Wema Amɛvetɔ ci Woŋwlɛ Ðaɖa Korɛntitɔwo
12 Ŋɖo ayi go. Ci ele ɖe dele mɛ can ɔ, naxo nuxu so ŋtegannukpɔkpɔ jiŋ Axwetɔ lɔ tɔwo koɖo enu ciwo yí edasɛ nɔŋ nu. 2 Ŋjeshi ŋsu ɖeka ɖɛ ci yí le ekacaca mɛ koɖo Kristo. Ewa exwe 14 vayi yɛ yí wokɔɛ yi jeŋkwi amɛtɔntɔ lɔ mɛ. (Ŋdenya nɔ éle gbaza mɛ alo dele gbaza mɛ o, vɔ Mawu nya.) 3 Ɛɛ, ŋjeshi ŋsu ŋtɔ́ ɖɛ. (Ŋdenya nɔ éle gbaza mɛ alo dele gbaza mɛ o, vɔ Mawu nya.) 4 Wokɔɛ yi paradiso mɛ yí ese enyɔ ciwo yí wodatɛnŋ anu o, wodena gbe mɛɖe mɔ yɛ le nu enyɔ lɔwo hɛnnɛ o. 5 Nayi go do ŋsu ŋtɔ́ nu, vɔ ŋdayi go do nyɛŋtɔ nu o, anyi gbɔjɔgbɔjɔwo ɖekɛ yí nasɔ yi go. 6 Nɔ ŋji mɔ nayi go can ɔ, ŋdanyi xlunɔ o, ɖo nyɔnɔnwi yí nanu, vɔ ŋdeji mɔ nawɛ ahan keŋ nɔ mɛɖe avakanfuŋ sɔwu lé ŋle do yí ekpɔkpɔ alo enyɔ ciwo yí eseseɛ so ŋgbɔ o. 7 Ŋgbenyi enujiŋ gangan ciwo ŋkpɔ kpoŋ yí woakanfuŋ nɔ o.
Nɔ nyɛŋgbevagangan nyɛɖeki ɖoɖuɔ, wosɔ ŋja ɖeka do gbaza mɛ nɔŋ, ele shigbe Satana dɔdɔla ɖeka nɛ yí xoxoɔŋ mamimami keŋ nɔ nyɛŋgbegangan nyɛɖeki ɖoɖu o. 8 Zetɔn yí ŋɖe kuku nɔ Axwetɔ lɔ veviɖe mɔ yɛ le ɖe ŋja lɔ so lanmɛ nɔŋ. 9 Vɔ énu nɔŋ mɔ: “Xomɛvu gangan anyitɔ sun nɔ eo, ɖo ao gbɔjɔgbɔjɔ mɛ yí ŋdanasɛ anyi ŋsɛn le nywiɖe.” Eyi taɖo nayi go le anyi gbɔjɔgbɔjɔ lɔwo mɛ koɖo jijɔ sugbɔ keŋ nɔ Kristo ŋsɛn lɔ akpɔtɔ acɔn ŋji shigbe avɔnzava nɛ. 10 Eyi taɖo nɔ ŋgbɔjɔ, nɔ wozuzuɔŋ, nɔ enuwo wudoŋ, nɔ wociciɛ yumɛ nɔŋ yí ŋle cukaɖawo mɛɔ, ŋkpɔnɔ jijɔ do Kristo ŋci. Ðo nɔ ŋgbɔjɔɔ, eyi ŋkpɔnɔ ŋsɛn.
11 Ŋvatrɔ sukunɔ. Míwo yí dɔ, ɖo ele mɔ míwo yí akanfuŋ sa. Ci ŋdenyi ŋɖe can ɔ, apotru gangan míwotɔ lɔwo dewuganŋ le enu kuɖeka kpetii mɛ o. 12 Le nyɔnɔnwi mɛɔ, ŋdasɛ nɔ mí mɔ apotru yí ŋnyi ci ŋdo ji sugbɔ yí gbewa enujiŋ gangan hamɛhamɛwo koɖo ŋsɛndɔwo le mí mɛ. 13 Nyi mɛ yí ŋdo hamɛ kpɛtɛwo ji le sɔwu míwoɔ? Ci ŋdenyi agban nɔ mí ɖekɛ yɔa? Nɔ ahan yɔ nɛɔ, ŋɖe kuku, mísɔ keŋ.
14 Míkpɔ ɖa! Zetɔntɔ lɔ ke yí ŋdra do mɔ nava mí gbɔ yí ŋdavanyi agban nɔ mí o, denyi enu ciwo yí le mí shi yí ŋjijiɛ o, vɔ míwoŋtɔwo yí ŋjijiɛ. Ðo denyi ɖeviwo yí ɖonɔ nu ɖɛ nɔ wowo da koɖo wowo nɔwo o, vɔ eda koɖo enɔ yí ɖonɔ enu ɖɛ nɔ wowo viwo. 15 Enyɛ yɛɔ, nasɔ jijɔ sugbɔ azan anyi nuwo koɖo nyɛŋtɔ lɔ pleŋ do ta nɔ mí.* Nɔ ŋlɔn mí sugbɔ ahan ɖe, nyi yí taɖo lɔnlɔn ci míɖo nɔŋ ahweɔ? 16 Eɖekpokpuiɖe ci enyi can ɔ, ŋdenyi agban nɔ mí o. Gan mínunuɔ mɔ “ayetɔnɔ” nyɛŋnyi yí lé yewo koɖo “fɛnca.” 17 Ci ŋdɔ amɛwo ɖaɖa mí ɖe, ŋto ɖe ji yí xɔ ŋɖe le mí shia? 18 Ŋdo ŋsɛn Titu mɔ yɛ le va mí gbɔ yí sɔ nɔvi ɖeka can bɔdo nu. Ci Titu va ɖe, éxɔ ŋɖe le mí shia? De susu ɖekɛ lɔ yí kplɔkɔ nyɛ koɖo yɛ ba? De afɔteshi kuɖeka lɔwo mɛ mìzɔnkɔ ba?
19 Le hwenu ŋtɔ́wo pleŋ mɛ ɖe, míbukɔ mɔ mìhwlɛnhwlɛn ta nɔ mìwoɖekiwo le mí gbɔ yɔa? Mawu ŋkɔ yí mìle yí xoxoɔ nuxu le ekacaca mɛ koɖo Kristo. Vɔ exlɔ veviwo, enu ciwo pleŋ yí mìwakɔɔ, mìwakɔ wo yí asɔ do ŋsɛn mí yɔ. 20 Ðo ŋloloɔ mɔ nɔ ŋvaɔ, ŋdakpɔ mí shigbe lé ŋdrɔdrɔɛ do nɛ o yí míwo can dakpɔŋ shigbe lé mídrɔdrɔɛ do nɛ o, vɔ enu ciwo yí ali yí nyi evuwawa, ŋhwan, dɔmɛzi sugbɔ dodo, aɖehwlɛnhwlɛnwo, eɖyixoamɛ, amɛnyɔnunu, egoyiyi koɖo hannyahannyawo. 21 Taŋfuin hwenu nagbetrɔvaɔ, anyi Mawu ado ŋkpɛnŋ le ŋmɛ nɔ mí yí naci ŋshishi mɛ, ɖo amɛ sugbɔ wa nuvɔn vayi gan yí wodetrɔ ji mɛ so enumakɔmakɔ, mateli,* koɖo enudɔndɔn ciwo yí woshin ŋta yí wa* mɛ o.