Nyi Yí Taɖo Yehowa Kunuɖetɔwo Gbenɔ Mɔ Yewodawa Eju Lɔnlɔn Kɔnuwoɔ?
Yehowa Kunuɖetɔwo donɔ bubu acɛkpakpawo, jukɔn lɔ jeshidonuwo koɖo yi kɔnuwo nu. Nɔ amɛwo sɔ gbeta mɔ yewoata nu asɔ ɖo gbe nɔ jukɔn lɔ, yewoado gbe nɔ drapo, yewoaji jukɔn lɔ ha alo yewoaɖu ablɔɖexwe nɔ jukɔn lɔɔ, mìdegbenɔ nɔ wo o.
Ele ahan gan, Yehowa Kunuɖetɔwo sɔ gbeta mɔ yewodawa kɔnu hunnɔ hanciwo o, ɖo mìxɔɛ ji se mɔ wotrɔkpe Bibla nukplakplawo. Éjɔnɔ ji nɔ mì nɔ amɛwo do bubu mìwo jixɔsewo nu shigbe lé mìdonɔ bubu wowotɔwo nu nɛ.
Le nyɔta cɛ mɛ
Bibla gɔnmɛɖose ciwo yí kuso enyɔ cɛ nuɔ?
Bibla gɔnmɛɖose vevi amɛve ciwo yí gbɔgbɔ yí dɔ mìsɔ gbeta ahan:
Mawu ɖekɛ kpaŋ yí mìɖo asɛn. Bibla nu mɔ: “Sɛn Tɔhonɔ ao Mawu yí a sumɔ Yi ɖekɛ kpaŋ!” (Luiki 4:8) Blaŋblaŋ ɔ, hwenu woata nu asɔ ɖo gbe nɔ jukɔn lɔ, alo aji jukɔn lɔ haɔ,wozannɔ nyɔgbe ciwo yí dasɛ mɔ jumɛvi ɖo alɔn jukɔn lɔ wu nubuɖekpokpui. Eyi taɖo Yehowa Kunuɖetɔwo kpɔɛ mɔ yɛdenyɔ mɔ yewoawa kɔnu hunnɔ hanciwo o.
Yehowa Kunuɖetɔwo gbekpɔɛ mɔ egbedodo nɔ drapo nyi sɛnsɛn nu ɖeka alo vojusɛnsɛn ci yí Bibla gbe mɔ yewodawa o. (1 Korɛntitɔwo 10:14) Exolɔtɔ ɖewo lɔn do ji mɔ jukɔnwo drapo nyi sɛnsɛn jeshidunuwo. Exolɔtɔ Carlton J.H. Hayes nu mɔ: “Eju lɔnlɔn nyi sɛnsɛn yí yi jeshidunu vevi ɖeka yí nyi drapo.”a Wemaŋwlɛtɔ Daniel P. Mannix nu so Kristotɔ ŋkɔtɔwo nu mɔ: “Kristotɔwo gbe mɔ. . . yewodasa avɔn nɔ agɛ ci amɛwo mɔ yɛglɔnnɔ ta nɔ Rɔma fyɔ o. Egbɛɔ, ecɛ jikɔ asɔ koɖo gbegbe mɔ wodado gbe nɔ drapo o.”b
Ci mìwo Yehowa Kunuɖetɔwo dedonɔ gbe nɔ drapo can ɔ, mìdedana hɛn yi alo tɔnɔ zo yi o. Gbesɔ kpe niɔ, mìdewanɔ habamɛnu ɖe do drapo, eju lɔ jeshiduwo koɖo yi kɔnu buwo nu o.
Le Mawu gbɔɔ, agbetɔwo pleŋ nyi enu kuɖeka ŋmɛ. (Edɔwawawo 10:34, 35) Bibla nu mɔ Mawu to ‘ŋsu kuɖeka ji yí wa jukɔnwo pleŋ.’ (Edɔwawawo 17:26) Susu cɛ yí taɖo, Yehowa Kunuɖetɔwo kpɔɛ mɔ enu dɔndɔn anyi, nɔ yewowa nu ɖaɖa egbe ɖe tɔwo alo jukɔn ɖe mɛ tɔwo gbɔ shigbe mɔ wonyɔ wu ebuwo nɛ. Mìbunɔ amɛshiamɛ, nɔ woso fiɖekpokpui alo wole eju ɖekpokpui mɛ can.—1 Piɛ 2:17.
Vɔ nɔ wodo se mɔ dandandan yí mìɖo awɛ ɖe
Yehowa Kunuɖetɔwo defɔnnɔ gu do acɛkpakpawo ji o. Mixɔɛ ji se mɔ acɛkpakpawo “xɔ hlɔnhlɔn so Mawu gbɔ” yí eɖe mɔ nɔ wo yí woli. (Rɔmatɔwo 13:1-7) Mìgbexɔɛ ji se mɔ Kristotɔwo ɖo ase tonu nɔ acɛkpakpawo.—Luiki 20:25.
Vɔ nɔ acɛkpakpawo sewo trɔkpe Mawu sewo ɖe? Le nɔnɔmɛ ɖewo mɛɔ, woatɛnŋ abiɔ gbe acɛkpakpawo nɔ woatrɔ ashi so ese lɔwo nu.c Vɔ nɔ ɖewaxu deliɔ, Yehowa Kunuɖetɔwo sɔnɔ gbeta yí ‘nanɔ shishi Mawu wu agbetɔ cɛkpakpawo.’—Edɔwawawo 5:29.
Yehowa Kunuɖetɔwo tenɔkpɔ mɔ yewoado nu egufɔnfɔn gbɛbɔbɔ ɖe alo politikinyɔwo mɛa?
Oo. Yehowa Kunuɖetɔwo detenɔkpɔ mɔ yewoado nu egufɔnfɔn gbɛbɔbɔ ɖe alo politikinyɔwo mɛ o. Mìdeta nu yí sɔnɔ ɖo gbe nɔ jukɔn lɔ, donɔ gbe nɔ drapo, jinɔ jukɔn lɔ ha alo ɖunɔ ablɔɖexwe nɔ jukɔn lɔ o. Vɔ ecɛ dedasɛ mɔ mìnyi politikiwatɔ egufɔntɔwo o. Ewaɖeɔ, mìzɔnnɔ do mìwo jixɔse ciwo yí kudo kɔnu hunnɔwo nu ji.