Enyɔbiɔse Ciwo yí so yi Hlɛntɔwo Gbɔ
“Susu” ci yí Yehowa asɔ do ji mɛ nɔ jukɔnwo le sabaɖe yɛɔ?
Sɔ kuso lé efunkpekpe gangan lɔ atɔ ji do nuɔ, Enyɔdasɛ 17:16, 17 nu mɔ: ‘Elanzo amɛwó ciwo yí èkpɔ koɖo elan lɔ ŋtɔ avatɔ sakabo lɔ ŋtɔ nyɔ gbɔ gbegbe. Woavaxɔ enu ciwo pleŋ yí le shi yí avaɖi do mama. Woavatɔ yi lanciwo ɖuɖu yí avatɔ ezo yi lankpu lɔ pleŋ. Ðoɔ, Mawu sɔ [do ji mɛ] nɔ wo mɔ wo le wa do ye susu ji. Éna yí Efyɔ amɛwó lɔwo ɖo gbe ju yi sɔ wowo fyɔɖuxu jo nɔ elan lɔ.’ Mìwo wemawo nu sa vayi mɔ “susu” ci Yehowa asɔ do ji mɛ nɔ jukɔn lɔwo yí nyi ŋsusɛnsɛnwo gugu.
Vɔ, éʒan mɔ woawa trɔtrɔ ɖeka so nyɔ cɛ nu. “Susu” ci Yehowa asɔ ɖo ji mɛ nɔ jukɔn lɔwo yí nyi mɔ woasɔ “wowo fyɔɖuxu jo nɔ elan [wadan] lɔ.” Nɔ mìamɔŋje lé enyɔ cɛ avamɛ do mɛɔ, mìakpɔ ɖoŋci nɔ enyɔbiɔse cɛ ciwo yí gbɔgbɔ.
Miwo nu yí enyɔnuɖɛ cɛ xokɔ nuxu soɔ? “Nyɔnu Asuwatɔ” lɔ ci wogbeyɔnɔ mɔ “Babiloni Gangan lɔ” le dumɛ nɔ ŋsusɛnsɛnhawo pleŋ ci yí le xexeɛ mɛ. ‘Elan wadan jin’ lɔ le dumɛ nɔ fafa habɔbɔ ci yí tɔ edɔ wawa le exwe 1919 mɛ yí woyɔɛ mɔ Jukɔnwo Nublabla. Ecɛyɛɔ, wovayɔyɔɛ mɔ Jukɔnwo Xoxoxu Habɔbɔ. (Enyɔ. 17:3-5) “Ezo amɛwó” lɔwo le dumɛ nɔ acɛkpakpa ciwo pleŋ yí le godu nɔ elan wadan lɔ.
Ekacaca ci yí le gblamɛ nɔ nyɔnu asuwatɔ lɔ koɖo elan wadan jin lɔɔ? Nyɔnu asuwatɔ lɔ “nɔ nyinɔnɔ do” elan wadan jin lɔ ji yí cucuɔ eshi ni yí teteɛkpɔ mɔ yeaflui keke áji mɔ yeakpa ni ŋtɔkpu hɛnnɛ.
Nyi yí avajɔ do nyɔnu asuwatɔ lɔ jiɔ? Elan wadan koɖo yi zo amɛwó lɔwo ‘atɔ nyɔnu asuwatɔ lɔ nyɔ gbɔ gbegbe’ keke axɔ enu ciwo pleŋ yí le shi yí agbedasɛ lé ebaɖa do nɔ amɛwo. Eyi kojoɖonyɔ ci Yehowa nu so nu ajɔ do ji yí woagui keŋkeŋ. (Enyɔ. 17:1; 18:8) Ecɛ anyi vɔvɔnu nɔ ŋsusɛnsɛnhawo pleŋ. Éle ahan gan, keŋ gbɔxwe ajɔ ahan ɔ, Yehowa adɔ yí jukɔnwo awa ŋɖeka ci yí dejɔ kpɔ le agbetɔwo cɛkpakpa xolɔlɔ mɛ o.
Nyi yí Yehowa adɔ jukɔnwo mɔ wo le waɔ? Yehowa asɔ ɖo ji mɛ nɔ ezo amɛwó lɔwo mɔ wo le wa do “ye susu” ji. Eyi nyi mɔ ‘woana wowo hlɔnhlɔn koɖo acɛkpakpa elan wadan jin’ ci yí nyi Jukɔnwo Xoxoxu Habɔbɔ lɔ. (Enyɔ. 17:13) Bu tamɛ kpɔ so gɔnmɛsese ci yí le nyɔ cɛ nu. Agbetɔwo cɛkpakpa lɔwo asɔ gbeta wowoŋtɔwo yí asɔ acɛkpakpa wowotɔ koɖo wowo ŋsɛn asɔ jo nɔ elan wadan lɔ kpoŋ a? Oo. Enyɔnuɖɛ lɔ dasɛ mɔ Mawu ŋtɔ yí adɔ yí woawɛ ahan. (Elo. 21:1; Sɔ sɔ koɖo Ezai 44:28.) Woasɔ acɛkpakpa lɔ jo vivivia? Oo! Kankandoji li mɔ enu cɛ avajɔ le avomɛ zeɖeka. Le yɛ goduɔ, elan wadan ci yí wona ŋsɛn yoyu lɔ awa do enu ci Yehowa jikɔ ji. Eyi nyi mɔ áɖe ŋsusɛnsɛnwo habɔbɔwo pleŋ swi le afɔdumɛ yí anyi évɔ.
Nyi mìatɛnŋ akpɔ emɔ nɔ le esɔ mɛɔ? Déʒan mɔ mìakpɔkɔ emɔ mɔ enyɔtakankan yoyuwo axokɔ nuxu so acɛkpakpawo nu yí anu mɔ wotɔ godu nɔnɔ nɔ Jukɔnwo Xoxoxu Habɔbɔ lɔ vivivi o. Enu ci mìatɛnŋ akpɔ emɔ nɔ ke: Le zeɖeka kaka le avomɛɔ, Yehowa asɔ ɖo ji mɛ nɔ jukɔnwo mɔ woana wowo ŋsɛn elan wadan ci yí nyi Jukɔnwo Xoxoxu Habɔbɔ lɔ. Nɔ enu cɛ vajɔɔ, mìanya mɔ efunkpekpe gangan lɔ jikɔ atɔ ji. Gbɔxwe hwenɔnu aɖoɔ, “mìɖo ale zanŋte yí akpɔ mìwoɖekiwo ji” ɖo trɔtrɔ ciwo yí jikɔ ava le avomɛ gbɔgbɔ xii sabaɖe yɛ!—1 Tɛs. 5:6.