Wema Ŋkɔtɔ ci Ʒan Ŋwlɛ
4 Amɛveviwo, míŋgbexɔ enyɔ ɖekpokpui ci womɔ yɛso gbɔngbɔn* mɛ ji se o, vɔ míji gɔnmɛ kpɔ nɔ enyɔ ciwo yí womɔ woso gbɔngbɔn* mɛ keŋ akpɔ mɔ Mawu gbɔ yí woso nyao ma, ɖo enyɔnuɖɛtɔ ŋsukantɔ sugbɔ le xexeɛ mɛ ɖɛyɛ.
2 Lé míawɛ anya nɔ enyɔ ɖe ci womɔ yɛso gbɔngbɔn mɛ so Mawu gbɔ ke: Enyɔ ɖekpokpui ci womɔ yɛso gbɔngbɔn mɛ ci yí nu mɔ Yesu Kristo va le gbaza mɛ so Mawu gbɔ. 3 Vɔ enyɔ ɖekpokpui ci womɔ yɛso gbɔngbɔn mɛ yí denukɔ ahan so Yesu nu deso Mawu gbɔ o. Enyɔ ci míse mɔ Kristo ketɔnɔ lɔ anu yí enyi, eyi eɖyiɖyiɛ le xexeɛ mɛ vɔ.
4 Evi veviwo, Mawu gbɔ yí míso yí míɖu wo* ji, ɖo mɛ ci yí le koɖo mí gangan wu mɛ ci yí le koɖo xexe lɔ. 5 Xexe lɔ mɛ yí woso, eyi taɖo woxonɔ nuxu so enu ci yí nyi xexe lɔ tɔ nu yí xexe lɔ ɖonɔ to wo. 6 Mawu gbɔ yí mìso, mɛɖekpokpui ci yí jeshi Mawu ɖɛ ɖonɔ to mì, mɛ ci yí deso Mawu gbɔ deɖonɔ to mì o. To ecɛ jiɔ, mìkpɔnɔ vovototo ci yí le gblamɛ nɔ enyɔ ci yí so gbɔngbɔn mɛ nyao koɖo ŋsu nyɔ ci womɔ yɛso gbɔngbɔn mɛ.
7 Amɛveviwo, mìakpɔtɔ alɔnkɔ mìwonɔnɔwo, ɖo Mawu gbɔ yí lɔnlɔn so yí mɛɖekpokpui ci yí lɔnnɔ amɛɔ, Mawu vi enyi yí gbejeshi Mawu ɖɛ. 8 Mɛ ci yí delɔnnɔ amɛ dejeshi Mawu ɖɛ o, ɖo Mawu nyi lɔnlɔn. 9 Lé Mawu dasɛ mɔ yelɔn mì do ke: Mawu sɔ Eviɛ akogo ɖaɖa xexe lɔ mɛ keŋ nɔ mìatɛnŋ akpɔ agbe to ji. 10 Mawu sɔ Eviɛ sɔ sa vɔn* do ta nɔ mìwo nuvɔnwo keŋ asɔ dra gblamɛ do nɔ mìwo koɖo yɛ. Denyi mìlɔn Mawu yí dɔ taɖo ewɛ ahan o, vɔ ci elɔn mì taɖo yɔ.
11 Amɛveviwo, nɔ enyi ahan yí Mawu lɔn mì nɛɔ, éle dandan mɛ mɔ mìwo can mìalɔnnɔ mìwonɔnɔwo. 12 Mɛɖe dekpɔ Mawu kpɔ o. Vɔ nɔ mìkpɔtɔ lɔnkɔ mìwonɔnɔwoɔ, Mawu akpɔtɔ ale koɖo mì yí lɔnlɔn yitɔ keŋkeŋ ale mì mɛ. 13 Ecɛ dɔ yí mìnya mɔ mìkpɔtɔ le koɖi yí yɛ can le koɖo mì, ɖo éna gbɔngbɔn yitɔ mì. 14 Mìwoŋtɔwo kpɔɛ hɛnnɛ yí ɖeɖeɛ kunu mɔ, Eda dɔ Eviɛ ɖaɖa nɔ ahwlɛn xexe lɔ gan. 15 Mɛɖekpokpui ci yí nya mɔ Yesu nyi Mawu Viɔ, Mawu akpɔtɔ ale koɖi yí yɛ can ale koɖo Mawu. 16 Eyi mìvanya mɔ Mawu lɔn mì yí gbekando ji.
Mawu nyi lɔnlɔn yí mɛ ci yí kpɔtɔ lɔnkɔ amɛ kpɔtɔ le koɖo Mawu yí Mawu kpɔtɔ le koɖi. 17 Ahan yí lɔnlɔn lɔ le mì mɛ vɛ pleŋpleŋ nɛ keŋ nɔ mìatɛnŋ avoŋ fɛɛ axo nuxu* le kojoɖogbe; ɖo lé mɛ ŋtɔ́ leɔ, ahanke yí mìwo can mìle le xexe cɛ mɛ nɛ. 18 Vɔnvɔn ɖekɛ dele lɔnlɔn mɛ o, vɔ lɔnlɔn ci yí le blebu nyanɔ vɔnvɔn ti, ɖo vɔnvɔn dɔnnɔ mì do godu. Le nyɔnɔnwi mɛɔ, lɔnlɔn dele mɛ ci yí vɔnnɔ mɛ vɛ pleŋpleŋ o. 19 Mìlɔnnɔ amɛ, ɖo élɔn mì doŋkɔ.
20 Nɔ mɛɖe nukɔ mɔ: “Ŋlɔn Mawu,” gan yí gbe ŋwa nɔ nɔviɛɔ, ŋsukantɔ yí enyi. Ðo nɔ mɛɖe delɔn nɔviɛ ci ekpɔkɔɔ, datɛnŋ alɔn Mawu ci yí dekpɔkɔ o. 21 Eyi mìxɔ ese cɛ so gbɔ mɔ, mɛɖekpokpui ci yí lɔn Mawu ɖogbe alɔn nɔviɛ hɛnnɛ.