Gbe susu ɖeshiaɖe ci yí trɔkpe Mawu nukplakpla!

1. Amɛkanxlenyɔ ciwo yí apostolo Pɔlu ŋwlɛn ɖaɖa Kristotɔ amɛshiaminɔwoɔ?

APOSTOLO Pɔlu nu amɛkanxlenyɔ cɛwo mɔ: “Mí ŋgbe sɔ xexe cɛ sɔ wa kpɔwɛ o.” (Rɔm. 12:2) Exwe sanŋdi ŋkɔtɔ mɛ Kristotɔwo yí Pɔlu ŋwlɛn enyɔ cɛwo nɔ. Wonyi ŋsu koɖo nyɔnu ciwo yí sɔ wowoɖekiwo na Mawu yí wosɔ gbɔngbɔn kɔkɔɛ shi ami nɔ wo. Vɔ nyi yí taɖo Pɔlu nu amɛkanxlenyɔ sɛnŋsɛnŋ cɛwo nɔ woɔ?​—Rɔm. 1:7.

2-3. Lé Satana jekɔ agbla mɔ yeana mìatrɔkpe Yehowa doɔ, vɔ lé mìawɛ ahun enu ciwo yí “lo do gogwiɖe” le mìwo susumɛ tiɔ?

² Pɔlu vɔnkɔ, ɖo Satana xexe lɔ susu ciwo yí danahɛn nu le amɛ nu kpɔkɔ ŋsɛn do Kristotɔ ɖewo ji. (Efe. 4:​17-19) Susu cɛwo atɛnŋ akpɔ ŋsɛn do mìwo ji hɛnnɛ. Satana yí nyi xexe cɛ mɛ mawu yí ezankɔ mɔnu sugbɔ mɔ yeakpɔ ŋsɛn do mì ji nɔ mìagbe Yehowa. Le kpɔwɛ mɛ, nɔ mìji mɔ mìanyi amɛkpɛnkpin alo mɛ ci ŋkɔ yi to nɔɔ, Satana ate kpɔ azan edro cɛ keŋ nɔ mìatrɔ gbeɖe Yehowa ɖɛ. Átɛnŋ agbeji mɔ yeazan enu ciwo mìkpla le axomɛ, le suklu alo le mɛ ciwo yí trodo mì gbɔ keŋ asɔ kpɔ ŋsɛn do mì ji, nɔ mìakpɔ enuwo shigbe yɛ hannɛ.

³ Mìatɛnŋ ahun enu ciwo yí “lo do gogwiɖe” le mìwo susumɛ tia? (2 Kor. 10:​4, nwt) Kpɔ lé Pɔlu ɖo ŋci do ɖa: “Mì trɔnɔ eta do gu nɔ susu ɖeshaɖe koɖo egoyìnu ɖeshaɖe ciwo yí fɔnnɔ do enunyanya Mawutɔ ji yi mì lénɔ susuɖeɖe ɖeka ɖeka yi sɔɛ ɖonɔ gɔnmɛ nɔ Kristo hlɔnhlɔn.” (2 Kor. 10:5) Aɛ, Yehowa akpedo mì nu yí mìaɖu susu vwin ɖekpokpui ji. Shigbe lé cikewo li yí xɔnɔ ŋsɛn le aɖyiwuamɛ shiɔ, ahanke Mawu Nyɔ lɔ atɛnŋ akpedo mì nu yí mìaxɔ ŋsɛn le Satana xexe lɔ ŋsɛnkpɔdoamɛji vwin shi nɛ.

MÍNA “NƆ TAMƐ BUBU MÍWOTƆ A TRƆ YOYU”

4. Trɔtrɔ ciwo yí mìwo domɛtɔ sugbɔtɔ wa ci mìxɔ nyɔnɔnwi lɔ kakaɔ?

⁴ Ðo ŋwi trɔtrɔ ciwo yí èwa hwenu èxɔ nyɔnɔnwi ci yí so Mawu Nyɔ lɔ mɛ yí sɔ gbeta mɔ yeasɛn Yehowa. Gbɔxwe mìasɛn Yehowaɔ, mìwo domɛtɔ sugbɔtɔ mi enu ciwo yí nyi enuvwinwo wawa. (1 Kor. 6:​9-11) Mìdokɔ akpe sugbɔ nɔ Yehowa, ɖo ékpedo mì nu yí mìɖo te enudɔndɔn cɛwo wawa!

5. Enu amɛve ciwo yí Rɔmatɔwo 12:2 mɔ mìwo le waɔ?

⁵ Ele ahan gan, mìdeɖo akpɔɛ mɔ trɔtrɔwawa ɖe degbele kɔ nɔ mì o. Ele mɛ mɔ, mìmi nuvɔn ganganwo wawa gbɔxwe yí wa ʒinʒindoshimɛ. Vɔ mìakpɔtɔ ajenɔ agbla yí agbe ŋɖekpokpui ci yí atɛnŋ ate mì kpɔ, nɔ mìawa nuvɔn gangan ɖe. Lé mìatɛnŋ awa cɛ doɔ? Pɔlu ɖo ŋci. Énu mɔ: “Mí ŋgbe sɔ xexe cɛ sɔ wa kpɔwɛ o, vɔ mí trɔ míwoɖekiwo, nɔ tamɛ bubu míwotɔ a trɔ yoyu.” (Rɔm. 12:2) Eyi taɖoɔ, mìɖo awa enu amɛve. Ŋkɔtɔ yí nyi mɔ mìdeɖo asɔ “xexe cɛ sɔ wa kpɔwɛ o,” alo xexe cɛ ŋgbekpɔ ŋsɛn do mì ji o. Evetɔ yí nyi mɔ mìɖo ‘atrɔ mìwoɖekiwo’ alo ana tamɛbubu mìwotɔ atrɔ yoyu.

6. Nyi yí mìkpla so susu ciwo yí le godu nɔ enyɔ ciwo yí Yesu nu do Matie 12:​43-45 mɛɔ?

⁶ Denyi trɔtrɔ le agogbe ɖekɛ nyɔ yí Pɔlu nukɔ o. Trɔtrɔ le akpaxwe ɖeshiaɖe nyɔ yí enukɔ. (Kpɔ dakavi ci yí nyi “Mìtrɔ le ji mɛ nyaoa alo mìwa shigbe mɔ mìtrɔ nɛ?”) Adɛn, seselelanmɛ koɖo edro mìwo tɔwo ɖo atrɔ keŋkeŋ gbɔxwe anyi mìwo susu trɔ yoyu. Eyi taɖo mì pleŋ, mìɖo abiɔ mìwoɖekiwo se mɔ: ‘Agogbe trɔtrɔwo ɖekɛ ŋwakɔ mɔ manyi Kristotɔa alo ŋtrɔkɔ Kristotɔ nyɔnɔnwitɔ le anyi susu koɖo anyi ji mɛ?’ Nyɔbiɔse cɛ le veviɖe. Enyɔ ciwo Yesu nu yí woŋwlɛn do Matie 12:​43-45 mɛ, dasɛ enu ci ele mɔ mìawa. (Hliin.) Susu ci yí le godu nɔ enyɔgbe ciwo ezan kpla enuvevi ɖeka mì: mìɖo asɔ susu nywi ciwo yí jɔnɔ ji nɔ Mawu ɖɔli susu vwin ciwo mìgbe.

“WO KPLA MÍ MƆ MÍ A TRƆSUN ENU YOYU LE MÍWO JI MƐ”

7. Lé mìawɛ atrɔ mìwo susu alo enu ci mìnyi le ji mɛɔ?

⁷ Mìatɛnŋ atrɔ mìwo susuwo alo enu ci mìnyi le ji mɛa? Mawu Nyɔ lɔ ɖo ŋci mɔ ɛɛ. Énu mɔ: “Wo kpla mí mɔ mí a trɔsun enu yoyu le míwo ji mɛ. Wo kpla mí mɔ mí a trɔsun agbetɔ yoyu. Agbetɔ yoyu hunnɔ ɖo a le shigbe Mawu ɛnɛ. É ɖo a mɛ̀ a gbe kɔ nyɔnɔnwitɔ.” (Efe. 4:​23, 24) Ɛɛ, mìatɛnŋ atrɔ le mìwo jiwo mɛ, vɔ yi wawa defa o. Denyi edro vwinwo koɖo enuvwinwawa gbegbe ɖekɛ nyɔ yɔ o. Mìɖo atrɔ “enu yoyu le mìwo ji mɛ.” Edasɛ mɔ mìɖo atrɔ edro, adɛn koɖo susu ci yí cucunɔ mì yí mìwanɔ nuwo. Mìɖo akpɔtɔ ajenɔ agbla tɛgbɛɛ gbɔxwe atɛnŋ asun ji.

8-9. Lé enu ci yí jɔ do nɔviŋsu ɖeka ji dasɛ mɔ mìɖo atrɔ mɛ ciŋmɛ mìnyi le ji mɛɔ?

⁸ Le kpɔwɛ mɛ, nɔviŋsu ɖeka nyi adanwatɔ sa. Énunɔ aha mu sugbɔ yí wanɔ vu koɖo amɛwo, vɔ évami keke wa ʒinʒindoshimɛ. Ecɛ nyi kunuɖeɖe nywi le nutwi lɔ mɛ. Vɔ le fiɛfiyu ɖeka, ci ewa ʒinʒindoshimɛ dejinjin ɔ, édo go tetekpɔ ci yí dekpɔkɔ mɔ nɔ o. Ahanumutɔnɔ ɖeka va yi xomɛ vaji adrɛn le nu yí mɔ yeaxui. Ci edro mìwo nɔvi lɔ mɔ yeawa vu koɖi can ɔ, éɖu yiɖeki ji le tɔtɔmɛ. Vɔ ci ŋsu lɔ vatɔ enyɔ kpotuwo nunu so Yehowa ŋkɔ nuɔ, eve mìwo nɔvi lɔ nu keke degbetɛnŋ ɖu yiɖeki ji o. Éto yí xo ŋsu lɔ. Nyi yí taɖo ewa ahan ɔ? Ci Bibla kplakpla kpedo nu eɖu evuwawa ci yí druini ji can ɔ, detɛnŋ trɔ le ji mɛ o. Mìanui kpoŋ mɔ detrɔ amɛ yoyu le yi ji mɛ o.

⁹ Vɔ nɔvi cɛ dena ta o. (Elo. 24:16) Hamɛmɛshinshinwo kpedo nu, eyi ji yí wa ŋkɔyiyi. Évaje yí nyi hamɛmɛshinshin. Fiɛfi ɖeka ci eto le Fyɔɖuxuxɔ mɛɔ, égbedo go tetekpɔ ci hanci edo go exwe ɖewo vayi. Ahanumutɔnɔ ɖeka jikɔ axo hamɛmɛshinshin ɖeka. Nyi mìwo nɔvi lɔ waɔ? Édo ʒinxo yí sɔ yiɖeki hwe keŋ yí xo nuxu nɔ ahanumutɔnɔ lɔ. Éna ŋsu lɔ ɖo yiɖeki mɛ yí kpedo nu eyi axomɛ. Nyi yí taɖo mìwo nɔvi lɔ wa nu eto akpo nɔ sasatɔɔ? Étrɔ mɛ ciŋmɛ enyi le ji mɛ. Évanyi amɛfafa koɖo mɛ ci yí sɔ yiɖeki hwe ŋtɔŋtɔ. Ecɛ kanfu Yehowa ŋkɔ!

10. Nyi mìɖo awa gbɔxwe atrɔ mɛ ciŋmɛ mìnyi le ji mɛɔ?

¹⁰ Trɔtrɔ cɛwo devanɔ gbeɖeka koɖo zan o; wodevanɔ le wowoɖeki shi hɛnnɛ o. Mìɖo ado gbla na nɔ exwe sugbɔ. (2 Piɛ 1:⁠5) Denyi ci mìle “nyɔnɔnwi lɔ mɛ” na nɔ exwe sugbɔ taɖo trɔtrɔ cɛwo ava le wowoɖeki shi o. Mìɖo aje agbla sɛnsinɖe lé mìakpe ji do yí atrɔ mɛ ciŋmɛ mìnyi le ji mɛ. Enuvevi ɖewo li mìawa gbɔxwe awa trɔtrɔ cɛwo. Na mìakpɔ wowo domɛtɔ ɖewo.

LÉ MÌATRƆ MƐ CIŊMƐ MÌNYI LE JI MƐ DO

11. Lé gbedodoɖa akpedo mì nu mìatrɔ mɛ ciŋmɛ mìnyi le ji mɛ doɔ?

¹¹ Gbedodoɖa yí nyi enuvevi ŋkɔtɔ. Mìɖo ado gbe ɖaɖa shigbe ehakpɔtɔ lɔ nɛ. Énu mɔ: “Mawu, jɔ eji mɛmi do lanmɛ nɔ ŋ. Na nɔ anyi gbɔngbɔn a gbe sɛnŋ ke.” (Eha. 51:10) Ele mɔ mìalɔn do ji mɔ mìɖo atrɔ mɛ ciŋmɛ mìnyi le ji mɛ yí abiɔ Yehowa kpekpedonu. Lé mìawɛ akando ji mɔ Yehowa akpedo mì nu mìawa trɔtrɔwoɔ? Egbe ci Yehowa ɖo kudo Izraɛlivi jimɛsɛntɔwo nu le Ezekiɛli hwenu, atɛnŋ ado ŋsɛn mì. Énu mɔ: “Nana ji ci yí ato emɔ kuɖeka ji wo yí nado gbɔngbɔn yoyu wo mɛ . . . yí asɔ ŋcilanji na wo;” eji ci yí wanɔ do Mawu mɔdasɛnawo ji enyi. (Eze. 11:​19, nwt) Yehowa lɔn faa mɔ yeakpedo Izraɛliviwo nu woatrɔ; égbejikɔ mɔ yeakpedo mìwo nu hɛnnɛ.

12-13. (a) Sɔ koɖo Ehajiji Wema 119:59 ɖe, nyi nu ele mɔ mìabu tamɛ kpɔ soɔ? (b) Nyɔbiɔse ciwo yí ele mɔ àbiɔ eoɖeki seɔ?

¹² Tamɛbubukpɔ nyi afɔɖeɖe vevi amɛvetɔ. Nɔ mìhlɛnkɔ Mawu Nyɔ lɔ ŋkeŋkeɔ, ele mɔ mìabu tamɛ kpɔ nywiɖe so enu ci mìhlɛn nu yí ado jeshi susu koɖo seselelanmɛ ciwo mìɖo atrɔ. (Hlɛn Ehajiji Wema 119:59; Ebre. 4:12; Ʒaki 1:25) Mìɖo ado jeshi ŋsɛn ci yí xexe cɛ mɛ nunya kpɔkɔ do mìwo susu koɖo mìwo seselelanmɛwo ji. Ele mɔ mìalɔn do mìwo gbɔjɔgbɔjɔwo ji yí aje agbla veviɖe atrɔ.

¹³ Le kpɔwɛ mɛ, biɔ eoɖeki se mɔ: ‘Ŋhwan hwɛɖeka kpetii kpɔtɔ le anyi ji mɛa?’ (1 Piɛ 2:1) ‘Fini ŋso, ekpla ci wonaŋ alo eho ci yí le ŋshi, na ŋsenɔ le nyɛɖeki mɛ mɔ ŋnyɔ wu mɛbuwoa?’ (Elo. 16:5) ‘Ŋkpɔɛni mɔ ŋle ŋkɔ nɔ mɛ ciwo yí deɖo enu ciwo yí le ŋshi alo mɛ ciwo yí so akɔta bu mɛa?’ (Ʒaki 2:​2-4) ‘Enu ciwo Satana xexe lɔ sɔ ɖonɔ ŋmɛ nɔ mì dronɔŋ a?’ (1 Ʒan 2:​15-17) ‘Ayeɖedaɖɛ ciwo mɛ gbɔdɔndɔn masɔkoɖose koɖo tamɛsɛnnuwanawo le, jɔnɔ ji nɔŋ a?’ (Eha. 97:10; 101:3; Amosu 5:15) Nɔ èɖo nyɔbiɔse cɛwo ŋciɔ, àtɛnŋ ado jeshi trɔtrɔ ciwo èɖo awa. Nɔ mìɖu susu ciwo yí “lo do gogwiɖe” le mìwo ji mɛ jiɔ, mìwo nu ajɔ ji nɔ mìwo Da ci yí le jeŋkwimɛ.​—Eha. 19:14.

14. Nyi yí taɖo exlɔ nywiwo cancan le veviɖeɔ?

¹⁴ Exlɔ nywiwo cancan nyi afɔɖeɖe amɛtɔntɔ ci yí gbele veviɖe. Exlɔwo kpɔnɔ ŋsɛn do mì ji sugbɔ, nɔ mìgbe alo mìlɔn can. (Elo. 13:20) Le dɔmɛ alo le sukluɔ, mɛ ciwo yí trɔdo mì dekpenɔdo mì nu, nɔ mìaɖo susu ciwo yí jɔnɔ ji nɔ Mawu o. Vɔ mìatɛnŋ akpɔ exlɔ nywiwo le mìwo Kristotɔwo bɔbɔwo mɛ. Nɔtɔxu yí mìakpɔ mɛ ciwo yí ado ŋsɛn mì nɔ “lɔnlɔn koɖo enunywi wawa” le.​—Ebre. 10:​24, 25.

LO DO GOGWIÐE LE XƆSE MƐ

15-16. Lé Satana jenɔ agbla mɔ yeatrɔ mìwo susuwo doɔ?

¹⁵ Ðo ŋwi hɛnnɛ mɔ, Satana ɖui mɔ yeatrɔ mìwo susu. Ézannɔ enukplakpla hamɛhamɛ yí asɔ dahɛn ŋsɛn nywi ci Mawu Nyɔ lɔ kpɔkɔ do mì ji.

¹⁶ Enyɔ ci Satana biɔ Ɛva se le Edɛn kpa lɔ mɛ yí egbekpɔtɔ biɔkɔ se. Ébiɔɛ se mɔ: “Nyɔnɔnwi yí Mawu nu mɔ . . . ?” (Gɔnm. 3:​1, nwt) Le xexe cɛ ci ji Satana kpɔkɔ ŋsɛn do mɛɔ, wowanɔ enyɔbiɔ ciwo yí ana mìdagbekando mìwo jixɔsewo ji o. Wobiɔnɔ se mɔ: ‘Nyɔnɔnwi yí Mawu delɔn mɔ, ŋsu aɖe ŋsu yí nyɔnu aɖe nyɔnua? Nyɔnɔnwi yí Mawu deji mɔ, míwo le ɖu Nɔwɛli xwe alo jigbezanwoa? Nyɔnɔnwi yí Mawu nu mɔ, míŋgbedo ehun a? Nyɔnɔnwi yí lɔnlɔn Mawu lɔ nu mɔ, míŋgbedo ha koɖo míwo mɛ vevi ciwo woɖe ti le ha lɔ mɛa?’

17. Nyi mìatɛnŋ awa nɔ wobiɔ enyɔ ciwo yí atɛnŋ ana mìdagbekando mìwo jixɔsewo ji mì seɔ, yí sɔ koɖo Kolosetɔwo 2:​6, 7 ɖe, nyi yí ato so mɛɔ?

¹⁷ Mìɖo akando mìwo jixɔsewo ji. Nɔ mìdeɖo nyɔbiɔse vevi ciwo yí kudo mìwo jixɔsewo nu ŋciɔ, mìatɛnŋ atɔ kpɔkpɔɛ mɔ mìwo jixɔsewo denyi nyɔnɔnwi o. Nɔ mìdekando mìwo jixɔsewo jiɔ, mìacaka le susumɛ yí mìwo xɔse aku. Ci enyi ahan ɖe, nyi mìɖo awaɔ? Mawu Nyɔ lɔ nu nɔ mì mɔ, mìɖo atrɔ mìwo susu keŋ aɖo kpe yi ji nɔ mìwoɖekiwo mɔ “enu ci yí nyi enu nywi, enu ci yí jeŋmɛ nɔ amɛ koɖo enu ci yí sɔgbe, wowo yí nyi Mawu nudrodro.” (Rɔm. 12:2) Nɔ mìkplanɔ nu kabakabaɔ, mìatɛnŋ aɖo kpe nyɔnɔnwi ciwo mìkpla le Bibla mɛ ji nɔ mìwoɖekiwo. Ecɛ ana mìakando ji pleŋpleŋ mɔ Mawu gɔnmɛɖosewo le jɔjɔɛɖe. Eyi mìalo do gogwiɖe le xɔse mɛ shigbe aci ciwo eke sɛnŋ nɔ hannɛ.​—Hlɛn Kolosetɔwo 2:​6, 7.

18. Nyi yí akpedo mì nu yí mìaxɔ ŋsɛn le Satana xexe ɖyiwuamɛ shiɔ?

¹⁸ Eoŋtɔ yí ana ao xɔse alo do gogwiɖe. Mɛɖe dawɛ do dumɛ nɔ eo o. Eyi taɖo, yi ji atrɔnɔ mɛ ciŋmɛ ènyi le ji mɛ. Donɔ gbe ɖaɖa hweshiahwenu, fan kwi abiɔnɔ Yehowa gbɔngbɔn kɔkɔɛ kpekpedonu. Bunɔ tamɛ kpɔ nywiɖe; yi ji agbejenɔ susu koɖo enu ci yí cucunɔ eo yí èwanɔ nuwo mɛ kpɔ. Do ha nywiwo; can exlɔ nywi ciwo yí akpedo eo nu natrɔ ao susuwo. Nɔ èwanɔ ahan ɔ, àkpe ji axɔ ŋsɛn le Satana xexe ɖyiwuamɛ shi yí agbe “susu ɖeshaɖe koɖo egoyìnu ɖeshaɖe ciwo yí fɔnnɔ do enunyanya Mawutɔ ji.”​—2 Kor. 10:5.