Wema Ŋkɔtɔ ci Woŋwlɛ Ðaɖa Korɛntitɔwo

10 Ecɛyɛ nɔviwo, ŋji mɔ míanya mɔ mìwo tɔgbiwo pleŋ yí nɔ azɔ lɔ gɔnmɛ yí gbeso axu lɔ. 2 Eyi woʒin wo pleŋ do shi mɛ le Moizi mɛ to azɔ lɔ koɖo axu lɔ ji. 3 Wo pleŋ ɖu gbɔngbɔn mɛ ŋɖuɖu ɖekɛ lɔ 4 yí wo pleŋ nu gbɔngbɔn mɛ shi ɖekɛ lɔ. Ðo wonu shi le gbɔngbɔn mɛ kpe ci yí kplɔ wo do mɛ, ekpe lɔ yí nyi* Kristo. 5 Ele ahan gan, denyi wo pleŋ nu yí kpe nɔ Mawu o, ɖo éna yí woku le zogbe lɔ ji.

6 Enu cɛwo nyi kpɔwɛ nɔ mì nɔ enuvɔnwo ŋgbedro mì shigbe lé edro wo hannɛ o. 7 Ahanke mìdeɖo asɛn vojuwo shigbe lé mɛɖewo wɛ le wo mɛ nɛ o; shigbe lé Enuŋwlɛŋwlɛ lɔwo nui do nɛ mɔ: “Jukɔn lɔ nɔ nyinɔnɔ yí ɖu yí nu. Yi goduɔ, woso yí mu munu.” 8 Nɛnɛke mìdeɖo awa mateli* shigbe lé mɛɖewo wa mateli* le wo mɛ yí amɛ 23 000 blebu ku le wo mɛ le ŋkeke kuɖeka ji nɛ o. 9 Ahanke mìdeɖo ate Yehowa* kpɔ o, shigbe lé mɛɖewo ti kpɔ le wo mɛ nɛ yí edanwo ɖu wo yí woku. 10 Ahanke mìdeɖo ato nyɔ shigbe lé mɛɖewo to nyɔ le wo mɛ yí mawudɔla ci yí wunɔ amɛ wu wo nɛ o. 11 Ŋciwo yí jɔ do wo ji nyi kpɔwɛ nɔ mì yí woŋwlɛ wo ɖɛ keŋ asɔ kanxle mìwo ciwo le vɔvɔnu nɔ xexe lɔ.

12 Eyi taɖo mɛ ci yí bukɔ mɔ yele te le kpɔ nywiɖe nɔ ŋgbejuin o. 13 Tetekpɔ ɖe dava mí ji to akpo nɔ ci yí vanɔ agbetɔwo pleŋ ji o, gan egbejinɔtɔ yí Mawu nyi yí dalɔn yí woate mí kpɔ sɔwu ci mɛ míatɛnŋ ado ji le o. Vɔ nɔ tetekpɔ lɔ vaɔ, ána mí emɔ ci ji míato keŋ atɛnŋ ado ji le mɛ.

14 Eyi taɖo anyi xlɔ veviwo, míshi nɔ voju* sɛnsɛn. 15 Ŋxokɔ nuxu nɔ mí shigbe mɛ ciwo yí senɔ enu gɔnmɛ nɛ; míwoŋtɔwo míkpɔ nyɔ ci ŋnukɔ ɖa. 16 Nɔ mìnu enu le shicu kɔnkpu ci ji mìdo akpe do* mɛ ɖe, denyi Kristo hun lɔ yí mìmama ahan ba? Nɔ mìɖu kpɔnnɔ ci mìŋɛ ɖe, denyi Kristo lankpu lɔ yí mìmama ahan ba? 17 Kpɔnnɔ kuɖeka yí li yí ci mìsugbɔ can ɔ, mìnyi lankpu kuɖeka, ɖo mì pleŋ yí ɖukɔ kpɔnnɔ ɖeka lɔ.

18 Míkpɔ enu ci Izraɛliviwo wanɔ ɖa: Ci woɖunɔ enu ciwo wosɔ sa vɔn do avɔnsakpe lɔ ji ɖe, dele shigbe woɖuɖuɔ nu koɖo Mawu nɛ ba? 19 Ecɛyɛ ɖe, enyɔ ci ŋjikɔ anuɔ? Mɔ ŋci wosɔ sa vɔn nɔ voju nyi ŋɖea alo voju lɔ nyi ŋɖe? 20 Oo, vɔ nyɔ ci ŋjikɔ anu yí nyi mɔ vɔnsa ciwo yí jukɔnwo wakɔɔ, gbɔngbɔnvɔnwo yí wowawa wo nɔ, denyi Mawu yí wowawa wo nɔ o; yí ŋdeji mɔ míaca ka koɖo gbɔngbɔnvɔnwo o. 21 Mídatɛnŋ anukɔ nu le Yehowa* kɔnkpu mɛ yí agbenukɔ nu le gbɔngbɔnvɔnwo kɔnkpu mɛ o yí mídatɛnŋ aɖu nu le “Yehowa* kplɔn nu” yí agbeɖu nu le gbɔngbɔnvɔnwo kplɔn nu o. 22 Alo ‘mìwɛkɔ ahan keŋ nɔ Yehowa* ahwanŋ’ yɔa? Mìɖo ŋsɛn wuia?

23 Wona gbe mɔ wo le wa enushianu, vɔ de enuwo pleŋ yí wanɔ enywi nɔ amɛ o. Wona gbe mɔ wo le wa enushianu, vɔ de enuwo pleŋ yí donɔ ŋsɛn amɛ o. 24 Mɛɖe ŋgbejijiɛ yiŋtɔ ɖekɛ nyɔna o, vɔ le ji nɔ mɛbuwo can.

25 Míɖu elan ɖekpokpui ci wosanɔ le afi mɛ yí míŋgbebiɔ nyɔ ɖe se o, sɔ kudo ayexa míwotɔ ŋci. 26 Ðo “Yehowa* tɔ yí nyi nyigban lɔ koɖo enu ciwo pleŋ yí le ji.” 27 Nɔ maxɔsetɔ ɖe yɔ mí yí mílɔn mɔ yewoayi gbɔɔ, míɖu ŋɖekpokpui ci asɔ ɖo ŋkɔ nɔ mí yí míŋgbebiɔ nyɔ ɖe se o, sɔ kudo míwo yexa ŋci. 28 Vɔ nɔ mɛɖe nu nɔ mí mɔ, “Wosɔ ŋcɛ sɔ sa vɔn nɔ vojuwoɔ,” míŋgbeɖui o, sɔ kudo mɛ ci yí nu ahan nɔ mí sɔ kpe nɔ ayexa ŋci. 29 Denyi míwo yexa ŋnukɔ o, vɔ amɛ ɖetɔ lɔ yexa yí ŋnukɔ. Nyi yí taɖo mɛbu yexa avaɖo kojo nɔŋ so ŋci ŋvo yí awa nuɔ? 30 Nɔ ŋdo akpe nɔ Mawu gbɔxwe yí ɖu ŋɖuɖu lɔ ɖe, nyi yí taɖo mɛbu avanukɔ enyɔdɔndɔn so ŋnu nɔ ŋci ji ŋdo akpe doɔ?

31 Eyi taɖo, nɔ míɖuɖuɔ alo nunuɔ alo wakɔ nubu ɖeɔ, míwa wo pleŋ nɔ Mawu kanfukanfu. 32 Míŋgbenyi ŋci yí adɔ yí Ʒuifuwo, Grɛkitɔwo koɖo Mawu hamɛ lɔ aklɛn afɔ o. 33 Eyi ŋtekɔkpɔ mɔ mawa, ŋjekɔ agbla mɔ mawɛ nɔ anyi nu akpe nɔ amɛshiamɛ le enushianu mɛ, ŋdejijiɛ nyɛŋtɔ nyɔna o, vɔ ŋjijiɛ nyɔna nɔ amɛ sugbɔ keŋ nɔ woahwlɛn wo gan.