Wema Ŋkɔtɔ ci Woŋwlɛ Ðaɖa Korɛntitɔwo

9 Ŋdele vovo mɛ ba? Denyi apotru ŋnyi ba? Ŋdekpɔ mìwo Xwetɔ Yesu ba? De míwo yí nyi edɔ ci ŋwa le Axwetɔ lɔ mɛ ba? 2 Nɔ ŋdenyi apotru nɔ mɛbuwo can ɔ, ŋnyi nɔ míwo yɛ, ɖo míwo yí nyi kpeɖoji ci yí dasɛ mɔ ŋnyi apotru le Axwetɔ lɔ mɛ.

3 Enyɔ ci ŋjikɔ anu asɔ hwlɛn ta nɔ nyɛɖeki le mɛ ciwo yí dodoɔ hwɛŋ gbɔ ke: 4 Mìdeɖo acɛ yí aɖu alo anu ba? 5 Mìdeɖo acɛ yí aɖe nyɔnu xɔsetɔ yí akplɔnɔ mì do shigbe lé apotru kpɛtɛwo koɖo Axwetɔ nɔviɛwo sɔ kpe nɔ Sefasi* wɛ nɛ ba? 6 Alo nyɛ koɖo Barnabasi ɖekɛ yí ɖogbe awa dɔ gbɔxwe aɖu nua? 7 Sɔja ci yí zannɔ yiŋtɔ ho do ahwa mɛɔ? Mi yí donɔ vɛnci yí deɖunɔ sɛnsɛn yitɔɔ? Alo mi yí nyinɔ elanwo yí denunɔ wowo nɔshuɔ?

8 Agbetɔ susu yí ŋzan yí sɔ nukɔ nyɔ cɛwoa? Alo Ese lɔ can denu nyɔ cɛwo ba? 9 Ðo woŋwlɛ do Moizi Se lɔ mɛ mɔ: “Dèɖo abla nu nɔ nyibusu ci èzan yí sɔ tokɔ jinuku o.” Nyibusuwo ɖekɛ tɔ yí Mawu bukɔ kpɔa? 10 Alo mìwotɔ ebukɔ kpɔ taɖo yí nu ahan a? Le nyɔnɔnwi mɛɔ, mìwo nyɔna taɖo yí woŋwlɛ nyɔ cɛ, ɖo mɛ ci yí dekɔ agble koɖo mɛ ci yí tokɔ jinuku wɛni mɔ yewoavakpɔ ɖe axɔ le mɛ.

11 Ci mìdo gbɔngbɔn mɛ nuwo do mí mɛ ɖe, enudɔndɔn enyi nɔ míkpedo mì nu koɖo gbaza mɛ nuwoa? 12 Nɔ mɛbuwo ɖo acɛ yí abiɔ enu cɛwo mí ɖe, mìwo deɖo acɛ sɔwu ba? Gan mìdezan acɛ ŋtɔ́ o, vɔ mìdo ji le enuwo pleŋ mɛ nɔ mìŋgbewa ŋɖe yí asɔ cu emɔ nɔ eŋɛnywi ci yí kuso Kristo lɔ nu o. 13 Mídenya mɔ mɛ ciwo yí wanɔ dɔ kɔkɔɛwo le gbedoxɔ lɔ mɛ ɖunɔ enu ciwo yí le gbedoxɔ lɔ mɛ ba yí mɛ ciwo yí wanɔ dɔ le avɔnsakpe lɔ gbɔ xɔnɔ akpaxwe ɖe nɔ enu ciwo wosɔ sa vɔn do avɔnsakpe lɔ ji ba? 14 Axwetɔ lɔ can nu nɔ mɛ ciwo yí drakɔ eŋɛnywi lɔ mɔ, eŋɛnywi lɔ yí akpɔ wowo ʒanwo gbɔ nɔ wo.

15 Vɔ ŋdezan ɖekɛ le acɛ ŋtɔ́wo mɛ o. Le nyɔnɔnwi mɛɔ, ŋdeŋwlɛkɔ ŋcɛwo nɔ míawɛ ahan nɔŋ o, anyɔ mɔ naku sɔwu mɔ woaxɔ acɛ ci ŋɖo yí sɔ yikɔ go le ŋshi! 16 Nɔ ŋdrakɔ eŋɛnywi lɔɔ, de eyi taɖo nayi go o, ɖo edɔ enyi yí le kɔ nɔŋ. Ɛɛ, babɛɛ nɔŋ nɔ ŋdedra eŋɛnywi lɔ o! 17 Nɔ ŋwakɔ cɛ koɖo xomɛɔ, naxɔ fɛncu; vɔ nɔ dedroŋ gbɔxwe ŋwɛkɔ can ɔ, edɔ enyi yí wodɔŋ. 18 Ecɛyɛ ɖe, nyi yí nyi anyi fɛncuɔ? Eyi nyi mɔ, nɔ ŋdradra eŋɛnywi Iɔɔ, ŋɖo adrɛ gbali keŋ nɔ nyɛŋgbewa afɛn azan acɛ ci ŋɖo yí sɔ drakɔ eŋɛnywi lɔ o.

19 Ci ŋnyi mɛ ci yí le vovo mɛ can ɔ, ŋsɔ nyɛɖeki wa hwashi nɔ amɛwo pleŋ keŋ atɛnŋ akpedo amɛ sugbɔ nu lé nakpe ji do. 20 Ŋsɔ nyɛɖeki trɔnɔ Ʒuifu le Ʒuifuwo mɛ keŋ atɛnŋ akpedo Ʒuifuwo nu. Ŋsɔ nyɛɖeki trɔnɔ esejiwatɔ le mɛ ciwo yí wanɔ do ese lɔ ji mɛ keŋ atɛnŋ akpedo mɛ ciwo yí wanɔ do ese lɔ ji nu, ci nyɛŋtɔ ŋdele ese lɔ gɔnmɛ can. 21 Ci ŋwanɔ do Mawu se ji yí gbele Kristo se lɔ gɔnmɛ can ɔ, ŋtrɔ mɛ ci yí deɖo ese o le mɛ ciwo yí deɖo ese mɛ keŋ atɛnŋ akpedo mɛ ciwo yí deɖo ese nu. 22 Ŋsɔ nyɛɖeki trɔnɔ mɛ ci yí gbɔjɔ le mɛ ciwo yí gbɔjɔ mɛ keŋ atɛnŋ akpedo mɛ ciwo yí gbɔjɔ nu. Ŋsɔ nyɛɖeki trɔnɔ enuwo pleŋ nɔ amɛ vovovowo pleŋ keŋ atɛnŋ ahwlɛn mɛɖewo gan le wo mɛ dandandan. 23 Vɔ eŋɛnywi lɔ ŋci yí ŋwanɔ enuwo pleŋ do keŋ atɛnŋ adrɛ nɔ amɛwo.

24 Mídenya mɔ amɛ sugbɔ yí lɔnɔ ju gan yí enyi amɛ kuɖeka kpaŋ yí xɔnɔ fɛncu lɔ ba? Mílɔ ju lɔ keŋ aɖu ji. 25 Mɛɖekpokpui ci yí wakɔ ehwlɛn ɖunɔ yiɖeki ji le nushianu mɛ, vɔ wowɛni ahan keŋ axɔ ejiɖuɖukuku ci yí adahɛn, gan ejiɖuɖukuku ci yí dedanahɛn yí mìwo axɔ. 26 Eyi taɖo ŋdeshikɔ eju shigbe mɛ ci yí denya fini eyikɔ nɛ o yí ŋdedada ekɔn do hahatu mɛ o; 27 vɔ ŋxokɔ anyi lankpu* yí sɔ wa hwashi keŋ nɔ nyɛŋgbedra enyɔ lɔ nɔ mɛbuwo ɖegbɔ keŋ yí Mawu avagbe nyɛŋtɔ o.*