɔ o; ci èɖokɔ kojo nɔ mɛbuɔ, èdokɔ hwɛ eoɖeki. Ðo eo ci yí le kojo ɖokɔ can wakɔ ŋɖekɛ lɔwo. 2 Vɔ mìnya mɔ nɔ Mawu ɖokɔ kojo nɔ mɛ ciwo yí wakɔ nɛnɛnuwoɔ, kojoɖoɖo yitɔ sɔnɔ koɖo nyɔnɔnwi lɔ.
3 Oo, eo ci yí mɔ yeɖokɔ kojo nɔ mɛ ciwo yí wakɔ nɛnɛnuwo gan yí eoŋtɔ wakɔ wo ɖe, èbukɔ mɔ Mawu kojoɖoɖo axla eo doa? 4 Alo ci dènya mɔ Mawu wa xomɛvu nɔ eo yí teteɛkpɔ mɔ yeakpedo eo nu nɔ nàtrɔ ji mɛ taɖo yí ègbalikɔ xomɛvu, xomɛfafa koɖo jigbɔnɖɛxɔxɔ yitɔa? 5 Vɔ ci èshin ŋta yí gbe mɔ yedatrɔ ji mɛɔ, Mawu adɔn to nɔ eo dandandan le dɔmɛzi zan yitɔ lɔ gbe hwenu ale kojo jɔjɔɛ ɖokɔ. 6 Eyi acu fɛn nɔ mɛɖekamɛɖeka sɔ koɖo edɔ ciwo ewa: 7 Ásɔ agbe mavɔ cu fɛn nɔ mɛ ciwo yí do ji yí le edɔ nywi wakɔ keŋ yí jijiɛ kanfukanfu, bubu koɖo agbe ci yí devɔnɔ o. 8 Vɔ mɛ ciwo yí aɖehwlɛnhwlɛn jɔnɔ ji nɔ yí wogbe tonu sese nɔ nyɔnɔnwi lɔ keŋ yí le enumajɔmajɔ wakɔɔ, áshin xomɛ yí ado dɔmɛzi do wo. 9 Enu agbɔnnu nɔ mɛɖekpokpui* ci yí le nuvɔn wakɔ yí ase gbazavi, anyi ahan nɔ Ʒuifuwo doŋkɔ yí avanyi ahan nɔ Grɛkitɔwo hɛnnɛ. 10 Vɔ kanfukanfu, bubu koɖo fafa anyi mɛɖekpokpui ci yí le enunywi wakɔ tɔ. Anyi ahan nɔ Ʒuifuwo doŋkɔ yí avanyi ahan nɔ Grɛkitɔwo hɛnnɛ. 11 Ðo Mawu detranɔ amɛ mɛ o.
12 Mɛ ciwo pleŋ shi ese ɖe dele o yí wole nuvɔn wakɔɔ, woaku ci ese ɖe deli yí ado hwɛ wo can. Vɔ mɛ ciwo pleŋ yí ese li nɔ yí wole nuvɔn wakɔɔ, ese lɔ aɖo kojo nɔ wo. 13 Ðo denyi mɛ ciwo yí ɖo to yí sekɔ ese lɔ yí nyi amɛjɔjɔɛwo le Mawu gbɔ o. Vɔ mɛ ciwo yí wakɔ do ese lɔ ji yí woayɔ mɔ amɛjɔjɔɛwo. 14 Ðo nɔ jukɔn bu mɛ tɔ ciwo shi ese dele wakɔ nu wowoŋtɔwo yí esɔnɔgbe koɖo ese lɔɔ, édasɛ mɔ wonyi ese nɔ wowoŋtɔwo ci ese dele wo shi can. 15 Mɛ cɛwo taŋtaŋ yí danasɛ mɔ woŋwlɛ ese lɔ nyɔwo do eji mɛ nɔ yewo yí wowo yexawo can le yi kunu ɖekɔ, wowoŋtɔwo susuwo donɔ hwɛ wo alo nunɔ ŋtɔkpu mɔ wowo nyɔ jɔ. 16 Enu cɛ ajɔ le ŋkeke ci ji yí Mawu ato Kristo Yesu ji yí aɖo kojo so enu ciwo agbetɔwo wanɔ le bebemɛ nu sɔgbe koɖo eŋɛnywi ci ŋdrakɔ.
17 Ecɛyɛ èyɔnɔ eoɖeki mɔ Ʒuifu yí ɖoŋ do ese lɔ nu yí le ego yikɔ mɔ yenyi Mawu tɔ, 18 èjeshi Mawu dro yí lɔn do enu ciwo yí nyɔ adodwimɛtɔ ji ɖo wokpla Ese lɔ eo, 19 èkando ji mɔ yedanasɛ emɔ nɔ mɛ ciwo yí nyi ŋkuvitɔnnɔwo yí nyi klɛnklɛn nɔ mɛ ciwo yí le vinvin mɛ, 20 ènunuɔ mɔ yegbenɔ nyɔ nɔ xlunɔwo yí kplanɔ nu ɖevihwɛwo, ɖo èjeshi nyɔnɔnwi vevi ciwo yí le Ese lɔ mɛ yí mɔŋje wo mɛ. 21 Eo ci yí kplakɔ nu mɛbuwo, dèkplanɔ nu eoɖeki ba? Eo ci yí nunɔ mɔ, “Ŋgbefi fi o,” eo yí le efi fikɔa? 22 Eo ci yí nunɔ mɔ, “Ŋgbewa hashi o,” eo yí le hashi wakɔa? Eo ci yí gbe ŋwa nɔ vojuwo, eo yí vayi le efi fikɔ le vojuxɔwo mɛa? 23 Eo ci yí sɔ Mawu se lɔ yikɔ go, eo yí dada le Ese lɔ ji yí sɔ gbalikɔ Mawu a? 24 Ðo shigbe lé woŋwli ɖɛ nɛɔ, “Míwo wanawo dɔ yí wonukɔ enyɔkpotuwo do Mawu ŋkɔ nu le jukɔnwo mɛ.”
25 Le nyɔnɔnwi mɛɔ, nɔ míwakɔ do ese lɔ ji gbɔxwe evososo míwotɔ anyi enuŋtɔŋtɔ. Vɔ nɔ mídewakɔ do ese lɔ jiɔ, ále shigbe mɔ mídeso vo kpɔ hannɛ. 26 Vɔ nɔ mɛ ci yí deso vo wanɔ do enyɔ ciwo Ese lɔ nu ji ɖe, Mawu dakpɔɛ do mɛ ci yí so vo ji ba? 27 Nɔ wokpla Ese lɔ eo yí èso vo gan yí dada le ese lɔ jiɔ, mɛ ci yí deso vo gan yí wawa do ese lɔ ji aɖo kojo nɔ eo. 28 Ðo denyi mɔ nɔ wonyi Ʒuifu le agogbe yí enyi wonyi Ʒuifu ŋtɔŋtɔ o yí denyi evososo le gbaza mɛ yí nyi evososo ŋtɔŋtɔ hɛnnɛ o. 29 Vɔ mɛ ci yí nyi Ʒuifu le ji mɛ yí nyi Ʒuifu ŋtɔŋtɔ yí evososo yitɔ nyi eji mɛ vososo to gbɔngbɔn kɔkɔɛ lɔ ji, denyi to ese ci woŋwlɛ ɖɛ ji o. Mawu gbɔ yí kanfukanfu yitɔ sonɔ, vɔ desonɔ agbetɔwo gbɔ o.