Apotruwo Dɔwawawo
7 Avɔnsatɔ gangantɔ lɔ biɔɛ se mɔ: “Nyɔnɔnwi yí nyɔ cɛwo nyia?” 2 Etiɛni nu do nu mɔ: “Nɔviwo, danyɛwo míɖo toŋ. Mawu gangan lɔ dasɛ yiɖeki nɔ mìwo tɔgbi Abrahamu hwenu ele Mezopotami gbɔxwe avayi ci Xaran. 3 Mawu nu ni mɔ: ‘Sò le ao ju mɛ koɖo ao mɛwo gbɔ yí ayi eju ci nadasɛ nɔ eo mɛ.’ 4 Eyi eso le Kaldeatɔwo ju mɛ yí vaci Xaran. Le edalɔ ku goduɔ, Mawu na evaci eju cɛ ci mɛ míle gbɛ. 5 Vɔ dena cinɔnu ɖe yi le eju lɔ mɛ o, oo dena fiɖe yi keke asɔ afɔ da do kpetii o, gan etrɔgbɔ ɖo gbe ni mɔ yeasɔ nyigban lɔ jo nɔ yɛ koɖo viviɛwo nɔ anyi wowotɔ; vɔ dewa evi ɖɛ hwenɔnu o. 6 Mawu nu ni hɛnnɛ mɔ, viviɛwo anyi mɛdruwo le mɛbuwo ju mɛ. Eju lɔ mɛ tɔwo asɔ wo sɔ wa hwashiwo yí aɖe fun nɔ wo na nɔ exwe 400. 7 Mawu mɔ ‘Naɖo kojo nɔ jukɔn ŋtɔ́ ci yí asɔ wo sɔ wa hwashi; eyi le ŋcɛwo goduɔ, woato so eju lɔ mɛ yí avasɛnŋ le texwe cɛ.’
8 “Éwa evososo nublabla koɖi hɛnnɛ, eyi evaji Izaki yí so vo ni le ŋkeke amɛnyitɔ lɔ gbe. Izaki vaji Ʒakɔbu yí Ʒakɔbu vaji* ŋsuvi* 12 ciwo yí vanyi xomu 12 lɔwo. 9 Eyi Ʒozɛfu fofoɔwo ku ŋɔ Ʒozɛfu yí sɛ do Eʒiptitɔwo, vɔ Mawu le koɖi. 10 Éhwlin gan le yi funkpekpewo pleŋ mɛ yí wa xomɛvu ni yí na nunya yi yí yi nu jeŋ nɔ Eʒipti fyɔ Faraɔn yí esɔɛ keŋ nɔ akpɔ Eʒipti ju lɔ koɖo yi xomu lɔ pleŋ ji. 11 Vɔ eju vato le Eʒipti lɔ pleŋ koɖo Kanaan, ɛɛ efunkpekpe gangan ɖeka va yí mìwo tɔgbiwo degbekpɔ ŋɖe aɖu o. 12 Vɔ Ʒakɔbu se mɔ ŋɖuɖu* le Eʒipti. Eyi edɔ mìwo tɔgbiwo ɖaɖa ŋkɔtɔ. 13 Ʒozɛfu vadasɛ yiɖeki nɔ fofoɔ lɔwo ci wovayi zevetɔ, eyi Faraɔn vajeshi Ʒozɛfu xomu ɖɛ. 14 Ʒozɛfu do ŋɛ ɖaɖa mɔ, wo le yɔ ye daye Ʒakɔbu koɖo ye mɛwo pleŋ so Kanaan nyigban ji nɔ woava. Wo pleŋ wa agbetɔ* 75. 15 Eyi Ʒakɔbu vayi ci Eʒipti, hunnɔtɔxu eku do nɛ yí mìwo tɔgbiwo can ku do nɔ. 16 Wosɔ wo yi Sishɛmu yí ɖyi wo do yɔdu mɛ. Abrahamu yí sɔ eho xwle yɔdu cɛ le Hamɔ viwo shi le Sishɛmu.
17 “Ci ekpɔtɔ hwɛɖeka yí egbe ci Mawu ɖo nɔ Abrahamu avamɛɔ, Izraɛliviwo va sugbɔ doji haan le Eʒipti. 18 Eyi efyɔ bu vakpakpa nɔ Eʒipti, vɔ yɛdejeshi Ʒozɛfu ɖɛ o. 19 Efyɔ cɛ ve xomɛ koɖo mìwo mɛwo yí ʒin vidawo ji mɔ, wo le tashi wowo viwo ɖɛ nɔ woaku. 20 Hwenɔnu yí woji Moizi. Ényɔ vi taŋ* yí wodo anɔ ni* na nɔ wleci amɛtɔn le dalɔ xwe mɛ. 21 Vɔ ci wotashi ɖɛɔ,* Faraɔn vi nyɔnuvi vasɔɛ yí hin shigbe eviɛ ŋtɔ nɛ. 22 Eyi wokpla Eʒiptitɔwo nunyawo pleŋ Moizi. Le nyɔnɔnwi mɛɔ, éɖo ŋsɛn le nuxuxoxo koɖo wana mɛ.
23 “Ci eɖo exwe 40-ɔ, édrui mɔ* yeayi ji ye nɔviye Izraɛliviwo kpɔ.* 24 Ci ekpɔ yí woɖeɖeɛ fun nɔ Izraɛlivi ɖeka do ŋɖemajɔ jiɔ, éxɔ nɔ mɛ ci wotafukɔ lɔ yí wu Eʒiptitɔ lɔ yí sɔ ɖe ehlɔn ni. 25 Ébukɔ mɔ ye nɔviyewo akpɔɛ mɔ Mawu yí to ye ji yí hwlɛnkɔ yewo gan, vɔ wowo dekpɔɛ ahan o. 26 Yɛ ŋkegbuɔ, ékpɔ wowoɖeɖewo le evu wakɔ. Eyi etekpɔ mɔ yeaɖa wo nɔ fafa ani yí nu mɔ: ‘Kinyɛwo, amɛ ɖekɛwo mínyi, nyi yí taɖo míle evu wakɔɔ?’ 27 Vɔ mɛ ci yí tafukɔ yi kpena do cucu Moizi ɖaɖa yí nu mɔ: ‘Mi yí sɔ eo sɔ ɖo ega koɖo kojoɖotɔ nɔ mìɔ? 28 Èjikɔ awu nyɛ can shigbe lé èwu Eʒiptitɔ lɔ do esɔ nɛa?’ 29 Ci Moizi se ahan ɔ, éshi vayi ci Madian yí nyi mɛdru le nɔ yí ji evi ŋsuvi amɛve.
30 “Exwe 40 goduɔ, mawudɔla ɖeka dasɛ yiɖeki nɔ Moizi le zogbeji le Sinai To lɔ ji le ŋjaci ɖeka ci yí bibiɛ ezo mɛ. 31 Ci Moizi kpɔɛɔ, ékpacɛ. Vɔ ci eteyi mɔ yeakpɔ enu ci yí jɔjɔɔ, ése Yehowa* gbe mɔ: 32 ‘Enyɛ yí nyi tɔgbiowo Mawu, Abrahamu Mawu, Izaki Mawu koɖo Ʒakɔbu Mawu.’ Eyi Moizi tɔ vɔnvɔn yí degbegbe dɔn mɔ yeaglo enu lɔ kpɔ o. 33 Yehowa* nu ni mɔ: ‘Ðè ao fɔkpawo, ɖo texwe ci èle te leɔ, texwe kɔkɔɛ yɔ. 34 Ɛɛ, ŋkpɔ lé wododoɔ aya nɔ anyi mɛwo do le Eʒipti. Ŋse vevisese xwadodo wowotɔwo yí ŋva keŋ ahwlɛn wo gan. Ecɛyɛɔ, và madɔ eo ɖaɖa Eʒipti.’ 35 Moizi cɛ ci wogbe yí nu mɔ: ‘Mi yí sɔ eo sɔ ɖo ega koɖo kojoɖotɔɔ?’ eyi lɔ taŋ yí Mawu to mawudɔla ci yí dasɛ yiɖeki ni le ŋjaci lɔ mɛ ji yí ɖui ɖaɖa nɔ anyi ega koɖo hwlɛngantɔ. 36 Ŋsu cɛ yí kplɔ wo ti le Eʒipti yí wa enujiŋ gangan hamɛhamɛwo le Eʒipti, le Axu Jin lɔ mɛ koɖo le zogbeji na nɔ exwe 40.
37 “Moizi cɛ yí nu nɔ Izraɛliviwo mɔ: ‘Mawu asɔ enyɔnuɖɛtɔ ɖeka le míwo nɔviwo mɛ nɔ mí yí ale shigbe enyɛ nɛ.’ 38 Eyi nyi mɛ ci yí nɔ Izraɛliviwo mɛ le zogbeji sɔ kpe nɔ mawudɔla ci yí xo nuxu ni le Sinai To lɔ ji yí gbexo nuxu nɔ mìwo tɔgbiwo hɛnnɛ. Moizi lɔ ke yí xɔ eŋɛdu kɔkɔɛ ciwo yí nanɔ agbe yí sɔ wo nɔ mí. 39 Mìwo tɔgbiwo deji mɔ yewoaɖo to yi o, vɔ wogbi yí trɔ yi Eʒipti le wowo jiwo mɛ, 40 ci wonu nɔ Arɔn mɔ: ‘Wà mawuwo nɔ mì nɔ woanɔ ŋkɔ nɔ mì, ɖo mìdenya ŋci yí jɔ do Moizi ŋtɔ́ ci yí kplɔ mì ti le Eʒipti ji o.’ 41 Eyi womɛ̀ legba ɖeka ci yí le shigbe nyibuvi nɛ hwenɔnu yí sa avɔnwo ni. Edɔ ciwo wowoŋtɔwo sɔ alɔ̀ wa tɔ eji jɔjɔ nɔ wo. 42 Eyi taɖo Mawu trɔ ŋgbe do wo yí tashi wo yí wosɛn jeŋkwi mɛ wleciviwo, shigbe lé woŋwli do Enyɔnuɖɛtɔwo wema mɛ nɛ mɔ: ‘Oo Izraɛliviwo, denyi enyɛ yí míwu elanwo nɔ yí wa vɔnsawo nɔ le zogbe lɔ ji na nɔ exwe 40 o. 43 Vɔ Moloki zava koɖo mawu Refan wlecivi do yí míkplɔ. Mísɔ wo sɔ mɛ̀ vojuwo keŋ yí tɔ sɛnsɛn. Wowo yí míwa vɔnsa lɔwo nɔ. Eyi taɖo, nana yí woakplɔ mí yi hwashigbemɛ le keke Babiloni godu ɖaa.’
44 “Mìwo tɔgbiwo ɖo zava ci yí dasɛ mɔ Mawu le koɖo wo le zogbe lɔ ji. Moizi wa zava lɔ pɛpɛpɛ shigbe lé Mawu nui ni do nɛ sɔgbe koɖo ŋci ekpɔ. 45 Mìwo tɔgbiwo kɔ zava lɔ yí wowo koɖo Ʒozue hin yi nyigban ci ji Mawu nya jukɔnwo si le le ŋkɔ nɔ wo. Zava lɔ nɔ hunnɔ keke vaɖo Davidi hwenu. 46 Davidi nu kpe nɔ Mawu yí ebiɔ gbe mɔ, yeacu xɔ nɔ Ʒakɔbu Mawu lɔ. 47 Vɔ denyi eyi vacui o, Salomɔ yí vacui. 48 Ele ahan gan, Ejiɖaatɔ lɔ denɔnɔ exɔ ciwo wosɔ alɔ̀ wa mɛ o, shigbe lé enyɔnuɖɛtɔ lɔ nui nɛ mɔ: 49 ‘Yehowa* nu mɔ, jeŋkwi yí nyi anyi fyɔʒinkpin yí nyigban nyi afɔɖoxu nɔŋ. Exɔ ci han mímɔ yewoacu nɔŋ ɔ? Alo fini yí nagbɔn domɛ leɔ? 50 Enyɛ yí wa ŋcɛwo pleŋ, alo?’
51 “Tonumasetɔwo, eji mɛ sɛnŋ nɔ mí yí mígbetri to. Mídesenɔ tonu nɔ gbɔngbɔn kɔkɔɛ lɔ gbeɖe o. Enu ci míwo tɔgbiwo waɔ, eyi lɔ ke míwakɔ. 52 Enyɔnuɖɛtɔ ci yí míwo tɔgbiwo dedo aya nɔɔ? Ɛɛ, wowu mɛ ciwo yí nu amɛjɔjɔɛ ci yí avava nyɔ ɖɛ. Ecɛyɛɔ, míwo yí vanyi mɛ ciwo yí sɛ yí gbesɔ wu. 53 Míwo yí woto mawudɔlawo ji yí sɔ Ese lɔ jo nɔ, vɔ mídewa do ji o.”
54 Ci wose nyɔ cɛwoɔ, dɔmɛzi wa wo haan yí wotɔ aɖukli ɖuɖu do nu. 55 Vɔ ci gbɔngbɔn kɔkɔɛ ɖɔ Etiɛni yɛɔ, églo jeŋkwi kpɔ juun yí kpɔ kanfukanfu Mawu tɔ koɖo Yesu yí ele te le ɖushi mɛ nɔ Mawu. 56 Eyi enu mɔ: “Kpɔ ɖa! Ŋkpɔ jeŋkwi hun yí Agbetɔvi lɔ le te le ɖushi mɛ nɔ Mawu.” 57 Eyi wodo axwa cicici yí sɔ alɔ̀wo cu etowo yí wo pleŋ lun do ji zeɖeka. 58 Yi goduɔ, wokplɔɛ yi eju lɔ godu yí tɔ ekpe xuixui. Kunuɖetɔ ciwo yí do hwɛ yi ɖe awu jitɔ wowotɔwo da do afɔ gbɔ nɔ ɖajɛvi ɖeka ci yí tɔ mɔ Sɔlu. 59 Ci wole ekpe lɔ xokɔ Etiɛni ɔ, éɖe kuku nɔ Yesu mɔ: “Axwetɔ Yesu, xɔ̀ anyi gbɔngbɔn.” 60 Eyi eje klo ji yí do axwa sɛnsinɖe mɔ: “Yehowa,* ŋgbedo hwɛ wo nɔ nuvɔn cɛ o.” Enyɔ lɔ enu ɖegbɔ ahan vɔɔ, yí ku.