Apotruwo Dɔwawawo
10 Ŋsu ɖeka le Sezare yí tɔ mɔ Kɔnɛyi. Ényi sɔjawo ga* ci yí kpa nɔ ahwakɔn ɖeka ci woyɔnɔ mɔ Itali hwakɔn.* 2 Ŋsu ɖeka enyi yí sɛnnɔ Mawu yí yɛ koɖo yi xomu lɔ pleŋ vɔnnɔ nɔ Mawu. Énanɔ enu sugbɔ amɛwo xomɛvutɔ yí gbedonɔ gbe ɖaɖa gashiagamɛ. 3 Le wetrɔ gatɔ̀n mɛ han ɔ,* ékpɔ mawudɔla ɖeka le ŋtegannukpɔkpɔ mɛ yí eva gbɔ yí yɔɛ mɔ: “Kɔnɛyi!” 4 Kɔnɛyi cu ŋkuviwo do ji yí vɔn yí biɔ se mɔ: “Axwetɔ, nyi yɔɔ?” Mawudɔla lɔ nu ni mɔ: “Mawu se ao gbedoɖawo yí ɖo ŋwi xomɛvunu ciwo yí ènanɔ amɛwo. 5 Eyi taɖo, dɔ̀ amɛwo ɖaɖa Ʒope nɔ woayɔ ŋsu ɖeka ci yí tɔ mɔ Simɔ ci woyɔnɔ mɔ Piɛ vɛ nɔ eo. 6 Ŋsu cɛ ze* elangbazadɔwatɔ ɖeka ci woyɔnɔ mɔ Simɔ gbɔ, yi xwe le axu tu.” 7 Ci mawudɔla ci yí xo nuxu koɖi so zeɖekaɔ, éyɔ yi dɔwavi amɛve koɖo yi sɔja ciwo yí bɔnɔ do nu ɖeka. Sɔja cɛ sɛnnɔ Mawu. 8 Énu ŋciwo pleŋ yí jɔ lɔ nɔ wo yí ɖo wo ɖaɖa Ʒope.
9 Yi ŋkegbu ci woyikɔ le emɔ lɔ ji yí gogokɔ eju lɔɔ, Piɛ yi exɔ tamɛ le gawive mɛ han* keŋ ado gbe ɖaɖa. 10 Vɔ shive ci sugbɔ yí eji mɔ yeaɖu nu. Hwenu wole enu lɔ ɖakɔɔ, ékpɔ ŋtegannu ɖeka. 11 Ékpɔ jeŋkwi hun yí ŋɖeka le shigbe lɛnvɔn gangan ɖeka nɛ yí wolé zogui amɛnɛ lɔwo ni yí ɖyiɖyikɔ ɖaɖa nyigban. 12 . Eyi elan afɔ amɛnɛ hamɛhamɛwo pleŋ, elan ciwo pleŋ yí sanɔ koɖo ciwo pleŋ yí tanɔ to nyigban koɖo xeviwo pleŋ le mɛ. 13 Eyi egbe ɖeka nu ni mɔ: “Sò awu lan keŋ aɖu.” 14 Vɔ Piɛ nu mɔ: “Axwetɔ, gbeɖe! Ðo ŋdeɖu enuxoɖyixoɖyi koɖo enumakɔmakɔ ɖe kpɔ o.” 15 Egbe lɔ gbenu ni zevetɔ mɔ: “Mi ŋciwo Mawu sɔ wa enukɔkɔɛ yɔyɔ mɔ enuxoɖyixoɖyi.” 16 Egbe lɔ gbenu ahan ni zetɔntɔ; eyi zeɖeka tɔntɔn ɔ, wosɔ enu lɔ yi jeŋkwi mɛ.
17 Piɛ dan ta nɔ yiɖeki yí demɔ dwi nɔ ŋtegannu ci ekpɔ lɔ o. Hwenɔnu pɛɛ yí ŋsu ciwo yí Kɔnɛyi dɔ ɖaɖa biɔ tamɛ se nɔ Simɔ xwe yí va le te le agbo lɔ ji. 18 Wodo axwa yí biɔ se mɔ elɛtɔxu yí Piɛ ci woyɔnɔ mɔ Simɔ ze ma. 19 Ci Piɛ kpɔtɔ bubuɔ tamɛ kpɔ so ŋtegannu ci ekpɔ lɔ nuɔ, gbɔngbɔn kɔkɔɛ nu ni mɔ: “Kpɔ ɖa! Ŋsu amɛtɔn ɖekawo jijiɛ eo. 20 Eyi taɖo, sò keŋ aɖyi ayi koɖo wo, ŋgbexo nu kpɔ ɖeeɖe o, ɖo enyɛ yí dɔ wo ɖaɖa.” 21 Eyi Piɛ ɖyi va ŋsu lɔwo gbɔ yí nu mɔ: “Enyɛ ci míjijiɛ lɔ ke, nyi yí hɛn mí vɛɔ?” 22 Wonu mɔ: “Kɔnɛyi, sɔjawo ga ɖeka ci yí nyi amɛjɔjɔɛ yí vɔnnɔ nɔ Mawu yí Ʒuifuwo pleŋ xonɔ nuxu nywi so nu yí dɔ mì ɖaɖa. Mawu to mawudɔla ɖeka ji yí nu ni mɔ, yɛ le dɔ amɛ ɖaɖa eo nɔ nàva yi xomɛ keŋ nɔ ase enyɔ ci yí le eo shi.” 23 Eyi Piɛ nu nɔ wo mɔ, wo le ɖo axwe lɔ mɛ yí exɔ wo mɛdru.
Ci eŋ keɔ, éso yí yi koɖo wo yí Ʒope nɔvi ɖewo can yi koɖi. 24 Yi ŋkegbuɔ, évaɖo Sezare, Kɔnɛyi can le te kpɔ wo. Éyɔ yi mɛwo koɖo yi xlɔ veviwo bɔ. 25 Ci Piɛ ɖo axwe lɔ mɛɔ, Kɔnɛyi do go yi yí je klo ji do afɔ gbɔ ni yí na bubu yi.* 26 Vɔ Piɛ fuin tɔ te yí nu mɔ: “Sò, ɖo agbetɔ nyɛ can ŋnyi.” 27 Ci ekankɔ seŋ koɖi yí ɖo axwe lɔ mɛɔ, ékpɔ amɛ sugbɔ bɔ do enɔ. 28 Énu nɔ wo mɔ: “Mínya nywiɖe mɔ desɔgbe mɔ Ʒuifu ado gbɛ koɖo jukɔn bu mɛ tɔ alo ava gbɔ o, gan Mawu dasɛ nɔŋ mɔ ŋdeɖo ayɔ mɛɖe mɔ amɛxoɖyixoɖyi alo amɛmakɔmakɔ o. 29 Eyi taɖo ci èdɔ amɛ ɖaɖaŋ ɔ, ŋdegbe o, ŋva. Ecɛyɛɔ, ŋji mɔ nanya ŋci yí taɖo èdɔ amɛ ɖaɖaŋ.”
30 Eyi Kɔnɛyi nu mɔ: “Egbɛ yí nyi ŋkeke amɛnɛ yí ŋdokɔ gbe ɖaɖa le anyi xomɛ hweyɛhannu do wetrɔ gatɔ̀n mɛ han;* eyi zeɖeka tɔntɔn ɔ, ŋsu ɖeka vanɔ te le ŋkɔ nɔŋ yí yi wu dada zo. 31 Ŋsu lɔ nu mɔ: ‘Kɔnɛyi, Mawu se ao gbedoɖa yí ɖo ŋwi xomɛvunu ciwo yí ènanɔ amɛwo. 32 Eyi taɖo, dɔ̀ amɛwo ɖaɖa Ʒope nɔ woayɔ ŋsu ɖeka ci yí tɔ mɔ Simɔ ci woyɔnɔ mɔ Piɛ vɛ nɔ eo. Ŋsu cɛ ze elangbazadɔwatɔ ɖeka ci woyɔnɔ mɔ Simɔ gbɔ, yi xwe le axu tu.’ 33 Eyi ŋdɔ amɛ ɖaɖa eo zeɖeka, èwɛ nywiɖe ci èva. Ecɛyɛɔ, mì pleŋ le te le ŋkɔ nɔ Mawu keŋ ase enyɔ ciwo pleŋ Yehowa* dɔ eo mɔ eo le nu.”
34 Eyi Piɛ tɔ nuxu xoxo yí nu mɔ: “Ecɛyɛɔ, ŋmɔŋje mɛ nyɔnɔnwimɛtɔ mɔ Mawu detranɔ amɛ mɛ o. 35 Vɔ mɛɖekpokpui ci yí vɔnnɔ ni yí wanɔ enujɔjɔɛ nu kpenɔ ni nɔ éso jukɔn ɖekpokpui mɛ can. 36 Éto Yesu Kristo ci yí nyi Axwetɔ nɔ amɛwo pleŋ ji yí nu fafa ŋɛnywi lɔ nɔ Izraɛliviwo. 37 Mínya mɔ ci Ʒan xo nuxu so ʒinʒindoshimɛwawa yitɔ nu ɖegbɔɔ, woxo nuxu so nyɔ cɛ nu le Galile koɖo Ʒude lɔ pleŋ. 38 Enyɔ lɔ kuso Yesu ci yí so Nazarɛti nu, lé Mawu sɔ gbɔngbɔn kɔkɔɛ shi ami ni yí na ŋsɛn yi do koɖo lé edan to fishiafi yí wa nywi nɔ amɛwo do yí da edɔ̀ nɔ mɛ ciwo pleŋ Legba dokɔ aya nɔ; ɖo Mawu le koɖi. 39 Mìwo yí kpɔ ŋciwo pleŋ ewa le Ʒuifuwo ju mɛ koɖo Ʒerusalɛmu tɔxu; vɔ wokin do aci nu yí sɔ wu. 40 Mawu fuin do agbe le ŋkeke amɛtɔntɔ lɔ gbe yí na edasɛ yiɖeki nɔ amɛwo. 41 Vɔ denyi amɛwo pleŋ yí kpɔɛ o, mìwo ciwo yí ɖu nu yí nu enu koɖi le fɔnfɔnsoku yitɔ godu ɖekɛwo yí kpɔɛ. Mawu can mì doŋkɔ nɔ mìakpɔɛ keŋ axo nuxu so nu nɔ amɛwo. 42 Énu nɔ mì hɛnnɛ mɔ, mìwo le ɖe kunu nɔ amɛwo kitokito mɔ eyi nyi mɛ ci Mawu sɔ nɔ aɖo kojo nɔ amɛleagbuwo koɖo amɛkukuwo. 43 Enyɔnuɖɛtɔwo pleŋ ɖe kunu so nu mɔ to yi ŋkɔ jiɔ, woasɔ nuvɔnwo ke mɛɖekpokpui ci yí xɔɛ ji se.”
44 Ci Piɛ kpɔtɔ xoxoɔ nuxu so nyɔ cɛwo nuɔ, mɛ ciwo pleŋ yí seseɛ nyɔ lɔ xɔ gbɔngbɔn kɔkɔɛ lɔ. 45 Eyi ekpaca xɔsetɔ Ʒuifu* ciwo yí va koɖo Piɛ, ɖo Mawu na yí jukɔn bu mɛ tɔwo can xɔ gbɔngbɔn kɔkɔɛ lɔ. 46 Ðo wose yí wododoɔ egbe buwo yí kanfukɔ Mawu. Eyi Piɛ nu mɔ: 47 “Ci mɛ cɛwo xɔ gbɔngbɔn kɔkɔɛ lɔ shigbe mìwo can nɛ ɖe, mɛɖe atɛnŋ agbe amɔ woŋgbeʒin wo do eshi mɛa?” 48 Eyi enu nɔ wo mɔ, wo le ʒin wo do shi mɛ le Yesu Kristo ŋkɔ mɛ. Yi goduɔ, woɖe kuku ni mɔ yɛ le nɔ yewo gbɔ hwɛɖeka na nɔ ŋkeke ɖewo.