Apotruwo Dɔwawawo
16 Pɔlu vaɖo Dɛrbe. Yɛ goduɔ, éyi Listra. Enukplavi ɖeka le nɔ yí tɔ mɔ Timɔte. Enɔlɔ nyi Ʒuifu yí dalɔ nyi Grɛkitɔ. 2 Listra koɖo Ikonia nɔviwo xo nuxu nywiwo so Timɔte nu. 3 Pɔlu nu mɔ yeji mɔ Timɔte akplɔ ye do, eyi taɖo ekplɔɛ hɛn yi yí so evo ni do Ʒuifu ciwo yí le eju ŋtɔ́wo mɛ ŋci. Ðo wo pleŋ nya mɔ Grɛkitɔ yí dalɔ nyi. 4 Ci wototoɔ eju lɔwo mɛɔ, wonu gbeta ciwo yí apotruwo koɖo hamɛmɛshinshinwo sɔ le Ʒerusalɛmu nɔ nɔviwo keŋ nɔ woawa do wo ji. 5 Eyi le nyɔnɔnwi mɛɔ, hamɛ lɔwo kpɔtɔ sɛnkɔŋ doji le xɔse mɛ yí xɔsetɔwo sukɔgbɔ doji ŋkeŋke.
6 Woyi Friʒi koɖo Galati hɛnnɛ, ɖo gbɔngbɔn kɔkɔɛ lɔ gbe nɔ wo mɔ woŋgbenu enyɔ lɔ le Azi kan mɛ o. 7 Eyi ci wovaɖo Misi ɔ, woje agbla mɔ yewoayi Bitini, vɔ Yesu to gbɔngbɔn kɔkɔɛ lɔ ji yí gbe nɔ wo. 8 Eyi taɖo wototo Misi yí vayi Troasi. 9 Eyi zanmɛɔ, Pɔlu kpɔ ŋtegannu ɖeka yí Maseduani ŋsu ɖeka le te yí ɖeɖeɛ kuku ni veviɖe mɔ: “Va Maseduani yí akpedo mì nu.” 10 Ci ekpɔ ŋtegannu lɔ ɖegbɔ kakaɔ, mìyi Maseduani, ɖo mìkpɔ mɔ Mawu yí nunuɔ nɔ mì mɔ mìwo le yi dra eŋɛnywi lɔ nɔ wo.
11 Eyi taɖo mìɖo tɔjihun so Troasi yí zɔn trelele yi Samɔtrasi, vɔ le yi ŋkegbuɔ, mìyi Neapoli. 12 Mìso le enɔ yí va Filipi ci yí le Rɔma cɛkpakpa gɔnmɛ yí gbenyi jugan vevitɔ le Maseduani kan mɛ. Mìnɔ Filipi jugan lɔ mɛ yí wa ŋkeke ɖewo. 13 Le Sabatigbeɔ, mìto to agbo lɔ nu yí yi etɔ ɖeka gbɔ. Mìse mɔ gbedoɖa tɔxu ɖeka le nɔ. Eyi mìnɔ nyinɔnɔ yí tɔ nuxu xoxo nɔ nyɔnu ciwo yí bɔ do nɔ. 14 Nyɔnu ɖeka le enɔ yí tɔ mɔ Lidi. Ésanɔ avɔn jun ciwo yí yubɔ do mɛ yí so Tiati. Ésɛnnɔ Mawu. Hwenu ele eto ɖokɔɔ, Yehowa* hun eji ni gbajɛɛ keŋ nɔ yi susu awa ɖaŋ anɔ enyɔ ciwo Pɔlu nukɔ ji nywiɖe. 15 Ci yɛ koɖo mɛ ciwo yí le yi xomɛ wa ʒinʒindoshimɛɔ, éɖe kuku nɔ mì veviɖe mɔ: “Nɔ míkpɔ mɔ ŋnyi egbejinɔtɔ nɔ Yehowa* ɔ, mívaze anyi xomɛ.” Éwɛ keke mìlɔn yí yi.
16 Gbeɖeka ci mìyikɔ gbedoɖa tɔxu lɔɔ, edɔwavi nyɔnuvi ɖeka ci mɛ gbɔngbɔnvɔn le yí ekannɔ nu nɔ amɛwo do go mì. Ékannɔ nu yí sɔ jinɔ eho sugbɔ nɔ yi gawo. 17 Nyɔnuvi cɛ kplɔ mìwo koɖo Pɔlu do matrɔmatrɔ yí dodoɔ axwa mɔ: “Ŋsu cɛwo nyi Mawu Ejiɖaatɔ lɔ dɔwaviwo yí dradra hwlɛngankpɔkpɔ mɔ lɔ nɔ mí.” 18 Éwa ahan na nɔ ŋkeke sugbɔ. Le vɔvɔnuɔ, evaci kɔ nɔ Pɔlu yí etrɔ kpanŋkɔ yi yí nu nɔ gbɔngbɔn lɔ mɔ: “Ŋnukɔ nɔ eo le Yesu Kristo ŋkɔ mɛ mɔ eo le to le mɛ.” Eyi gbɔngbɔn lɔ to le nyɔnuvi lɔ mɛ do gaxoxo ŋtɔ́ pɛpɛpɛ ji.
19 Ci nyɔnuvi lɔ gawo kpɔ mɔ enu ci yí hɛnnɔ eho vɛ nɔ yewo dahɛn ɔ, wolé Pɔlu koɖo Silasi yí dɔn wo yi nɔ jumɛgawo le fini amɛ sugbɔ bɔnɔ do.* 20 Ci wokplɔ wo yi jumɛga lɔwo gbɔɔ, wonu mɔ: “Ŋsu cɛwo na yí eʒin tɔnkɔ le mìwo ju lɔ mɛ keke denyɔ o, Ʒuifuwo yí wonyi. 21 Kɔnu ciwo yí ese delɔn mɔ mìwo le xɔ gbe nɔ alo awa yí wokplakɔ amɛwo, vɔ mìwo trɔgbɔ nyi Rɔmatɔwo.” 22 Eyi amɛahwa lɔ te je wo ji, jumɛgawo drɛn awu le kɔ nɔ wo yí ɖe gbe mɔ wo le ya wo. 23 Ci woxo wo nywiɖe ɖegbɔɔ, wosɔ wo do gakpa mɛ yí nu nɔ gakpajikpɔtɔ lɔ mɔ yɛ le wa ɖaŋ acɔ wo. 24 Ci wonu ahan ɔ, ésɔ wo sɔ do fini wocɔnɔ nɔ gakpa lɔ sɔwu yí jan wowo fɔwo do acituwo mɛ.
25 Vɔ le zandomɛɔ, Pɔlu koɖo Silasi dokɔ gbe ɖaɖa yí jijiɛ ha yí kanfukɔ Mawu yí gakpamɛnɔtɔwo ɖokɔ to wo. 26 Zeɖeka tɔntɔn ɔ, nyigban hunhun sɛnsinɖe keke gakpa lɔ gɔnmɛɖokpewo hunhun. Ehɔn lɔwo pleŋ can hun zeɖeka; eyi ega ciwo wodo mɛshiamɛ ɖe. 27 Ci gakpajikpɔtɔ lɔ nyɔ yí kpɔ mɔ gakpa lɔ hɔnwo le hunhun ɔ, éɖe ewi ti yí jikɔ awu yiɖeki, ɖo ébukɔ mɔ gakpamɛnɔtɔ lɔwo shi. 28 Vɔ Pɔlu do axwa sɛnsinɖe mɔ: “Ŋgbewu eoɖeki o, ɖo mì pleŋ le elɛ!” 29 Eyi emɔ wo le sɔ kaɖigbanwo vɛ, élɔ ju yí ɖo xɔ lɔ mɛ yí hunhunkɔ kpikpikpi yí cɔn ŋmɛ anyi do ŋkɔ nɔ Pɔlu koɖo Silasi. 30 Ékplɔ wo ti yí biɔ se mɔ: “Mɛganwo, nyi ŋɖo awa yí agan ɔ?” 31 Wonu ni mɔ: “Xɔ̀ Axwetɔ Yesu ji se yí woahwlɛn eo koɖo ao xomɛtɔwo gan.” 32 Eyi wonu Yehowa* nyɔ lɔ nɔ yɛ koɖo mɛ ciwo pleŋ yí le yi xwe mɛ. 33 Ékplɔ wo le ezan lɔ mɛ yí klɔ akpawo nɔ wo. Yɛ goduɔ, yɛ koɖo yi xomu lɔ pleŋ wa ʒinʒindoshimɛ zeɖeka. 34 Ékplɔ wo hɛn yi yi xomɛ yí ɖo ekplɔn nɔ wo yí woɖu nu, eyi yɛ koɖo yi xomɛtɔwo kpɔ jijɔ manumanu, ɖo woxɔ Mawu ji se.
35 Ci eŋ keɔ, jumɛgawo ɖo sɔjawo ɖaɖa nɔ woanu nɔ gakpajikpɔtɔ lɔ mɔ: “Jò ŋsu lɔwo nɔ woayi.” 36 Gakpajikpɔtɔ lɔ nu wowo nyɔwo nɔ Pɔlu mɔ: “Jumɛgawo ɖo amɛwo ɖaɖa mɔ wo le jo míwo koɖo ve lɔwo. Eyi taɖo, míto ayi le fafa mɛ.” 37 Vɔ Pɔlu nu nɔ wo mɔ: “Woxo mì le amɛwo mɛ, kpɔ wodedo hwɛ ɖe mì gbɔxwe o,* gan yí mìtrɔgbɔ nyi Rɔmatɔwo. Wocu mì do gakpa mɛ, ecɛyɛ wojikɔ avaɖe mì ti le bebemɛa? Oo, gbeɖe! Wowoŋtɔwo le va ɖe mì ti.” 38 Sɔja lɔwo vayi nu nyɔ cɛwo nɔ jumɛga lɔwo. Ci wose mɔ Rɔmatɔwo yí ŋsu lɔwo nyiɔ, wovɔn sugbɔ. 39 Eyi taɖo wova yí ɖe kuku nɔ wo. Ci wokplɔ wo ti ɖegbɔɔ, wodo klo nɔ wo mɔ wo le so le eju lɔ mɛ. 40 Vɔ ci woto le gakpa lɔ mɛɔ, woyi Lidi xwe mɛ. Ci wokpɔ nɔviwo yí do ŋsɛn wo ɖegbɔɔ, woso.