Wema Amɛvetɔ ci Woŋwlɛ Ðaɖa Korɛntitɔwo

13 Zetɔntɔ lɔ ke ŋgbɔgbɔ mí gbɔ. “Ele mɔ amɛ amɛve alo amɛtɔn aɖe kunu so nyɔ ɖe nu gbɔxwe woakando ji.” 2 Ci ŋdele mí gbɔ yɛ can ɔ, ele shigbe mɔ ŋva mí gbɔ zevetɔ nɛ. Eyi ŋɖoɖoɔ afɔ afɔta nɔ mɛ ciwo yí wa nuvɔn vayi koɖo mɛkpɛtɛwo pleŋ mɔ nɔ ŋgbevavaɔ, ŋdaku ŋshishi nɔ wo o. 3 Ðo míjijiɛ mɔ yewoakpɔ mɔ Kristo lɔ yí xoxoɔ nuxu to nyɛ ji nyao ma. Kristo denyi amɛklekli le enu ciwo ewanɔ ɖaɖa mí gbɔ mɛ o, vɔ ŋsɛntɔnɔ enyi le mí mɛ. 4 Ðo le nyɔnɔnwi mɛɔ, wokin do aci nu ci egbɔjɔ, vɔ éle agbe to Mawu ŋsɛn ji. Nyɔnɔnwi yɔ, mìwo can mìgbɔjɔ koɖi, vɔ mìanɔ agbe koɖi to Mawu ŋsɛn ci edasɛ nɔ mí ji.

5 Míkpɔtɔ adodoɔ míwoɖekiwo kpɔ akpɔ mɔ míle xɔse lɔ mɛ ma; míkpɔtɔ adodoɔ míwoɖekiwo kpɔ yí akpɔ mɔ mi yí mínyi ma. Alo mídenya mɔ Yesu Kristo le koɖo mí ba? Nɔ denyi ahan ɔ, anyi wogbe mí yɔ. 6 Le nyɔnɔnwi mɛɔ, ŋkpɔkɔ emɔ mɔ míavakpɔɛ mɔ mìwo denyi mɛ ciwo wogbe o.

7 Ecɛyɛɔ, mìbiɔbiɔ Mawu mɔ míŋgbewa enudɔndɔn ɖe o, denyi mɔ nɔ amɛwo akpɔɛ mɔ mìwo nu kpe ni yɔ o, vɔ nɔ míatɛnŋ awa enu ci yí nyɔ nɔ amɛwo kpɔkpɔɛ mɔ mìwo nu dekpe ni can. 8 Ðo mìdatɛnŋ awa ŋɖekpokpui ci yí atrɔkpe nyɔnɔnwi lɔ o, vɔ enu ci yí asɔgbe koɖo nyɔnɔnwi lɔ ɖekɛ yí mìawa. 9 Nyɔnɔnwi yɔ, nɔ mìwo gbɔjɔ gan yí míwo ɖo ŋsɛn ɔ, ejɔnɔ ji nɔ mì; eyi mìdodoɔ gbe ɖaɖa nɔ woadra mí do. 10 Eyi taɖo ŋŋwlɛkɔ enu cɛwo ɖaɖa mí ci ŋdele mí gbɔ o, keŋ nɔ ŋvava mí gbɔɔ, nyɛŋgbesɔ xomɛveve azan acɛ ci Axwetɔ lɔ sɔ naŋ o, vɔ nɔ matɛnŋ azin asɔ do ŋsɛn amɛ yí ŋdasɔ dahɛn nu o.

11 Le vɔvɔnuɔ, nɔviwo, míkpɔtɔ akpɔkɔ jijɔ, mílɔn nɔ woadranɔ mí do, nɔ woafanɔ akɔn nɔ mí, míɖonɔ susu ɖekɛ ŋmɛ, mínɔ fafa mɛ. Eyi lɔnlɔn koɖo fafa Mawu lɔ anɔ koɖo mí. 12 Mísɔ lɔnlɔn ki shi* nɔ míwonɔnɔwo. 13 Amɛkɔkɔɛwo pleŋ do gbe ɖaɖa mí.

14 Xomɛvu gangan Axwetɔ Yesu Kristo tɔ koɖo lɔnlɔn Mawu tɔ sɔ kpe nɔ gbɔngbɔn kɔkɔɛ ci ena mì le nɔ koɖo mí pleŋ.