Wema Ŋkɔtɔ ci Ʒan Ŋwlɛ
3 Míkpɔ lé Eda lɔn mì sugbɔ do ɖa, keŋ nɔ woayɔ mì mɔ eviɛwo! Eviɛwo yí mìnyi nyao, eyi dɔ taɖo xexe lɔ dejeshi mì o, ɖo detɛnŋ yí jeshi ɖɛ o. 2 Amɛveviwo, Mawu viwo yí mìnyi yɛ, vɔ wodedasɛ enu ci mìavanyi hɔɖo o. Mìnya mɔ hwenu adasɛ yiɖekiɔ, mìale shigbe eyɛ nɛ, ɖo mìakpɔɛ shigbe lé ele do nɛ. 3 Eyi mɛɖekpokpui ci yí kpɔkɔ emɔ ni aje agbla ale kɔkɔɛɖe shigbe lé yɛ can le kɔkɔɛɖe nɛ.
4 Mɛɖekpokpui ci yí wakɔ nuvɔn can dada le ese ji, eyi nuvɔn nyi esejimawamawa. 5 Mínya hɛnnɛ mɔ, yɛdasɛ yiɖeki keŋ aɖe mìwo nuvɔnwo swi, eyi nuvɔn ɖekɛ dele mɛ o. 6 Mɛɖekpokpui ci yí kpɔtɔ le koɖi dewanɔ nuvɔn o, mɛ ci yí wakɔ nuvɔn dekpɔɛ alo jeshi ɖɛ o. 7 Evi veviwo, míŋgbelɔn nɔ mɛɖe able mí domɛ o; mɛ ci yí wakɔ enujɔjɔɛ nyi amɛjɔjɔɛ shigbe lé yɛ can nyi amɛjɔjɔɛ nɛ. 8 Amɛ ci yí wakɔ nuvɔn so Legba gbɔ, ɖo nuvɔnwatɔ yí Legba nyi so gɔnmɛjeje.* Ecɛ yí dɔ taɖo Mawu Vi va keŋ adahɛn Legba dɔwo.
9 Mɛɖekpokpui ci yí nyi Mawu vi dewanɔ nuvɔn o, ɖo nuku* Mawu tɔ kpɔtɔ le mɛ, eyi ci enyi Mawu viɔ, datɛnŋ awa nuvɔn o. 10 Enu ci mìasɔ jeshi Mawu viwo koɖo Legba viwo ke: Mɛɖekpokpui ci yí wakɔ enumajɔmajɔ deso Mawu gbɔ o, ahanke mɛ ci yí delɔn nɔviɛ deso Mawu gbɔ hɛnnɛ nɛ. 11 Ðo enyɔ cɛ yí míse so tɔtɔmɛ mɔ, mìɖo alɔn mìwonɔnɔwo. 12 Mìdawa Kayɛn ci yí so nuvwinwatɔ lɔ gbɔ yí wu nɔviɛ tɔ han o. Nyi yí taɖo ewuiɔ? Ðo yi nuwanawo denyɔ o, vɔ nɔviɛ yɛ wanɔ enujɔjɔɛ.
13 Nɔviwo, ŋgbekpaca mí mɔ xexe lɔ gbe ŋwa nɔ mí o. 14 Mìnya mɔ mìfɔn so eku mɛ yí va agbe mɛ, ɖo mìlɔnnɔ nɔviwo. Mɛ ci yí delɔnnɔ amɛ kpɔtɔ ci eku mɛ. 15 Mɛɖekpokpui ci yí xakɔ nɔviɛɔ, amɛwutɔ enyi yí mínya mɔ mɛ ci yí nyi amɛwutɔ dakpɔ agbe mavɔ o. 16 Mìvanya enu ci lɔnlɔn nyi, ɖo ésɔ yi gbe* sa vɔn do ta nɔ mì, eyi ele dandan mɛ mɔ mìwo can mìasɔ mìwo gbewo* sa vɔn do ta nɔ mìwo nɔviwo. 17 Vɔ nɔ xexe cɛ mɛ nuwo le mɛɖe shi yí ekpɔ nɔviɛ le eʒan mɛ, gan yí gbe mɔ yedaku ŋshishi ni ɖe, lé lɔnlɔn Mawu tɔ lɔ kpɔtɔ le mɛ doɔ? 18 Evi veviwo, denyi nuxu alo aɖe mɛ ɖekɛ yí mìalɔnnɔ amɛ le o, vɔ mìalɔnnɔ amɛ le wana koɖo nyɔnɔnwi mɛ.
19 To ecɛ jiɔ, mìanya mɔ nyɔnɔnwi lɔ tɔ yí mìnyi, eyi mìakando ji le mìwo jiwo mɛ mɔ Mawu lɔn mì* 20 le ŋɖekpokpui ci mɛ yí mìwo jiwo ado hwɛ mì le, ɖo Mawu gangan wu mìwo jiwo yí nya enushianu. 21 Amɛveviwo, nɔ mìwo jiwo dedokɔ hwɛ mìɔ, anyi mìatɛnŋ avoŋ fɛɛ axo nuxu nɔ Mawu. 22 Eyi nɔ mìbiɔ ŋɖekpokpui yiɔ, ána mì; ɖo mìwakɔ do yi sewo ji yí wakɔ enu ci yí jɔnɔ ji ni. 23 Le nyɔnɔnwi mɛɔ, ese yitɔ lɔ yí nyi mɔ: mìaxɔ Eviɛ Yesu Kristo ŋkɔ ji se yí alɔn mìwonɔnɔwo shigbe lé enui nɔ mì nɛ. 24 Eyi mɛ ci yí wakɔ do yi sewo ji akpɔtɔ ale ɖekɛ koɖi yí yɛ can ale ɖekɛ koɖo mɛ ŋtɔ́; eyi to gbɔngbɔn ci ena mì jiɔ, mìnya mɔ ékpɔtɔ le ɖekɛ koɖo mì.