Lé mìazan traktiwo asɔ ɖe kunu do

So janvier 2018 jiɔ, kpɔwɛ seŋkannyɔwo nɔnɔ akpa ji nɔ Kristotɔwo gbenɔnɔ koɖo sumɔsumɔdɔ bɔbɔ nukplawema lɔ. Wonu nɔ mì mɔ mìwoŋgbegbenanɔ wemawo amɛwo kpoŋ o, vɔ mìwo le zannɔ seŋkannyɔwo sɔwu. Wowanɔ kpɔwɛ seŋkannyɔ videowo koɖo susu mɔ woasɔ kpedo eŋɛnywidratɔwo nu. Video lɔwo na mìnyanɔ lé mìazan Bibla ɖekɛ asɔ kan seŋ koɖo amɛwo do. Ecɛ dasɛ mɔ nɔ mìɖekɔ kunu so axomɛ yi axomɛ ɖe, mìdagbezannɔ wemawo yɔa? Oo, de ahan yɔ nɛ o! Le kpɔwɛ mɛ, traktiwo nyi emɔ nywi ɖeka ci ji mìato atɔ seŋ kankan ji. Mìhɛn mìazan trakti ɖekpokpui do alɔkpa ci yí gbɔkɔ ji:

1. Biɔ enyɔ ciwo yí le kpashi ŋkɔtɔ ji nɔ trakti lɔ se.

2. Dasɛ ɖoŋci Bibla tɔ ci yí le eji le kpashi amɛvetɔ lɔ ji. Nɔ gamɛ liɔ, hlɛn nyɔ ɖewo le xomɛ nɔ trakti lɔ nɔ míakan seŋ so wo nu.

3. Sɔ trakti lɔ jo nɔ axomɛnɔtɔ lɔ keŋ anu ni mɔ yi le tekpɔ ahlɛn enyɔ kpɛtɛwo.

4. Gbɔxwe àso le amɛ lɔ gbɔɔ, dasɛ nyɔbiɔse ci yí le gɔnmɛ nɔ “Bu tamɛ kpɔ só enyɔ cɛ nu” ni, yí awa toto koɖi keŋ nɔ míavakan seŋ so ɖoŋci Bibla tɔ nu gabumɛ.

Nɔ èvatrɔyi gbɔɔ, kan seŋ so ɖoŋci lɔ nu koɖi, yí agbe enyɔbiɔse bu ci nu míavakan seŋ so gabumɛ ɖɛ. Àtɛnŋ asɔ nyɔbiɔse lɔ le mìwo siti ji alo asɔɛ le wema ci yí le godu nɔ trakti lɔ mɛ. Le gamɛ ci yí sɔgbe jiɔ, sɔ Eŋɛnywi ciwo yí so Mawu gbɔ! wemagbaja lɔ alo Bibla nukplawema ɖeka le Enukplakpla dɔwanu dakavi lɔ mɛ ɖo ŋmɛ nɔ amɛ lɔ.