Apotruwo Dɔwawawo
13 Enyɔnuɖɛtɔwo koɖo enukplamɛtɔwo le Antiɔshi hamɛ lɔ mɛ. Wowo yí nyi: Barnabasi, Simeɔn ci yí tɔ mɔ Niʒɛ, Lusiwusi ci yí so Sirɛnu, Manaɛn ci ejujikpɔtɔ Erodi na ekpla koɖo Sɔlu. 2 Hwenu wole sɛnsɛndɔ wakɔ nɔ Yehowa* yí bla nuɔ, gbɔngbɔn kɔkɔɛ lɔ nu mɔ: “Mísɔ Barnabasi koɖo Sɔlu do akpo nɔŋ keŋ nɔ woawa edɔ ci ŋyɔ wo nɔ.” 3 Ci wobla nu yí do gbe ɖaɖa ɖegbɔɔ, wosɔ wowo lɔ̀wo da do wo ji yí klan wo yí woyi.
4 Eyi gbɔngbɔn kɔkɔɛ dɔ ŋsu cɛwo yí woyi Selesi yí ɖo tɔjihun so nɔ yí yi Shipru. 5 Ci wovaɖo Salaminu ɔ, wotɔ Mawu nyɔ nunu le Ʒuifuwo nukplaxuwo. Ʒan can kplɔ wo do yí kpekpeɛdo wo nu.
6 Ci wodan to tɔdomɛnyigban lɔ ji pleŋ keke vaɖo Pafosi ɔ, wovado go Ʒuifu ŋsu ɖeka ci yí tɔ mɔ Ba-Yesu. Ényi azetɔnɔ yí gbenyi enyɔnuɖɛtɔ ŋsukantɔ. 7 Énɔnɔ koɖo ejujikpɔtɔ Sɛrʒiwusu Pɔlusu ci yí nyi ŋsu ŋɖɛnyatɔ ɖeka. Ejujikpɔtɔ lɔ yɔ Barnabasi koɖo Sɔlu yí ji veviɖe mɔ yease Mawu nyɔ. 8 Vɔ Elimasi, azetɔnɔ lɔ tɔ yumɛ cici nɔ wo yí teteɛkpɔ mɔ yeawɛ keke nɔ ejujikpɔtɔ lɔ ŋgbexɔ Axwetɔ lɔ ji se o. (Elimasi gɔnmɛ yí nyi azetɔnɔ.) 9 Eyi gbɔngbɔn kɔkɔɛ ɖɔ Sɔlu ci wogbeyɔnɔ mɔ Pɔlu yí ecu ŋkuvi do ji 10 yí nu mɔ: “Oo, eo mɛ ci yí ɖɔ koɖo ŋsukankan koɖo nuvwin hamɛhamɛwo pleŋ, eo Legba vi, ketɔnɔ ènyi nɔ enujɔjɔɛwawawo pleŋ. Dàmi Yehowa* mɔ jɔjɔɛwo dadahɛn ba? 11 Kpɔ ɖa! Yehowa* adɔn eto nɔ eo, ŋkuviwo atɔn nɔ eo yí dagbekpɔ ewe klɛnklɛn na nɔ hwenu ɖe o.” Zeɖeka tɔntɔn ɔ, étɔ enu kpɔkpɔ vlivlivli yí vinvin do do ŋmɛ ni, eyi etɔ trɔtrɔ glogloglo yí jijiɛ mɛ ci yí alé alɔ̀ ni. 12 Ci ejujikpɔtɔ lɔ kpɔ enu ci yí jɔɔ, étrɔ xɔsetɔ. Ðo enu ciwo ekpla so Yehowa* nu jiŋ ni sugbɔ.
13 Pɔlu koɖo yi kpenawo ɖo tɔjihun so Pafosi yí va Pɛga le Panfili. Ʒan yɛtrɔ gbeɖe wo ɖɛ yí yi Ʒerusalɛmu. 14 Vɔ wowo so le Pɛga yí va Antiɔshi le Pisidi. Woyi Ʒuifuwo nukplaxu le Sabatigbe yí nɔ nyinɔnɔ. 15 Ci wohlɛn Ese lɔ koɖo Enyɔnuɖɛtɔwo nyɔwo nɔ mɛ lɔwo ɖegbɔɔ, Ʒuifuwo nukplaxu lɔ jikpɔtɔwo nu ɖaɖa wo mɔ: “Nɔviwo, nɔ nyɔ ɖe le mí shi yí míasɔ do ŋsɛn mɛ lɔwoɔ, mínui fɛɛ.” 16 Eyi Pɔlu so je te yí wa alɔ̀ yí nu mɔ:
“Míwo Izraɛliviwo koɖo míwo ciwo pleŋ yí vɔnnɔ nɔ Mawu, míɖo toŋ. 17 Izraɛli ju cɛ mɛ tɔwo Mawu can mìwo tɔgbiwo keŋ yí na kɔkɔ jukɔn lɔ hwenu wonyi mɛdruwo le Eʒipti nyigban ji. Ésɔ ŋsɛn gangan yitɔ kplɔ wo ti le eju lɔ mɛ. 18 Eyi na nɔ exwe 40 han ɔ, Mawu gbɔn ji ɖɛ nɔ wo nɔ adɛn ciwo wowu le zogbe lɔ ji. 19 Ci egu eju amadrɛ le Kanaan nyigban lɔ ji ɖegbɔɔ, ésɔ nyigban lɔ jo nɔ wo yí enyi cinɔ wowotɔ. 20 Ŋcɛwo pleŋ jɔ le exwe 450 han gblamɛ.
“Yi goduɔ, éna kojoɖotɔwo wo keke vaɖo enyɔnuɖɛtɔ Samiɛli hwenu. 21 Vɔ le ŋcɛwo goduɔ, wobiɔ efyɔ. Eyi Mawu sɔ Sɔlu ci yí nyi Kishi vi yí so Bɛnʒamɛ kɔta mɛ na wo yí eɖu fyɔ na nɔ exwe 40. 22 Ci eɖi so ega jiɔ, ésɔ Davidi ɖo efyɔ nɔ wo. Énu so Davidi nu mɔ: ‘Ŋkpɔ Davidi ci yí nyi Ʒɛse viɛ. Ŋsu cɛ nu jɔ ji nɔŋ, áwa enu ciwo pleŋ yí droŋ.’ 23 Mawu sɔ mɛɖeka le ŋsu cɛ kannu mɛ nɔ ahwlɛn Izraɛli gan shigbe lé eɖo yi gbe nɛ; eyi nyi Yesu. 24 Gbɔxwe mɛ cɛ avaɔ, Ʒan ɖe kunu nɔ Izraɛli jukɔn lɔ pleŋ le jugbaja mɔ, woɖo awa ʒinʒindoshimɛ asɔ dasɛ mɔ yewotrɔ ji mɛ. 25 Vɔ hwenu Ʒan ɖeɖeɛgbɔ nɔ sɛnsɛndɔ yitɔɔ, énu mɔ: ‘Mi yí míbukɔ mɔ nyɛŋnyiɔ? De enyɛ yí nyi mɛ ci míkpɔkɔ emɔ nɔ o, vɔ míkpɔ ɖa! Mɛɖeka le godu nɔŋ gbɔgbɔ yí ŋdeje acu fɔkpakawo le afɔ ni o.’
26 “Nɔviwo, Abrahamu viviɛwo koɖo míwo ciwo yí vɔnnɔ nɔ Mawu, mìwo yí wodo hwlɛngankpɔkpɔ cɛ ŋɛ nɔ. 27 Ðo Ʒerusalɛmu jumɛtɔwo koɖo wowo gawo dejeshi mɛ cɛ o, vɔ hwenu wole kojo ɖokɔ niɔ, wona yí enyɔ ciwo Enyɔnuɖɛtɔwo nu jɔ do ji. Wokɔ gbe yi ji yí hlɛnnɔ enyɔ cɛwo le sabatigbe tɛgbɛɛ. 28 Ci wodekpɔ afɛn ɖe ci yí adɔ woawui can ɔ, wonu nɔ Pilati mɔ yɛ le wui. 29 Eyi ci wowa enu ciwo pleŋ woŋwlɛ ɖɛ so nu ɖegbɔɔ, wokin do aci nu yí vasɔ mlɔ yɔdu* mɛ. 30 Vɔ Mawu fuin so amɛkukuwo mɛ. 31 Mɛ ciwo yí kplɔɛ do so Galile va Ʒerusalɛmu kpɔɛ na nɔ ŋkeke sugbɔ. Mɛ cɛwo yí ɖeɖeɛ kunu so nu nɔ amɛwo yɛ.
32 “Eyi taɖo, eŋɛnywi yí mìnukɔ nɔ mí so egbe ci woɖo nɔ mìwo tɔgbiwo nu. 33 Mawu na yí ecɛ vamɛ keŋkeŋ nɔ mìwo ciwo yí nyi wowo viwo ci efɔn Yesu do agbe shigbe lé woŋwli do ehajiji wema amɛvetɔ mɛ nɛ mɔ: ‘Anyi vi ènyi. Egbɛɔ, ŋtrɔ dao.’ 34 Eyi le nyɔnɔnwi mɛ ci Mawu fuin so amɛkukuwo mɛ yí lankpu yitɔ dagbenyinyɔ gbeɖeɔ, énu mɔ: ‘Nalɔn mí sɔyi mavɔ shigbe lé ŋɖo yi gbe nɔ Davidi yí kankandoji le nu nɛ.’ 35 Ehajiji wema lɔ gbenu hɛnnɛ mɔ: ‘Dàlɔn yí mɛ ci yí le gbeji nɔ eo anyinyɔ o.’ 36 Davidi yɛsɛn Mawu* le yi hwenu. Éku yí woɖyi do fini woɖyi tɔgbiɛwo do yí enyinyɔ. 37 Vɔ mɛ ci yí Mawu fɔn do agbe yɛdenyinyɔ o.
38 “Eyi taɖo nɔviwo, mínya mɔ eyi ji woto yí dra nuvɔnwo sɔsɔke ŋɛdu nɔ mí. 39 Sɔgbe koɖo Moizi Se lɔɔ, wodatɛnŋ amɔ mímɛ le enuwo pleŋ mɛ o. Vɔ mɛɖekpokpui ci yí xɔ seɔ, woakpɔɛ mɔ yɛmɛ sɔ to mɛ cɛ ji. 40 Eyi taɖo míkpɔ nywiɖe keŋ nɔ enu ci woŋwlɛ do Enyɔnuɖɛtɔwo wema mɛ ŋgbeɖyi mí nu o. Woŋwlɛ mɔ: 41 ‘Míwo ciwo yí gbalinɔ nu, míkpɔ ɖa, le jiŋ nɔ mí yí míaku, ɖo ŋwawa dɔ ɖeka le míwo hwenu yí nɔ mɛɖe dre edɔ lɔ mɛ nɔ mí kitokito can ɔ, mídakando ji gbeɖe o.’”
42 Ci woto yí yikɔɔ, mɛ lɔwo ɖe kuku nɔ wo mɔ wo le gbevaxo nuxu so nyɔ cɛwo nu nɔ yewo le Sabati ci yí akplɔɛ do ji. 43 Ci mɛ ciwo yí bɔ do Ʒuifuwo nukplaxu lɔ ka ɖegbɔɔ, Ʒuifuwo koɖo mɛ ciwo yí trɔ Ʒuifu yí nyi Mawu sɛntɔwo sugbɔ kplɔ Pɔlu koɖo Barnabasi do. Ci Pɔlu koɖo Barnabasi xoxoɔ nuxu nɔ woɔ, wodo ŋsɛn wo mɔ wo le kpɔtɔ anɔ xomɛvu Mawu tɔ mɛ.
44 Le Sabatigbe ci yí kplɔɛ do jiɔ, amɛ kankin yí kpɔtɔ yí anyi jukɔn lɔ pleŋ yí va bɔ mɔ yewoase Yehowa* nyɔ. 45 Ci Ʒuifuwo kpɔ amɛahwa lɔɔ, ŋɔku ɖɔ lanmɛ nɔ wo keke wotɔ enyɔkpotuwo nunu keŋ asɔ trɔkpe enyɔ ciwo Pɔlu nukɔ. 46 Eyi Pɔlu koɖo Barnabasi gbe dɔn yí nu nɔ wo mɔ: “Ele veviɖe mɔ woanu Mawu nyɔ lɔ nɔ míwo doŋkɔ, vɔ ci mígbe nyɔ lɔ yí kpɔ mɔ yewodenyi nu akpɔ agbe mavɔɔ, míkpɔ ɖa, mìtrɔ kpe jukɔn bu mɛ tɔwo gbɔ. 47 Ðo Yehowa* yí dɔ mì ci enu mɔ: ‘Ŋsɔ eo nɔ nànyi klɛnklɛn nɔ jukɔnwo yí ahwlɛn amɛwo gan keke sɔyi vɔvɔnu nɔ nyigban lɔ.’”
48 Ci jukɔn bu mɛ tɔwo se enyɔ cɛɔ, ejɔ ji nɔ wo yí wokanfu Yehowa* nyɔ lɔ yí mɛ ciwo pleŋ shi eji nywi le nɔ agbe mavɔ kpɔkpɔ trɔ xɔsetɔwo. 49 Gbesɔ kpe niɔ, Yehowa* nyɔ lɔ kakakɔ doji le eju lɔ pleŋ mɛ. 50 Vɔ Ʒuifuwo vayi kpɔ nyɔnu kpɛnkpin ciwo yí vɔnnɔ nɔ Mawu koɖo ŋsu ŋkuvileji ciwo yí le eju lɔ mɛ yí wodɔ yí amɛwo tɔ yumɛ cici nɔ Pɔlu koɖo Barnabasi yí nya wo ti le wowo ju lɔ mɛ. 51 Eyi taɖo woxuxu afɔkɔ wowotɔwo nɔ anyi kunuɖeɖe nɔ wo keŋ yí so kpe Ikonia. 52 Eyi enukplavi lɔwo kpɔtɔ kpɔkpɔ jijɔ yí ɖɔ koɖo gbɔngbɔn kɔkɔɛ.