Agbenɔnɔ koɖo sumɔsumɔdɔ bɔbɔ nukplawema nyɔsoxuwo
6-12 JUILLET
MAWU NYƆ MƐ DƆKUNUWO | HUNHUN 6-7
“Evyɛ ɔ, a kpɔ enu ci yí Na wa koɖo Faraɔn”
it-2-F 309 mm. 5
Moizi
Ŋsu ciwo yí le Izraɛliviwo mɛ can trɔ. Woxɔ gbe do Moizi nyɔwo ji doŋkɔ, vɔ evyɛ ci Faraɔn vaɖe gbe yí edɔ sɛnŋsɛnŋ wowo tɔwo gbesɛnŋ dojiɔ, wotɔ nyɔ toto nɔ Moizi keke Moizi ŋtɔkpu can vagbɔjɔ yí ɖe kuku nɔ Yehowa mɔ yi le kpedo ye nu. (Hun 4:29-31; 5:19-23) Eyi Ejiɖaatɔ lɔ nu ni mɔ yeawa do egbe ci yeɖo nɔ Abraxamu, Izaki koɖo Ӡakɔbu ji keŋ yí sɔ do ŋsɛn yi. Wawa do egbe ci eɖo lɔ ji adasɛ gɔnmɛsese ci yí le yi ŋkɔ lɔ nu. Áhwlɛn Izraɛliviwo gan yí asɔ wo wa jukɔn gangan ɖeka le gbeɖu nyigban lɔ ji. (Hun 6:1-8) Ci enyi ahan can ɔ, Izraɛli ŋsuwo deɖo to Moizi o. Vɔ le efunkpekpe amashiɖekɛtɔ lɔ goduɔ, wogbetrɔ yí tɔ lɔnlɔn do yi nyɔwo ji yí tɔ enu wawa koɖi alɔlealɔmɛ. Eyi le efunkpekpe amɛwotɔ lɔ goduɔ, Moizi bɔ Izraɛliviwo shigbe ‘ahwawaviwo nɛ’ yí kplɔ wo ti le Eӡipti.—Hun 13:18.
it-2-F 309 mm. 3-4
Moizi
Woyi Eӡipti fyɔ Faraɔn gbɔ. Moizi koɖo Arɔn yí adɔ ‘mawuwo hwa’ ɖeka ajɔ yɛ. Faraɔn yɔ Eӡipti hojunɔwo pleŋ nɔ woayɔ Eӡipti mawuwo pleŋ, keŋ nɔ woate kanmɛ kpɔ koɖo Yehowa. Ewa mɔ hojunɔ lɔwo gawo yí woyɔnɔ mɔ Ӡanɛsi koɖo Ӡambrɛsi. (2Tim 3:8) Enujiŋ ŋkɔtɔ ci Moizi mɔ Arɔn le wa dasɛ lé Yehowa sɛnŋ wugan Eӡipti mawuwo pleŋ do. Ele ahan gan, Faraɔn kpɔtɔ shinkɔ ŋta kpi. (Hun 7:8-13) Le yiyimɛ le efunkpekpe amɛtɔntɔ lɔ hwenuɔ, evaglo keke hojunɔ lɔwo ŋtɔwo can valɔn do ji mɔ, “Mawu hlɔnhlɔn yí wa enudaӡi cɛ.” Eyi le efunkpekpe ci yí nyi enutɛntin lɔwo hwenuɔ, enu sun wo kpɛɖɛkpɛɖɛ keke wodegbesun ji ayi Faraɔn gbɔ yí avayi nɔ te le ŋmɛ nɔ Moizi o.—Hun 8:16-19; 9:10-12.
Efunkpekpe ciwo yí na mɛɖewo lɔn Yehowa yí gbena mɛbuwo tri to doji. Moizi koɖo Arɔn yí vanyi mɛ ciwo yí anu efunkpekpe amɛwo lɔwo ɖekaɖeka. Enu lɔwo jɔ pɛpɛpɛ. Ecɛ dasɛ mɔ Yehowa ŋɛwo yí Moizi dokɔ nyao. Yehowa ŋkɔ vaɖyikɔ le Eӡipti juɔ pleŋ mɛ, yí amɛ sugbɔ le yi nyɔ nukɔ. Enu cɛwo dɔ yí Izraɛliviwo koɖo Eӡiptitɔ ɖewo valɔn Yehowa, vɔ Faraɔn koɖo yi bɔdonutɔwo gbetrikɔ to doji. (Hun 9:16; 11:10; 12:29-39) Eӡiptitɔwo nya mɔ de ekɔ ɖe yewoɖu nɔ yewo mawu lɔwo o, vɔ Yehowa yí ɖokɔ kojo nɔ wo. Le efunkpekpe amashiɖekɛtɔ lɔ goduɔ, ‘Eӡiptitɔwo, amɛ ciwo yí bɔdo Faraɔn nu can va nanɔ bubu Moizi.’—Hun 11:3.
Bibla mɛ nuxɔafiwo jiji
it-2-F 1091 mm. 4-5
Ŋsɛnwopleŋtɔ
Hwecinu Yehowa ɖoɖoɔ gbe nɔ Abraxamu mɔ yɛaji Izakiɔ, ézan bubuŋkɔ ci yí nyi “Mawu Ŋsɛnwo Pleŋtɔ” (ʼEl Shad·daiʹ). Abraxamu ɖo akando ji mɔ, Mawu ɖo ŋsɛn yí awa do egbe cɛ ci eɖo nɔ ye ji dandandan. Wogbezan bubuŋkɔ lɔ hwecinu woxo nuxu so Mawu nu mɔ, eyi acu shi nɔ Izaki koɖo Ӡakɔbu ciwo yí aɖu cinɔ nɔ Abraxamu nublabla lɔ.—Gɔnm 17:1; 28:3; 35:11; 48:3.
Ecɛ yí dɔ taɖo Yehowa vanu nɔ Moizi le yiyimɛ mɔ: ‘Ŋ ze do Abraxamu, Izaki, koɖo Ӡakɔbu ji shigbe Mawu Ŋsɛnwo Pleŋtɔ (Ɛl Shadai) nɛ, vɔ wodenya Anyi ŋkɔ o.’ (Hun 6:3) Ecɛ dedasɛ mɔ blematɔgbui cɛwo dejeshi Yehowa ŋkɔ lɔ ɖɛ o, ɖo wowoŋtɔwo koɖo mɛ ciwo yí ni doŋkɔ nɔ wo zan ŋkɔ lɔ. (Gɔnm 4:1, 26; 14:22; 27:27; 28:16) Le nyɔnɔnwimɛɔ, zeadɛn (6) yí woyɔ “Ŋsɛnwo Pleŋtɔ” le Gɔnmɛjeje wema lɔ mɛ hwecinu woxokɔ nuxu so blematɔgbui cɛwo nu, vɔ zenɛni ci woŋwlɛ Yehowa ŋkɔ lɔ do Ebre nuŋwlɛŋwlɛwo mɛ yí nyi 172. Ele ahan gan, ci enu ciwo mɛ blematɔgbui cɛwo to na wovanya mɔ woɖo gbe ayɔ Mawu mɔ “Ŋsɛnwo Pleŋtɔ” nyao yí enu ciwo ewa sɔ koɖi can ɔ, wodejeshi gɔnmɛsese ci yí le Yehowa ŋkɔ yɛ nu vɛ o. Wema ɖeka xo nuxu so nu mɔ: “Enu ŋkɔtɔ ci wodasɛ nɔ mìwo tɔgbuiwo nyi nu ciwo yí avajɔ le esɔmɛ. Eyi taɖo woɖo akando Eyɛ, mɛ ci yí nyi Yawe ji mɔ, yɛnyi Mawu (ʼel) ci yí asun ji (woatɛnŋ aɖe sadday gɔnmɛ ahan) awa do enyɔ ci enu ji. Enu ci Mawu dasɛ le aci ci yí jejeɛ zo gbɔ gbenyi enugangan koɖo enuvevi ɖeka, ɖo lé edasɛ Mawu ŋsɛn koɖo lé Mawu kpɔtɔ nɔ koɖo wo do nyi enu ciwo yí sɔ koɖo gɔnmɛsese ci yí le yi ŋkɔ Yawe lɔ nu.”—The Illustrated Bible Dictionary (Vol. 1, p. 572), wema ci yí J. D. Douglas wa le 1980 mɛ.
it-2-F 308 mm. 6
Moizi
Wodetashi Moizi ci yí dekando yiɖeki ji can o. Moizi dekando yiɖeki ji o, ɖo énu mɔ yedasun ji axo nuxu nywiɖe o. Ecɛyɛɔ, Moizi trɔ keŋkeŋ, degbele shigbe lé ele sa hwecinu yiŋtɔ sɔ gbeta mɔ yeahwlɛn Izraɛliviwo gan exwe 40 han vayi o. Ékpɔtɔ gbegbeɛ keke yí vaɖe kuku nɔ Yehowa le vɔvɔnu mɔ, yedasun ji awa dɔ lɔ o. Ci enyɔ ci Moizi nunuɔ do dɔmɛzi nɔ Mawu can ɔ, degbi o, vɔ ésɔ nɔviɛ Arɔn bɔdo nu keŋ nɔ axo nuxu doŋ ni. Ci Moizi le Mawu dumɛɔ, Moizi vale shigbe “Mawu” hannɛ nɔ Arɔn, ci yí anɔ yi dumɛ axo nuxu doŋ ni. Le bɔbɔ ci wo koɖo ve lɔ wa koɖo Izraɛli mɛganwo koɖo ego ciwo wovado koɖo Faraɔn mɛɔ, eze petii mɔ Mawu nunɔ nyɔ ɖewo nɔ Moizi, yɛvanunɔ wo nɔ Arɔn yí enyi Arɔn yí vanunɔ wo nɔ Faraɔn (Faraɔn ci yí kplɔ Faraɔn ci yí Moizi shi nɔ exwe 40 vayi do). (Hun 2:23; 4:10-17) Le yiyimɛɔ, Yehowa vayɔ Arɔn mɔ Moizi “nyɔnuɖɛtɔ,” ɖo Moizi yí nunɔ enyɔ ciwo Arɔn anu ni shigbe lé Moizi ŋtɔ can nyi nyɔnuɖɛtɔ nɔ Yehowa hannɛ. Wogbenu nɔ Moizi hɛnnɛ mɔ wosɔ trɔ “Mawu . . . nɔ Faraɔn.” Ecɛ dasɛ mɔ Mawu na acɛ koɖo ŋsɛn Moizi mɔ yɛakpa nɔ Faraɔn, yí degbeɖo avɔn nɔ Eӡipti fyɔ cɛ o.—Hun 7:1, 2.
13-19 JUILLET
MAWU NYƆ MƐ DƆKUNUWO | HUNHUN 8-9
“Faraɔn egoyitɔnɔ wa Mawu dro le manyamanya mɛ”
it-2-F 431
Etotritri
Yehowa sɔ jigbɔnɖɛ tanɔshi eju alo nuvwinwatɔ ciwo yí eɖo awu ɖɛ, yí wokpɔtɔ nɔnɔ agbe. (Gɔnm 15:16; 2 Piɛ 3:9) Mɛɖewo valɔn yí trɔnɔ adɛn yí wanɔ nunywi keŋ nɔ Mawu aku ŋshishi nɔ wo (Ӡoz 2:8-14; 6:22, 23; 9:3-15), vɔ hɔnnɔxwe yí mɛbuwo gbetrinɔ to doji le egunfɔnfɔn do Yehowa koɖo yi mɛwo nu mɛ ke. (2Ese 2:30-33; Ӡoz 11:19, 20) Ci Yehowa degbenɔ nɔ mɛɖe mɔ yiŋgbetri toɔ, eyi taɖo wonu so nu mɔ ‘yɛdɔ amɛwo trinɔ to’ alo ‘dɔ wowo ji sɛnnɔŋ.’ Eyi nɔ évagu etosɛntɔ lɔwoɔ, amɛwo kpɔnɔ yi ŋsɛn gangan lɔ yí kannɔfu yi ŋkɔ.—Sɔ sɔ koɖo Hun 4:21; Ӡan 12:40; Rɔm 9:14-18.
it-2-F 240 mm. 8-241 mm. 2
Nuvwinwawa
Gbesɔ kpe niɔ, Yehowa Mawu tanɔshi nuvwinwatɔwo ɖɛ hweɖewonu yí wɛni keke wowanɔ edro yi tɔ le manyamanya mɛ. Ci nuvwinwatɔ cɛwo fɔnnɔ gu do Yehowa nu can ɔ, delɔn wocunɔ nu koɖo yi sɛntɔwo keke egbejinɔnɔ glonɔ wo o. Égbewɛni keke nuvwinwatɔ lɔwo ŋtɔwo nuwanawo dɔ jɔjɔɛnyinyi yi tɔ zenɔ petii.—Rɔm 3:3-5, 23-26; 8:35-39; Eha 76:10.
Le kpɔwɛ mɛ, Yehowa dɔ Moizi koɖo Arɔn mɔ wo le vayi nu nɔ Faraɔn mɔ, yi le tashi Izraɛlivi ciwo yí le hwashigbemɛ le gbɔ. De Mawu yí wɛ yí Eӡipti cɛkpatɔ lɔ nyi amɛvwin o, vɔ ta etashi yí ekpɔtɔ le agbe yí wa nuwo keke Faraɔn ŋtɔ dasɛ mɔ amɛvwin yenyi yí je nɔ eku. Wonu enu ci yí taɖo Yehowa wa nu ahan mɛ le Hunhun 9:16 mɛ mɔ: “Vɔ, Ŋ sɔ eo daɖo elɛ do enu ɖeka ŋci. Ŋ sɔ eo daɖo elɛ yí a tɛnŋ dasɛ Anyi hlɔnhlɔn nɔ eo. Eyi, amɛwo le xexe lɔ pleŋ mɛ a kplanu so Ŋ nu.”
Yehowa dasɛ yi ŋsɛn gangan lɔ hwecinu ehɛn efunkpekpe amɛwo va Eӡiptitɔwo ji, yí gu Faraɔn koɖo yi hwakɔn lɔ le Axu Jin lɔ mɛ. (Hun 7:14–12:30; Eha 78:43-51; 136:15) Le xwe sugbɔ goduɔ, eju ciwo yí se nyɔ lɔ gbekpɔtɔ xokɔ nuxu so enujɔjɔ lɔwo nu, yí Mawu ŋkɔ gban kpedo fishiafi le nyigban lɔ ji. (Ӡoz 2:10, 11; 1Sam 4:8) Nɔ wu Yehowa wu Faraɔn zeɖeka saɔ, amɛwo dagbekpɔ Yi ŋsɛn gangan lɔ, kanfukanfu Yi tɔ koɖo lé ehwlɛn Yi mɛwo gan do o.
Bibla mɛ nuxɔafiwo jiji
w04-EW 3/15 25 mm. 10
Enyɔ vevi ciwo yí le Hunhun wema mɛ
8:26, 27—Nyi yí taɖo Moizi nu mɔ Izraɛliviwo vɔnsawo ‘anyɔŋ nɔ Eӡiptitɔwoɔ?’
Wosɛnnɔ elan sugbɔ le Eӡipti. Eyi taɖo nunu mɔ yewoyikɔ avɔn sa gbe, atɛnŋ adɔ Faraɔn alɔn do enu ci Moizi biɔkɔ gbɛmɛgbɛmɛ mɔ wo le tashi Izraɛliviwo nɔ woavayi sa vɔn nɔ Yehowa ji.
5 Yehowa na yí Moizi vanyi hwlɛngantɔ nɔ Izraɛliviwo. Vɔ hwenu yí Yehowa ziin ɔ? Hwenu yí “Eӡiptitɔwo kpla wowo ŋununyanyawo pleŋ Moizi” yɔa? (Edɔ. 7:22-25) Oo, Yehowa na kpla Moizi evanyi mɛ ci yí sɔnɔ yiɖeki hwe koɖo amɛfafa gbɔxwe yí ziin. (Edɔ. 7:30, 34-36) Yehowa na dɔngbegbe Moizi yí etɛnŋ xo nuxu nɔ Eӡipti fyɔ ci yí nyi ŋsɛntɔnɔ. (Hun. 9:13-19) Nyi yí mìkpla so hwenu Yehowa zan Moizi koɖo lé eziin do mɛɔ? Yehowa zannɔ mɛ ciwo yí te kpɔ srannɔ yi nɔnɔmɛwo koɖo mɛ ciwo yí ɖonɔŋ do nu mɔ yɛado ŋsɛn yewo.—Fili. 4:13.
20-26 JUILLET
MAWU NYƆ MƐ DƆKUNUWO | HUNHUN 10-11
“Moizi koɖo Arɔn dasɛ mɔ yewonyi jitrinɔwo”
w09-EW 7/15 20 mm. 6
Sran Yesu yí aɖe kunu koɖo jitri
6 Faraɔn nyi acɛkpatɔ yí amɛwo kpɔɛni mɔ yɛnyi mawu ɖe, wleci mawu Ra vi, yí denyi mawuwo dumɛnɔtɔ ɖe kpoŋ enyi o. Eyi taɖo yi susumɛ kpɔ yí akpɔ eji ci Moizi ɖo gbɔxwe yí xo nuxu ni ɖa. Taŋfuin shigbe Faraɔn kpɛtɛwo nɛɔ, Faraɔn cɛ can donɔ ŋdo nɔ yiŋtɔ kpe ci womɛ. Enyɔ ɖekpokpui ci yí tonɔ le numɛ nɔ Faraɔn nyinɔ se, eyi donɔ sewo le juɔ mɛ. Ci Faraɔn nyi acɛkpatɔ, egoyitɔnɔ koɖo ŋtashintɔɔ, mɛɖe denunɔ enu ci awa ni o. Mɛ cɛ gbɔ yí Moizi, lɛngbɔkplɔtɔ gbali yi zenɛniɖe ci wodeyɔɛni alo xɔɛni nywiɖe can. Eyi nyɔ ciwo Moizi vayi nunɔ niɔ? Wowo yí nyi efunkpekpe sɛnŋsɛnŋwo. Yí nyi emɔ yɛ le waɔ? Émɔ yɛ le tashi yi hwashi miliɔn nɛniɖe nɔ woaso le ju lɔ mɛ! Moizi ӡan jitria? Ɛɛ, éӡan jitri gbɔxwe awa dɔ cɛ!—Amh. 12:3; Ebre. 11:27.
it-2-F 309 mm. 6
Moizi
Woӡan edɔngbegbe koɖo xɔse gbɔxwe ayi Faraɔn gbɔ. Yehowa ɖekɛ kpaŋ koɖo yi gbɔngbɔn kɔkɔɛ yí do ŋsɛn Moizi koɖo Arɔn gbɔxwe wosun ji yí wa edɔ ci wodɔ wo. Kpɔ lé Faraɔn ci yí nyi acɛkpatɔ gangantɔ hwenɔnu le nyigban ji kpatɛmɛ ale do le susumɛ ɖa! Faraɔn kpatɛmɛ nyi fini yí je acɔ wu afiwo pleŋ. Susuɖekoɖoamɛtɔwo, ahwaŋkɔnɔtɔwo, enucɔtɔwo koɖo sumɔviwo trɔdo Faraɔn egoyitɔnɔ, ci yí mɔ yenyi mawu. Gbesɔ kpe niɔ, hojunɔ ciwo nyi Moizi ketɔnɔ teŋwo can trɔdi. Le Faraɔn fyɔɖuxu lɔ pleŋ mɛɔ, ŋsu cɛwo nyi ega gangan ciwo yí kplɔ Faraɔn do. Amɛ hatahata ɖyivɔnvɔn cɛwo pleŋ le godu nɔ Faraɔn yí nunuɔ ni mɔ, Eӡipti mawuwo le godu ni. Ele ahan gan, Moizi koɖo Arɔn yi Faraɔn gbɔ zenɛniɖe, vɔ Faraɔn kpɔtɔ shinshin ŋta, ɖo éɖui koŋ mɔ Ebre hwashiwo akpɔtɔ anɔ ye cɛkpakpa gɔnmɛ. Le nyɔnɔnwimɛɔ, ci yí Moizi koɖo Arɔn vayi nu efunkpekpe amɛnyitɔ lɔ nɔ Faraɔn ɔ, wonya wo ti le Faraɔn gbɔ. Hwenu wovayi nu efunkpekpe amashiɖekɛtɔ lɔ niɔ, wonu nɔ wo mɔ woawu wo nɔ wogbekpɔ wo ke.—Hun 10:11, 28.
Bibla mɛ nuxɔafiwo jiji
w95-EW 9/1 11 mm. 11
Kunuɖetɔ ciwo yí trɔkpe ŋsumawuwo
11 Hwecinu Izraɛliviwo kpɔtɔ le Eӡiptiɔ, Yehowa ɖo Moizi ɖaɖa Faraɔn gbɔ yí nu mɔ: “Yì Faraɔn gbɔ. Ŋ dɔ yí yi koɖo amɛ ciwo yí bɔdonɔnu trito. Ŋ wa enu lɔwo ahan yí a sɔ dasɛ enudaӡi ciwo yí le Anyi hlɔnhlɔn mɛ nɔ wo. Ŋ gbe wa enu lɔwo ahan nɔ́ nà tɛnŋ nu enudaӡi koɖo enu adodwi ciwo yí Ŋ wa le Eӡipti nyigban ji nɔ ao viwo koɖo viviwo. Eyi, míwo pleŋ a nya mɔ Ŋ nyi [Yehowa].” (Hunhun 10:1, 2) Izraɛlivi setonuwo anu enujiŋ ciwo Yehowa wa nɔ wowo viwo, wowo viwo can anu enujiŋ lɔwo nɔ wowo viwo, yí ahan woanuikɔ tɛgbɛɛ nɛ. Ecɛ adɔ yí woaɖonɔ ŋwi enujiŋ ciwo Yehowa wa. Ahanke le egbɛmɛɔ, edɔ le kɔ nɔ vida koɖo vinɔwo mɔ woaxonɔ nuxu so enujiŋ Yehowa tɔwo nu nɔ wowo viwo.—2 Ese Wema 6:4-7; Elododo Wema 22:6.
it-1-F 849 mm. 6
Hunhun
Yehowa dasɛ yi ŋsɛn gangan lɔ yí sɔ hwlɛn Izraɛliviwo gan yí enyi kanfukanfu nɔ yi ŋkɔ. Ci Izraɛliviwo je ago ji nɔ Axu Jin lɔ le wezexu yí ŋɖekɛ dewa woɔ, Moizi nɔ ŋkɔ nɔ Izraɛli ŋsuwo yí woji ha. Nɔviɛ nyɔnushitɔ Miriamu ci yí nyi enyɔnuɖɛtɔ lé saya ɖeka do alɔ̀mɛ yí le ŋkɔ nɔ nyɔnuwo yí wowo can lé saya do alɔ̀mɛ yí xexeɛ ha nɔ ŋsuwo yí ɖuɖuɔ ewe. (Hun 15:1, 20, 21) Izraɛliviwo so le wowo ketɔnɔwo gbɔ keŋkeŋ. Hwecinu woso le Eӡiptiɔ, Yehowa delɔn yí agbetɔ alo elan wadan ɖe wa ŋɖe nɔ wo o, yí avu kpetii can dewó wo o. (Hun 11:7) Ci exolɔlɔ ci yí le Hunhun wema mɛ denu mɔ wogu Faraɔn bɔdo yi hwakɔn nu do axu lɔ mɛ can ɔ, Ehajiji Wema 136:15 nu mɔ, Yehowa “wu Faraɔn koɖo yi hwakɔn do axu jin mɛ.”
27 JUILLET–2 AOÛT
MAWU NYƆ MƐ DƆKUNUWO | HUNHUN 12
“Gɔnmɛsese ci yí le Paki lɔ nu nɔ Kristotɔwo”
w07-EW 1/1 20 mm. 4
“Eyi àɖɔ koɖo jijɔ fulii”
4 Yesu ku le ŋkeke 14 tɔ ji nɔ Nisan exwe 33 K.H. mɛ. Le Izraɛliɔ, ŋkeke 14 tɔ nɔ Nisan nyinɔ Paki xwe koɖo jijɔ ŋkeke. Xwekpekpe duu le ŋkeke ŋtɔ́ jiɔ, xomuwo sɔ lɛngbɔvi ci ŋɖe dewa fiɖe nɔ o ɖanɔ ŋɖuɖu ɖeka yí ɖuini doju. Nɔ wowɛ ahan ɔ, woɖonɔ ŋwi enu ci lɛngbɔvi hun lɔ wa le Izraɛliviwo vi ŋkɔtɔwo hwlɛnhwlɛngan mɛ hwecinu mawudɔla wu evi ŋkɔtɔwo le Eӡipti le ŋkeke 14 tɔ ji nɔ Nisan exwe 1513 D.Y. mɛ. (Hunhun 12:1-14) Paki lɛngbɔvi lɔ le dumɛ nɔ Yesu, mɛ ci nu apotru Pɔlu nu so mɔ: “Wo sɔ Kristo ci yí nyi mìwo Paki xweɖuɖu sɔ sa avɔn do mìwo ta.” (1 Korɛntitɔwo 5:7) Shigbe Paki lɛngbɔvi hun nɛɔ, Yesu hun ahwlɛn amɛ sugbɔ gan.—Ӡan 3:16, 36.
it-2-F 485 mm. 7
Paki
Yesu wa ŋɖewo le enu ciwo wowanɔ le Paki ɖuɖu hwenu mɛ. Le kpɔwɛ mɛ, woshishi ehun do ehɔnciwo nu le Eӡipti nɔ mawudɔla lɔ ŋgbewu Izraɛliviwo vi ŋkɔtɔwo o. Pɔlu nu mɔ Kristotɔ amɛshiaminɔwo nyi hamɛ lɔ vi ŋkɔtɔwo (Ebr 12:23), yí Kristo hwlɛn wo gan koɖo yi hun. (1Tɛs 1:10; Efe 1:7) Nɔ woɖukɔ Paki lɛngbɔvi lɔɔ, wodegbannɔ xu ɖekɛ ni o. Ahanke wonu ɖɛ mɔ mɛɖe daŋɛ Yesu xu ɖekɛ o, yí ejɔ do ahan ji hwenu eku. (Eha 34:20; Ӡan 19:36) Eyi taɖo Paki ci yí Ӡuifuwo ɖu na nɔ exwe sanŋdi nɛniɖe nyi ɖeka nɔ enu ciwo Ese lɔ mɔ woanyi kpɔli nɔ enu ciwo yí avamɛ do Yesu Kristo, “Mawu Lɛngbɔvi” lɔ ji.—Ebr 10:1; Ӡan 1:29.
w13-EW 12/15 20 mm. 13-14
‘Mí a ɖonɔŋwi azan hunnɔ lɔ tɛgbɛɛ’
13 Ci exwe lɔwo vayikɔɔ, vidawo kplanɔ enuveviwo wowo viwo so Paki lɔ nu. Ðeka le enu ci wokplanɔ wo mɛ yí nyi mɔ, Yehowa glɔnnɔ ta nɔ yi sɛntɔwo. Wokpla nu ɖevi lɔwo yí wonya mɔ Yehowa denyi mawu ɖe kpoŋ o. Yehowa nyi amɛ ŋtɔŋtɔ, Mawu agbeagbe ci yí lenɔ bu nɔ yi sɛntɔwo yí gbehwlɛnnɔ wo gan. Éwa nu cɛ hwecinu ‘ewu Eӡiptitɔwo’ yí glɔn ta nɔ Izraɛliviwo vi ŋkɔtɔwo.
14 Egbɛɔ, vida koɖo vinɔ ciwo yí nyi Kristotɔwo degbekplanɔ gɔnmɛsese ci yí le Paki lɔ nu wowo viwo xweshiaxwe o. Ci enyi ahan can ɖe, èkplanɔ enu ɖekɛŋmɛ ao viwo mɔ Mawu glɔnnɔ ta nɔ yi mɛwoa? Viowo kpɔɛni le eo nu mɔ èkando ji mɔ Yehowa kpɔtɔ nyi Etaglɔnnamɛtɔ ŋtɔŋtɔ nɔ yi mɛwoa? (Eha. 27:11; Ezai 12:2) Nɔ èkplakɔ nu cɛwo koɖo viowo ɖe, wokpɔɛni mɔ enu èhlɛnnɔ kpoŋ alo èwɛni enyinɔ seŋkankan koɖo jijɔ han a? Nɔ èkplakɔ nu koɖo viowoɔ, tekpɔ akpla enu cɛ wo yí ado ŋsɛn wo nɔ woashin le gbɔngbɔnmɛ.
Bibla mɛ nuxɔafiwo jiji
it-2-F 484 mm. 2
Paki
Efunkpekpe Amɛwo ciwo mɛ Eӡiptitɔwo to nyi kojoɖoɖo nɔ ju lɔ mɛ mawuwo, taŋtaŋ amɛwotɔ lɔ ci yí nyi evi koɖo elan ŋkɔtɔwo wuwu. (Hun 12:12) Ci agbo nyi enukɔkɔɛ nɔ mawu Raɔ, Paki lɛngbɔvi hun ci wosɔ shishi do ehɔnciwo nu anyi nukpotu wawa doŋ nɔ Eӡiptitɔwo. Gbesɔ kpe niɔ, nyibu can nyi elan kɔkɔɛ. Nyibuwo vi ŋkɔtɔwo wuwu nyi mawu Osiris gbaligbali. Ci wokpɔnɔ Faraɔn mɔ yɛnyi Ra viɔ, wosinni. Faraɔn vi ŋsuvi ŋkɔtɔ wuwu dasɛ mɔ, Faraɔn koɖo Ra deɖo ŋsɛn ɖe o.
it-1-F 207 mm. 1
Bɔbɔ
Enuvevi ɖeka ci wodewanɔ le “bɔbɔ kɔkwɛwo” hwenu yí nyi mɔ, wodewanɔ edɔ sɛnsin ɖekɛ le azan lɔwo ji o. Le kpɔwɛ mɛ, ŋkeke ŋkɔtɔ koɖo ŋkeke amadrɛtɔ nɔ Kpɔnnɔ Majimaji Xwe nyinɔ “bɔbɔ kɔkwɛwo.” Yehowa nu so ŋkeke cɛwo nu mɔ: “Mí de ɖo edɔ ɖe yí a wa le ŋkeke hunnɔwo ji o. Edɔ kuɖeka ci mí ɖo a wa le ŋkeke hunnɔ gbe ɔ, nyi mí a ɖa ŋɖuɖu nɔ amɛ ɖeka ɖeka.” (Hun 12:15, 16) Ele ahan le “bɔbɔ kɔkwɛwo” hwenu, gan avɔnsatɔwo lɔnu jannɔ ɖo wowanɔ vɔnsawo nɔ Yehowa. (1Ese 23:37, 38) De eyi enyi mɔ da wodada le ese ci wodo kudo edɔ ciwo wowanɔ ŋkeŋke nu ji yɔ o. Bɔbɔ cɛwo hwenu denyinɔ ŋɖe mawamawa hwenu nɔ Izraɛliviwo o, vɔ enyinɔ hwenu ɖeka ci mɛ wowanɔ gbɔngbɔnmɛdɔwo le. Le Sabati ŋkeke ji le kwɛshila vɔvɔnuɔ, eju lɔ pleŋ va bɔnɔ yí sɛnnɔ Mawu yí gbekplanɔ nu. Wohlɛnnɔ Mawu Nyɔ lɔ yí drenɔ mɛ nɔ wo, shigbe lé wovawɛ le Ӡuifuwo nukplaxuwo nɛ. (Edɔ 15:21) Ci wodewanɔ edɔ sɛnsinwo le Sabati ŋkeke ji alo le “bɔbɔ kɔkwɛwo” zanwo jiɔ, wovo yí donɔ gbe ɖaɖa yí bunɔ tamɛ kpɔ so Gbɛɖotɔ lɔ koɖo yi tamɛɖoɖowo nu.