“Egbeɖoju ci Gbɔngbɔn lɔ Nanɔ Akpɔtɔ Anɔ mí mɛ”
APOTRU Pɔlu do ŋsɛn Kristotɔ Efezitɔwo mɔ: “Mído ji anɔnɔ koɖo míwonɔnɔwo le lɔnlɔn mɛ, míje agbla veviɖe nɔ egbeɖoju ci gbɔngbɔn lɔ nanɔ akpɔtɔ anɔ mí mɛ le fafa mɛ.”—Efe. 4:2, 3.
“Egbeɖoju” alo ejunɔnɔ ci mìsenɔ vivi nɔ yí nyi enu “ci gbɔngbɔn lɔ nanɔ.” Ecɛ dasɛ mɔ Mawu dɔwanu sɛnŋ yí awɛ yí egbeɖoju cɛ ani. Vɔ, shigbe lé Pɔlu nui nɛɔ, éʒan mɔ mìaje agbla gbɔxwe egbe anɔ ju nɔ mì. Mi yí awɛɔ? Le nyɔnɔnwi mɛɔ, Kristotɔ ɖekaɖeka yí ɖo aje agbla veviɖe alo awa yi kpaxwe “nɔ egbeɖoju ci gbɔngbɔn lɔ nanɔ akpɔtɔ” ani.
Sɔɛ le kpɔwɛ mɛ mɔ mɛɖe na eo ehun yoyu ɖeka. Mi yí ɖo alé ebu ni nɔ anɔ nywiɖeɔ? Ðoŋci lɔ ze petii. Nɔ dèlé ebu nɔ ehun lɔ o yí edahɛn ɔ, dàtɛnŋ ado hwɛ mɛ ci yí na ehun lɔ eo o.
Ahanke ci enyi Mawu yí na yí egbe le eju nɔ Kristotɔwoɔ, mɛɖekamɛɖeka ji yí agban le mɔ awɛ nɔ akpɔtɔ ani. Nɔ fafa dele gblamɛ nɔ mìwo koɖo nɔviŋsu ɖe alo nɔvinyɔnu ɖeɔ, mìɖo abiɔ mìwoɖekiwo se mɔ: ‘Ŋwakɔ anyi kpaxwe yí akpɔ enyɔ lɔ gbɔ nɔ egbeɖoju ci gbɔngbɔn lɔ nanɔ akpɔtɔ ania?’
‘JE AGBLA VEVIÐE’ NƆ EGBEÐOJU AKPƆTƆ ANI
Shigbe lé Pɔlu nui nɛɔ, mìatɛnŋ akpɔɛ mɔ datɛnŋ anɔ fafɛɖe nɔ mì gashiagamɛ mɔ mìakpɔtɔ anɔ fafa mɛ koɖo mìwo nɔviŋsu koɖo nɔvinyɔnuwo, vevitɔ nɔ wowa enuvevi ɖe koɖo mì o. Nɔ egbe akpɔtɔ anɔ eju nɔ mí gashiagamɛ ɖe, éʒan mɔ àyinɔ mɛ lɔ gbɔ yí axonɔ nuxu so cukaɖa lɔ nu nia? Déʒan kokoko o. Biɔ eoɖeki se mɔ: ‘Nɔ ŋwɛ ahan ɖe, cukaɖa lɔ avɔa alo agbevasɛnŋ dojia?’ Hweɖewonuɔ, enunywitɔ ci woawa yí nyi mɔ woatashi enyɔ kpoŋ alo asɔ enu ke amɛ lɔ.—Elo. 19:11; Maki 11:25.
Biɔ eoɖeki se mɔ: ‘Nɔ ŋyi mɛ lɔ gbɔ mɔ mìakpɔ cukaɖa lɔ gbɔ ɖe, cukaɖa lɔ avɔa alo agbevasɛnŋ dojia?’
Shigbe lé apotru Pɔlu ŋwli nɛɔ, mína nɔ mìakpɔtɔ ado “ji anɔnɔ koɖo [mìwonɔnɔwo] le lɔnlɔn mɛ.” (Efe. 4:2) Wema ɖeka nu mɔ woatɛnŋ agbenu nyɔgbe cɛ mɔ “xɔnɔ wo shigbe lé wole do nɛ.” Ecɛ dasɛ mɔ mìalɔn doji mɔ mìwo kpena xɔsetɔwo nyi nuvɔnwatɔwo shigbe mìwo hannɛ. Le nyɔnɔnwi mɛɔ, mìkeŋkeŋ yí jejeɛ agbla mɔ mìatɔ “agbe yoyu nɔnɔ.” (Efe. 4:23, 24) Éle ahan gan, mɛɖekpokpui dele mì mɛ yí awɛ yí asɔ gbe pɛpɛpɛ o. (Rɔm. 3:23) Nɔ mìnya ahan ɔ, ále fafɛɖe nɔ mì mɔ mìasɔ enu kenɔ mìwonɔnɔwo yí awɛ yí “egbeɖoju ci gbɔngbɔn lɔ nanɔ akpɔtɔ” ani.
“Egbeɖoju ci gbɔngbɔn lɔ nanɔ akpɔtɔ anɔ [mì] mɛ le fafa mɛ” le hamɛ lɔ mɛ nɔ mìsɔ enu ke mɛbuwo yí ŋlɔnɔbe enu ci wowa koɖo mì. Grɛki nyɔgbe ci gɔnmɛ woɖe mɔ “egbeɖoju” le Efezitɔwo 4:3 mɛ hɛn susu yi “lanmɛkanwo” ciwo nyɔ wonu le Kolosetɔwo 2:19 mɛ ji. Lanmɛkanwo nyi eka sɛnŋ ɖekawo ciwo yí lénɔ exu ɖeka do yi kpena nu gogwiɖe. Lanmɛkan sɛnŋ 943 yí lénɔ exuwo do nɔnɔ nu le lanmɛ. Le emɔ ɖekɛ lɔ nuɔ, fafa ci yí anɔ mìwo nɔviŋsu koɖo nɔvinyɔnuwo gblamɛ koɖo lɔnlɔn ci mìɖo nɔ wo akpedo mì nu yí mìakpɔtɔ atenɔ gogo wo nɔ gaɖewomɛ wowa enuvevi ɖe koɖo mì can.
Eyi taɖo, nɔ ao kpena xɔsetɔ ɖe wa enu ɖe koɖo eo alo do dɔmɛzi nɔ eoɔ, tèkpɔ asɔ vevisesedoamɛnu asɔ kpɔ amɛ lɔ sɔwu mɔ adokɔ hwɛ yi do enu ci ewa ŋci. (Kol. 3:12) Ci agbetɔwo pleŋ nyi nuvɔnmɛwoɔ, étɛnŋ jɔ mɔ eɔ can èwa enu ɖe koɖo mɛɖe kpɔ yí eve amɛ lɔ nu. Ecɛ nyanya akpedo eo nu yí nàwa ao kpaxwe nɔ “egbeɖoju ci gbɔngbɔn lɔ nanɔ akpɔtɔ” ani.