Wema Ŋkɔtɔ ci Woŋwlɛ Ðaɖa Korɛntitɔwo
6 Mɛɖe le mí mɛ yí nɔ enyɔ ɖe ɖo gblamɛ nɔ yɛ koɖo yi kpena ɖe, egbe dɔn yí yɔnɔ hwɛ yi do amɛmajɔmajɔwo gbɔ yí denyi le amɛkɔkɔɛwo gbɔa? 2 Alo mídenya mɔ amɛkɔkɔɛwo yí aɖo kojo nɔ xexe lɔ ba? Nɔ enyi míwo yí aɖo kojo nɔ xexe lɔ ɖe, nyi yí taɖo mídesun ji yí kpɔnɔ enyɔ hwɛhwɛwo gbɔɔ? 3 Mídenya mɔ mìwo yí aɖo kojo nɔ mawudɔlawo ba? Ci enyi ahan ɖe, nyi yí taɖo mídatɛnŋ akpɔ agbe cɛ mɛ nyɔwo gbɔɔ? 4 Vɔ nɔ míaɖo kojo so agbeɛ mɛ nyɔwo nu ɖe, mɛ ciwo yí hamɛ lɔ dekpɔnɔ do ŋɖe ji yí mísɔ ɖo kojoɖotɔwoa? 5 Ŋnukɔ ahan keŋ nɔ eŋ akpɛn mí. Ŋɖɛnyatɔ ɖe dele mí mɛ yí asun ji keke aɖo kojo nɔ nɔviɛwo ba? 6 Vɔ nɔvi kplɔkɔ nɔvi yi ehwɛ ŋkɔ le maxɔsetɔwo gbɔ!
7 Le nyɔnɔnwi mɛɔ, míwa fɛn wɛ xoxoxo ci kojoɖoɖo nyɔwo le gblamɛ nɔ mí. Nyi yí taɖo mídalɔn yí woawa enudɔndɔn koɖo míɔ? Nyi yí taɖo mídalɔn yí woatafu mí doɔ? 8 Gan yí míwo le enudɔndɔn wakɔ yí tafukɔ amɛ yí enyi míwo nɔviwo nu míwɛkɔ do ŋtɔkpu!
9 Alo mídenya mɔ amɛmajɔmajɔwo daɖu Mawu Fyɔɖuxu lɔ cinɔ ba? Míŋgbelɔn nɔ woable mí domɛ o.* Matelitɔnɔwo,* vojusɛntɔwo, hashiwatɔwo, ŋsu ciwo gbɔ yí ŋsuwo dɔnnɔ alo ŋsu ciwo dɔnnɔ koɖo ŋsuwo, 10 flafinɔwo, sukanujitɔwo, ahanumunɔwo, amɛzutɔwo* koɖo awoxotɔwo daɖu Mawu Fyɔɖuxu lɔ cinɔ o. 11 Vɔ mɛɖewo le mí mɛ nyi nɛnɛmunɔwo sa, gan wole shi nɔ mí, wowɛ yí mímɛ, woyɔ mí mɔ amɛjɔjɔɛwo le Axwetɔ Yesu Kristo ŋkɔ koɖo mìwo Mawu gbɔngbɔn lɔ mɛ.
12 Wona gbeŋ mɔ mawa enushianu, vɔ de enuwo pleŋ yí wanɔ enywi nɔ amɛ o. Wona gbeŋ mɔ mawa enushianu, vɔ ŋdalɔn yí ŋɖe akpa cɛ nɔŋ o. 13 Ŋɖuɖu li nɔ xodu yí xodu can li nɔ ŋɖuɖu, vɔ Mawu asɔ wo koɖo ve lɔwo trɔ enugbali. Lankpu deli nɔ mateliwawa* o, vɔ Axwetɔ yí eli nɔ yí Axwetɔ can li nɔ lankpu lɔ. 14 Vɔ Mawu fɔn Axwetɔ lɔ so ku yí afɔn mìwo can so ku sɔ to yi ŋsɛn ji.
15 Mídenya mɔ míwo lankpuwo nyi ŋcinuwo nɔ Kristo ba? Ci enyi ahan ɖe, natɛnŋ aɖe Kristo ŋcinuwo keŋ asɔ wo ca koɖo sakabo ŋcinuwoa? Gbeɖe! 16 Mídenya mɔ nɔ mɛɖe sɔ yiɖeki xoca koɖo sakaboɔ, wo koɖo ve lɔ trɔ lankpu ɖeka ba? Ðo Mawu nu mɔ, “wo koɖo ve lɔ atrɔ lankpu kuɖeka.” 17 Vɔ mɛɖekpokpui ci yí sɔ yiɖeki xoca koɖo Axwetɔ lɔɔ, étrɔ enu kuɖeka koɖi le gbɔngbɔn mɛ. 18 Míshi nɔ mateliwawa!* Nuvɔn ɖekpokpui ci amɛ awaɔ, dadahɛn nu le yi lankpu nu o, vɔ mɛ ci yí wakɔ mateli wakɔ nuvɔn do yiŋtɔ lankpu.* 19 Mídenya mɔ, gbedoxɔ yí míwo lankpu lɔ nyi nɔ gbɔngbɔn kɔkɔɛ ci míxɔ so Mawu gbɔ yí ele mí mɛ ba? Gbesɔ kpe niɔ, mídenyi míwoŋtɔwo tɔ o. 20 Ðo efɛn gangan yí wocu yí sɔ xwle mí. Eyi taɖo, mízan míwo lankpuwo asɔ kanfu Mawu.