ENUKPLAKPLA 4

Enuɖeɖeti nɔ kpukpuiwo nywiɖe

Matie 22:41-45

SUSU VEVI LƆ: Dra susu do nɔ ao nyɔsetɔwo gbɔxwe ahlɛn kpukpui ɖe.

Bu tamɛ kpɔ so enu ci yí taɖo èhlɛnkɔ kpukpui ɖe nu. Ðe nu ti nɔ kpukpui ɖeshiaɖe le mɔ ci yí akpedo ao nyɔsetɔwo nu nɔ woakpɔ enyɔ vevi ci ji èji mɔ yeatɛ gbe do le kpukpui lɔ mɛ.

Do jeshi enyɔ ciwo yí trɔdo kpukpui lɔ. Nɔ èji mɔ yeahlɛn kpukpui ɖe nɔ mɛɖe yí anu mɛ ci yí xokɔ nuxu alo mɛ ci yí ŋwlɛn Bibla wema lɔɔ, kando ji mɔ amɛ lɔ teŋ yí yeyɔkɔ.
Sɔ Bibla ɖo kpe enyɔ lɔ ji. Nɔ èxokɔ nuxu nɔ mɛ ciwo yí xɔ Mawu ji seɔ, hɛn susu yi Bibla ci yí nyi Mawu Nyɔ ji yí adasɛ mɔ eyi nyi nunya adodwi lɔ soxu.
Na nɔ ao nyɔsetɔ asɔ eɖe le kpukpui lɔ mɛ. Wa nyɔbiɔse ci kpukpui ɖe ana ɖoŋci nɔ; nu cukaɖa ɖe, le yi godoɔ, dɔn susu yi kpukpui ci yí atɛnŋ akpedo amɛwo nu yí woakpɔ cukaɖa lɔ gbɔ ji; alo dasɛ gɔnmɛɖose ɖe ci Bibla mɛ xolɔlɔ ɖe ana yí woamɔŋje mɛ.

Bu tamɛ kpɔ so enu ciwo yí ao nyɔsetɔwo jeshi xoxoxo so enyɔ lɔ koɖo kpukpui lɔ nu. Nɔ wojeshi kpukpui ɖe ɖɛ can ɔ, ɖe nu ti ni le mɔ ci nu yí woaji mɔ yewoagbese nu so nu; kpedo wo nu nɔ woamɔŋje akpaxwe buwo mɛ nɔ kpukpui lɔ.