LÉ WOZAN EDRO NUNANA AO TƆWO DO
Dakavi hwɛhwɛ ɖeka ci yí nakɔ gbɔngbɔnmɛŋɖuɖu amɛwo
1er SEPTEMBRE 2020
Yehowa Kunuɖetɔwo xɔkɔ gbɔngbɔnmɛŋɖuɖu to ka ji egbɛ sɔwu sa. Vɔ le afi sugbɔ nɔ xexe lɔɔ, eho dele mìwo nɔviwo shi woaxwle kɔnnɛshiɔn ayi ɛntɛnɛti ji o. Le fibuwoɔ, wosonɔ kɔnnɛshiɔn blaŋblaŋ, abi kɔnnɛshiɔn lɔ desɛnnɔŋ o alo denini ɖeeɖe o.
Ele ahan gan, mìwo nɔviŋsu koɖo nɔvinyɔnu sugbɔtɔ atɛnŋ awa kɔpi nɔ wemawo koɖo videowo yɛ le ɛntɛnɛti ji kɔnnɛshiɔn mazan! Lé ewɛ yí nyi ahan ɔ?
JW dakavi ci wona hamɛ ciwo yí le fini kɔnnɛshiɔn kpɔkpɔ gbɔnnɔnu le alo finiwo yí dele taŋtaŋ o yí dɔ enyi ahan. Le dakavi lɔ mɛɔ, àkpɔ ŋci yí dɔ wotɛnŋ yinɔ ɛntɛnɛti ji (routeur) ci woxwle koɖo edɔwanu ɖeka ci Betɛli dɔwaxu ci yí kpɔnɔ ɔdinatɛɛ nyɔwo gbɔ wa le mɛ; àgbekpɔ wema koɖo video ciwo yí le jw.org ji can le mɛ. Nɔ woaxwle dakavi lɔ ɖekaɔ, woakpɔ 40 000 fcfa han.
Le Fyɔɖuxuxɔ mɛɔ, nɔviŋsu koɖo nɔvinyɔnuwo atɛnŋ asɔ wowo telefonu alo tablɛti ca nɔ JW dakavi lɔ kɔnnɛshiɔn keŋ awa kɔpi nɔ wema koɖo video ciwo yí le mɛ. Mɛ ciwo yí ɖo telefonu xoxwiwo alo ciwo yí denyi hogan tɔ can atɛnŋ aca ka koɖi. Vɔ lé enu yoyuwo wɛ yí vanɔ JW dakavi lɔ mɛ nɔ hamɛ ciwo yí deɖo ɛntɛnɛti ɖeeɖeɔ? Alɔjedɔwaxuwo xɔnɔ enu yoyu ciwo yí le jw.org ji do clés USB-wo ji yí sɔnɔ wo ɖaɖa hamɛwo blaŋblaŋ. Clés USB ɖeka ho ayi 2 000 fcfa han. Nɔ clé lɔ vaɖoɔ, wosɔnɔ enu yoyu lɔwo le ji yí sɔ wo donɔ JW dakavi lɔ mɛ.
Lé JW dakavi lɔ kpekpeɛdo mìwo nɔviwo nu doɔ? Nathan Adruandra, ci yí nyi vida le République démocratique du Congo nu mɔ: “Ejinjin yɛ yí ŋle gbla ji keŋ awa kɔpi nɔ video ciwo yí nyi ‘Oo Yehowa, . . . Ŋuwòe Meɖo Ŋu Ðo’ koɖo Miɖo Ŋku Lot Srɔ̃ Dzi. Vɔ ŋdesun ji yí wanɔ kɔpi nɔ wo gbeɖe o yí ŋdan ta nɔ nyɛɖeki. Ecɛyɛɔ, natɛnŋ awa kɔpi nɔ video cɛwo do anyi tablɛti ji. Ecɛ kpekpeɛdo mì nu yí mìtɛnŋ kplanɔ nu mìwo viwo nywiɖe.”
Nɔviŋsu ɖeka ci yí kpenɔdo hamɛwo nu le Nigéria nɔ JW dakavi lɔ nu mɔ: “Nɔviwo kpɔnɔ JW dakavi lɔ mɔ, yɛnyi enuvevi ɖeka ci Yehowa na yewo. Eji jɔkɔ wo sugbɔ mɔ, yewoatɛnŋ awa kɔpi nɔ wemawo koɖo videowo fafɛɖe yɛ le Enukplakpla dɔwanu dakavi lɔ mɛ.”
JW dakavi 1 700 nu le ji yí wosɔ ɖaɖa mìwo nɔviwo le Afrique, Océanie, koɖo Amérique du Sud. Wowa toto mɔ woagbesɔ buwo ɖaɖa hamɛ buwo. Fini wokpɔ eho le yí sɔ wawa ŋcɛwo pleŋ ɔ? Eho ci amɛwo nanɔ mɔ woasɔ kpedo xexeɛ pleŋ mɛ dɔ lɔ nu yɔ. Amɛ sugbɔ nini to donate.jw.org ji. Akpe nɔ xomɛvu nunana míwo tɔwo pleŋ.