Èɖo Ŋwi Woa?
Èwa ɖaŋ hlɛn Jutakpɔxɔ exwe cɛ mɛ tɔwo nywiɖea? Kpɔ̀ mɔ yeatɛnŋ aɖo nyɔbiɔse ciwo yí gbɔgbɔ ŋci ma:
Nyi yí dɔ mìkannɔfu Yehowaɔ?
Mìkannɔfu Yehowa ɖo mìbuini yí gbeluinni sugbɔ. Mìkannɔfu Yehowa ɖo mìji mɔ mɛbuwo can ajeshi ɖɛ.—w25.01, kp. 3.
Nɔ mɛɖe wa enuvevi ɖe koɖo mì ɖe, lé mìatɛnŋ asɔ ki doɔ?
Mìdakpɔ lé enu lɔ wawa do nɔ mì do enugbali ji o. Éle ahan gan, nɔ mìtashi dɔmɛziwawa koɖo amɛleledoxomɛɔ, ádɔ yí mìdagbese vevi sugbɔ o.—w25.02, kp. 15-16.
Lé Yesu nukplavi Maki ɖo kpɔwɛ nywi do ɖɛ nɔ nɔviŋsu jajɛwoɔ?
Maki lɔn yí le egbesɔsɔ yí awa edɔ nɔ amɛwo. Ci enu atɛnŋ ave Maki nu yí agbɔjɔ le nɔnɔmɛ ɖeka mɛ can ɔ, dena eta o. Ékpɔ nyɔna sugbɔ ci edo ha koɖo Pɔlu koɖo Kristotɔ ciwo yí shin le gbɔngbɔn mɛ wo.—w25.04, kp. 27.
Le mìase enyɔ ci Yesu jikɔ anu gɔnmɛ do hwenu edo gbe ɖaɖa mɔ: “Ŋna yí wojeshi ao ŋkɔɔ”? (Ʒan 17:26)
Yesu nukplaviwo jeshi Mawu ŋkɔ ɖɛ vɔ. Vɔ Yesu kpedo wo nu yí wojeshi Yehowa ɖɛ nywiɖe. Enu ciwo Yesu kpla amɛwo ɖewo yí nyi enu ci yí Mawu drɔdrɔ nɔ nyigban lɔ koɖo agbetɔwo. Égbekpla enu ci Mawu wa vayi, enu ci avawa le esɔ mɛ koɖo yi nɔnɔmɛ nywiwo.—w25.05, kp. 20-21.
Nyɔna ciwo yí mìakpɔ nɔ mìjeshi sɛnxu nɔ mìwoɖekiwoɔ?
Sɛnxujejeshinamɛɖeki adɔ yí mìanya mɔ mìdejeshi enuwo pleŋ o. Le kpɔwɛ mɛ, mìdenya hwenu yí xexe vwin cɛ ava vɔvɔnu o yí mìdenya lé Yehowa awa enuwo do le esɔ mɛ o. Ahanke mìdenya enu ci yí ajɔ le esɔ mɛ o yí mìdatɛnŋ amɔŋje lé Yehowa jeshi mì ɖɛ do mɛ vɛ gbeɖe o.—w25.06, pp. 15-18.
Nyi yí atɛnŋ akpedo mì nu mìakpɔ nyɔna so enukplakpla nyɔta alo jugbaja nuxu ɖe mɛɔ?
Mìatɛnŋ abiɔ mìwoɖekiwo se mɔ: ‘Kpeɖoji ci wona le lɛ, ci yí ana toɖotɔwo akando Bibla mɛ nyɔnɔnwi lɔ jiɔ? Kpɔwɛ nywi ɖe li ci natɛnŋ azan hwenu yí ŋkplakɔ enu lɔa? Mi nyɔta cɛ atɛnŋ ajɔ eji nɔɔ?’—w25.07, kp. 19.
Nyi mìatɛnŋ akpla so sɔsɔke Mawu tɔ nu le lé ewa nu do Davidi nu do mɛɔ?
Davidi wa nuvɔn ganganwo, vɔ ci etrɔ ji mɛ ŋtɔŋtɔɔ, Yehowa sɔ wo ki. (1 Efy. 9:4, 5) Nɔ Mawu sɔ enu ke mìɔ, éŋlɔnɔbe mìwo nuvɔnwo yí degbevasɔ wo cunɔ nu kpɔ koɖo mì le ŋkɔ mɛ o.—w25.08, p. 17.
Nɔ Bibla nukplavi ɖe dexɔ gbe do Bibla nukplakpla ɖe ji le afɔdumɛ ɖe, nyi àtɛnŋ awaɔ?
Nɔ evajɔ mɔ èkpla Bibla mɛ nyɔnɔnwi ɖe mɛɖe vɔ yí egbɔnkɔnu ni mɔ amɔŋje mɛɔ, tashi akpaxwe ci mɛ demɔŋje lɔ keŋ awa toto avayi ji gabumɛ.—w25.09, kp. 24.
Bibla nu mɔ nuvɔn nyi “Amɛbleble Ŋsɛn.” (Ebre. 3:13) Lé enyi ahan doɔ?
Nuvɔn cinɔ ci mìɖu dɔ yí mìwanɔ enudɔndɔn. Étɛnŋ gbedɔ yí mìgbexonɔ nu kpɔ mɔ Yehowa lɔn mì ŋtɔŋtɔ nyao ma.—w25.10, kp. 16.
Enu amɛtɔn ciwo atɛnŋ adɔ yí mìwo gbedoɖawo anyɔ dojiɔ?
(1) Mìatɛnŋ abu tamɛ kpɔ so Yehowa nɔnɔmɛwo nu. (2) Mìatɛnŋ abu tamɛ kpɔ so ŋciwo mɛ yí mìtokɔ nu yí anui do gbedoɖa mɛ. Shigbe lé ele veviɖe do mɔ mìasɔ nu ke mɛɖe do nɛ. (3) Zannɔ gamɛ sugbɔ asɔ donɔ egbe ɖaɖa. Enu cɛwo akpedo mì nu yí mìaxo nuxu so ji mɛ.—w25.10, kp. 19-20.
Lé mìatɛnŋ akpedo amɛshinshinwo nu doɔ?
Mìatɛnŋ ayi jinɔ amɛshinshinwo kpɔ blaŋblaŋ yí ayɔnɔ wo. Mìatɛnŋ akplɔnɔ wo yi dotoxwe. Mìagbetɛnŋ awanɔ edɔ koɖo wo le kunuɖeɖedɔ lɔ kpaxwe vovovowo mɛ.—w25.11, kp. 6-7.
Enuvevi ciwo yí adɔ yí bubu anɔ Kristotɔ ɖe lɔlele nuɔ?
Èɖo awa do ese ciwo acɛkpatɔwo do kuso alɔlele nu ji. Jè agbla awɛ nɔ Mawu gbɔngbɔn lɔ kusɛnsɛn aze le alɔlele lɔ zangbe. Sɔ̀ ao nudodowo le dredrenu yí agbe kɔnu ciwo yí desɔgbe koɖo Enuŋwlɛŋwlɛ lɔwo o. Wà daŋ adre lé alɔlele lɔ totowo ayi do nywiɖe nɔ mɛ ciwo yí akpedo eo nu.—w25.12, kp. 21-24.