Wema ci Woŋwlɛ aɖa Rɔmatɔwo
1 Enyɛ Pɔlu ci yí nyi hwashi nɔ Kristo Yesu yí ŋwlɛ wema cɛ ɖaɖa mí. Ésɔŋ mɔ nyɛ le nyi apotru yí gbesɔŋ do akpo nɔ madra eŋɛnywi Mawu tɔ lɔ. 2 Mawu to yi nyɔnuɖɛtɔwo ji yí nu eŋɛnywi cɛ nyɔ ɖɛ xoxoxo do Enuŋwlɛŋwlɛ kɔkɔɛ lɔwo mɛ. 3 Eŋɛnywi cɛ kuso Eviɛ ci yí so Davidi kannu mɛ nu. 4 Eze gbajɛɛ mɔ, eyi nyi Mawu Vi lɔ, ɖo Mawu zan gbɔngbɔn kɔkɔɛ sɛnŋ Yitɔ lɔ yí sɔ fuin so eku. Ɛɛ, eyi nyi Yesu Kristo mìwo Xwetɔ lɔ. 5 Eyɛ ji yí Mawu to yí wa xomɛvu gangan nɔ mì. Yesu canŋ nɔ manyi apotru keŋ akpedo amɛwo nu le jukɔnwo pleŋ mɛ nɔ woaɖo xɔse yí ase tonu yí agbena bubu yi ŋkɔ. 6 Jukɔn cɛwo mɛ yí woyɔ míwo can so yí mívatrɔ Yesu Kristo tɔ. 7 Ŋle wema cɛ ŋwlɛkɔ ɖaɖa míwo ciwo pleŋ yí le Rɔma yí nyi amɛveviwo nɔ Mawu yí woyɔ mí mɔ amɛkɔkɔɛwo:
Mìwo Da Mawu koɖo Axwetɔ Yesu Kristo le wa xomɛvu gangan nɔ mí yí agbena fafa mí.
8 Doŋkɔɔ, ŋdokɔ akpe nɔ anyi Mawu to Yesu Kristo ji do ta nɔ mí pleŋ, ɖo woxoxoɔ nuxu so xɔse ci míɖo nu le xexeɛ pleŋ mɛ. 9 Mawu ci ŋwanɔ sɛnsɛndɔ kɔkɔɛ nɔ koɖo anyi ji pleŋ* yí nunɔ eŋɛnywi ci yí kuso Eviɛ nu nya mɔ, ŋyɔnɔ míwo ŋkɔwo le anyi gbedoɖawo mɛ hweshiahwenu. 10 Ŋɖeɖeɛ kuku mɔ, nɔ edro Mawu ɔ, nava yɔ mí kpɔ. 11 Ðo ŋjijiɛ veviɖe mɔ makpɔ mí keŋ akpedo mí nu le gbɔngbɔn mɛ nɔ xɔse míwotɔ asɛnŋ doji; 12 alo mìado ŋsɛn mìwonɔnɔwo, míwo xɔse ado ŋsɛnŋ yí anyitɔ can ado ŋsɛn mí.
13 Nɔviwo, ŋji mɔ míanya mɔ édroŋ zenɛniɖe mɔ mava mí gbɔ keŋ akpɔ nunywi ciwo yí ato so kunuɖeɖedɔ ci nawa le mí gbɔ mɛ shigbe lé ŋwɛ le jukɔn kpɛtɛwo mɛ nɛ. Vɔ deje ji hɔɖo o. 14 Ŋɖu fɛn do Grɛkitɔwo koɖo eju bu mɛ tɔwo,* ŋɖɛnyatɔwo koɖo ŋɖɛmanyatɔwo. 15 Eyi taɖo edrodroɔŋ veviɖe mɔ, manu eŋɛnywi lɔ nɔ míwo can le Rɔma. 16 Eŋɛnywi lɔ nunu dewanɔ ŋkpɛn nɔŋ o; ɖo le nyɔnɔnwi mɛɔ, eyi nyi Mawu ŋsɛn ci yí hwlɛnnɔ mɛɖekpokpui ci yí ɖo xɔse gan. Doŋkɔɔ, wonui nɔ Ʒuifuwo; yi goduɔ, wovanui nɔ Grɛkitɔwo. 17 Ðo mɛ ciwo yí ɖo xɔse akpɔ enujɔjɔɛwawa Mawu tɔ yí ecɛ ado ŋsɛn wowo xɔse shigbe lé Enuŋwlɛŋwlɛ lɔwo nui do nɛ mɔ: “Vɔ xɔse ci yí amɛjɔjɔɛ ɖo yí adɔ anɔ agbe.”
18 Ðo Mawu le dɔmɛzi ji so jeŋkwi mɛ do mɛ ciwo pleŋ yí devɔnnɔ ni koɖo mɛ ciwo yí le enumajɔmajɔ wakɔ keŋ yí tekɔkpɔ mɔ yewoabu ŋmɛ nɔ nyɔnɔnwi lɔ nu. 19 Enu ciwo yí ana woajeshi Mawu ɖɛ trɔgbɔ ze nɔ wo gbajɛɛ gbɔxwe, ɖo Mawu dasɛ wo nɔ wo petii. 20 Yi nɔnɔmɛ makpɔmakpɔwo ze petii so keke hwenu ewa xexe lɔ, ɖo wokpɔnɔ wo gannaganna le ŋciwo ewa lɔwo mɛ. Wodanasɛ ŋsɛn mavɔ yitɔ koɖo Mawu ci enyi; eyi taɖo, enyɔ ɖe deli woavanu keke enyɔ ajɔ nɔ wo o. 21 Ðo ci wojeshi Mawu ɖɛ can ɔ, wodena bubu ɖekɛ yi alo do akpe ni can hɛnnɛ o. Vɔ enugbaliwo nu wobunɔ tamɛ kpɔ so yí wowo ji ciwo yí desenɔ nu gɔnmɛ do vinvin. 22 Ci wonukɔ mɔ yewonyi ŋɖɛnyatɔwo can ɔ, xlunɔwo yí wonyi. 23 Ci woakanfu Mawu ci yí dekunɔ lɔɔ, wovawa enukpakpɛ ciwo yí ɖyi agbetɔ ci yí kunɔ, xeviwo, elan afɔamɛnɛnɔwo koɖo elan ciwo yí sanɔ to nyigban yí kanfukɔ wo.
24 Eyi taɖo Mawu kpɔ do edro ciwo yí le wowo jiwo mɛ nu yí tashi wo nɔ enumakɔmakɔwawa keŋ nɔ woado ŋkpɛn wowoŋtɔwo gbazawo. 25 Wosɔ nyɔnɔnwi Mawu tɔ ɖɔli koɖo ŋsukankan yí nanɔ bubu enu ciwo ewa yí gbesɛnnɔ wo keŋ yí gbe Gbɛɖotɔ lɔ ɖɛ, mɛ ci woɖo akanfu sɔyi mavɔmavɔ. Amɛn. 26 Eyi taɖo Mawu tashi wo yí woɖo amɛgbɔdɔndɔn dro ciwo yí nyi ŋkpɛnnuwanawo, ɖo wowo nyɔnuwo gbe lé amɛgbɔdɔndɔn ɖo ayi do le jɔjɔmɛnu ɖɛ yí vawakɔ ci yí desɔgbe o. 27 Ahanke ŋsuwo can mi exɔ ɖoɖo koɖo nyɔnuwo yí vaɖo edro sɛnŋsɛnŋ nɔ wowonɔnɔwo yí ŋsu vaɖokɔ xɔ koɖo ŋsu. Wole enudɔndɔnwo wakɔ yí wowoŋtɔwo ɖukɔ afɛn ciwo yí wowakɔ lɔzu* keŋkeŋ.
28 Ci wokpɔ mɔ yɛdele veviɖe mɔ yewoajeshi Mawu ɔ,* Mawu can tashi wo yí wokpɔtɔ yí ɖoɖoɔ susu masɔgbewo yí wakɔ enu ciwo wodeɖo awa o. 29 Woɖɔ koɖo enumajɔmajɔwawawo pleŋ, nuvwinwawa, sukanujiji* koɖo enudɔndɔnwawa. Woɖɔ koɖo ŋbia, amɛwuwu, aɖehwlɛnhwlɛn, amɛbleble, susu vɔnwo koɖo amɛnyɔnunu. 30 Woxonɔ ɖyi amɛ, wogbe ŋwa nɔ Mawu, wodebunɔ amɛ o, wonyi egoyitɔnɔwo yí gangannɔ wowoɖekiwo, wonyi susuvɔnɖetɔwo* yí gbenɔ to nɔ wowo dawo koɖo wowo nɔwo. 31 Wonyi enugɔnmɛmasetɔwo, wodewanɔ do egbe ciwo woɖo ji o, wodelɔnnɔ amɛ o yí wodekunɔ ŋshishi nɔ amɛ hɛnnɛ o. 32 Wotrɔgbɔ nya nywiɖe mɔ Mawu mɔ mɛ ciwo yí wakɔ enu ŋtɔ́wo ɖo aku, gan wokpɔtɔ wakɔ wo yí ci amɛwo wakɔ wo hɛnnɛɔ, wolɔnkɔ do ji nɔ wo.