Wema ci Woŋwlɛ Ðaɖa Efezitɔwo
4 Eyi taɖo, enyɛ ci yí le gakpa mɛ do Axwetɔ lɔ ŋciɔ, ŋdokɔ ŋsɛn mí mɔ míwo le nɔ agbe nɔ asɔ koɖo enu ci woyɔ mí nɔ. 2 Mísɔ míwoɖekiwo hwenɔ keŋkeŋ, mífanɔ xomɛ, míxɔnɔ jigbɔnɖɛ, mído ji anɔnɔ koɖo míwonɔnɔwo le lɔnlɔn mɛ, 3 míje agbla veviɖe nɔ egbeɖoju ci gbɔngbɔn lɔ nanɔ akpɔtɔ anɔ mí mɛ le fafa mɛ. 4 Lankpu lɔ nyi kuɖeka, gbɔngbɔn lɔ can nyi kuɖeka shigbe lé woyɔ mí nɔ emɔkpɔkpɔ kuɖeka lɔ nɛ; 5 Axwetɔ kuɖeka yí li, xɔse kuɖeka yí li, ʒinʒindoshimɛ kuɖeka yí li; 6 Mawu kuɖeka yí li yí nyi Eda nɔ enuwo pleŋ, eyɛ yí kpa nɔ enuwo pleŋ yí wanɔ dɔ to enuwo pleŋ ji le enuwo pleŋ mɛ.
7 Mawu wa xomɛvu gangan nɔ mɛɖekaɖeka le mì mɛ, Kristo yí ma enunana cɛ nɔ mɛɖekaɖeka. 8 Ðo woŋwlɛ ɖɛ mɔ: “Ci eyi ejiɔ, ékplɔ hwashiwo yi; ésɔ ŋsuwo jo yí wonyi enunanawo.” 9 Ecɛyɛ ɖe, enyɔgbe “Éyi eji” gɔnmɛ ɖe? Yi gɔnmɛ yí nyi mɔ, éɖyi va gɔnmɛ sa, eyi nyi nyigban lɔ ji. 10 Mɛ ci yí ɖyi va gɔnmɛɔ, eyi lɔ ke yí yi eji kpanŋkpanŋ keke yí fla jeŋkwiwo keŋ atɛnŋ ana yí enushianu asɔgbe keŋkeŋ.
11 Eyi esɔ mɛɖewo na yí wonyi apotruwo, mɛɖewo nyi enyɔnuɖɛtɔwo, mɛɖewo nyi eŋɛnywidratɔwo, mɛɖewo nyi lɛngbɔkplɔtɔwo koɖo enukplamɛtɔwo, 12 keŋ nɔ woadradra amɛkɔkɔɛ lɔwo do* yí ale sɛnsɛndɔ wakɔ yí adodoɔ ŋsɛn Kristo lankpu lɔ 13 keke ana nɔ hwenu mì pleŋ asɔ egbe ɖo ju* le xɔse lɔ mɛ, awa ɖaŋ ajeshi Mawu Vi lɔ ɖɛ nywiɖe yí anyi mɛ ciwo yí shin vɛ yí ale shigbe Kristo hannɛ pleŋpleŋ le enushianu mɛ. 14 Eyi taɖo, dele mɔ mìagbenyi vihwɛwo yí aseseɛ enukplamunyɔ ciwo yí amɛbletɔwo nunɔ o. Nɔ denyi ahan ɔ, mìavale shigbe tɔjihun ci yí aya xoxoɔ yí edandan lɛgɛlɛgɛ le axu ji nɛ. 15 Vɔ mìanunɔ nyɔnɔnwi, lɔnlɔn le dɔ yí mìashin le enuwo pleŋ mɛ le Kristo ci yí nyi eta nɔ mì mɛ. 16 Lankpu lɔ pleŋ wa ɖaŋ ca do ɖekɛ to eyɛ ji yí bɔ le edɔ wakɔ doju yí kpexukpexu lɔwo pleŋ le wowo dɔwo wakɔ nywiɖe. Nɔ ŋcinu ɖekaɖeka le yi dɔ wakɔ nywiɖeɔ, éna yí lankpu lɔ shinnɔ yí sɛnnɔŋ le lɔnlɔn mɛ.
17 Eyi taɖo ŋnukɔ nyɔ cɛ yí sɔ dokɔ ŋsɛn mí le Axwetɔ lɔ mɛ mɔ, míwo le mi enu wawa shigbe lé jukɔnwo wanɔ nu nɛ, ɖo wowoŋtɔwo susu maɖota* lɔwo ɖekɛ yí wosɔ wanɔ nu. 18 Susu mɛ do vinvin nɔ wo yí wojinjin le agbe ci yí nyi Mawu tɔ gbɔ, ɖo wole manyasaka mɛ yí eji mɛ sɛnŋ nɔ wo. 19 Ŋɖekɛ degbewanɔ ŋkpɛn nɔ wo o, woshin ŋta yí le enudɔndɔn wakɔ* keŋ yí le enumakɔmakɔ ɖekpokpui wakɔ madrɔmadrɔ.
20 Vɔ denyi ahan wokpla mí mɔ Kristo lɔ le nɛ o. 21 Yesu kpla nyɔnɔnwi lɔ amɛwo, eyi nɔ míse enyɔ so gbɔ yí ekpla nu mí nyaoɔ, anyi mímɔŋje enyɔ cɛwo mɛ nyɔnɔnwitɔ. 22 Wokpla mí mɔ míɖo atashi míwo dɛn xoxwi ciwo yí nyi agbe ci mínɔ vayi sa, ɖo enudɔndɔn ciwo yí dronɔ mí dɔ yí míwo dɛn xoxwi cɛwo fɔn yí nyinakɔ doji. 23 Eyi míɖo akpɔtɔ atrɔkɔ lé míbunɔ tamɛ kpɔ do nɔ anyikɔ yoyu doji. 24 Míɖo atɔ agbe yoyu nɔnɔ sɔgbe koɖo edro Mawu tɔ yí awanɔ enujɔjɔɛ yí agbenɔnɔ egbeji nyɔnɔnwimɛtɔ.
25 Eyi taɖo, ecɛyɛ ci mími amɛ blebleɔ, mɛɖekaɖeka le tonɔ nyɔnɔnwi nɔ yi kpena, ɖo ŋcinuwo yí mìnyi yí li nɔ mìwonɔnɔwo. 26 Mído dɔmɛzi, vɔ míŋgbewa nuvɔn o, míŋgbele dɔmɛzi ji keke nɔ ewe ayi xɔ o; 27 míŋgbena emɔ Legba o.* 28 Mɛ ci yí le efi fikɔ ŋgbefi fi ke o, vɔ le wa edɔ sɛnsinɖe, le sɔ yi lɔ̀wo wa edɔ nywi keŋ nɔ enuwo ale shi yí ana mɛ ci yí le ʒan mɛ. 29 Míŋgbelɔn nɔ enyɔdɔndɔn ɖe atonɔ le aglan mɛ nɔ mí o, vɔ enyɔnywi ci yí ado ŋsɛn amɛ do yi hwenu ɖekɛ yí míanunɔ keŋ nɔ awanɔ enywi nɔ mɛ ciwo yí sisiɛ. 30 Míŋgbedonɔ vevisese nɔ Mawu gbɔngbɔn kɔkɔɛ lɔ hɛnnɛ o, eyi wosɔ do jeshi mí ɖɛ nɔ ŋkeke ci ji yí woato tafɛn lɔ ji yí ahwlɛn mí gan le.
31 Mítashi amɛleledoxomɛ, dɔmɛzidodo, axwadodo koɖo enyɔveamɛ ɖekpokpui sɔ kpe nɔ ŋɖekpokpui ci yí adahɛn nu le amɛ nu. 32 Vɔ mínyi mɛ ciwo yí fanɔ xomɛ nɔ míwonɔnɔwo yí akunɔ ŋshishi nɔ míwonɔnɔwo yí asɔ enu kenɔ míwonɔnɔwo faa shigbe lé Mawu can sɔ ke mí faa to Kristo ji nɛ.