Yehowa Kunuɖetɔwo gbenɔ mɔ yewodashi abɔtaa?
Oo. Yehowa Kunuɖetɔwo degbenɔ mɔ yewodashi abɔta o. Mìkpɔnɔ mɔ Kristotɔ ɖekaɖeka yí asɔ gbeta yiŋtɔ. Mìjinɔ edɔ̀dada mɔnu nywi le dotoxwe, yí ŋkɔyiyi sugbɔ ci wowakɔ le edɔ̀dada mɔnuwo mɛ yí asɔ ɖe edɔ̀lele sɛnsɛnŋwo kpɔtɔ jɔnɔ ji nɔ mì.
Mìdo akpe nɔ dotowo nɔ dɔ sɛnsin ciwo wakɔ wole, vevitɔ le hweni sɛnŋsɛnŋwo mɛ.
Yehowa Kunuɖetɔwo wanɔ nu sɔgbe koɖo ahɔsudɔwatɔ ciwo yí kpɔnɔ lanmɛsɛn nyɔwo gbɔ. Le kpɔwɛ mɛ, ci COVID-19 dɔ̀bamɛ lɔ toɔ, Yehowa Kunuɖetɔwo kpɔtɔ le nuŋwlɛkɔ yí sɔ ɖoɖoɔ ŋwi nu amɛwo le gbe sanŋdi nɛniɖe mɛ le siti cɛ ji, yí sɔ dokɔ ŋsɛn amowo nɔ woase tonu nɔ emɔdasɛnamɛ ciwo yí wona kudo etaglɔnnɔamɛɖeki nu le wo gbɔ ji. Emɔdasɛnamɛ lɔwo kan azɔge nɔnɔ nɔ amowo koɖo wawa do ese ci yí kudo bɔbɔ doju nu ji, amɛxoxo do xɔ, alɔklɔklɔ, enucɔncɔndo ŋɔci koɖo nu koɖo nubu ciwo acɛkpɔtɔwo mɔ wo le wa wo hɛnnɛ.—Rɔmatɔwo 13:1, 2.
So exwe nɛniwo keɔ, Yehowa Kunuɖetɔwo wemawo tɛtɛɔgbe do mɔdasɛnamɛ ciwo yí gbɔgbɔ:
Mɛɖekamɛɖeka yí asɔ gbeta kudo yi lanmɛsɛn nyɔwo nu.—Galatitɔwo 6:5.
“[Enyɔdrawema cɛ] dedrenɔ cike ɖe alo dɔ̀damɔnu ɖe mɛɖe, ahanke yí denanɔ emɔdasɛnamɛwo kudo dɔ̀danyɔwo nu nɛ. Yi tajinu kpoŋ yí nyi mɔ, anu nyɔnɔnwi ci yí kudo nɔnɔmɛ ɖe nu, eyi enuhlɛntɔ lɔ ŋtɔ asɔ gbeta yiŋtɔ.”—Nyɔ! 8 février 1987 le Flansegbe mɛ.
“Eoŋtɔ yí asɔ gbeta nɔ enyi mɔ eo koɖo ao viwo ashi abɔta.”—Nyɔ! 22 août 1965 le Flansegbe mɛ.
Ci agbe nyi nu vevi nɔ mì yí taɖo mìjinɔ dɔ̀damɔnu le dotowo gbɔ.—Edɔwawawo 17:28.
“Nɔ Ywhowa Kunuɖetɔwo lekɔ dɔ̀ɔ, woyinɔ dotowo gbɔ keŋ nɔ woakpedo wo nu. Wolɔn agbe lɔ yí gbewanɔ ŋɖekpokpui ci yí sɔgbe koɖo ŋwlɛŋwlɛ lɔwo keŋ anɔ agbe jinjin mɔ.”—Jutakpɔxɔ, 1er juillet 1975 le Ŋlɛnshigbe mɛ.
“Ejɔnɔ ji nɔ Yehowa Kunuɖetɔwo mɔ yewoazan cike koɖo dɔ̀damɔnuwo le dotoxwe. Wojinɔ mɔ yewoanɔ nywiɖe le lanmɛsɛn mɛ keŋ anɔ agbe jinjin. Le nyɔnɔnwi mɛɔ, shigbe exwe sanŋdi ŋkɔtɔ Kristotɔ Luiki nɛɔ, Yehowa Kunuɖetɔ ɖewo nyi dotowo. . . . Yehowa Kunuɖetɔwo kpɔnɔ jijɔ do edɔ sɛnsin koɖo amɛɖekisɔsɔna dotoxwe dɔwatɔwo tɔ nu. Wogbekpɔnɔ jijɔ nɔ dotoxwe dɔwatɔ cɛwo kpedo wo yí wokpɔ wowoɖekiwo mɛ nywiɖe.”—Jutakpɔxɔ, 1er avril 2011 le Eʋegbe mɛ.