Wema Ŋkɔtɔ ci Woŋwlɛ Ðaɖa Korɛntitɔwo
16 Ecɛyɛɔ, kuso eho ciwo woasɔ ɖaɖa amɛkɔkɔɛwo nuɔ, míwa do emɔdasɛnamɛ ciwo ŋna hamɛ ciwo yí le Galati ji. 2 Le ŋkeke ŋkɔtɔ ji nɔ kwɛshila ɖekpokpuiɔ, mɛɖekaɖeka ɖo asɔ ŋɖe do akpo ɖɛ sɔgbe koɖo ŋci yí le shi keŋ nɔ ŋgbevanyi hwenu nava yí míale eho lɔwo jɔkɔ o. 3 Vɔ nɔ ŋva nɔɔ, ŋsu ciwo míkanfu do wema ciwo míŋwlɛ ɖaɖa mɛ mɔ wonyi mɛ ciwo ji woatɛnŋ akando yí nadɔ ɖaɖa keŋ nɔ woasɔ xomɛvu nunana lɔwo yi Ʒerusalɛmu. 4 Nɔ anyɔ mɔ nyɛ can nayi nɔ hɛnnɛɔ, mìabɔ ayi.
5 Vɔ nava mí gbɔ nɔ ŋso le Maseduani, ɖo Maseduani ŋjikɔ ato. 6 Eyi taŋfuin nanɔ mí gbɔ hwɛɖeka alo ŋtɛnŋ ci mí gbɔ le vuvɔ hwenu lɔ ŋtɔkpu keŋ nɔ ŋjikɔ aso yí agbekpe fini nayiɔ, míavayi ɖoŋ hwɛɖeka. 7 Ŋdeji mɔ mato mí gbɔ kakayɛ yí agbeɖedo ahan kpoŋ o, ɖo ŋkpɔkɔ emɔ mɔ nɔ edro Yehowa* ɔ, nanɔ mí gbɔ hwɛɖeka. 8 Vɔ nanɔ Efezi keke aje Pantekoti xweɖuɖu lɔ hwenu, 9 ɖo ehɔn gangan ɖeka hun nɔŋ yí nawa kunuɖeɖedɔ lɔ doji, vɔ ketɔnɔwo sugbɔ.
10 Nɔ Timɔte vaɖoɔ, míwɛ keke nɔ ŋɖe ŋgbedo vɔnvɔn ni le mí mɛ o, ɖo Yehowa* dɔ wakɔ yí ele shigbe nyɛ can nɛ. 11 Eyi taɖo mɛɖe ŋgbegbali o. Míɖui ɖaɖa le fafa mɛ keŋ nɔ atɛnŋ ava ŋgbɔ, ɖo ŋle te kpɔɛ koɖo nɔviwo.
12 Kuso mìwo nɔvi Apolosu nuɔ, ŋdo ŋsɛn yi veviɖe mɔ yɛ le va mí gbɔ koɖo nɔvi lɔwo, gan hunnɔ vava dedrui hɔɖo o, vɔ nɔ emɔ lɔ vahun niɔ, áva.
13 Mínɔ zanŋte, mílo do gogwiɖe le xɔse lɔ mɛ, mígbe dɔn,* mído ŋsɛn. 14 Ŋɖekpokpui ci míawaɔ, míwɛ koɖo lɔnlɔn.
15 Nɔviwo, mínya mɔ mɛ ciwo yí le Sitefanasi xwe mɛ yí nyi amɛ ŋkɔtɔ ciwo yí trɔ xɔsetɔwo* le Akayi. Wogbekpenɔdo amɛkɔkɔɛwo nu haan. 16 Ŋdokɔ ŋsɛn mí mɔ, míwo can míakpɔtɔ asɔ míwoɖekiwo hwehweɛ nɔ mɛ cɛ hanciwo koɖo mɛ ciwo yí do ŋsɛn yí le edɔ wakɔ koɖo wo alɔlealɔ mɛ. 17 Vɔ ejɔ ji nɔŋ mɔ Sitefanasi, Fɔtunatusi koɖo Akayikusu le elɛ koɖoŋ; ɖo ci mídele lɛɔ, wole edɔ wakɔ do dumɛ nɔ mí. 18 Wofa akɔn nɔŋ yí gbefa akɔn nɔ míwo can. Eyi taɖo mɛ cɛ hanciwo nu le jenɔŋ nɔ mí.
19 Hamɛ ciwo le Azi do gbe ɖaɖa mí. Akilasi koɖo Priska sɔ kpe nɔ hamɛ ci yí le wowo xwe mɛ do gbe ɖaɖa mí so ji mɛ le Axwetɔ lɔ mɛ. 20 Nɔviwo pleŋ do gbe ɖaɖa mí. Mísɔ lɔnlɔn ki shi* nɔ míwonɔnɔwo yí ado gbe nɔ míwonɔnɔwo.
21 Enyɛ Pɔlu, ŋdo gbe ɖaɖa mí, nyɛŋtɔ yí ŋwlɛ egbedonamɛ cɛ yɛ.
22 Mɛɖekpokpui ci yí dalɔn Axwetɔ lɔɔ, wo le sɛn kpɛn ni. Oo, mìwo Xwetɔ, va! 23 Axwetɔ Yesu le wa xomɛvu gangan nɔ mí. 24 Anyi lɔnlɔn le nɔ koɖo mí pleŋ le Kristo Yesu mɛ.