Mi yí ahwlɛn nyigban lɔ gan ɔ?

Amɛ sugbɔ dejikɔ mɔ nyigban lɔ le dahɛn o yí wogbejikɔ mɔ enuwo le nyɔ nɔ nulagbu ciwo yí le ji, ɖo wokpɔ mɔ agbetɔwo dadahɛn nu le wo nu. Mɛ ciwo yí kpɔnɔ ayamɛnyɔwo gbɔ ɖewo nu mɔ, agbetɔwo nuwanawo dɔ yí enulagbu ɖewo tɔ gugu yí cɛ dadahɛn nu le nulagbu hamɛhamɛ ciwo yí le nyigban ji nu ɖɛyɛ sɔwu sasa.

Agbetɔwo agu nyigban lɔa? Abi woatɛnŋ avanɔ nyigban lɔ ji yí wodagbedanahɛn ŋɖe le nua?

Agbla ciwo agbetɔwo jejeɛ ana nuwo anyɔa?

Mɛ ciwo yí nya nu so nyɔ cɛwo nu sugbɔtɔ kando ji mɔ, agbetɔwo aglɔn ta nɔ nyigban dru yí agbetɛnŋ anɔ ji gan yí wodadahɛn ŋɖe le nu o. Enugɔnmɛkutɔ ɖewo mɔ gbɔxwe yí egbla ciwo agbetɔwo dodoɔ ana nuwo anyɔɔ, woɖo atrɔ nu sugbɔ le hwenu kuɖeka mɛ. Enu ciwo woatrɔ ɖewo ke:

• Lé wolenɔ bu nɔ nyigban, avewo, eshi tɔxuwo koɖo axuwo do ɖo agbenyɔ doji.

• Woatɔ nu ciwo wosɔ denɔ agble buwo zanzan yí agbetɔ enu ciwo yí ana woakpɔ eshi, ezo, zozu, fafa koɖo ŋtɔ́ hanwo buwo zanzan.

• Woato emɔ buwo ji yí akpɔ ŋɖuɖu ciwo mɛ ama koɖo acikusɛnsɛnwo sunɔgbɔ le sɔwu ŋɖuɖu ciwo mɛ elan koɖo kpaviwo sunɔgbɔ le; nɔ wowɛ ahan ɔ, awɛ mɔ wodagbeɖunɔ nu sugbɔ abi adanahɛn ŋɖuɖu o.

• Woɖo anya mɔ de ŋcilanmɛnu sugbɔ yí ale amɛ shi gbɔxwe mɛ lɔ anɔ agbe nywiɖe yí ase vivi ni o.

Lé èkpɔɛ doɔ? Esɔgbe mɔ mìakpɔkɔ emɔ mɔ acɛkpakpawo, ajɔdotɔwo koɖo amɛwo awa nu alɔlealɔmɛ keke anyɔ wu sasaa? Alo èkpɔɛ mɔ datɛnŋ ajɔ ahan o, ɖo enu cinɔ ŋmɛ nɔ mɛɖekatɔwo sugbɔ, mɛɖewo jinɔ wowoɖekɛ tɔ haan yí mɛbuwo gbeli ciwo yí debunɔ esɔmɛ tɔ kpɔa?—2 Timɔte 3:1-5.

Ŋci yí taɖo mɔkpɔkpɔ li

Bibla na mìkando ji mɔ nyigban avanɔ nywiɖe le esɔmɛ. Edre enu ci yí taɖo agbla ciwo agbetɔwo jejeɛ desun aglɔn ta nɔ nyigban lɔ o yí gbedre enu vevi ŋtɔŋtɔ ciwo woɖo atrɔ. Gbesɔ kpe niɔ, enu lé trɔtrɔ cɛwo avava do.

Ŋci yí taɖo agbetɔwo gblajejewo ɖekɛ datɛnŋ aglɔn ta nɔ nyigban lɔ o. Yehowaa Mawu wa nyigban lɔ yí nu nɔ agbetɔwo mɔ wo le lé bu ni. (Gɔnmɛjeje 1:28; 2:15) Woawa wowo dɔ lɔ nywiɖe nɔ wose tonu nɔ Mɛ ci yí wa wo keŋ yí gbewa do emɔdasɛnamɛ yi tɔwo ji. (Elododo Wema 20:24) Ci ele ahan can ɔ, wogbe Yehowa yí tekpɔ mɔ yewoanɔ agbe lé edro yewoŋtɔwo do. (Ŋununyatɔ 7:29) Agbetɔviwo deɖo ŋsɛn wowoŋtɔwo yí ale bu nɔ nyigban lɔ o, eyi taɖo egbla ciwo woado atɛnŋ adra ŋɖewo do, gan wodatɛnŋ awɛ mɔ enuwo anyɔ vɛ keŋkeŋ o.—Elododo Wema 21:30; Ʒeremi 10:23.

Trɔtrɔ ciwo ele mɔ woawa. Mawu ɖui mɔ yeaɖo te agbetɔwo nɔ woŋgbegu nyigban lɔ o. (Enyɔdasɛ 11:18) Mawu dakpedo acɛkpakpawo koɖo mɛ ciwo yí le nyigban lɔ ji nu o, ɖo wowo yí dadahɛn nyigban lɔ; áɖɔ li wo. (Enyɔdasɛ 21:1) Eyi taɖo Yehowa nu mɔ: “Kpɔɖaa! Ŋ wawa nushanu do yoyu ji!”—Enyɔdasɛ 21:5.

Lé trɔtrɔ lɔwo avava do. Yehowa asɔ acɛkpakpa ci yí le jeŋkwimɛ ci woyɔnɔ mɔ Mawu Fyɔɖuxu asɔ ɖɔ li agbetɔwo cɛkpakpawo. Yesu Kristo yí akpa nɔ Fyɔɖuxu ŋtɔ́ ci yí akplɔ nyigban lɔ.—Daniɛli 2:44; Matie 6:10.

Mawu Fyɔɖuxu lɔ ana kpla agbetɔwo nɔ woanɔ agbe asɔ koɖo Mawu se jɔjɔɛwo. Nɔ agbetɔwo jeshi Mɛ ci yí wa wo keŋ yí wanɔ do yi mɔdasɛnamɛwo jiɔ, woanɔ xexeɛ mɛ yí wodadahɛn ŋɖe le nu o. (Ezai 11:9) Bibla dre lé Mawu cɛkpakpa lɔ awɛ do yí mɛ ciwo akplɔ anɔ agbe nywitɔ yí ase vivi ni gan yí dadahɛn nu le nyigban lɔ nu o. Awa ŋcɛwo:

• Ana ŋɖuɖu amɛshiamɛ.—Ehajiji Wema 72:16.

• Awɛ yí jɔjɔmɛnu ciwo yí nanɔ ezo, zozu, eshi, fafa koɖo ebuwo atrɔva wowo tɔxu.—Ezai 35:1, 2, 6, 7.

• Awɛ yí agbetɔwo alenɔ bu nɔ lanwo yí elanwo dawa nu vevi koɖo wo o.—Ezai 11:6-8; Oze 2:18.

• Ana yí jɔjɔmɛfɔkuwo dagbejɔnɔ o.—Maki 4:37-41.

Àtɛnŋ akando ji mɔ Mawu Fyɔɖuxu lɔ atrɔ nuwo ahan. Nɔ èjijiɛ numɛɖeɖe buwoɔ, hlɛn nyɔta ci yí nyi “Hwenu yí Mawu Fyɔɖuxu lɔ atɔ acɛ kpakpa do nyigban lɔ jiɔ?”