ENUKPLAKPLA 52
Enu ci yí taɖo lé mìdranɔdo koɖo ŋciwo mìdonɔ le veviɖe
Lé mɛɖeka mɛɖeka dranɔdo do koɖo enu ciwo mɛɖeka mɛɖeka donɔ tonɔ akpo. Nɔ mìwanɔ do Bibla gɔnmɛɖose fafɛ ɖewo jiɔ, mìatɛnŋ acannɔ enudodo nywi ciwo yí donɔ jijɔ nɔ mì, yí mìwo nu agbekpe nɔ Yehowa. Na mìakpɔ gɔnmɛɖose ɖewo.
1. Gɔnmɛɖose ciwo yí akpedo mì nu mìadranɔdo nywiɖe yí adonɔ nunywiwoɔ?
Mìɖo “a do awuwo do nɔ̀nɔmɛ nywi ji . . . le bubu koɖo susu nywi mɛ,” yí mìwo zezemɛ anɔnɔ mɛmiɖe gashiagamɛ, nɔ amowo akpɔ lé ‘mìkando Mawu ji’ do. (1 Timɔte 2:9, 10) Gɔnmɛɖose amɛnɛ ɖekawo ke: (1) Mìɖo “a do awuwo do nɔ̀nɔmɛ nywi ji.” Shigbe lé èkpɔɛni le hamɛ bɔbɔwo mɛ nɛɔ, Yehowa mɛwo donɔ enu vovovowo. Vɔ mìwo nudodowo koɖo mìwo ɖawo donɔ bubu Mawu ci mìsɛnkɔ nu. (2) Mìɖo adonɔ nuwo le ‘bubu mɛ,’ yi gɔnmɛ nyi mɔ mìwo zezemɛ dafɔnnɔ gbɔdɔndɔn drodro do amowo mɛ, alo adɔn amowo susu va mìwoɖekiwo ji ɖoɖu o. (3) Mìdonɔ nuwo le “susu nywi mɛ,” nɔ mìdetenɔkpɔ mɔ mìado ŋɖekpokpui ci yí le afiɛ ji nɔ amowo akpɔ adro o. (4) Mìwo zezemɛ ɖo adanasɛ gashiagamɛ mɔ ‘mìkando Mawu ji’ yí amowo anya mɔ Mawu adodwi lɔ yí mìsɛnnɔ.—1 Korɛntitɔwo 10:31.
2. Nyi mìɖo abu kpɔ so mìwo nɔviwo nu gbɔxwe acan enu ci mìadoɔ?
Le nyɔnɔnwi mɛɔ, mìvo ado enu ci yí dro mì. Gan mìɖo abui kpɔ mɔ mìwo nudodo lɔ aɖe fun nɔ mɛbuwo ma. Mìtekpɔ yí wanɔ ci ji mìkpe nɔ mìŋgbedo fɔbli mɛɖekɛ o, vɔ ‘mìado jijɔ nɔ mìwo kpenawo. Mìɖo awɛ yí akpedo wo nu.’—Hlɛn Rɔmatɔwo 15:1, 2.
3. Lé mìwo nudodowo atɛnŋ ana amowo aji mɔ yewoakpla nu so Yehowa nu doɔ?
Mìtekpɔ yí donɔ awu do nɔnɔmɛ nywi mɛ gashiagamɛ, vɔ mìgbelenɔ bu nɔ mìwo nudodowo nywiɖe nɔ mìjikɔ ayi hamɛ bɔbɔ alo kunuɖegbe. Mìdeji mɔ mìwo nudodowo aɖe amowo susu so eŋɛnywi ci mìdrakɔ ji o. Vɔ mìji mɔ mìwo nudodowo ana amowo aji mɔ yewoakpla nu so nyɔnɔnwi lɔ nu yí “a kpɔ mɔ Mawu mìwo Hwlɛngantɔ nukplamuwo nyi enu nyakpɔkpɔ.”—Titu 2:10.
JI DWI NI KPƆ DOJI
Kpɔ lé mìawɛ nɔ mìwo dradrado koɖo mìwo nudodowo adasɛ nɔ amowo mɔ Kristotɔwo mìnyi.
Mìwo zezemɛ atɛnŋ adasɛ mɔ mìbunɔ mɛ ciwo yí le acɛtɔxu alo mìdebunɔ wo o. Ci Yehowa kpɔnɔ enu ci yí le ji mɛ nɔ mì can ɔ, mìwo zezemɛ ɖo adasɛ mɔ mìbuini
4. Nɔ mìdo nu nywiɖeɔ, mìado bubu Yehowa nu
Susu vevitɔ ci yí taɖo mìadonɔ nu nywiɖeɔ? Hlɛn Ehajiji Wema 47:2, keŋ agbeje nyɔbiɔse cɛwo mɛ:
Nyiwo mìɖo adonɔ nɔ amowo aɖo susu nywi do Yehowa ci mìsɛnkɔ nuɔ?
Ci èkpɔɛ ɖe, eʒan mɔ mìalenɔ bu nɔ mìwo nudodowo nɔ mìjikɔ ayi bɔbɔ alo kunuɖegbea? Nyi yí taɖoɔ?
5. Nyi yí akpedo mì nu mìasɔ gbeta nywi so dradrado koɖo enudodo nuɔ?
Nɔ mìwo nudodowo ve ho alo kpɔn can ɔ, woɖo ale mɛmiɖe yí asɔ koɖo nɔnɔmɛ ci mɛ mìle. Hlɛn 1 Korɛntitɔwo 10:24 koɖo 1 Timɔte 2:9, 10. Yi godu, nagbeje enu ci yí taɖo mìdadonɔ enu . . .
ciwo yí xo ɖyi alo ciwo wodele bu nɔ o.
ciwo yí axa mì yí adadasɛ amɛci lɔ alo afɔn gbɔdɔndɔn drodro do amowo mɛ o.
Deʒan mɔ Kristotɔwo awa do Moizi Se lɔ ji o, vɔ woatɛnŋ akpla nu so mɛ keŋ anya susu ci Yehowa ɖonɔ do nuwo nu. Hlɛn 2 Ese Wema 22:5, keŋ agbeje nyɔbiɔse cɛ mɛ:
Nyi yí taɖo mìdeɖo adonɔ enu ciwo yí na ŋsuwo ɖyinɔ nyɔnuwo alo nyɔnuwo ɖyinɔ ŋsuwoɔ?
Hlɛn 1 Korɛntitɔwo 10:32, 33 koɖo 1 Ʒan 2:15, 16, keŋ agbeje nyɔbiɔse cɛwo mɛ:
Nyi yí taɖo mìɖo ayi susu mɛ kpɔ, keŋ akpɔ mɔ mìwo nudodowo ɖekɔ fun nɔ mɛɖewo le mìwo nutwi mɛ alo le mìwo hamɛ lɔ mɛ maɔ?
Enudodo koɖo dradrado ciwo yí bɔ le fini èleɔ?
Ci èkpɔɛ ɖe, enudodo ɖewo li ciwo yí danyɔ nɔ Kristotɔa? Nyi yí taɖoɔ?
Mìatɛnŋ adranɔdo yí adonɔ nu vovovowo, gan yí mìwo nu akpe nɔ Yehowa
MƐÐEWO NUNƆ MƆ: “Ŋɖo acɛ ado ŋɖekpokpui ci yí droŋ.”
Èlɔn do jia? Nyi yí taɖoɔ?
ENU CI ÈKPLA
Nɔ mìwo dradrado koɖo mìwo nudodowo nɔnɔ nywiɖeɔ, mìado bubu Yehowa koɖo mɛbuwo nu.
Enumɛtoto
Nyi yí taɖo mìwo dradrado koɖo mìwo nudodowo le veviɖe nɔ Yehowaɔ?
Gɔnmɛɖose ɖewo ciwo ji mìɖo awa do nɔ mìcankɔ enu ciwo mìadoɔ?
Lé mìwo nudodowo atɛnŋ ana amowo aɖo susu nywi alo susu vwin do mìwo sɛnsɛn nu doɔ?
KPƆ ŊCƐWO KPƆ
Kpɔ susu ci amowo atɛnŋ aɖo nɔ wokpɔ enu ciwo èdo.
Kpɔ enu ci yí taɖo nunya le mɛ mɔ àbu tamɛ kpɔ nywiɖe gbɔxwe ata nu do gbaza.
“Lé Bibla nu so enutata do gbaza nuɔ?” (Àkpɔɛ le siti lɔ ji)
Kpɔ gɔnmɛɖose bu ciwo yí atɛnŋ akpedo mì nu le gbetasɔsɔwo mɛ.
“Ao nudodowo donɔ bubu Mawu nua?” (Jutakpɔxɔ septembre 2016)
Lé nyɔnu ɖeka ci yí jinɔ veviɖe mɔ ye nu akpe nɔ Mawu wɛ yí vaɖo susu nywi do mɛbuwo nudodowo nuɔ?
“Enudodo koɖo dradrado yí donɔ fɔbliŋ” (Nyɔ! 22 décembre 2003)