Wema Ŋkɔtɔ ci Ʒan Ŋwlɛ

2 Evinyɛ veviwo, ŋŋwlɛkɔ enu cɛwo ɖaɖa mí keŋ nɔ míŋgbewa nuvɔn o. Gan, nɔ mɛɖe wa nuvɔn can ɔ, mìɖo kpedonutɔ* le Eda gbɔ, eyi nyi Yesu Kristo, mɛ ci yí wanɔ enujɔjɔɛ. 2 Ényi vɔnsa ci wowa do ta nɔ mìwo nuvɔnwo yí sɔ dra gblamɛ do nɔ mìwo koɖo Mawu,* denyi mìwo nuvɔnwo ɖekɛ yí enyi nɔ o, vɔ ényi nɔ xexe lɔ pleŋ tɔ hɛnnɛ. 3 Eyi nɔ mìkpɔtɔ wakɔ do yi sewo jiɔ, ádasɛ petii mɔ mìjeshi ɖɛ. 4 Nɔ mɛɖe nunuɔ mɔ, “Ŋjeshi ɖɛ” gan yí dewakɔ do yi sewo jiɔ, ŋsukantɔ enyi yí nyɔnɔnwi lɔ dele mɛ o. 5 Nɔ mɛɖe wakɔ do yi nyɔ jiɔ, ézenɔ petii mɔ mɛ ŋtɔ́ lɔn Mawu nyao. Ecɛ dɔ mìnya mɔ mìle koɖi. 6 Mɛ ci yí nukɔ mɔ yekpɔtɔ le koɖi ɖo akpɔtɔ anɔkɔ agbe shigbe lé yɛnɔ agbe do nɛ.*

7 Amɛveviwo, denyi ese yoyu yí ŋŋwlɛkɔ ɖaɖa mí o, vɔ ese xoxwi ci yí le mí shi so tɔtɔmɛ yí ŋŋwlɛkɔ ɖaɖa mí. Ese xoxwi cɛ yí nyi enyɔ ci míse. 8 Gan ŋŋwlɛkɔ ese yoyu nɔ mí, ese ci ji Yesu wa do yí míwo can míwakɔ do ji, ɖo vinvin bukɔ yí klɛnklɛn adodwi lɔ kɔkɔ xoxoxo.

9 Nɔ mɛɖe nukɔ mɔ yele klɛnklɛn mɛ, gan yí gbe ŋwa nɔ nɔviɛɔ, ékpɔtɔ le vinvin mɛ. 10 Mɛ ci yí lɔnkɔ nɔviɛɔ, ékpɔtɔ le klɛnklɛn mɛ yí ŋɖekɛ dado fɔbli yi o.* 11 Vɔ mɛ ci yí gbe ŋwa nɔ nɔviɛɔ, éle vinvin mɛ yí zɔnkɔ vinvin mɛ yí denya fini eyikɔ o, ɖo vinvin tɔn ŋkuvi ni.

12 Evi veviwo, ŋŋwlɛkɔ nu ɖaɖa mí, ɖo wokpɔ do yi ŋkɔ nu yí sɔ míwo nuvɔnwo ke mí. 13 Ŋŋwlɛkɔ nu ɖaɖa míwo ajitɔwo, ɖo mívajeshi mɛ ci yí li so tɔtɔmɛ ɖɛ. Ŋŋwlɛkɔ nu ɖaɖa míwo jajɛwo, ɖo míɖu nuvwinwatɔ lɔ ji. Ŋŋwlɛkɔ nu ɖaɖa míwo ɖeviwo, ɖo mívajeshi Eda ɖɛ. 14 Ŋŋwlɛkɔ nu ɖaɖa míwo ajitɔwo, ɖo mívajeshi mɛ ci yí li so tɔtɔmɛ. Ŋŋwlɛkɔ nu ɖaɖa míwo jajɛwo, ɖo mísɛnŋ yí Mawu nyɔ lɔ kpɔtɔ le mí mɛ yí míɖu nuvwinwatɔ lɔ ji.

15 Míŋgbelɔn xexe lɔ alo enu ciwo yí le xexe lɔ mɛ o. Nɔ mɛɖe lɔn xexe lɔɔ, lɔnlɔn Eda tɔ dele mɛ o. 16 Ðo enu ciwo pleŋ yí le xexe lɔ mɛ, ciwo yí nyi enu ciwo yí dronɔ gbaza lɔ, enu ciwo yí dronɔ ŋkuviwo koɖo gbɛmɛnu ciwo yí le amɛ shi dadasɛ egoyiyitɔ deso Eda gbɔ o, vɔ xexe lɔ mɛ woso. 17 Eyi xexe lɔ vayikɔ koɖo enudroamu yitɔwo, vɔ mɛ ci yí wakɔ Mawu dro ani keke asɔyi mavɔ.

18 Evi veviwo, gaxoxo kpɛtɛkpɛtɛtɔ lɔ ke; eyi shigbe lé míse mɔ Kristo ketɔnɔ lɔ gbɔgbɔ nɛɔ, Kristo ketɔnɔ sugbɔ va ɖɛyɛ, eyi taɖo mìnya mɔ gaxoxo kpɛtɛkpɛtɛtɔ lɔ ke. 19 Woto so mì mɛ vɔ wodele shigbe mìwo nɛ o,* ɖo nɔ wole shigbe mìwo nɛɔ, woakpɔtɔ anɔ koɖo mì, gan woto so mì mɛ keŋ nɔ aze petii mɔ denyi wo pleŋ yí le shigbe mìwo nɛ o. 20 Amɛkɔkɔɛ lɔ shi ami nɔ mí yí mí pleŋ mɔŋje enu mɛ. 21 Denyi ci mídejeshi nyɔnɔnwi lɔ yí dɔ taɖo ŋŋwlɛkɔ nu ɖaɖa mí o, vɔ ŋŋwlɛkɔ nu ɖaɖa mí ci míjeshi nyɔnɔnwi lɔ yí ŋsukankan ɖekɛ detonɔ so nyɔnɔnwi lɔ mɛ hɛnnɛ o.

22 Mi yí nyi ŋsukantɔɔ? Denyi mɛ ci yí gbe mɔ Yesu denyi Kristo lɔ yɔ ba? Eyi nyi Kristo ketɔnɔ lɔ, mɛ ci yí gbe Eda koɖo Evi lɔ. 23 Mɛɖekpokpui ci yí gbe Evi lɔ dele ekacaca mɛ koɖo Eda lɔ o. Vɔ mɛɖekpokpui ci yí nu mɔ yexɔ Evi lɔ ji seɔ, éle ekacaca mɛ koɖo Eda lɔ. 24 Míwoɔ, enyɔ ci míse so tɔtɔmɛ ɖo akpɔtɔ ale mí mɛ, eyi nɔ enyɔ ci míse so tɔtɔmɛ kpɔtɔ le mí mɛɔ, míwo can míakpɔtɔ ale ɖekɛ koɖo Evi lɔ yí akpɔtɔ ale ɖekɛ koɖo Eda lɔ hɛnnɛ. 25 Eyi enu ci yiŋtɔ sɔ ɖo gbe nɔ mì yí nyi agbe mavɔ lɔ.

26 Ŋŋwlɛkɔ enu cɛwo ɖaɖa mí, ɖo mɛɖewo teteɛkpɔ mɔ yewoable mí. 27 Vɔ míwoɔ, ami ci eshi nɔ mí kpɔtɔ le mí mɛ, eyi deʒan mɔ mɛɖe akpla nu mí o, vɔ ami ci eshi nɔ mí kplakɔ enuwo pleŋ mí. Nyɔnɔnwi yí enyi yí ŋsukankan dele mɛ o. Shigbe lé ami ci eshi nɔ mí kpla mí do nɛɔ, míkpɔtɔ anɔ ɖekɛ koɖi. 28 Eyi taɖo ecɛyɛɔ, evi veviwo, míkpɔtɔ anɔ ɖekɛ koɖi keŋ nɔ hwenu woadasɛ yiɔ, mìatɛnŋ avoŋ fɛɛ axo nuxu yí mìdate so gbɔ koɖo ŋkpɛn hwenu ava o. 29 Nɔ mínya mɔ yɛnyi amɛjɔjɔɛɔ, mínya hɛnnɛ mɔ, mɛɖekpokpui ci yí wanɔ enujɔjɔɛ nyi eviɛ.