Wema Ŋkɔtɔ ci Woŋwlɛ Ðaɖa Korɛntitɔwo

13 Nɔ ŋdonɔ egbe ciwo yí agbetɔwo donɔ yí donɔ egbe ciwo yí mawudɔlawo donɔ hɛnnɛ gan yí ŋdelɔnnɔ amɛɔ, anyi ŋle shigbe gasu alo yawa ci yí ɖyiɖyiɛ gbe sɛnsinɖe nɛ. 2 Nɔ enyɔnunuɖɛ nunana le ŋshi yí ŋmɔŋje enyɔwlawla kɔkɔɛwo pleŋ mɛ yí jeshi enuwo pleŋ yí xɔse gangan nɔŋ keke ŋɖo ŋsɛn yí ate etowo swi, gan yí ŋdeɖo lɔnlɔn ɔ, anyi ŋdenyi ŋɖekɛ o.* 3 Eyi nɔ ŋzan anyi nuwo pleŋ yí sɔ na ŋɖuɖu mɛbuwo yí sɔ nyɛŋtɔ lɔ pleŋ jo keŋ atɛnŋ ageze, gan yí ŋdeɖo lɔnlɔn ɔ, ele ɖekɛ dele mɛ nɔŋ o.

4 Lɔnlɔn gbɔnnɔ ji ɖɛ yí fanɔ xomɛ. Lɔnlɔn dehwannɔŋ o, dewinɔ nu mɛ o, deyinɔ go o, 5 dewanɔ enumanyɔmanyɔ o,* dejinɔ yiɖekɛ tɔ o, dedonɔ dɔmɛzi o, delenɔ amɛ do xomɛ o.* 6 Dekpɔnɔ jijɔ do enumajɔmajɔwawa nu o, vɔ nyɔnɔnwi nu ekpɔnɔ jijɔ do. 7 Lɔnlɔn denanɔ ta gbeɖe o, éxɔnɔ enuwo pleŋ ji se, ékpɔnɔ emɔ nɔ nuwo pleŋ, édonɔ ji le enuwo pleŋ mɛ.

8 Lɔnlɔn devɔnɔ gbeɖe o. Vɔ enyɔnunuɖɛ nunanawo avavɔ; egbe hamɛhamɛwo dodo avaɖo te; enunyanya avavɔ. 9 Ðo sɛnxu li nɔ enu ciwo mìjeshi ɖɛ yí sɛnxu gbeli nɔ enyɔ ciwo mìnunuɔ ɖɛ. 10 Vɔ nɔ enu ci yí le blebu lɔ vaɖoɔ, woaɖe enu ci sɛnxu li nɔ lɔ swi. 11 Hwenu ŋnyi vihwɛɔ, ŋxonɔ nuxu shigbe vihwɛ nɛ, ŋbunɔ tamɛ kpɔ shigbe vihwɛ nɛ yí gbeɖenɔ susu shigbe vihwɛ nɛ; vɔ ecɛyɛ ci ŋvashin ɔ, ŋtashi vihwɛ mɛ nuwo. 12 Ðo mìkpɔkpɔ enuwo vlivlivli to ega weni mɛ yɛ; vɔ hwehunnɔnuɔ, mìavakpɔ wo ŋmɛŋmɛ. Kakacɛɔ, enu kankin yí ŋjeshi ɖɛ, vɔ navajeshi wo vɛ* shigbe lé wojeshiŋ ɖɛ nywiɖe nɛ. 13 Vɔ enu amɛtɔn cɛwo yí akpɔtɔ ani: xɔse, emɔkpɔkpɔ koɖo lɔnlɔn; gan lɔnlɔn yí gangan wu wo pleŋ.