Galatitɔwo 6:9​—“Enunywi Wawa De Ðo A Cikɔ Nɔ Mì O”

“Mìdana ta le enu ci yí nyɔ wawa mɛ o, ɖoɔ, mìagbɛn enu le gamɛ nywitɔ ji, nɔ enu decikɔ nɔ mì o.”​—Galatitɔwo 6:9, Xexe Yeye Gɔmeɖeɖe.

“Enunywi wawa de ɖo a cikɔ nɔ mì o. Gamɛnywi lɔ vava hwenu ɔ, mì a xɔ jinuku sɔsɔ mìwotɔ ci yí nyi agbe mavɔ. Mì de ɖo a tashi enunywi lɔwo wawa o.”​— Galatitɔwo 6:9, MAWU NYƆ.

Gɔnmɛsese nɔ Galatitɔwos 6:9

Apotru Pɔlu do ŋsɛn Kristotɔwo mɔ wo le kpɔtɔ awawa enu ciwo Mawu kpɔ mɔ wonyɔ. Nɔ wowɛ ahan ɔ, woatɛnŋ akando ji mɔ Mawu acu efɛn nɔ yewo.

“Mìdana ta o.” Wohɛn woagbenu akpaxwe cɛ mɔ “enunywi wawa de ɖo a cikɔ nɔ mì o.” Nyɔgbe cɛ le egbe xoxwi lɔ mɛ atɛnŋ aɖo gɔnmɛsese ci yí nyi mɔ mìdagbɔjɔ o, alo ezo ci yí le mì mɛ ŋgbeci o. Apotru Pɔlu deɖe yiɖeki ti le enyɔ cɛ ciwo enu mɛ o, ɖo édasɛ mɔ ye can yewanɔ ahwa koɖo gbɔjɔgbɔjɔ hweɖewonu.​—Rɔmatɔwo 7:21-24.

“Enu ci yí nyɔ,” alo enunywi yí nyi enu ciwo pleŋ Kristotɔ ɖo awa le Mawu sɛnsɛn mɛ. Edɔ ciwo mɛɖe awa asɔ kpedo yí kpena xɔsetɔwo koɖo mɛbuwo nu can le mɛ​—Galatitɔwo 6:10.

“Mìagbɛn enu le gamɛ nywitɔ ji, nɔ enu decikɔ nɔ mì o.” Pɔlu ɖoɖoɔ ŋwi nɔ enuhlɛntɔwo mɔ, yɛtɛnŋ xɔ gamɛ gbɔxwe woakpɔ nyɔna ciwo yí le enunywiwawa mɛ, shigbe lé exɔnɔ gamɛ do gbɔxwe jinuku ci agbledetɔ do shinnɔ hannɛ. Ci Pɔlu xo nuxu so jinukusɔsɔ nuɔ, ésɔ kpukpui cɛ ca koɖo nyɔnɔnwi tajitɔ ɖeka ci yí le kpukpui 7 mɛ: “Jinuku ciwo yí amɛ do ɔ, wowo ɖekɛ yí é sɔnɔ.” Le enyɔgbe buwo mɛɔ, nɔ Kristotɔ ɖe wa enu ci Mawu kpɔ mɔ yɛ nyɔɔ, axɔ shicu gangan ɖeka ci mɛ yí agbe mavɔ can le​—Rɔmatɔwo 2:6, 7; Galatitɔwo 6:8.

Enyɔ ciwo yí trɔdo Galatitɔwo 6:9

Apotru Pɔlu ŋwlɛ lɛta cɛ nɔ Kristotɔ ciwo yí nɔ agbe le Galati le exwe 50-52 han mɛ nɔ K.H. Ewɛ ahan keŋ asɔ glɔn eta nɔ Kristotɔwo so mɛ ciwo yí nunɔ mɔ yewonyi Kristotɔwo gan yí trɔnɔ eta nɔ nyɔnɔnwi ci yí kuso Yesu nu. (Galatitɔwo 1:6, 7) Nukplamɛtɔ ŋsukantɔ cɛwo hwlɛnnɔ aɖe koɖo Kristotɔwo mɔ woɖo azɔn do Ese ci Mawu na blema jukɔn Izraɛli to Moizi ji. (Galatitɔwo 2:15, 16) Pɔlu dre mɛ mɔ Ese lɔ ɖo yi tajinu gbɔ vɔ, yí degbeʒan mɔ Mawu sɛntɔwo azɔn do ji o.​— Rɔmatɔwo 10:4; Galatitɔwo 3:23-25.

Hwenu Pɔlu dokɔ ŋsɛn nɔviɛ Kristotɔwo mɔ wo le kpɔtɔ awanɔ “enu ci yí nyɔɔ,” denyi Moizi Se ji enukɔ mɔ wo le zɔn do o. Vɔ édodoɔ ŋsɛn wo mɔ wo le wa do “Kristo Sewo ji,” wowo yí nyi enu ciwo pleŋ Yesu kpla kuso enywiwawa nɔ mɛbuwo nu.​— Galatitɔwo 6:2; Matie 7:12; Ʒan 13:34.

Kpɔ video kpoli cɛ keŋ akpɔ enumɛtoto nɔ Galatitɔwo wema lɔ.