Wema Ŋkɔtɔ ci Woŋwlɛ Ðaɖa Korɛntitɔwo

14 Mído afɔ nɔ lɔnlɔn gan yí akpɔtɔ adodoɔ gbla veviɖe nɔ gbɔngbɔn mɛ nunanawo xɔxɔ;* vɔ vevitɔ lɔɔ, míadodoɔ gbla nɔ enyɔnunuɖɛ nunana xɔxɔ. 2 Mɛ ci yí le nuxu xokɔ yí dodoɔ egbe buɔ, Mawu exoxoɔ nuxu nɔ yí denyi agbetɔwo exoxoɔ nuxu nɔ o. Mɛɖe demɔnɔŋje enyɔ ci enukɔ mɛ o, ɖo enyɔwlawla kɔkɔɛwo yí enukɔ to gbɔngbɔn lɔ ji. 3 Vɔ mɛ ci yí nunɔ nyɔ ɖɛ donɔ ŋsɛn amɛ yí nanɔ edɔngbegbe amɛ yí gbefanɔ akɔn nɔ amɛwo to yi nuxuwo ji. 4 Mɛ ci yí xoxoɔ nuxu do egbe bu mɛ yɛdonɔ ŋsɛn yiɖeki, vɔ mɛ ci yí nunuɔ nyɔ ɖɛ donɔ ŋsɛn hamɛ lɔ. 5 Naji sa mɔ mí pleŋ axonɔ nuxu do egbe buwo mɛ, vɔ ŋji mɔ míwo le nunɔ nyɔ ɖɛ. Le nyɔnɔnwi mɛɔ, nɔ mɛ ci yí xoxoɔ nuxu do egbe buwo mɛ deɖe nyɔ lɔwo gɔnmɛ keŋ asɔ do ŋsɛn hamɛ lɔɔ, mɛ ci yí nunɔ nyɔ ɖɛ tɔ nyɔ wui. 6 Vɔ ecɛyɛ ɖe, nɔviwo, nɔ ŋdodoɔ egbe buwo yí sɔ xoxoɔ nuxu nɔ mí ɖe, enywi ci ŋwakɔ nɔ míɔ? Nɔ ŋdadasɛ enu ciwo yí so Mawu gbɔ nɔ mí alo yí na mímɔŋje nu mɛ alo yí nunuɔ nyɔ ɖɛ alo yí kplakpla nu mí le anyi nuxuwo mɛ ɖe, danyɔ wu ba?

7 Ahanke ele le enu ciwo mɛ agbe dele yí woɖyinɔ gbe kpaxwe hɛnnɛ nɛ, etɛnŋ nyi ekpɛn alo giŋta.* Nɔ evototo dele egbeɖyiɖyi lɔwo mɛ ɖe, lé woawɛ anya egbe ci dokɔ ekpɛn alo giŋta lɔ leɔ? 8 Ðo nɔ ekpɛn deɖyi gbe nywiɖe ɖe, mi yí adra do yí ale gbesɔsɔ ɖɛ nɔ ahwaɔ? 9 Ahanke míwo can, nɔ mídewa ɖaŋ yí xo nuxu yí yi gɔnmɛsese le fafɛɖe ɖe, mi yí atɛnŋ anya nuxu ci xokɔ míleɔ? Le nyɔnɔnwi mɛɔ, ányi nuxuxoxo do hahamɛ. 10 Egbe hamɛhamɛwo sugbɔ le xexe lɔ mɛ, vɔ ɖekɛ deli ci nu gɔnmɛsese dele o. 11 Ðo nɔ ŋdese enyɔ ci wonukɔ gɔnmɛɔ, anyi ŋvatrɔ mɛdru nɔ mɛ ci yí le nuxu lɔ xokɔ yí mɛ ci yí le nuxu lɔ xokɔ can nyi mɛdru nɔŋ. 12 Eyi taɖo míwo can, ci míjijiɛ veviɖe mɔ yewoaxɔ gbɔngbɔn mɛ nunanawoɔ, mítekpɔ axɔ enunana sugbɔ ciwo ado ŋsɛn hamɛ lɔ.

13 Ci ele ahan ɔ, mɛ ci yí dodoɔ egbe bu le do gbe ɖaɖa keŋ atɛnŋ aɖe gɔnmɛ ni. 14 Ðo nɔ ŋdokɔ gbe ɖaɖa le egbe bu mɛɔ, gbɔngbɔn nunana ci ŋxɔ yí dokɔ gbe lɔ ɖaɖa, vɔ anyi susu yɛdegbewakɔ edɔ ɖe o. 15 Ci ele ahan ɖe, nyi ŋɖo awaɔ? Nasɔ gbɔngbɔn nunana lɔ do gbe ɖaɖa yí agbesɔ anyi susu can do gbe ɖaɖa. Nasɔ gbɔngbɔn nunana lɔ ji kanfukanfu ha yí agbesɔ anyi susu ji kanfukanfu ha hɛnnɛ. 16 Nɔ denyi ahan o yí èsɔ gbɔngbɔn nunana lɔ nukɔ kanfukanfu nyɔwo ɖe, lé amɛgbali ci yí le mí mɛ awɛ anu “Amɛn” nɔ akpe ciwo èdokɔ ci denya enyɔ ci nukɔ èleɔ? 17 Nyɔnɔnwi yɔ, èdokɔ akpewo pɛɛ, vɔ dedokɔ ŋsɛn amɛ ɖetɔ lɔ o. 18 Ŋdo akpe nɔ Mawu mɔ ŋxonɔ nuxu do egbe sugbɔ mɛ sɔwu mí pleŋ. 19 Ele ahan gan, ŋji mɔ mazan anyi susu* asɔ nu enyɔ amatɔn keŋ asɔ kpla nu mɛbuwo le hamɛ lɔ mɛ hɛnnɛ, sɔwu mɔ manu enyɔ kotokun amɛwo do egbe bu mɛ.

20 Nɔviwo, míŋgbenyi vihwɛwo le enugɔnmɛsese mɛ o, vɔ mínyi vihwɛwo le enudɔndɔnwawa mɛ yí ashin keŋkeŋ le enugɔnmɛsese mɛ. 21 Woŋwlɛ do Ese lɔ mɛ mɔ: “Yehowa* nu mɔ, ‘Nazan mɛdruwo ɖewo koɖo eju bu mɛ tɔwo nukpawo yí asɔ xo nuxu nɔ jukɔn cɛ, gan yí woagbe mɔ yewodaɖo toŋ o.’” 22 Eyi taɖo egbe buwo dodo denyi enujiŋ nɔ xɔsetɔwo o, vɔ maxɔsetɔwo enyi enujiŋ nɔ; ahanke yí denyi maxɔsetɔwo yí wonu nyɔ ɖɛ nɔ o, vɔ xɔsetɔwo yí wonu nyɔ ɖɛ nɔ. 23 Nɔ hamɛ lɔ pleŋ vabɔ do fiɖeka yí mɛshiamɛ xoxoɔ nuxu do egbe buwo mɛ yí amɛgbaliwo alo maxɔsetɔwo va enɔtɔxu lɔ ɖe, wodamɔ suku míjekɔ ba? 24 Vɔ nɔ míwo pleŋ mínukɔ nyɔ ɖɛ yí maxɔsetɔ alo amɛgbali ɖe va mí mɛɔ, míwo nyɔ ciwo pleŋ eseseɛ lɔwo ana yí akpɔ mɔ yele afɛn mɛ, eyi awa ɖaŋ ayi yiɖeki mɛ kpɔ nywiɖe. 25 Enu ciwo yí wla do yi ji mɛ avaze gbajɛɛ, keke asɔ ŋmɛ cɔn anyi yí asɛn Mawu yí anu mɔ: “Mawu le koɖo mí nyao.”

26 Ecɛyɛ ɖe, nɔviwo, nyi míɖo awaɔ? Nɔ mívabɔ dojuɔ, mɛɖe ajijiɛ kanfukanfu hawo nɔ Mawu, mɛbu akplakpla nu amɛ, mɛbu anunuɔ enu ciwo Mawu dasɛ ni, mɛbu adodoɔ egbe bu yí mɛbu aɖeɖeɛ gɔnmɛ ni yí adredreɛ mɛ. Míɖo awa enuwo pleŋ keŋ asɔ do ŋsɛn hamɛ lɔ. 27 Nɔ mɛɖewo jikɔ axo nuxu do egbe buwo mɛɔ, le sɛn amɛ amɛve ji alo nɔ awugan ɖoɖuɔ, wo le nyi amɛtɔn, woaxoxoɔ nuxu lɔwo ɖekaɖeka keŋ nɔ mɛbu aɖekɔ gɔnmɛ nɔ wo. 28 Vɔ nɔ amɛ deli yí aɖe egbe gɔnmɛ nɔ mɛɖeɔ, mɛ lɔ le bɔ nu le hamɛ lɔ mɛ keŋ axo nuxu nɔ yiŋtɔ koɖo Mawu. 29 Enyɔnuɖɛtɔ amɛve alo amɛtɔn le xo nuxu yí mɛkpɛtɛwo atekpɔ ase nyɔ lɔwo gɔnmɛ. 30 Nɔ míle nyinɔnɔ le bɔbɔ yí Mawu dasɛ ŋɖe nɔ mɛɖeɔ, amɛ ŋkɔtɔ ci yí le nuxu xokɔ le bɔ nu. 31 Míatɛnŋ anu nyɔ ɖɛ ɖekaɖeka keŋ nɔ mɛshiamɛ atɛnŋ akpla ŋɖe yí axɔ ŋsɛndoamu. 32 Enyɔnuɖɛtɔwo le wa ɖaŋ azan gbɔngbɔn nunana ci woxɔ lɔ. 33 Ðo Mawu denyi hannyahannya Mawu o, vɔ fafa Mawu yí enyi.

Eyi shigbe lé ele le amɛkɔkɔɛwo hamɛwo pleŋ mɛ nɛɔ, 34 nyɔnuwo le bɔ nu le hamɛ lɔwo mɛ, ɖo wodena gbe wo mɔ wo le xo nuxu o, vɔ wo le bubɔ wowoɖekiwo shigbe lé Ese lɔ can nui do nɛ. 35 Nɔ nyɔnuwo demɔŋje ŋɖe mɛɔ, wo le biɔ wowo suwo se le axwe mɛ, ɖo ŋkpɛn anyi nɔ nyɔnu mɔ axo nuxu le hamɛ lɔ mɛ.

36 Míwo gbɔ yí Mawu nyɔ lɔ so doŋkɔa alo míwoɖekɛwo yí xɔɛa?

37 Nɔ mɛɖe bukɔ mɔ yenyi enyɔnuɖɛtɔ alo yexɔ gbɔngbɔn lɔ nunanaɔ, éɖo anya mɔ Axwetɔ lɔ sewo yí nyi enu cɛwo ciwo yí ŋŋwlɛkɔ ɖaɖa mí. 38 Vɔ mɛɖekpokpui ci yí agbali enyɔ cɛɔ, woagbali yɛ can.* 39 Eyi taɖo nɔvinyɛwo, míkpɔtɔ ajijiɛ veviɖe mɔ yewoanukɔ enyɔ ɖɛ yí míŋgbedo se mɔ woŋgbexo nuxu do egbe buwo mɛ o. 40 Vɔ míwa enuwo pleŋ nywiɖe yí awa wo do totonu.