Wa do agbenywinɔnɔ se Yehowa tɔwo ji

Yehowa na agbenywinɔnɔ sewo agbetɔwo. Le kpɔwɛ mɛ, énu mɔ ŋsu koɖo nyɔnu yí alealɔ, eyi woanɔ wowo nɔnɔwo gbɔ keke asɔyi. (Mt 19:4-6, 9) Yehowa delɔnnɔ gbɔdɔndɔn masɔkoɖose ɖekpokpui o. (1Kor 6:9, 10) Égbena gɔnmɛɖosewo kudo enudodo koɖo acɔɖoɖo nu. Gɔnmɛɖose cɛwo ana yi jukɔn ato akpo.​—2Ese 22:5; 1Tim 2:9, 10.

Le xexeɛ mɛ gbɛɔ, amɛ sugbɔ dewakɔ do agbenywinɔnɔ se Yehowa tɔwo ji o. (Rɔm 1:18-32) Wona amɛwo susuwo kpɔnɔ ŋsɛn do wowo nudodowo, wowo cɔɖoɖowo koɖo wowo gbenɔnɔ ji. Amɛ sugbɔ kannɔfu agbebaɖanɔnɔ yí gbexonɔ nuxu vwin so mɛ ciwo yí nɔnɔ agbe nywi nu.​—1Piɛ 4:3, 4.

Ci mìnyi Yehowa Kunuɖetɔwoɔ, mìɖo awa do agbenywinɔnɔ se Mawu tɔwo ji koɖo edɔngbegbe. (Rɔm 12:9) Lé mìawɛ doɔ? Mìatɛnŋ asɔ ayexa ana amɛwo ajeshi enu ciwo yí elɔnnɔ. Egbeӡan mɔ mìwo ŋtɔwo gbenɔnɔ akpɔtɔ asɔnɔ koɖo agbenywinɔnɔ se kɔyiji lɔwo. Le kpɔwɛ mɛ, nɔ mìcankɔ enudodowo alo mìjikɔ adradoɔ, mìɖo abiɔnɔ mìwoɖekiwo se mɔ: ‘Cancan anyitɔwo sɔ koɖo Yehowa sewo alo xexeɛ tɔa? Anyi nudodowo koɖo anyi dradrado danasɛ mɔ ŋvɔnnɔ nɔ Mawu nyaoa?’ Alo nɔ mìjikɔ akpɔ televiӡiɔn alo video ɖeɔ, mìɖo abiɔnɔ mìwoɖekiwo se mɔ: ‘Yehowa dashi do jia? Agbenɔnɔ se ci yí edadasɛɔ? Anyi gbetasɔsɔ le nɔnɔmɛ cɛwo mɛ ana, lé ŋkpɔnɔ Mawu sewo do aɖe kpɔtɔa? (Eha 101:3) Atɛnŋ anyi afɔklɛnnu nɔ anyi xomumɛtɔwo alo mɛbuwoa?’​—1Kor 10:31-33.

Nyi yí taɖo ele veviɖe mɔ mìawa do agbenywinɔnɔ se Yehowa tɔwo jiɔ? Dajinjin o, Yesu agu jukɔnwo koɖo amɛ vwinwo pleŋ. (Eze 9:4-7) Amɛ ciwo yí wa Mawu dro ɖekɛwo yí aci agbe. (1Ӡan 2:15-17) Eyi taɖoɔ, mína mìanɔ agbe asɔ koɖo agbenywinɔnɔ se Yehowa tɔwo, keŋ nɔ mɛ ciwo yí kpɔkɔ mìwo gbenɔnɔ nywi akanfu Mawu.​—1Piɛ 2:11, 12.

KPƆ VIDEO, NYÌ YEHOWA XLƆ​—ŊSU ÐEKA, NYƆNU ÐEKA, KEŊ AÐO ENYƆBIƆSE CƐWO ŊCI:

• Nyi yí taɖo enyi ŋɖɛnyanya mɔ woanɔ agbe asɔ koɖo Yehowa sewoɔ?

• Nyi yí taɖo jilawo ɖo akpla agbenywinɔnɔ se Yehowa tɔwo wowo viwo so ɖevimɛɔ?

• Lé jajɛwo koɖo mɛganxoxuwo akpedo amɛwo nu nɔ woakpɔ nyɔna so Mawu sewo mɛɔ?