Apotruwo Dɔwawawo
19 Yi godu ci Apolosu vale Korɛnti ɔ, Pɔlu to kɔxwiwo mɛ yí va Efezi. Ékpɔ enukplavi ɖewo le nɔ 2 yí biɔ wo se mɔ: “Míxɔ gbɔngbɔn kɔkɔɛ lɔ hwenu mítrɔ xɔsetɔwoa?” Woɖo ŋci ni mɔ: “Mìdese kpɔ gbeɖe can mɔ gbɔngbɔn kɔkɔɛ ɖe li o.” 3 Eyi taɖo ebiɔ wo se mɔ: “Ecɛyɛ ɖe, ʒinʒindoshimɛ ci míwaɔ?” Wonu ni mɔ: “Ʒinʒindoshimɛ Ʒan tɔ.” 4 Pɔlu nu mɔ: “Ʒinʒindoshimɛ ci woawa asɔ dasɛ mɔ wotrɔ ji mɛ yí Ʒan wa nɔ amɛwo yí nu nɔ wo mɔ wo le xɔ mɛ ci yí aje ŋgbe nɔ ye ji se, eyi nyi Yesu.” 5 Ci wose ahan ɔ, woʒin wo do shi mɛ le Axwetɔ Yesu ŋkɔ mɛ. 6 Eyi ci Pɔlu sɔ yi lɔ̀wo da do wo jiɔ, gbɔngbɔn kɔkɔɛ va wo ji yí wotɔ egbe buwo dodo yí nukɔ enyɔwo ɖɛ. 7 Wo pleŋ ayi ŋsu 12 han.
8 Na nɔ wleci amɛtɔn ɔ, Pɔlu yinɔ Ʒuifuwo nukplaxu lɔ yí xonɔ nuxu koɖo edɔngbegbe yí drenɔ ŋciwo yí kuso Mawu Fyɔɖuxu lɔ nu nɔ wo. Éxonɔ nuxu lɔwo keke wokannɔdo ji. 9 Vɔ ci mɛɖewo shin ŋta yí gbe mɔ yewodaxɔ se o yí nunuɔ enyɔmanyɔmanyɔwo so Emɔ lɔ nu le amɛahwa lɔ ŋkɔɔ, Pɔlu kplɔ enukplavi lɔwo yí so le wo gbɔ yí vayi xonɔ nuxu nɔ wo gbeɖeka duu le Tiranɔsu suklu bɔbɔxɔ mɛ. 10 Éwɛ ahan na nɔ exwe amɛve keke mɛ ciwo pleŋ yí le Azi kan mɛ se Axwetɔ nyɔ lɔ, Ʒuifuwo koɖo Grɛkitɔwo pleŋ se nyɔ lɔ.
11 Eyi Mawu kpɔtɔ wakɔ enujiŋ ganganwo to Pɔlu ji 12 keke wosɔ awu koɖo atraviwo tɔnɔ gotu ni yí sɔ yi jonɔ nɔ dɔ̀nɔwo yí edɔ̀ minɔ nɔ wo yí gbɔngbɔnvɔnwo tonɔ le amɛwo mɛ hɛnnɛ. 13 Vɔ Ʒuifu ɖewo ciwo yí ɖyiɖyiɛ sa yí nyakɔ gbɔngbɔnvɔnwo ti le amɛwo mɛ can tekpɔ hɛnnɛ mɔ yewoazan Axwetɔ Yesu ŋkɔ asɔ nya gbɔngbɔnvɔnwo ti. Wonunɔ mɔ: “Ŋɖekɔ gbe nɔ eo le Yesu ci nyɔ Pɔlu nunuɔ ŋkɔ mɛ.” 14 Ʒuifuwo vɔnsatɔwo ga ci yí tɔ mɔ Seva vi ŋsuvi amadrɛ yí wakɔ enu cɛ. 15 Vɔ gbɔngbɔnvɔn lɔ nu nɔ wo mɔ: “Ŋjeshi Yesu yí gbejeshi Pɔlu. Vɔ mi míwo nyiɔ?” 16 Eyi ŋsu ci mɛ gbɔngbɔnvɔn lɔ le te je wo ji yí wa vu koɖo wo ɖekaɖeka yí ɖu wo ji. Édo akpa wo nu yí woshi to le axwe lɔ mɛ mama. 17 Ʒuifuwo koɖo Grɛkitɔ ciwo pleŋ yí le Efezi se nyɔ cɛ yí vɔnvɔn le wo pleŋ. Eyi wokpɔtɔ kanfukɔ Axwetɔ Yesu ŋkɔ lɔ. 18 Mɛ ciwo yí trɔ xɔsetɔwo sugbɔtɔ va nunɔ nuvɔn ciwo yí wowa le jugbaja. 19 Mɛ ciwo yí wanɔ maʒiki sa sugbɔtɔ lɔ wowo wemawo pleŋ vɛ yí tɔ zo wo le ŋmɛ nɔ amɛshiamɛ. Ci wodrɔ wema lɔwo ho kpɔɔ, wokpɔ gajunho 50 000. 20 Ecɛ na yí Yehowa* nyɔ lɔ kakakɔ doji yí trɔkɔ amɛwo gbenɔnɔ doji keke ejiŋ.
21 Le enu cɛwo goduɔ, Pɔlu ɖui mɔ nɔ yeyi to Akayi koɖo Maseduani ɖegbɔɔ, yeayi Ʒerusalɛmu. Énu mɔ: “Nɔ ŋyi nɔɔ, ŋɖo ayi Rɔma hɛnnɛ.” 22 Eyi taɖo edɔ yi bɔdonutɔ amɛve ɖaɖa Maseduani. Wowo yí nyi Timɔte koɖo Eratu. Vɔ yiŋtɔ ci Azi kan mɛ na nɔ hwenu ɖe.
23 Hwenɔnuɔ, eʒin gangan ɖeka tɔn le amɛwo mɛ do Axwetɔ Mɔ lɔ ŋci. 24 Ðo ŋsu ɖeka tɔ mɔ Demetriusi yí zannɔ egacuho yí sɔ wanɔ Artemisi vojuxɔ hwɛhwɛwo yí ŋsu ciwo yí wanɔ dɔ koɖi kpɔnɔ eho sugbɔ le mɛ. 25 Eyi eyɔ wo koɖo mɛ ciwo yí wanɔ edɔ cɛ hanwo bɔ yí nu mɔ: “Kinyɛwo, mínya nywiɖe mɔ edɔ cɛ mɛ yí mìkpɔnɔ eho sugbɔ le. 26 Ecɛyɛ míkpɔkpɔɛ yí gbesisiɛ mɔ denyi Efezi ɖekɛ yí Pɔlu cɛ wɛ keke yí amɛ sugbɔ trɔ susu le o, vɔ ekpɔtɔ hwɛɖeka yí anyi Azi kan lɔ mɛ pleŋ yí ewɛ le. Ðo énunuɔ mɔ mawu ciwo agbetɔwo sɔ alɔ̀ wa denyi mawu ŋtɔŋtɔwo o. 27 Gbesɔ kpe niɔ, denyi mìwo dɔ cɛ ɖekɛ yí adahɛn o, vɔ woavagbali mawu gangan Artemisi* gbedoxɔ lɔ can yí wodagbevakpɔ eyɛ ci wosɛnnɔ le Azi kan lɔ mɛ koɖo nyigban lɔ pleŋ ji do ŋɖe ji o.” 28 Ci ŋsu lɔwo se nyɔ cɛɔ, wodo dɔmɛzi sugbɔ yí tɔ axwa dodo mɔ: “Efezitɔwo Artemisi nyi mawu gangan!”
29 Eyi eʒin tɔn le eju lɔ mɛ yí wo pleŋ lɔ ju yí yi enukpɔxu lɔ. Wodɔn Gayo koɖo Aristaki ciwo yí nyi Maseduanitɔwo yí kplɔnɔ Pɔlu do hɛn yi hunnɔ koɖo akpasɛnsin. 30 Pɔlu can ji mɔ yeayi mɛ lɔwo mɛ. Vɔ enukplavi lɔwo delɔn ni o. 31 Yi nu kpenɔ nɔ mɛɖewo le mɛ ciwo yí kpɔnɔ azanɖuɖuwo koɖo ehwlɛnwawa munumumuwo ji mɛ. Wodo ŋɛ ɖaɖɛ ŋtɔkpu yí ɖe kuku ni mɔ, yɛŋgbeva enukpɔxu lɔ yí asɔ yi gbe do afɔku mɛ o. 32 Enyɔ lɔ yí nyi mɔ, mɛɖewo le axwa ji mɔ ahan yɔ ke yí ebuwo nukɔ mɔ, oo ecɛ anyi ke; ɖo eʒin tɔn le amɛ lɔwo mɛ keke amɛ sugbɔtɔ degbenya enu ci yí taɖo wova bɔ o. 33 Eyi taɖo woɖe Alɛsandru ti le amɛahwa lɔ mɛ yí Ʒuifuwo cuicui ɖaɖa ŋkɔ, eyi ewa alɔ̀ nɔ wo yí ji mɔ yeahwlɛn ta nɔ yeɖeki le ŋkɔ nɔ amɛ lɔwo. 34 Vɔ ci wokpɔ mɔ Ʒuifu yí enyiɔ, wo pleŋ tɔ axwa dodo keke wa gaxoxo amɛve han mɔ: “Efezitɔwo Artemisi nyi mawu gangan!”
35 Ci jumɛga lɔ na yí eɖa ɖo nɔ amɛahwa lɔ ɖegbɔɔ, énu mɔ: “Efezitɔwo, mi yí denya mɔ Efezi ju lɔ yí kpɔnɔ Artemisi mawu gangan lɔ koɖo legba ci yí juin so jeŋkwi mɛ gbedoxɔ lɔ jiɔ? 36 Mɛɖe datɛnŋ ado ɖyika enyɔ cɛwo o. Eyi taɖo mínɔ xwii yí míŋgbenɔ hwlɛndo ji awa ŋɖe o. 37 Ðo ŋsu cɛwo ciwo yí míkplɔ vɛ defi ŋɖe le gbedoxɔ lɔwo mɛ alo nu nyɔkpotuwo do mìwo mawunɔ lɔ nu hɛnnɛ o. 38 Eyi taɖo, nɔ Demetriusi koɖo mɛ ciwo yí wanɔ dɔ koɖi dodoɔ hwɛ mɛɖeɔ, kojoɖozanwo li yí ejujikpɔtɔwo can li. Nɔ mɛɖe ɖo nyɔ koɖo mɛɖeɔ, le hɛn nyɔ lɔ yi wo gbɔ. 39 Vɔ nɔ nubu ɖe yí mígbejijiɛ sɔwu hunnɔɔ, ele mɔ gbɛbɔbɔ ci ese ɖo yí akpɔ enyɔ lɔ gbɔ. 40 Ðo enu ci yí jɔ gbɛ atɛnŋ ana yí woado hwɛ mì mɔ, mìwo yí dɔ yí eʒin tɔn le eju lɔ mɛ yí nyɔ ɖekɛ deli yí mìatɛnŋ asɔ dre enu ci yí taɖo hunnyahunnya cɛ li mɛ o.” 41 Ci jumɛga lɔ nu enyɔ cɛwo ɖegbɔɔ, énu nɔ mɛshiamɛ mɔ wo le yi axwe.