ENUKPLAKPLA 48
Wa ɖaŋ asɔnɔ mɛ ciwo ànyi xlɔ koɖo
Mìwo xlɔ veviwo na mìkpɔnɔ jijɔ le hwenu nywiwo mɛ, yí donɔ ŋsɛn mì le hwenu sɛnŋwo mɛ. Vɔ Bibla kanxle mì mɔ denyi mɛshiamɛ yí nyi exlɔ nywi o. Eyi taɖo lé àwɛ acan exlɔ nywiwoɔ? Na mìagbeje nyɔbiɔse ciwo yí gbɔgbɔ mɛ.
1. Lé exlɔ ciwo ècan akpɔ ŋsɛn do eo ji doɔ?
Nɔ mìtɔ gamɛ sugbɔ zanzan koɖo mɛɖeɔ, mìvasrannɔ enunywi alo enudɔndɔn ciwo ewanɔ. Enyinɔ ahan nɔ mìdonɔ go koɖi ŋmɛŋmɛ alo le eka ji. Shigbe lé Bibla nui nɛɔ, nɔ ‘ènyi exlɔ koɖo mɛ ciwo yí nyi ŋununyatɔwoɔ, ànyi ŋununyatɔ. Vɔ, nɔ ènyi exlɔ koɖo sukunuwatɔwo [alo mɛ ciwo yí delɔn Yehowaɔ], eyi cukaɖa ava eo ji.’ (Elododo Wema 13:20) Exlɔ ciwo yí lɔn Yehowa yí gbesinni atɛnŋ akpedo eo nu nate gogui yí agbesɔnɔ gbeta nywiwo. Vɔ ao xlɔ vevi ciwo yí delɔn Yehowa atɛnŋ ate eo yi azɔge le gbɔ. Eyi taɖo Bibla do ŋsɛn mì mɔ mìwo le wa ɖaŋ acan mìwo xlɔwo nywiɖe! Nɔ mìwo xlɔwo lɔn Yehowaɔ, wokpɔnɔ ŋsɛn nywi do mì ji, yí mìwo can mìkpɔnɔ ŋsɛn nywi do wo ji hɛnnɛ. Mìkpenɔ ji yí donɔ ‘akɔnfa nɔ mìwonɔnɔwo yí donɔ ŋsɛn lanmɛ nɔ mìwonɔnɔwo.’—1 Tɛsalonikitɔwo 5:11.
2. Lé exlɔ ciwo ècannɔ wanɔ nɔ Yehowaɔ?
Yehowa wa ɖaŋ cannɔ yi xlɔwo nywiɖe. “É le ŋgbe nɔ amɛ nywiwo koɖo amɛ [maxoawowo].” (Elododo Wema 3:32) Lé awa nɔ Yehowa nɔ mìvacankɔ mìwo xlɔwo le mɛ ciwo yí deluin mɛɔ? Ave nu haan! (Hlɛn Ʒaki 4:4.) Vɔ nɔ mìgbe egbɛ vɔnwo yí te gogo Yehowa koɖo mɛ ciwo yí luin ɔ, mìwo nu akpe ni yí ahlɛn mì do yi xlɔwo mɛ.—Ehajiji Wema 15:1-4.
JI DWI NI KPƆ DOJI
Kpɔ enu ci yí taɖo ele veviɖe mɔ àcan exlɔ nywiwo, yí agbekpɔ lé àcan exlɔ ciwo yí ana ao gbe agbenyɔ doji sɔwu.
3. Wa blɛwu nɔ ŋgbecan exlɔ dɔndɔnwo o
Mɛ ciwo yí delɔn Mawu koɖo yi sewo nyi exlɔ vwinwo. Xo VIDEO lɔ, keŋ agbeje biɔse ci yí gbɔgbɔ mɛ.
Lé ajɔ do yí àvatɔ eha dodo koɖo amɛvwinwo le manyamanya mɛɔ?
Hlɛn 1 Korɛntitɔwo 15:33, keŋ agbeje biɔse cɛwo mɛ:
Mi han yí atɛnŋ anyi exlɔ vwin nɔ eoɔ? Nyi yí taɖoɔ?
Hlɛn Ehajiji Wema 119:63, keŋ agbeje biɔse cɛ mɛ:
Nyi yí adasɛ nɔ eo mɔ mɛɖe nyi exlɔ nywiɔ?
Nɔ acikusɛnsɛn kuɖeka dahɛn ɔ, edanahɛn kpɛtɛwo pleŋ. Lé ehadodo vɔn adahɛn nu le eo nu doɔ?
4. Mɛ ciwo yí to akpo nɔ mì can atɛnŋ avanyi mìwo xlɔ veviwo
Bibla xo nuxu so Davidi koɖo Ʒonatan ciwo yí nyi blema Izraɛliviwo nu. Ʒonatan nyi gan nɔ Davidi xoxoxo yí gbenyi efyɔvi; ele ahan gan, wonyi exlɔ veviwo. Hlɛn 1 Samiɛli 18:1, keŋ agbeje biɔse cɛ mɛ:
Nyi yí taɖo mìwo xlɔwo deɖo anyi mìwo gbɛmɛtɔwo dandandan ɔ?
Hlɛn Rɔmatɔwo 1:11, 12, keŋ agbeje biɔse cɛ mɛ:
Lé exlɔ ciwo yí lɔn Yehowa atɛnŋ adonɔ ŋsɛn wowonɔnɔwo doɔ?
Le video ci yí gbɔgbɔ mɛɔ, kpɔ lé nɔviŋsu jajɛ ɖeka kpɔ exlɔ le fini deɖoŋ do ɖeeɖe ɖa. Xo VIDEO lɔ, keŋ agbeje biɔse ciwo yí gbɔgbɔ mɛ.
Le video lɔ mɛ ɖe, nyi yí taɖo Akil jilawo sokɔ jika do exlɔ ciwo ecankɔ le suklu nuɔ?
Nyi yí taɖo elɔn exlɔ cɛwo le tɔtɔmɛɔ?
Lé ewɛ yí do ji ci eci akogo can ɔ?
5. Lé àwɛ aɖo exlɔ nywiwo yí agbenyi exlɔ nywi nɔ mɛbuwo
Kpɔ lé àwɛ aɖo exlɔ nywiwo koɖo lé àwɛ anyi exlɔ nywi nɔ wo. Xo VIDEO lɔ.
Hlɛn Elododo Wema 18:24 koɖo 27:17, keŋ agbeje biɔse cɛwo mɛ:
Lé exlɔ adodwiwo kpenɔdo wowonɔnɔwo nu doɔ?
Exlɔ cɛ hanwo le eo shia? Nɔ dele eo shi ɖe, lé àwɛ awa ɖɛɔ?
Hlɛn Filipitɔwo 2:4, keŋ agbeje biɔse cɛ mɛ:
Gbɔxwe àɖo exlɔ nywiwoɔ, eoŋtɔ èɖo anyi exlɔ nywi. Lé àtɛnŋ awɛ doɔ?
Gbɔxwe àɖo exlɔ nywiwoɔ, eoŋtɔ èɖo anyi exlɔ nywi
MƐÐEWO NUNƆ MƆ: “Exlɔnyinyi koɖo mɛɖekpokpui ci wokpɔ nyɔ wu exlɔ ɖe maɖo.”
Lé ànu so nuɔ?
ENU CI ÈKPLA
Nɔ mìwa ɖaŋ can mìwo xlɔwo nywiɖeɔ, mìwo nu akpe nɔ Yehowa yí mìakpɔ nyɔna sugbɔ.
Enumɛtoto
Nyi yí taɖo lé mìcannɔ mìwo xlɔwo do le veviɖe nɔ Yehowaɔ?
Miwo mìdeɖo anyi xlɔ koɖoɔ?
Lé mìawɛ yí exlɔnyinyi ci yí le gblamɛ nɔ mìwo koɖo mɛɖe asɛnŋ dojiɔ?
KPƆ ŊCƐWO KPƆ
Kpɔ lé exlɔ nywiwo atɛnŋ akpedo mì nu le nɔnɔmɛ sɛnŋwo mɛ.
“Ðo exlɔ adodwiwo gbɔxwe vɔvɔnu lɔ ava” (Jutakpɔxɔ novembre 2019)
Kpɔ lé àwɛ akpɔ exlɔ nywiwo.
Nyi èɖo anya so exlɔ cancan le eka ji nuɔ?
Le exolɔlɔ ci yí nyi “Ŋji mɔ nawa eda ɖɛ” mɛɔ, kpɔ enu ci yí taɖo ŋsu ɖeka nyi xlɔ koɖo amɛ vovovowo.