Wema Amɛvetɔ ci Woŋwlɛ Ðaɖa Timɔte
2 Eyi taɖo vinyɛ, kpɔ̀tɔ aɖoɖoɔ ŋsɛn to xomɛvu gangan ci Kristo Yesu wanɔ ji. 2 Eyi enyɔ ciwo èse le ŋgbɔ yí kunuɖetɔ sugbɔ lɔn do wo jiɔ, kplà enyɔ lɔwo ŋsu egbejinɔtɔwo keŋ nɔ wowo can avasun ji yí akpla mɛbuwo nywiɖe. 3 Ci ènyi Kristo Yesu sɔja nywiɔ, lɔn faa yí akpe fun le cukaɖawo mɛ. 4 Mɛ ci yí nyi sɔja yí ji mɔ ye nu le kpe nɔ mɛ ci yí xɔ ye do sɔjadɔ lɔ mɛ degbevayi donɔ ta ajɔdodo nyɔwo* mɛ o. 5 Ahanke nɔ mɛɖe le ehwlɛn wakɔ le kanmɛtete mɛ yí dewa do ehwlɛnwawa se lɔwo jiɔ, daxɔ ejiɖuɖukuku lɔ o. 6 Glɛshinɔ ci yí wa dɔ sɛnsinɖe yí ɖo anyi amɛ ŋkɔtɔ ci yí aɖu jinuku ci edo. 7 Bùnɔ tamɛ kpɔ so enyɔ ciwo yí ŋnunuɔ nu gashiagamɛ, Axwetɔ lɔ ana yí àmɔŋje enuwo pleŋ mɛ.*
8 Ðò ŋwi mɔ, sɔgbe koɖo eŋɛnywi ci ŋdrakɔɔ, wofɔn Yesu Kristo so amɛkukuwo mɛ yí egbeso Davidi kannu mɛ. 9 Eŋɛnywi cɛ tamɛ yí ŋɖukɔ aya do yí woléŋ do gakpa mɛ shigbe danuwatɔ ŋnyi nɛ. Éle ahan gan, wodedo ga Mawu nyɔ lɔ yɛ o. 10 Ecɛ yí dɔ taɖo ŋkpɔtɔ dodoɔ ji le enuwo pleŋ mɛ do amɛcancanwo ŋci keŋ nɔ wowo can atɛnŋ akpɔ hwlɛngan to Kristo Yesu ji yí agbexɔ kanfukanfu mavɔ. 11 Nyɔnɔnwi yí enyɔ cɛ nyi: Kankandoji li mɔ nɔ mìku koɖiɔ, mìanɔ agbe koɖi hɛnnɛ. 12 Nɔ mìkpɔtɔ yí dodoɔ jiɔ, mìaɖu fyɔ koɖi hɛnnɛ; nɔ mìgbiɔ, yɛ can agbe mì. 13 Nɔ mìdenɔ gbejiɔ, yɛakpɔtɔ anɔkɔ gbeji, ɖo datɛnŋ agbe yiɖeki o.
14 Kpɔ̀tɔ aɖoɖoɔ ŋwi enu cɛwo nɔ wo, kplànɔ enu wo* le Mawu ŋmɛ mɔ woŋgbewanɔ vu do nyɔgbewo ji o, ele ɖekpokpui dele mɛ o, ɖo édanahɛn nu le mɛ ciwo yí sisiɛ nu.* 15 Wà enu ciwo pleŋ ji èkpe yí adasɛ mɔ yenyi mɛ ci nu yí kpenɔ nɔ Mawu, edɔwatɔ ci ŋkpɛn dewanɔ ɖeeɖe o, mɛ ci yí wa ɖaŋ drenɔ nyɔnɔnwi lɔ mɛ nywiɖe. 16 Vɔ, gbè enyɔgbali ciwo yí xonɔ ɖyi enukɔkɔɛwo, ɖo woadɔ yí bubumaɖo nɔ Mawu asɛnsɛnŋ doji. 17 Eyi mɛ ciwo yí nunɔ enyɔ lɔwo nyɔwo kakanɔ shigbe jemakwi nɛ. Imene koɖo Filetosi can le mɛ lɔwo mɛ. 18 Mɛ cɛwo klan gbeɖe nyɔnɔnwi lɔ ɖɛ yí nunuɔ mɔ wofɔn amɛwo so ku vɔ, eyi wodadahɛn xɔse nɔ mɛɖewo. 19 Ci ele ahan can ɔ, gɔnmɛɖokpe sɛnŋsɛnŋ Mawu tɔ lɔ kpɔtɔ le te goŋgoŋ yí woŋwlɛ do ji mɔ, “Yehowa* jeshi mɛ ciwo yí nyi yitɔ,” eyi “Mɛɖekpokpui ci yí yɔyɔ Yehowa* ŋkɔ le gbe enumajɔmajɔwawa.”
20 Le axwe gangan ɖe mɛɔ, denyi enu* ciwo yí wosɔ shika koɖo egacuho wa ɖekɛwo yí nini o, vɔ enu ciwo yí wosɔ aci koɖo esu wa nini hɛnnɛ yí wozannɔ ɖewo nɔ enujɔnuwo yí zannɔ ɖewo nɔ enu ciwo yí dele veviɖe o. 21 Eyi taɖo, nɔ mɛɖekpokpui nɔ azɔge nɔ enu ciwo wozannɔ nɔ enu ciwo yí dele veviɖeɔ, ányi edɔwanu* ci woazannɔ nɔ enujɔnu, ále mɛmiɖe, ányi ele nɔ mɛ ci tɔ enyi yí woadrɛ do ɖɛ nɔ edɔ nywi ɖekpokpui wawa. 22 Shì nɔ jajɛ mɛ drowo, vɔ dò afɔ nɔ enujɔjɔɛwawa, xɔse, lɔnlɔn, fafa koɖo mɛ ciwo yí sɔ eji mɛmi yɔnɔ Axwetɔ lɔ.
23 Gbè suku koɖo exlu ɖyikadodowo hɛnnɛ yí anya mɔ evu yí wohɛnnɔ vɛ. 24 Ðo Axwetɔ dɔwavi deɖo awa evu o, vɔ éɖo afanɔ xomɛ do amɛwo pleŋ yí asun ji akplanɔ nu amɛ yí alenɔ yiɖeki domɛ nɔ woje agɔ di, 25 ákplanɔ nu mɛ ciwo yí nyi egufɔntɔwo koɖo fafa, taŋfuin Mawu awɛ yí woatrɔ ji mɛ* yí awa ɖaŋ amɔŋje nyɔnɔnwi lɔ mɛ, 26 eyi woakpɔ mɔ Legba lé yewo agbuagbu nɔ yewoawa yi dro yí woanyɔ le wowoɖekiwo mɛ keŋ ato le yi fɛnca mɛ.