Wema ci Woŋwlɛ Ðaɖa Kolosetɔwo
3 Vɔ nɔ wofɔn mí do agbe koɖo Kristo ɔ, míkpɔtɔ ajijiɛ enu ciwo yí le jeŋkwi mɛ, fini Kristo nɔ nyinɔnɔ do ɖushi mɛ nɔ Mawu le. 2 Míkpɔtɔ asɔ susu ɖonɔ jeŋkwi mɛ nuwo ji, ŋgbenyi nyigban ji nuwo ji o. 3 Ðo míku yí wosɔ míwo gbewo wla koɖo Kristo sɔgbe koɖo Mawu dro. 4 Nɔ wodasɛ Kristo ci yí nyi mìwo gbeɔ, woadasɛ míwo can bɔdo nu le kanfukanfu mɛ.
5 Eyi taɖo, míwu edro ɖekpokpui* ci yí adɔ míawa mateli,* enumakɔmakɔ, aɖo amɛgbɔdɔndɔn dro ci yí wugan, edro vwin alo adɔ yí enu aci ŋmɛ nɔ mí, vojusɛnsɛn han yí enuciŋmɛnamɛ nyi. 6 Enu cɛwo yí dɔ yí Mawu dɔmɛzi gbɔgbɔ. 7 Ahan yí míwo can mínɔ agbe do vayi sa nɛ. 8 Vɔ ecɛyɛɔ, míɖo atashi ŋcɛwo pleŋ: dɔmɛzi, egufɔnfɔn, enudɔndɔnwawa, enyɔveamɛwo koɖo enyɔdɔndɔnwo nunu. 9 Míŋgbekannɔ ŋsu nɔ míwonɔnɔwo o, mítashi adɛn xoxwi lɔ koɖo yi nuwanawo. 10 Mítɔ agbe yoyu nɔnɔ, agbe cɛ yí wosɔ trɔkɔ yoyu to nunya adodwitɔ lɔ ji sɔgbe koɖo Mɛ ci yí wɛ nɔnɔmɛ. 11 Denyi Grɛkitɔ, Ʒuifu, mɛ ci yí so evo alo mɛ ci yí deso evo o, mɛdru, Sikitetɔ,* hwashi alo mɛ ci yí le vovo mɛ yí nyi nyɔ lɔ o, vɔ Kristo yí nyi enuwo pleŋ yí le enuwo pleŋ mɛ.
12 Eyi taɖo, ci mínyi mɛ ciwo Mawu can, amɛkɔkɔɛwo koɖo mɛ ciwo yí elɔn ɔ, mísɔ vevisesedoamɛnu, xomɛvuwawa, amɛɖekisɔsɔhwe, xomɛfafa koɖo jigbɔnɖɛxɔxɔ asɔ do shigbe awu nɛ. 13 Mído ji akpɔtɔ anɔ koɖo míwonɔnɔwo yí asɔ enu kenɔ míwonɔnɔwo faa, nɔ mɛɖe ɖo susu ɖe ci ji ado hwɛ yi kpena do can. Shigbe lé Yehowa* sɔ ke mí faa nɛɔ, míwo can míɖo awɛni ahan. 14 Vɔ sɔ kpe nɔ enu cɛwo pleŋ ɔ, mísɔ lɔnlɔn asɔ do shigbe awu hannɛ, ɖo eyi wa ɖaŋ xonɔ ca amɛwo doju yí enyɔnɔ vɛ.
15 Gbesɔ kpe niɔ, mílɔn nɔ fafa Kristo tɔ akpa le míwo jiwo mɛ,* ɖo fafa cɛ yí woyɔ mí nɔ keŋ nɔ míanyi lankpu kuɖeka. Míadonɔ akpe gashiagamɛ. 16 Mílɔn nɔ Kristo nyɔ lɔ axɔ texwe le mí mɛ le nunyawo pleŋ mɛ. Míkpɔtɔ akplakɔ nu míwonɔnɔwo yí adokɔ ŋsɛn míwonɔnɔwo koɖo kanfukanfu hawo, Mawu kanfukanfu nyɔwo koɖo gbɔngbɔn mɛ ha ciwo nu akpedodo* bɔdo. Míji ha nɔ Yehowa* le míwo jiwo mɛ. 17 Enyɔ ɖekpokpui ci mínukɔ alo ŋɖekpokpui ci míwakɔɔ, míwa enuwo pleŋ le Axwetɔ Yesu ŋkɔ mɛ keŋ ato ji adokɔ akpe nɔ Mawu ci yí nyi Eda.
18 Nyɔnuwo, mísɔ míwoɖekiwo hwe nɔ míwo suwo shigbe lé esɔgbe le Axwetɔ lɔ mɛ do nɛ. 19 Ŋsuwo, míkpɔtɔ alɔnnɔ míwo shiwo yí míŋgbewanɔ dɔmɛzi do wo o.* 20 Ðeviwo, mísenɔ tonu nɔ míwo dawo koɖo míwo nɔwo le enuwo pleŋ mɛ, ɖo ecɛ jɔnɔ ji nɔ Axwetɔ lɔ taŋ. 21 Vidawo, míŋgbedonɔ dɔmɛzi nɔ míwo viwo o; nɔ denyi ahan ɔ, woavagbɔjɔ.* 22 Edɔwaviwo, mísenɔ tonu nɔ míwo xwetɔwo le enuwo pleŋ mɛ, denyi hwenu wokpɔkpɔ mí ɖekɛ yí míasenɔ tonu nɔ wo keŋ nɔ míwo nu ajɔ ji nɔ agbetɔwo o, vɔ míasenɔ tonu nɔ wo nyɔnɔnwimɛtɔ so ji mɛ yí awɛni le Yehowa* vɔnvɔn mɛ. 23 Ŋɖekpokpui ci míwakɔɔ, míwɛ koɖo eji pleŋ* shigbe Yehowa* yí míwɛkɔ nɔ nɛ yí denyi nɔ agbetɔwo o. 24 Ðo mínya mɔ Yehowa* gbɔ yí míaxɔ cinɔ lɔ le yí anyi fɛncu nɔ mí. Míwa dɔ nɔ Axwetɔ Kristo shigbe hwashiwo nɛ. 25 Mɛ ci yí le enudɔndɔn wakɔɔ, enudɔndɔn fɛncu yí axɔ dandandan, amɛmɛtratra dele mɛ o.