Mìdaci Mìwoɖekɛwo Gbeɖe O

1-2. (a) Nyi yí taɖo mìatɛnŋ anu mɔ mìdato mìwo cukaɖawo mɛ mìwoɖekɛwo gbeɖeɔ? (b) Nyi nu mìaxo nuxu so le nyɔta cɛ mɛɔ?

NƆ MÌDO go cukaɖa sɛnŋsɛnŋwoɔ, etɛnŋ wa nɔ mì mɔ mìci mìwoɖekɛ le tɔjihun hwɛhwɛ ɖeka mɛ le axu blabla sɛnŋsɛnŋ ɖeka mɛ nɛ. Vɔ, mìdatɛnŋ ato cukaɖa lɔwo mɛ mìwoɖekɛ o. Mìwo Da amɛlɔntɔ ci yí le jeŋkwi mɛ dekpɔkpɔ cukaɖa lɔwo kpoŋ o, vɔ éɖo gbe nɔ mì mɔ yeakpedo mì nu mìato wo mɛ. Yehowa na kankandoji nyɔ cɛ mì mɔ: ‘nakpedo eo nu.’—Ezai 41:10.

² Le nyɔta cɛ mɛɔ, mìaxo nuxu so lé Yehowa kpenɔdo mì nu (1)  yí danasɛ emɔ nɔ mì, (2) yí lenɔ bu nɔ mì, (3) yí glɔnnɔ eta nɔ mì yí (4) gbefanɔ akɔn nɔ mì. Yehowa na kankandoji mì mɔ nɔ mìwo tokɔ cukaɖa ɖekpokpui mɛ le agbe mɛ can ɔ, yedaŋlɔbe mì kpɔ gbeɖe o. Dagbe mi ɖɛ gbeɖe o. Eyi taɖo mìdaci mìwoɖekɛwo gbeɖe o.

YEHOWA DANASƐ EMƆ NƆ MÌ

3-4. Lé Yehowa danasɛ emɔ nɔ mì doɔ? (Ehajiji Wema 48:14)

³ Hlɛn Ehajiji Wema 48:14. Yehowa dejikɔ mɔ mìadasɛ emɔ nɔ mìwoɖekiwo o. Lé ekplɔkplɔ yi sɛntɔ egbejinɔtɔwo do gbɛɔ? Emɔ ɖeka yí nyi to yi Nyɔ Bibla ji. (Eha. 119:105) Yehowa tonɔ yi Nyɔ ci yí so gbɔngbɔn mɛ ji yí kpenɔdo mì nu mìsɔnɔ gbeta nywiwo, yí gbeɖonɔ nɔnɔmɛ nywi ciwo yí nanɔ mìkpɔnɔ jijɔ sugbɔ le kakacɛ mɛ yí agbevakpɔ agbe mavɔ le esɔ mɛ.a Le kpɔwɛ mɛ, éna kpla mì mɔ mìwo le mi amɛ lele do xomɛ, yí atonɔ nyɔnɔwi le enushianu ci mìwanɔ mɛ, yí alɔnnɔ mɛbuwo veviɖe so ji mɛ. (Eha. 37:8; Ebre. 13:18; 1 Piɛ 1:22) Nɔ mìdanasɛ nɔnɔmɛ nywi ŋtɔ́woɔ, mìavanyi jila nywiwo doji, asu koɖo ashi nywiwo koɖo exlɔ nywiwo.

⁴ Gbesɔ kpe niɔ, Yehowa sɔ amɛŋtɔŋtɔwo xolɔlɔwo sɔ do yi Nyɔ lɔ mɛ, cukaɖa ciwo mɛ woto koɖo lé enu wanɔ do nɔ wo le shigbe mìwotɔ hanwo nɛ. (1 Kor. 10:13; Ʒaki 5:17) Nɔ mìhlɛnkɔ exolɔlɔ ŋtɔŋtɔ cɛwo yí wanɔ do enukplamu ciwo yí mìkpɔnɔ le wo mɛ jiɔ, mìakpɔ nyɔna sugbɔwo. Vɔ mìaxo nuxu so amɛve nu le wo mɛ. Ŋkɔtɔ, mìavado jeshi mɔ mìdeci mìwoɖekɛwo o. Amɛwo to mìwo nɔnɔmɛ ŋtɔ́ hanwo mɛ vayi hɛnnɛ yí do ji le wo mɛ keke yí ɖu wo ji. (1 Piɛ 5:9) Amɛvetɔ, mìakpla lé mìato mìwo cukaɖa lɔwo mɛ do.—Rɔm. 15:4.

5. Miwo yí Yehowa zannɔ yí sɔ danasɛ emɔ nɔ mì le agbe mɔ lɔ jiɔ?

⁵ Yehowa gbewanɔ toto keŋ nɔ mìwo kpena Kristotɔwo adasɛ emɔ nɔ mì.b Le kpɔwɛ mɛ, ekán lɔ mɛ hamɛwo jikpɔtɔwo vajinɔ mìwo hamɛwo kpɔ blaŋblaŋ yí donɔ ŋsɛn mì. Wowo nuxuwo donɔ ŋsɛn mìwo xɔse yí kpenɔdo mì nu yí egbe kpɔtɔ nɔnɔ eju nɔ mì. (Edɔ. 15:40–16:5) Hamɛmɛshinshinwo can jenɔ agbla veviɖe yí kpenɔdo eŋɛnywidratɔ ɖekaɖeka nu nɔ woate gogo Yehowa. (1 Piɛ 5:​2, 3) Jilawo danasɛ emɔ nɔ wowo viwo le gbɔngbɔn mɛ yí kpenɔdo wo nu nɔ woanya lé woasɔ gbeta nywiwo do yí aɖo nɔnɔmɛ nywiwo. (Elo. 22:6) Gbesɔ kpe niɔ, nyɔnu Kristotɔ ciwo yí shin le gbɔngbɔn mɛ kpenɔdo nɔvinyɔnu jajɛwo nu to wowo kpɔwɛ nywiwo ji yí nanɔ nukpamu ŋtɔŋtɔ koɖo ŋsɛndoamu nywiwo wo.—Titu 2:​3-5.

6. Nyi mìɖo awa yí akpɔ nyɔna so emɔdasɛnamɛ Yehowa tɔwo mɛɔ?

⁶ Yehowa wanɔ yi kpaxwe yí nanɔ emɔdasɛnamɛ ciwo yí mìʒan. Lé mìawɛ adasɛ mɔ enu ci yí ewakɔ nɔ mì jeŋ nɔ mìɔ? Elododo wema 3:​5, 6 nu mɔ: “Doji do [Yehowa] nu gbijigbiji! Ŋgbe godo nunyanya aotɔ nu o.” Nɔ mìwɛ ahan ɔ, “ána [mìwo] mɔwo ajɔ,” yí ecɛ akpedo mì nu mìaze nɔ cukaɖa sugbɔ le agbe mɛ yí akpɔkɔ jijɔ doji. Mìdo akpe sugbɔ nɔ Yehowa mɔ éjeshi mì ɖɛ nywiɖe yí lɔn mì sugbɔ keke yí danasɛ emɔ nɔ mì yí nanɔ nukplamu ci mìwo ɖekaɖeka ʒan!—Eha. 32:8.

YEHOWA LENƆ BU NƆ MÌ

7. Ŋɖewo ciwo mɛ Yehowa lenɔ bu nɔ mì leɔ? (Filipitɔwo 4:19)

⁷ Hlɛn Filipitɔwo 4:19. Gbesɔ kpe nɔ emɔdasɛnamɛ ciwo Yehowa nanɔ mì le gbɔngbɔn mɛɔ, écunɔ shi do agbla ciwo mìjenɔ yí akpɔ mìwo ʒan ciwo yí nyi ŋɖuɖu enudodo koɖo fini mìadɔn ji. (Mt. 6:33; 2 Tɛs. 3:12) Ci esɔgbe mɔ mìwo ŋcilanmɛ ʒanwo axa mì can ɔ, Yehowa do ŋsɛn mì mɔ mìwo ŋgbelokɔ nu kpɔ ɖoɖu so enu ŋtɔ́wo nu o. (Kpɔ gɔnmɛnuŋwlɛŋwlɛ ci yí le Matie 6:25.) Nyi yí taɖoɔ? Ðo mìwo Da dagbe yi sɛntɔ egbejinɔtɔwo ɖɛ hwenu wole eʒan mɛ gbeɖe o. (Mt. 6:8; Ebre. 13:5) Mìatɛnŋ akando ji keŋkeŋ ci enu nɔ mì mɔ yeale bu nɔ mì.

8. Nyi Yehowa wa nɔ Davidiɔ?

⁸ Bu tamɛ kpɔ so lé Yehowa kpedo Davidi nu do. Le exwe gbɔnnugbɔnnu ciwo mɛ Davidi sɔ nɔ gbejagbeja leɔ, Yehowa le bu nɔ yi koɖo yi mɛwo yí na wo enu ciwo wozan keŋ anɔ agbe. Ci Davidi bu tamɛ kpɔ so lé Yehowa le bu ni le exwe ŋtɔ́wo mɛ nuɔ, éŋwlɛ mɔ: “Ŋ nyi ɖajɛvi vayì, vɔ evyɛ ɔ, ŋ ku nyɔxo yi ŋ de kpɔ Mawu yí É ɖekɔ le amɛ nywiwo nu gbeɖe o. Ŋ de kpɔ amɛ nywiwo viwo yí wobyɔbyɔ ŋɖuɖu gbeɖe o.” (Eha. 37:25) Kankandoji li mɔ, le eoŋtɔ gbe mɛɔ, eo can èkpɔ lé Yehowa sɔ lɔnlɔn yí lé bu nɔ yi sɛntɔ egbejinɔtɔwo do.

9. Lé Yehowa lenɔ bu nɔ yi mɛwo gbɛ do le jɔjɔmɛfɔku ɖe hwenuɔ? (Kpɔ foto lɔ hɛnnɛ.)

⁹ Yehowa lenɔ bu nɔ yi sɛntɔ egbejinɔtɔwo le jɔjɔmɛfɔkuwo hwenu hɛnnɛ. Le kpɔwɛ mɛ, hwecinu yí eju to le exwe sanŋdi ŋkɔtɔ mɛɔ, Kristotɔ ciwo le afi vovovowo nɔ nyigban lɔ na ŋɖuɖu wowo nɔviŋsu koɖo nɔvinyɔnu ciwo yí le ʒan mɛ. (Edɔ. 11:​27-30; Rɔm. 15:​25, 26) Mawu sɛntɔ egbɛtɔwo can danasɛ xomɛvu gbɔngbɔn ŋtɔ́. Nɔ jɔjɔmɛfɔku ɖe jɔɔ, Yehowa lɔnlɔn dɔnɔ yí yi sɛntɔwo nanɔ enu ciwo yí le veviɖe shigbe ŋɖuɖu, eshi, enudodo koɖo cike mɛ ciwo ji yí jɔjɔmɛfɔku lɔ jɔ do. Mɛ ciwo yí le xɔcucugbɛwo mɛ dranɔ axwe koɖo Fyɔɖuxuxɔ ciwo yí dahɛn do. Yí Yehowa sɛntɔwo ɖeblɛ yí nunɔ akɔnfanamɛnyɔ koɖo ŋsɛndoamunyɔ ciwo yí so Bibla mɛ nɔ mɛ ciwo yí bu wowo xwewo koɖo wowo mɛveviwo.c

10-11. Nyi èkpla le Borys kpɔwɛ lɔ mɛɔ?

¹⁰ Yehowa gbesɔ xomɛvu lenɔ bu nɔ mɛ ciwo yí desinni can. Ahanke mìwo can mìtonɔ emɔ ciwo yí hun nɔ mì ji yí wanɔ xomɛvu nɔ mɛ ciwo yí deɖo jixɔse ɖekɛ ŋmɛ koɖo mì can nɛ. (Gal. 6:10) Wana cɛwo na yí wovajenɔshi mìwo nɔnɔmɛ nywiwo yí gbevakplanɔ nu so Yehowa nu. Mìasɔ Borys kpɔwɛ. Ényi sukluvi le suklu gan ɖeka le Ukraine. Ci Borys denyi Yehowa Kunuɖetɔ can ɔ, éwanɔ nu koɖo xomɛfafa ɖaɖa yi kpena sukluvi ciwo yí nyi Kunuɖetɔwo gbɔ yí gbedonɔ bubu wowo jixɔsewo nu gashiagamɛ. Ci Borys sɔ gbeta mɔ yeashi le fini wowakɔ ahwa le yí ayi nɔ bexujitɔwo tɔxuɔ, mìwo nɔviwo kpedo nu. Le yiyimɛɔ, Borys vayi Eŋwiɖoɖo Yesu ku lɔ tɔ. Ci Borys bu tamɛ kpɔ so ŋci nɔviwo wa ni nuɔ, énu mɔ: “Yehowa Kunuɖetɔwo fa xomɛ nɔŋ sugbɔ yí gbele bu nɔŋ. Ŋdo akpe nɔ Yehowa Kunuɖetɔwo.”

¹¹ Mìwo can mìsrannɔ mìwo Da ŋshishikunamɛtɔ ci yí le jeŋkwi mɛ, ci mìwanɔ xomɛvu nɔ mɛ ciwo yí le ʒan mɛ nɔ wonyi mìwo kpena xɔsetɔwo alo wodenyi can. (Luiki 6:​31, 36) Mìkpɔkpɔ emɔ mɔ agbla ciwo mìjekɔ yí lɔnkɔ amɛwo adɔ yí woavanyi Yesu nukplaviwo. (1 Piɛ 2:12) Nɔ devayi do ahan can ɔ, mìakpɔtɔ akpɔkpɔ jijɔ sugbɔ ci yí tonɔ so enunana amɛ mɛ.—Edɔ. 20:35.

YEHOWA GLƆNNƆ TA NƆ MÌ

12. Egbe ci Yehowa ɖo mɔ yeaglɔn ta nɔ ye mɛwo ciwo yí le gbɛbɔbɔ ɖeka mɛɔ? (Ehajiji Wema 91:​1, 2, 14)

¹² Hlɛn Ehajiji Wema 91:​1, 2, 14. Le egbɛ mɛɔ, Yehowa ɖogbe nɔ mì mɔ yeaglɔn ta nɔ mì le gbɔngbɔn mɛ. Daɖe emɔ yí Satana adahɛn nu le sɛnsɛn adodwi lɔ nu gbeɖe o. (Ʒan 17:15) Mìatɛnŋ akando ji keŋkeŋ mɔ Yehowa awa do egbe ci eɖo ji yí aglɔn ta nɔ yi mɛwo hwenu “efunkpekpe gangan” lɔ atɔ ji, yí denyi le gbɔngbɔn mɛ ɖekɛ yɔ o, vɔ le ŋcilan mɛ hɛnnɛ.—Enyɔ. 7:​9, 14.

13. Nyiwo mɛ yí Yehowa glɔnnɔ ta nɔ mìwo ɖekaɖeka leɔ?

¹³ Lé Yehowa aglɔn ta nɔ mìwo ɖekaɖeka doɔ? Yehowa tonɔ yí Nyɔ Bibla ji yí sɔ kpenɔdo mì nu mìdonɔ jeshi enu ci yí nyɔ koɖo enu ci yí dɔn. (Ebre. 5:14) Nɔ mìwanɔ do gɔnmɛɖose ciwo mìkpɔnɔ le yi Nyɔ lɔ mɛ jiɔ, mìaglɔn ta nɔ mìwoɖekiwo so enu ciwo yí adahɛn nu le mì nu le gbɔngbɔn mɛ koɖo le ŋcilan mɛ. (Eha. 91:4) Gbesɔ kpe niɔ, Yehowa glɔnnɔ ta nɔ mì to hamɛ lɔ ji. (Ezai 32:​1, 2) Nɔ mìdonɔ egbɛ koɖo mɛ ciwo yí lɔn Yehowa yí gbezɔnnɔ do Bibla gɔnmɛɖosewo jiɔ, woado ŋsɛn mì yí mìakpɔ ŋsɛn keŋ aɖu le enu ciwo yí adahɛn nu le mì nu le gbɔngbɔn mɛ ji.—Elo. 13:20.

14. (a) Nyi yí taɖo Yehowa deglɔnnɔ ta nɔ mì le cukaɖawo pleŋ mɛɔ? (b) Kankandoji ci Ehajiji Wema 9:10 na mìɔ? (Gbekpɔ gɔnmɛnuŋwlɛŋwlɛ lɔ.)

¹⁴ Sasa vayiɔ, Yehowa glɔn ta nɔ yí sɛntɔwo so ŋci yí adahɛn nu le wo nu le ŋcilan mɛ. Vɔ denyi nɔnɔmɛ ɖekpokpui mɛ yí ewɛ ahan le o. Hweɖewonuɔ “enujɔjɔ maɖoŋdonuwo” tɛnŋ va mì ji. (Ŋun. 9:​11, nwt) Gbesɔ kpe niɔ, Yehowa ɖe emɔ yí yi sɛntɔ ɖewo do go yumɛcici yí ɖewo ku ŋtɔkpu yí asɔ dasɛ nɔ Satana mɔ ŋsukantɔ yí enyi. (Job 2:​4-6; Mt. 23:34) Ahanke yí enyi le egbɛ mɛ nɛ. Taŋfuin ci Yehowa deɖekɔ mìwo cukaɖawo swi nɔ mì can ɔ, mìatɛnŋ akando ji mɔ dagbe yi sɛntɔ ciwo yí luinwo ɖɛ kpɔ gbeɖe o.d—Eha. 9:10.

YEHOWA FANƆ AKƆN NƆ MÌ

15. Lé gbedodoɖa, Mawu Nyɔ lɔ koɖo mìwo kpena Kristotɔwo fanɔ akɔn mɔ mì doɔ? (2 Korɛntitɔwo 1:​3, 4)

¹⁵ Hlɛn 2 Korɛntitɔwo 1:​3, 4. Hweɖewonuɔ, mìnɔnɔ ŋshishi mɛ, lonɔ nu kpɔ alo senɔ vevi. Taŋfuin le kakacɛ mɛ yɛɔ, ŋɖe na yí èseseɛ vevi yí na yí èkpɔɛ mɔ yeci yeɖekɛ. Mɛɖe li yí nya lé ewawa nɔ eo doa? Yehowa yɛ nya. Desenɔ vevi do mì nu kpoŋ o. vɔ “[égbefanɔ] akɔn nɔ mì le mìwo xaxawo pleŋ mɛ.” Lé éwɛni doɔ? Nɔ mìnu mìwo jimɛnyɔwo nɔ Yehowa le gbedodoɖa mɛɔ, énanɔ mì “fafa Mawu tɔ ci mɛ agbetɔ da tɛnŋ mɔŋje o.” (Fili. 4:​6, 7) Mìgbekpɔnɔ akɔnfɛ nɔ mìhlɛn nyɔ ciwo Yehowa nu nɔ mì le Bibla mɛ. Le yi Nyɔ lɔ mɛɔ, Yehowa danasɛ lé elɔn mì sugbɔ do yí kplanɔ nu mì lé mìawɛ anyaŋɖɛ yí gbenanɔ mì emɔkpɔkpɔ ci yí donɔ ŋsɛn mì. Gbesɔ kpe niɔ, eha nywi ciwo mìdonɔ koɖo Bibla mɛ ŋsɛndoamunyɔ ciwo mìsenɔ le Kristotɔwo bɔbɔwo mɛ fanɔ akɔn nɔ mì.

16. Nyi èkpla so enu ci yí jɔ do Nathan koɖo Priscilla ji mɛɔ?

¹⁶ Mìatɛnŋ akpɔ lé Yehowa donɔ ŋsɛn mì yí fanɔ akɔn nɔ mì to yí Nyɔ lɔ ji, nɔ mìbu tamɛ kpɔ so enu ci yí jɔ do Nathan koɖo Priscilla ciwo yí so États-Unis ji. Exwe dewo vayiɔ, Wosɔ gbeta mɔ yewoayi ci fini yí Fyɔɖuxu ŋɛnywidratɔwo ʒan sugbɔ le. Nathan nu mɔ: “Mìkando ji mɔ Yehowa acu shi sugbɔ do agblajeje mìwo tɔ ji.” Vɔ, ci wovaɖo wowo dɔ yoyu lɔ mɛɔ, wodo go lanmɛsɛn cukaɖawo koɖo eho cukaɖa sɛnŋsɛnŋwo ciwo nu wodeɖoŋ do o. Le yiyimɛɔ, asu koɖo ashi lɔ trɔyi axwe, vɔ ehonyɔwo kpɔtɔ gbɔngbɔnnu nɔ wo. Nathan ɖo ŋwi mɔ “Ŋbiɔ nyɛɖeki se mɔ nyi yí taɖo Mawu dekpedo mì nu shigbe lé mìwo ji do ɛnɛ ma. Ŋgbevatɔ nyɛɖeki biɔbiɔ se hɛnnɛ mɔ enudɔndɔn ɖe yí ŋwa ma.” Vɔ le yiyimɛɔ, Nathan koɖo Priscilla vakpɔɛ mɔ Mawu degbe yewo ɖɛ hwenu yewole eʒan mɛ o. Nathan nu kpi mɔ: “Le cukaɖa sɛnŋ ŋtɔ́wo hwenuɔ, Bibla vale shigbe exlɔ nywi ɖe ci yí donɔ ŋsɛn mì yí gbedanasɛ emɔ nɔ mì hannɛ. Ci mìsɔ susu ɖo lé Yehowa kpedo mì nu yí mìdo ji le nɔnɔmɛ sɛnŋsɛnŋ lɔwo mɛ yí denyi cukaɖa lɔ ŋtɔ ji yí mìsɔ susu ɖoɔ, edra mì do ɖɛ nɔ mìavakpanŋkɔ cukaɖa ciwo mìavado go le esɔ mɛ koɖo xɔse.”

17. Lé wofa akɔn nɔ nɔvinyɔnu Helga doɔ? (Kpɔ foto lɔ hɛnnɛ.)

¹⁷ Mìwo nɔviŋsu koɖo nɔvinyɔnuwo atɛnŋ agbefa akɔn nɔ mì doji. Lé anyi ahan doɔ? Kpɔ enu ci yí jɔ do Helga, ci yí so Hongrie ji. Na nɔ exwe sugbɔɔ, édo go cukaɖa vovovo ciwo yí na yí elo nu kpɔ yí kpɔɛ mɔ yedegbenyi ŋɖewanu o. Vɔ ci ebu tamɛ kpɔ so exwe ŋtɔ́wo nuɔ, évado jeshi mɔ Yehowa zan nɔviŋsu koɖo nɔvinyɔnu ciwo yí le hamɛ lɔ mɛ yí sɔ fa akɔn nɔ ye. Éŋwlɛ mɔ: “Yehowa kpedo ŋnu gashiagamɛ hwenu ekpɔɛ mɔ ŋsɛn vɔ nɔŋ, sɔ kuso edɔ ci ŋwakɔ, ebulele nɔ anyi vi ci yí ble koɖo cukaɖa buwo nu. Nanɔ exwe 30 ɔ, ŋkeke ɖeka dehwedo yí egbe mawado egbe ci eɖo mɔ yeafa akɔn nɔŋ ji o. Blaŋblaŋ ɔ, édonɔ ŋsɛnŋ to enyɔ nywi koɖo enyɔ vivi ciwo yí nɔviwo nunɔ nɔŋ ji. Le hwenu ciwo mɛ ŋʒan ŋsɛndoamu le koŋ ɔ, woŋwlɛnɔ nu ɖaɖaŋ to ka ji alo wema ji yí gbenunɔ ŋsɛndoamunyɔwo nɔŋ.”

18. Lé mìatɛnŋ afa akɔn nɔ mɛbuwoɔ?

¹⁸ Emɔ hun nɔ mì mɔ mìawanɔ Mawu tɔ han yí afanɔ akɔn nɔ mɛbuwo. Lé mìawɛ doɔ? Mìatɛnŋ ado ʒinxo aɖo to wo nywiɖe, anu ŋsɛndoamunyɔwo nɔ wo, yí akpedo wo nu le enuŋtɔŋtɔwo mɛ. (Elo. 3:27) Mìaje agbla yí afanɔ akɔn nɔ mɛ ciwo pleŋ yí le efun kpekɔ, mɛ ciwo yí desɛnkɔ Mawu can le mɛ. Nɔ mìwo xwexatɔwo ble alo lokɔ nu kpɔɔ, mìayi ji wo kpɔ aɖo to wo yí anu ŋsɛndoamunyɔ ciwo yí le Bibla mɛ ɖewo nɔ wo. Nɔ mìsrannɔ Yehowa ci yí nyi, “Mawu nɔ akɔnfafawo keŋkeŋ ɔ,” taŋfuin denyi mìwo kpena xɔsetɔwo ɖekɛ nu mìakpedo le cukaɖawo hwenu o, vɔ mìagbekpedo mɛ ciwo yí dekpɔsɛnkɔ Mawu nu yí woavakpla nu so sɛnsɛn adodwi lɔ nu.—Mt. 5:16.

YEHOWA LE NƆ NƆ MÌ TƐGBƐƐ

19. Nyi Yehowa wanɔ nɔ mìɔ, yí lé mìatɛnŋ awa yitɔ han doɔ?

¹⁹ Yehowa sɔnɔ ɖe le ji veviɖe nɔ mɛ ciwo pleŋ yí luinni. Dagbe mì ɖɛ nɔ mìle cukaɖawo mɛ o. Shigbe vida amɛlɔntɔ ɖe ci yí lenɔ bu nɔ eviɛ nɛɔ, Yehowa lenɔ bu nɔ yi sɛntɔ egbejinɔtɔwo. Édanasɛ emɔ nɔ mì, lénɔ bunɔ mì, glɔnnɔ eta nɔ mì yí gbefanɔ akɔn nɔ mì. Mìasran mìwo Da amɛlɔntɔ ci yí le jeŋkwi mɛ nɔ mìkpenɔdo mɛbuwo nu le wowo cukaɖawo mɛ yí gbedonɔ ŋsɛn wo. Le xexe cɛ mɛɔ, mìtɛnŋ dogo cukaɖawo koɖo vevisesewo, vɔ mìatɛnŋ akando ji mɔ, Yehowa le koɖo mì. Éɖo egbe nɔ mì mɔ: ‘Ŋgbevɔn o, ɖo ŋle koɖo eo.’ (Ezai 41:10) Gbeɖu cɛ na kankandoji mì mɔ le Yehowa gbɔɔ, mìdaci mìwoɖekɛwo gbeɖe o.