Apotruwo Dɔwawawo
8 Ci wowu Etiɛni ɔ, éjɔ ji nɔ Sɔlu.
Gbenɔgbe lɔ ke yí wotɔ yumɛ cici nɔ hamɛ ci yí le Ʒerusalɛmu sɛnŋsɛnŋɖe. Enukplavi lɔwo pleŋ gban hlɛn do Ʒude koɖo Samari juwo mɛ. Apotru lɔwo ɖekɛ yí kpɔtɔ ci Ʒerusalɛmu. 2 Vɔ ŋsu ɖekawo ciwo yí vɔnnɔ nɔ Mawu vasɔ Etiɛni cɔ lɔ yí yi ɖyi, eyi wofan yi vin veviɖe. 3 Sɔlu yɛtɔ yumɛ cici nɔ hamɛ lɔ sɛnŋsɛnŋɖe. Éyinɔ axwe lɔwo mɛ ɖekaɖeka yí dɔnnɔ ŋsuwo koɖo nyɔnuwo ti yí cunɔ wo do gakpa mɛ.
4 Ele ahan gan, mɛ ciwo yí gban hlɛn lɔwo kpɔtɔ nunuɔ eŋɛnywi lɔ le fishiafi ci woyi. 5 Filipu yɛyi Samari ju* mɛ yí tɔ nuxu xoxo so Kristo nu nɔ wo. 6 Ci amɛahwa lɔ se nyɔ ciwo Filipu nukɔ koɖo enujiŋ ciwo ewakɔɔ, wosɔ wowo susuwo pleŋ ɖo enyɔ ci enukɔ ji. 7 Ðo gbɔngbɔn makɔmakɔwo le amɛ sugbɔ mɛ, eyi wodonɔ axwa sɛnsinɖe yí tonɔ le wo mɛ. Edɔ̀ mi nɔ kplibɔtɔnɔ koɖo atakunɔ sugbɔ hɛnnɛ. 8 Eyi juɔ mɛ tɔwo kpɔ jijɔ sugbɔ.
9 Ŋsu ɖeka le eju lɔ mɛ yí tɔ mɔ Simɔ. Éwanɔ maʒikinuwo keke ekpacanɔ Samari ju lɔ. Énunɔ mɔ amɛkpɛnkpin ɖeka yenyi. 10 Amɛ lɔwo pleŋ, so vihwɛwo ji keke je mɛganxoxuwo ji ɖonɔ eto yi yí nunɔ mɔ: “Ŋsu cɛ yí nyi Mawu Ŋsɛn ci woyɔnɔ mɔ Ŋsɛn Gangan.” 11 Eyi taɖo mɛ lɔwo wa ɖaŋ ɖonɔ to yi, ɖo so hwenu ɖewo keɔ, maʒikinu ciwo ewakɔ jinɔŋ nɔ wo. 12 Vɔ ci Filipu xoxoɔ nuxu so Mawu Fyɔɖuxu ŋɛnywi lɔ koɖo Yesu Kristo ŋkɔ nuɔ, ŋsuwo koɖo nyɔnuwo xɔɛ se yí wa ʒinʒindoshimɛ. 13 Simɔ can vatrɔ xɔsetɔ; eyi ci ewa ʒinʒindoshimɛ ɖegbɔɔ, ékpɔtɔ nɔ koɖo Filipu. Ci ekpɔ enujiŋ koɖo ŋsɛndɔ gangan ciwo Filipu wakɔɔ, ekpacɛ sugbɔ.
14 Ci apotru ciwo yí le Ʒerusalɛmu se mɔ amɛwo xɔ Mawu nyɔ lɔ le Samari ɔ, wodɔ Piɛ koɖo Ʒan ɖaɖa wo. 15 Eyi woyi yí do gbe ɖaɖa do ta nɔ wo keŋ nɔ woaxɔ gbɔngbɔn kɔkɔɛ lɔ. 16 Ðo gbɔngbɔn kɔkɔɛ lɔ deva wo ji hɔɖo o, vɔ ʒinʒindoshimɛ ɖekɛ yí wowa le Axwetɔ Yesu ŋkɔ mɛ. 17 Eyi wosɔ wowo lɔ̀wo da do wo ji yí wotɔ gbɔngbɔn kɔkɔɛ lɔ xɔxɔ.
18 Vɔ ci Simɔ kpɔ mɔ, nɔ apotru lɔwo sɔ wowo lɔ̀wo da do mɛ lɔwo ji woxɔnɔ gbɔngbɔn kɔkɔɛɔ, éhɛn eho vɛ nɔ wo 19 yí nu mɔ: “Mína ŋsɛn cɛ nyɛ can keŋ nɔ ŋsɔ anyi lɔ̀wo da do mɛɖekpokpui jiɔ, axɔ gbɔngbɔn kɔkɔɛ lɔ hɛnnɛ.” 20 Vɔ Piɛ nu ni mɔ: “Àku koɖo ao ho, ɖo èbukɔ mɔ woatɛnŋ asɔ eho xwle enu ci Mawu nanɔ amɛ gbali. 21 Dèɖo ŋɖe awa le nyɔ cɛ mɛ o, ɖo nyɔnɔnwi dele ji mɛ nɔ eo le ŋmɛ nɔ Mawu o. 22 Eyi taɖo, trɔ ji mɛ yí atrɔ le ŋgbe nɔ susu vɔn ci èɖo keŋ aɖe kuku nɔ Yehowa.* Taŋfuin, ásɔ susu vɔn ci yí le ao ji mɛ lɔ asɔ ke eo. 23 Ðo ŋkpɔ mɔ, aɖyiwuamɛ ci yí ve kpakpakpa yí ènyi yí gbenyi hwashi nɔ enumajɔmajɔwawa.” 24 Simɔ nu do nu nɔ wo mɔ: “Míwoŋtɔwo míɖe kuku nɔ Yehowa* do ta nɔŋ keŋ nɔ ŋciwo mínu ɖe ŋgbejɔ do ŋji o.”
25 Ci woɖe kunu kitokito yí nu Yehowa* nyɔ lɔ nɔ wo ɖegbɔɔ, wogbetrɔ yí kpe Ʒerusalɛmu. Eyi wonu eŋɛnywi lɔ le Samari kɔxwi sugbɔ mɛ le mɔ lɔ ji.
26 Vɔ Yehowa* dɔla xo nuxu nɔ Filipu mɔ: “Sò ayi fɔde age le emɔ ci yí so Ʒerusalɛmu yí yi Gaza ji.” (Zogbeji mɔ yɔ.) 27 Eyi eso yi yí kpɔ Etiopi mɛgan* ɖeka ci yí nyi ega le Etiopi fyɔnyɔnu Kandasi cɛkpakpa mɛ. Ékpɔnɔ efyɔnyɔnu lɔ dɔkunuwo pleŋ ji. Mɛgan lɔ vayi Mawu sɛngbe le Ʒerusalɛmu. 28 Eyi etrɔ vayikɔ yí le nyinɔnɔ le esɔkekevi yitɔ mɛ yí kɔ gbe yi ji yí hlɛnkɔ enyɔnuɖɛtɔ Ezai wema. 29 Eyi taɖo gbɔngbɔn lɔ nu nɔ Filipu mɔ: “Yi esɔkekevi lɔ gbɔ.” 30 Eyi Filipu lɔ ju yí yi gbɔ. Ése ŋsu lɔ kɔ gbe yi ji yí hlɛnhlɛn enyɔnuɖɛtɔ Ezai wema. Eyi ebiɔɛ se mɔ: “Èseseɛ ŋci èhlɛnkɔ lɔ gɔnmɛ teŋ a?” 31 Énu mɔ: “Lé nawɛ ase gɔnmɛ ni nɔ mɛɖe deɖe mɛ nɔŋ ɔ?” Eyi taɖo eɖe kuku nɔ Filipu mɔ yɛ le va nɔ nyinɔnɔ do axa nɔ ye. 32 Enuŋwlɛŋwlɛ lɔ kpaxwe ci ehlɛnhlɛn ke: “Wokplɔɛ yikɔ wuwugbe shigbe lɛngbɔ nɛ. Wokplɔɛ yikɔ shigbe lɛngbɔvi ci yí bɔ nu kplikplikpli le ŋkɔ nɔ mɛ ci yí jikɔ axlɔ efu ni nɛ yí deke nu o. 33 Hwenu woɖi kpɔtɔɔ, wodeɖo kojo jɔjɔɛ ni o. Mi yí alɔ xo so kannu yitɔ nuɔ? Ðo woɖe agbe yitɔ swi le nyigban lɔ ji.”
34 Mɛgan lɔ biɔ Filipu se mɔ: “Ŋɖe kuku, mi nyɔ yí enyɔnuɖɛtɔ lɔ nukɔɔ? Yiŋtɔ yɔa alo mɛbu nyɔ enukɔ?” 35 Eyi Filipu tɔ nuxu xoxo yí tɔɛ so enuŋwlɛŋwlɛ ŋtɔ́ ji keŋ yí nu eŋɛnywi ci yí kuso Yesu nu ni. 36 Ci woyikɔ le emɔ lɔ jiɔ, wovaɖo fiɖeka ci eshi le. Eyi mɛgan lɔ nu mɔ: “Kpɔ ɖa! Eshi ke, nyi yí kpɔtɔ nɔŋ yí nawa ʒinʒindoshimɛɔ?” 37* —— 38 Énu nɔ mɛ ci yí kukuɔ esɔkekevi lɔ mɔ yɛ le nɔ te. Filipu koɖo mɛgan lɔ yi eshi lɔ mɛ yí Filipu ʒin do shi mɛ. 39 Ci woto le eshi lɔ mɛɔ, Yehowa* gbɔngbɔn kplɔ Filipu hɛn yi zeɖeka le afɔdumɛ yí mɛgan lɔ degbekpɔɛ ke o, vɔ éɖedo koɖo jijɔ. 40 Filipu yɛvayi tɔn do Asidodi, eyi edradra eŋɛnywi lɔ to eju lɔwo pleŋ mɛ keke vayi kɔdo Sezare.