Maki 11:24—‘Míbiɔ Enuwo le Kwifan mɛ yí Akando Ji Mɔ Yewoxɔ Wo Vɔ’

“Ecɛ yí taɖo ŋnukɔ nɔ mí mɔ, enu ciwo pleŋ mído gbe ɖaɖa biɔnɔɔ, míɖo xɔse mɔ yewoxɔ wo vɔ, eyi míawa wo ɖɛ.”—Maki 11:24, Xexe Yeye Gɔmeɖeɖe.

“Eyi ɔ, Ŋ nu nɔ mí mɔ mí byɔ enuwo le kwifanmɛ. Nɔ́ mí kando ji mɔ yewo xɔ wo vɔ ɔ, wo a nyi míwo tɔwo.”—Maki 11:24, Mawu Nyɔ.

Gɔnmɛsese nɔ Maki 11:24

Ci Yesu nu nyɔ cɛwoɔ, ésɔ dasɛ nɔ yi dokplɔtɔwo mɔ ele veviɖe mɔ woaɖo xɔse sɛnŋ do gbedodoɖa ŋsɛn nu. Éna kankandoji wo mɔ Mawu desenɔ wowo gbedodoɖawo yí enyi evɔ o, vɔ éɖonɔ wo ŋci hɛnnɛ. Mɛ ci yí do gbe ɖaɖa veviɖe sɔ koɖo Mawu dro atɛnŋ akando ji mɔ, enu ci nu yedokɔ gbe ɖaɖa so avamɛ yí dada o. Ele shigbe mɔ woɖo gbedodoɖa lɔ ŋci vɔ nɛ.

Yesu tɛ gbe do enu ci yí taɖo ele veviɖe mɔ woado gbe ɖaɖa koɖo xɔse ji. Éɖe mɛ mɔ mɛ ci yí dokɔ gbe ɖaɖa ɖo ‘akando ji le yi susu mɛ’ yí aɖo xɔse mɔ ‘enyɔ ci yenu ajɔ.’ (Maki 11:23) Nyi yí taɖoɔ? Ðo mɛ ciwo yí deɖo kankandoji datɛnŋ ‘abu kpɔ mɔ yewoaxɔ enu ɖe le Axwetɔ lɔ gbɔ o.’a—Ʒaki 1:5-8.

Mɛ ci shi xɔse le donɔ gbe ɖaɖa le nɔnɔmɛ sugbɔ mɛ. (Luiki 11:9, 10; Rɔmatɔwo 12:12) Nɔ éwɛni ahan ɔ, édadasɛ mɔ yeƷan enu ci yebiɔkɔ yí yexɔɛ se nyɔnɔnwitɔ mɔ Mawu atɛnŋ aɖo ye gbedodoɖa lɔ ŋci. Vɔ égbenya mɔ, Mawu atɛnŋ aɖo gbedodoɖa lɔ ŋci to alɔkpa ci yí to akpo nɔ ci yeji ji, yí awɛ le hwenu bu mɛ nɔ ci yekpɔkɔ mɔ nɔ.—Efezitɔwo 3:20; Ebretɔwo 11:6.

Ele ahan gan, Yesu nyɔ lɔwo dedasɛ mɔ mɛshiamɛ yí atɛnŋ akpɔ emɔ mɔ yeaxɔ ŋɖekpokpui ci yebiɔ Mawu le gbedodoɖa mɛ o. Yesu xokɔ nuxu nɔ yi dokplɔtɔwo, wonyi mɛ ciwo shi xɔse le yí wowakɔ ci ji wosun keŋ asɛn Yehowa Mawu shigbe lé eji do nɛ. Bibla nu mɔ gbedodoɖa ciwo yí sɔ koɖo Yehowa dro ɖekɛ eɖonɔ to. (1 Ʒan 5:14) Deɖonɔ to mɛ ciwo yí ɖui koŋ yí gbenɔ yi sewo koɖo mɛ ciwo yí wa nuvɔn yí gbe ji mɛ trɔtrɔ o.(Ezai 1:15; Mishe 3:4; Ʒan 9:31) Nɔ àkpɔ enu sugbɔ so gbedodoɖa ciwo Mawu ɖonɔ to nuɔ, kpɔ video kpoli cɛ.

Enyɔ ciwo yí trɔdo Maki 11:24

Le ŋkeke kpɛtɛwo mɛ nɔ Yesu sumɔsumɔdɔ lɔ le nyigban jiɔ, ékan seŋ koɖo yi dokplɔtɔwo so enu ci yí taɖo ele veviɖe mɔ woaɖo xɔse sɛnŋ nɔ Mawu nu. Ésɔ kpɔwɛ ɖeka tɛ gbe do nukplakpla cɛ ji. Ci ezɔn mɔ yikɔ Ʒerusalɛmuɔ, ékpɔ figici ɖeka ci yí dɔn yoyu. Vɔ aci lɔ desɛn o, eyi taɖo Yesu sɛn kpɛn ni. (Maki 11:12-14) Aci lɔ zezemɛ flu amɛ, ahanke blema jukɔn Izraɛli wanɔ shigbe mɔ yewosɛnkɔ Mawu nɛ, gan wodeɖo xɔse o.(Matie 21:43) Yi godu dejinjin o, figici lɔ ku kplɔyɔ, ecɛ dasɛ enu ci yí ajɔ do Izraɛli maɖoxɔse ji sabaɖe.—Maki 11:19-21.

Vɔ Yesu kando ji mɔ ye dokplɔtɔwo atɛnŋ aɖo xɔse ci yí Ʒan keŋ aɖu cukaɖawo ji yí awa enujiŋwo. (Maki 11:22, 23) Yesu nukplamu ci ena so gbedodoɖa nu va do gamɛ nywi ji nɔ yi dokplɔtɔwo, ɖo dajinjin o woado wowo xɔse kpɔ. Woɖo ado ji hwenu Yesu ku koɖo hwenu woaci yumɛ nɔ wo veviɖe le wowo sumɔsumɔdɔ lɔ mɛ. (Luiki 24:17-20; Edɔwawawo 5:17, 18, 40) Egbɛɔ, Yesu dokplɔtɔwo atɛnŋ aɖu cukaɖa nɔnɔmɛwo ji hɛnnɛ, nɔ woɖo xɔse nɔ Mawu koɖo gbedodoɖa ŋsɛn.—Ʒaki 2:26.

Kpɔ video kpoli cɛ keŋ akpɔ enumɛtoto nɔ Maki wema lɔ.