ENUKPLAKPLA 51
Lé àxonɔ nuxu do keŋ nɔ ao nu ajɔnɔ ji nɔ Yehowaɔ?
Ci Yehowa wa mìɔ, éna nunywi ɖeka mì, eyi nyi nuxuxoxo. Lé mìzannɔ enu cɛ ci ena mì do nɔnɔ veviɖe nia? Kankandoji li mɔ, enɔnɔ veviɖe ni! (Hlɛn Ʒaki 1:26.) Taɖo, lé mìawɛ azan nuxuxoxo nujikpekpe mìwotɔ yí akpe nɔ Yehowaɔ?
1. Lé mìawa ɖaŋ azannɔ nuxuxoxo nunana lɔ doɔ?
Bibla nu mɔ, “mí ɖo a do akɔnfa nɔ míwonɔ̀nɔwo yí a do ŋsɛn lanmɛ nɔ míwonɔ̀nɔwo.” (1 Tɛsalonikitɔwo 5:11) Àtɛnŋ ayi susu mɛ kpɔ keŋ akpɔ mɔ mɛɖewo ʒan ŋsɛndoamu maa? Nyi àtɛnŋ awa nɔ wo keŋ nɔ woavo le wowoɖekiwo mɛ dojiɔ? Na kankandoji wo mɔ wole veviɖe nɔ ye. Èhɛn ànu ŋci yí jɔnɔ ji nɔ eo le wowo nyɔ mɛ nɔ wo. Àtɛnŋ abu tamɛ kpɔ so mawunyɔkpukpui ɖe nu, ci yí atɛnŋ ado ŋsɛn mɛɖe ci èjeshi ɖɛa? Mawunyɔkpukpui sugbɔ li ci àcan dru. Ðo ŋwi hɛnnɛ mɔ, alɔkpa ci èsɔ nu nyɔ ɖe atɛnŋ ado ŋsɛn mɛbuwo sugbɔ. Eyi taɖo je agbla asɔ xomɛnywi koɖo xomɛfafa xonɔ nuxu nɔ amowo.—Elododo Wema 15:1.
2. Enyɔ ci hanciwo mìdeɖo anunɔɔ?
Bibla nu mɔ: “Nɔ mí xoxo nuxu ɔ, mí ŋgbe nu enyɔ vwinwo nɔ míwo hawo o.” (Hlɛn Efezitɔwo 4:29.) Ecɛ dasɛ mɔ, dele mɔ mìakannɔ nyɔ nɔ amɛ alo axonɔ dɔmɛzi nuxuwo abi enyɔ veamɛwo keŋ asɔ gbali amɛ abi ado vevisese nɔ amɛ o. Ele mɔ mìagbe amɛnyɔvwin nunu hɛnnɛ yí mìdeɖo azunɔ amɛ o.—Hlɛn Elododo Wema 16:28.
3. Nyi yí akpedo mì nu mìanunɔ nyɔ ciwo yí ado ŋsɛn mɛbuwoɔ?
Blaŋblaŋ ɔ, nyɔ ciwo mìnunɔ danasɛ ŋci yí le ji mɛ nɔ mì alo ŋci mìbubuɔ kpɔ. (Luiki 6:45) Eyi taɖo eʒan mɔ, mìana kpla mìwoɖekiwo keŋ abunɔ tamɛ kpɔ so enu cɛwo nu: enu ciwo yí nyi enujɔjɔɛ, enu ciwo nu bubu le, ciwo yí sɔgbe, yí kɔ, yí je acɔ koɖo enu ciwo nu kanfukanfu le. (Filipitɔwo 4:8) Gbɔxwe mìasɔ susu ɖo ŋcɛwo jiɔ, ele mɔ mìawa ɖaŋ acannɔ ŋciwo mìsɔ ɖenɔ aye daɖɛ shigbe mɔ ŋciwo mìkpɔnɔ koɖo ŋciwo mìsenɔ nɛ. Ele mɔ mìagbenya mɛ ciwo mìadonɔ gbɛ koɖo. (Elododo Wema 13:20) Nɔ woji hwenu kleŋ ɖe yí bu tamɛ kpɔ so nyɔ ci wojikɔ anu nu nywiɖe gbɔxwe yí nuiɔ, yɛ can gbekpenɔdo amɛ nu hɛnnɛ. Danɔ ao nyɔgbewo kpɔ keŋ akpɔnɔ mɔ nɔ mɛbuwo se wo ɖe, lé awa nɔ wo ma. Bibla nu mɔ: “Nuxu xoxo tamɛmabukpɔtɔ le shigbe ewitɔamɛ hannɛ, vɔ ŋɖɛnyatɔ ɖe danɔ dɔ̀ nɔ amɛ.”—Elododo Wema 12:18, NWT.
JI DWI NI KPƆ DOJI
Kpɔ lé mìawɛ axonɔ nuxu yí ajɔnɔ ji nɔ Yehowa yí agbedonɔ ŋsɛn mɛbuwo.
4. Danɔ ao nuxuwo kpɔ
Hweɖewonuɔ, mìnunɔ nyɔ ɖowo yí evavenɔ mì nu. (Ʒaki 3:2) Hlɛn Galatitɔwo 5:22, 23, yi godu nagbeje biɔse cɛwo mɛ:
Le nɔnɔmɛ nywi cɛwo mɛ ɖe, ciwo àdo gbe ɖaɖa abiɔ keŋ nɔ ao nuxuxoxo anyɔ dojiɔ? Lé nɔnɔmɛ cɛwo akpedo eo nu doɔ?
Hlɛn 1 Korɛntitɔwo 15:33, keŋ agbeje biɔse cɛ mɛ:
Lé ao xlɔwo koɖo ŋciwo èsɔ munɔ munu awa dɔ do ao nuxuxoxo ji doɔ?
Nyi yí atɛnŋ adɔ ao nuxuxoxo adɔn doji alo anyɔ dojiɔ?
Hlɛn Ŋununyatɔ 3:1, 7, yi godu nagbeje nyɔbiɔse cɛ mɛ:
Hwenu enyɔ mɔ, woabɔnu alo woanɔ te keŋ avanu nyɔ ɖe le hwenu nywitɔ jiɔ?
5. Wa ɖaŋ axonɔ nuxu nɔ mɛbuwo
Lé mìawɛ yí mìdazunɔ amɛ alo awa fɛn axonɔ nuxu nɔ amowoɔ? Xo VIDEO lɔ, keŋ agbeje nyɔbiɔse ciwo yí gbɔgbɔ mɛ.
Le videoɔ mɛ ɖe, nyi yí taɖo nɔviŋsu lɔ ji mɔ yeatrɔ lé yexonɔ nuxu nɔ mɛbuwoɔ?
Nyi ewa keŋ yí trɔ lé exonɔ nuxu doɔ?
Hlɛn Ŋununyatɔ 7:16, keŋ agbeje biɔse cɛ mɛ:
Nyi mìɖo awa nɔ evanyi tetekpɔ nɔ mì mɔ mìanu nyɔ vɔnwo so mɛɖe nuɔ?
Hlɛn Ŋununyatɔ 7:21, 22, keŋ agbeje nyɔbiɔse cɛ mɛ:
Lé kpukpui cɛwo akpedo eo nu do yí dɔmɛzi dawa eo nɔ mɛɖe nunuɔ nyɔ vɔnwo so eo nuɔ?
6. Xonɔ nuxu nɔ ao xomumɛtɔwo koɖo xomɛfafa
Yehowa ji mɔ mìwo le sɔ xomɛfafa koɖo lɔnlɔn xonɔ nuxu nɔ mìwo xomumɛtɔwo. Xo VIDEO lɔ, yi godu nagbeje nyɔbiɔse ci yí gbɔgbɔ mɛ.
Nyi yí akpedo eo nu nasɔ xomɛfafa xonɔ nuxu nɔ ao xomumɛtɔwoɔ?
Hlɛn Efezitɔwo 4:31, 32, keŋ agbeje biɔse cɛ mɛ:
Nuxu ci hanciwo mìaxonɔ nɔ mìwo xomumɛtɔwo nɔ woavo le wowoɖekiwo mɛ yí agbekpɔ mɔ mìlɔn yewoɔ?
Yehowa nu lé Eviɛ Yesu nu wa ni. Hlɛn Matie 17:5, keŋ agbeje biɔse cɛ mɛ:
Lé àwa Yehowa tɔ han do le nuxu ciwo èxonɔ nɔ ao xomumɛtɔwo koɖo lé èxonɔ nuxu lɔwo do mɛɔ?
Jinɔ emɔ ciwo yí ahun nɔ eo yí asɔ kannɔfu mɛbuwo
MƐÐEWO NUNƆ MƆ: “Nyɔ ci yí le susu mɛ nɔŋ yí ŋnu, nɔ dekpe nɔ amowo can yɛdekan nyɛ o.”
Èxɔ gbe do nyɔ cɛ jia? Nyi yí taɖoɔ?
ENU CI ÈKPLA
Nyɔgbe ciwo mìzannɔ ɖonɔ ŋsɛn. Ele mɔ, mìabunɔ tamɛ kpɔ nywiɖe so nyɔ ciwo mìnunɔ, hwenu mìanu wo koɖo lé mìanunɔ wo do nu.
Enumɛtoto
Emɔ ɖewo ciwo ji àzan ao nuxuxoxo to keŋ asɔ kpedo mɛbuwo nuɔ?
Enyɔ ci hanciwo nunu èji mɔ yeagbeɔ?
Nyi yí atɛnŋ akpenɔdo mì nu gashiagamɛ mìaxonɔ nuxu koɖo xomɛfafa yí agbesɔ donɔ ŋsɛn mɛbuwoɔ?
KPƆ ŊCƐWO KPƆ
Nyi yí atɛnŋ akpedo mì nu mìanunɔ nyɔ ciwo yí adonɔ ŋsɛn mɛbuwoɔ?
Kpɔ ŋci yí akpedo eo nu naze nɔ nuxu vɔn xoxo.
Kpɔ lé àwɛ yí danunɔ amɛnyɔvwin gbɔxwe avanya o.
Kpɔ lé Yehowa kpedo ŋsu ɖeka nu yí degbewa fɛn yí xonɔ nuxu nɔ amɛ ɖa.
“Ŋvatɔ tamɛ bubu kpɔ so fini anyi gbe kplɔŋ yikɔ nu veviɖe” (Jutakpɔxɔ 1er août 2013)