Wema Ŋkɔtɔ ci Ʒan Ŋwlɛ
5 Mɛɖekpokpui ci yí xɔɛ se mɔ Yesu yí nyi Kristo lɔ nyi Mawu vi; eyi mɛɖekpokpui ci yí lɔn Mawu ci yí na agbeɔ, élɔn mɛ ci yí nyi evi nɔ Mawu hɛnnɛ. 2 Nɔ mìlɔn Mawu yí wanɔ do yi sewo jiɔ, ecɛ adɔ mìanya mɔ mìlɔn Mawu viwo. 3 Ðo mìalɔn Mawu gɔnmɛ yí nyi mɔ, mìawanɔ do yi sewo ji yí yi sewo denyi agban o. 4 Mɛɖekpokpui* ci yí nyi evi nɔ Mawu ɖunɔ xexe lɔ ji, eyi enu ci mìsɔ ɖu xexe lɔ ji yí nyi xɔse mìwotɔ.
5 Mi yí atɛnŋ aɖu xexe lɔ jiɔ? Denyi mɛ ci yí xɔɛ se mɔ Yesu nyi Mawu Vi yɔ ba? 6 Yesu Kristo cɛ yí nyi mɛ ci yí va to eshi koɖo ehun ji; denyi to eshi ɖekɛ ji yɔ o, vɔ to eshi koɖo ehun ji. Eyi gbɔngbɔn lɔ ɖeɖeɛ kunu, ɖo gbɔngbɔn lɔ yí nyi nyɔnɔnwi lɔ. 7 Enu amɛtɔn yí ɖekɔ kunu: 8 gbɔngbɔn lɔ, eshi lɔ koɖo ehun lɔ; eyi egbe le ju nɔ amɛtɔn lɔwo.
9 Mìlɔn yí xɔnɔ kunu ci agbetɔwo ɖenɔ, vɔ kunuɖeɖe Mawu tɔ yɛ gangan wu. Ðo Mawu ŋtɔ yí ɖekɔ kunu so Eviɛ nu. 10 Mɛ ci yí xɔ Mawu Vi lɔ ji se lé enyɔ ci Mawu nu ni ɖɛ do yi ji mɛ. Mɛ ci yí dexɔ Mawu ji se sɔ Mawu ɖokɔ ŋsukantɔ, ɖo dexɔ kunu ci Mawu ɖekɔ so Eviɛ nu ji se o. 11 Kunuɖeɖe lɔ ke: Mawu na agbe mavɔ mì yí agbe cɛ le Eviɛ mɛ. 12 Mɛ ci yí xɔ Evi lɔ xɔ agbe cɛ, mɛ ci yí dexɔ Mawu Vi lɔɔ, dexɔ agbe cɛ o.
13 Ŋŋwlɛkɔ enu cɛwo ɖaɖa mí nɔ míanya mɔ yewoxɔ agbe mavɔ lɔ, míwo ciwo yí xɔ Mawu Vi lɔ ŋkɔ ji se. 14 Eyi kankandoji ci mìɖo do nu yí nyi mɔ, ŋɖekpokpui ci mìabiɔ yí asɔgbe koɖo yi droɔ, áɖo to mì. 15 Eyi ci mìnya mɔ yɛɖonɔ to mì nɔ mìbiɔ ŋɖekpokpuiɔ, mìnya mɔ mìaxɔ enu ciwo yí mìbiɔ, ɖo mìbiɔ wo yi.
16 Nɔ mɛɖe kpɔ nɔviɛ yí ewakɔ nuvɔn ci yí dahɛn eku vɛɔ, le do gbe ɖaɖa do ta ni nɔ Mawu ana agbe yi. Ɛɛ, énanɔ agbe mɛ ciwo yí dewanɔ nuvɔn ci yí hɛnnɔ eku vɛ o. Nuvɔn ɖeka li yí hɛnnɔ eku vɛ. Denyi nuvɔn ŋtɔ́ yí ŋnukɔ mɔ woaɖe kuku do ta nɔ nɛ o. 17 Nuvɔn yí enumajɔmajɔwawawo pleŋ nyi, vɔ nuvɔn ɖeka li yí dehɛnnɔ eku vɛ o.
18 Mìnya mɔ mɛ ci yí nyi Mawu vi desɔ nuvɔn ɖo edɔ yí wanɔ o, vɔ Mawu Vi lɔ kpɔnɔ ji yí nuvwinwatɔ lɔ detɛnŋ wanɔ ŋɖe koɖi o.* 19 Mìnya mɔ mìso Mawu gbɔ, vɔ xexe lɔ keŋkeŋ le gɔnmɛ nɔ enuvwinwatɔ lɔ ŋsɛn. 20 Gan mìnya mɔ Mawu Vi lɔ va, eyi ena yí mìwa ɖaŋ mɔŋje enu mɛ* keŋ atɛnŋ ajeshi nyɔnɔnwitotɔ lɔ. Mìle ɖekɛ koɖo nyɔnɔnwitotɔ lɔ to Eviɛ Yesu Kristo ji. Nyɔnɔnwitotɔ lɔ yí nyi Mawu adodwi lɔ koɖo agbe mavɔ lɔ. 21 Evi veviwo, mínɔ azɔge* nɔ vojuwo.*