“Mí Ðu Míwoɖekiwo Ji, A Nɔ̀ Zanŋte”

1. Enyɔ ci yí Yesu nu nɔ yi nukplaviwo so “xexemɛ lɔ vɔvɔɛnu” nuɔ, yí amɛkanxlenyɔ ci ena woɔ?

AZAN kankin ɖewo doŋkɔ nɔ Yesu kuɔ, yi nukplavi amɛnɛ ɖekawo biɛ se mɔ: “Nyi yí a va nyi jeshidu nɔ . . . xexemɛ lɔ vɔvɔɛnu ɔ?” (Mt. 24:3) Taŋfuin yi nukplavi lɔwo jijiɛ anya hwenu yí woagban Ʒerusalɛmu koɖo gbedoxɔ lɔ si. Denyi Ʒerusalɛmu koɖo gbedoxɔ lɔ gugu ɖekɛ nu yí Yesu xo nuxu so nɔ wo o, vɔ égbexo nuxu so “xexemɛ lɔ vɔvɔɛnu” ci mɛ mìle yɛ nu. Ci Yesu xokɔ nuxu so hwenu yí vɔvɔnu lɔ ava nuɔ, énu mɔ: “Amɛ ɖe de nya hwecinu ŋkeke hunnɔ alo ega xoxo hunnɔ a va o. Amɛagbetɔ Vi koɖo Mawu dɔdɔlawo de nya ega xoxo hunnɔ lɔ o.” Yi goduɔ, énu nɔ yi dokplɔtɔwo mɔ, wo le kpɔ ‘wowoɖekiwo ji yí ale glagla ji.’—Maki 13:32-37.

2. Nyi yí taɖo exwe sanŋdi ŋkɔtɔ mɛ Kristotɔwo ɖo anɔ zanŋteɔ?

² Exwe sanŋdi ŋkɔtɔ mɛ Kristotɔ Ʒuifuwo ɖo akpɔtɔ anɔ zanŋte keŋ atɛnŋ aci agbe. Yesu nu enu ci yí yi dokplɔtɔwo akpɔ yí anya mɔ wojikɔ agu Ʒerusalɛmu ju lɔ. Énu mɔ: “Gayimɛ mí a kpɔ mɔ ahwawaviwo trɔdo Ʒeruzalɛmu ɔ, mí a nya mɔ trɔntrɔn yitɔ gogo.” Eyi nɔ wokpɔɛ ahan ɔ, woɖo awa do Yesu nyɔwo ji yí “a shi yì etowo ji.” (Luiki 21:20, 21) Amɛ ciwo yí wa do amɛkanxlenyɔ cɛ ji, ci agbe hwenu Rɔmatɔwo vagu Ʒerusalɛmu.

3. Nyi yí mìakpɔ le nyɔta cɛ mɛɔ?

³ Egbɛɔ, mìle agbe le ŋkeke lɔwo vɔvɔnu. Eyi taɖo mìwo can mìɖo akpɔ mìwoɖekiwo ji yí akpɔtɔ anɔ zanŋte. Le nyɔta cɛ mɛɔ, mìaxo nuxu so lé mìawɛ aɖo susu sɔgbe nɔ mìkpɔkpɔ xexeɛ mɛ nujɔjɔwo, lé mìawɛ anɔ zanŋte do mìwoɖekiwo nu koɖo lé mìazan gaxoxo ci yí kpɔtɔ lɔ do nywiɖe.

ÐO SUSU SƆGBE NƆ ÈKPƆKPƆ XEXEƐ MƐ NUJƆJƆWO

4. Nyi yí taɖo mìjinɔ mɔ, mìakpɔ lé enu ciwo yí jɔjɔ le xexeɛ mɛ na yí enyɔnuɖɛwo vavamɛ doɔ?

⁴ Esɔgbe ci mìjinɔ mɔ mìanya lé Bibla mɛ nyɔnuɖɛwo vavamɛ le xexeɛ mɛ do. Le kpɔwɛ mɛ, Yesu yɔ enu ɖewo ciwo yí ajɔjɔ yí mìakpɔ anya mɔ Satana xexe cɛ va vɔvɔnu. (Mt. 24:3-14) Apotru Piɛ do ŋsɛn mì mɔ, mìwo le nɔ zanŋte keŋ akpɔ lé nyɔnuɖɛwo vavamɛ do yí akpɔtɔ asɛnŋ le xɔse mɛ. (2 Piɛ 1:19-21) Wotɔ Bibla wema kpɛtɛtɔ lɔ ji koɖo enyɔ cɛwo: “Avimɛnu Yesutɔwo ke. Mawu na enu hunnɔwo Yesu nɔ a dasɛ enu ci yí ɖo a ava jɔ kakayɛ nɔ Yi dɔkplaviwo.” (Enyɔ. 1:1) Eyi taɖo mìjinɔ veviɖe mɔ mìanya lé enu lɔwo jɔjɔ do le xexeɛ mɛ kakayɛ keŋ anya lé Bibla mɛ nyɔnuɖɛwo vakɔmɛ do. Eyi kpakpa tɛnŋ sɔ mì, mìakan seŋ so enujɔjɔ ŋtɔ́wo nu le mìwonɔnɔwo mɛ.

5. Nyi mìdeɖo awanɔɔ, vɔ nyi mìɖo awaɔ? (Kpɔ foto lɔ hɛnnɛ.)

⁵ Nɔ mìxoxoɔ nuxu so Bibla mɛ nyɔnuɖɛwo nuɔ, mìɖo anya wawa, nɔ mìŋgbevatɔ nunu mɔ ahan-ahan yí enu lɔwo ayi do ke o. Nyi yí taɖoɔ? Ðo mìdeji mɔ, mìanu nyɔ ɖe ci yí avama hamɛ lɔ mɛ o. Le kpɔwɛ mɛ, mìtɛnŋ se yí ejukplɔtɔ ɖewo anunuɔ enu ciwo yí woji mɔ yewoawa yí aɖo te ahwa wawa le eju ɖe mɛ, nɔ fafa koɖo vofamɛnɔnɔ ani. Nɔ mìkpɔɛ ahan ɔ, mìdatɔ nunu mɔ enyɔnuɖɛ ci yí le 1 Tɛsalonikitɔwo 5:3 mɛ yí vavamɛ ahan o, vɔ enumɛɖeɖe godugodutɔ ci yí le mìwo wemawo mɛ ji yí mìasɛnnɔ. Nɔ mìnunɔ enyɔ lɔwo yí wosɔnɔgbe koɖo wema ciwo yí Yehowa habɔbɔ lɔ waɔ, anyi mìkpekpeɛdo hamɛ lɔ nu nɔ akpɔtɔ aɖo “susu ɖeɖe koɖo tamɛbukpɔ ɖekaŋmɛ.”—1 Kor. 1:10; 4:6.

6. Nyi mìatɛnŋ akpla so 2 Piɛ 3:11-13 mɛɔ?

⁶ Hlɛn 2 Piɛ 3:11-13. Apotru Piɛ kpedo mì nu nɔ mìawanɔ nu le dredrenu nɔ mìxokɔ nuxu so Bibla mɛ nyɔnuɖɛwo nu. Édo ŋsɛn mì mɔ, mìwo le ɖonɔ “ŋkuvi ŋkeke Mawutɔ.” Nyi yí taɖoɔ? Denyi kpɔ mɔ mìanya “ŋkeke alo ega xoxo” ci ji Yehowa ahɛn Harmagedɔn va yɔ o, vɔ mìji mɔ mìazan gamɛ ci yí kpɔtɔ yí anɔ “kɔkwɛ ɖe yí a nyi Mawu mɛwo.” (Mt. 24:36; Luiki 12:40) Alo nɔ mìatrɔ anuiɔ, mìji mɔ mìakpɔtɔ anɔ agbenywi yí atekpɔ akpɔ mɔ agbla ciwo mìjejeɛ le Yehowa sɛnsɛn mɛ dasɛ mɔ mìɖo lɔnlɔn gangan ni ma. Gbɔxwe atɛnŋ anyi ahan ɔ, ele mɔ mìanɔ zanŋte do mìwoɖekiwo nu.

WOAKPƆ AMƐÐEKI JI GƆNMƐ ÐE?

7. Lé mìatɛnŋ adasɛ do mɔ mìle zanŋte do mìwoɖekiwo nuɔ? (Luiki 21:34)

⁷ Yesu nu nɔ yi dokplɔtɔwo mɔ wo le nɔ zanŋte do xexemɛ nujɔjɔwo nu yí agbenɔnɔ zanŋte do wowoɖekiwo nu. Enyɔ cɛ ze le amɛkanxlenyɔ ci enu nɔ wo le Luiki 21:34 mɛ. (Hlin.) Do jeshi enyɔ ci Yesu nu: “Mí nɔ̀ zanŋte do míwoɖekiwo nu nywiɖe.” Amɛ ci yí nɔnɔ zanŋte donɔ jeshi afɔku ciwo yí ana yí exlɔnyinyi ci yí le yi koɖo Yehowa gblamɛ adahɛn keŋ zenɔ nɔ wo. Ecɛ wawa na yí ekpɔtɔ nɔnɔ Mawu lɔnlɔn lɔ mɛ.—Elo. 22:3; Ʒuda 20, 21.

8. Enyɔ ci apotru Pɔlu nu nɔ Kristotɔwoɔ?

⁸ Apotru Pɔlu nu nɔ Kristotɔwo mɔ, wo le nɔ zanŋte do wowoɖekiwo nu. Le kpɔwɛ mɛ, énu nɔ Kristotɔ ciwo yí le Efezi mɔ: “Mí ŋgbe zɔnnɔ shigbe amɛ ma soŋkewo ɛnɛ o. Vɔ, mí zɔnnɔ shigbe amɛ nya ŋunuwo ɛnɛ.” (Efe. 5:15, 16) Satana jijiɛ gashiagamɛ mɔ yeadahɛn exlɔnyinyi ci yí le mìwo koɖo Yehowa gblamɛ, eyi taɖo Bibla kpla nu mì mɔ mìwo le tekpɔ anya lé “Axwetɔ dro do mɔ” mìwo le zan mìwoɖekiwo do. Ecɛ awɛ mɔ mìaze nɔ amɛjijeje Satana tɔwo.—Efe. 5:17.

9. Lé mìawɛ anya Yehowa droɔ?

⁹ Bibla denu afɔku ciwo pleŋ yí atɛnŋ adahɛn exlɔnyinyi ci yí le mìwo koɖo Yehowa gblamɛ o. Mìtɛnŋ sɔnɔ gbeta ɖewo, vɔ yí Bibla dexo nuxu so wo nu tiin o. Vɔ gbɔxwe mìatɛnŋ awa cancan nywiɔ, mìɖo amɔŋje ‘Yehowa susu’ mɛ nywiɖe. Mìasun ji awa cɛ nɔ mìkplanɔ Mawu Nyɔ lɔ blaŋblaŋ yí bunɔ tamɛ kpɔ so nu. Nɔ mìtekpɔ yí ɖonɔ Yehowa susu do enuwo nu yí “Kristo susu” le mì shiɔ, mìatɛnŋ awanɔ nu shigbe “nunyatɔwo” nɛ, nɔ wodenu enu ci mìawa nɔ mì tiin le ŋɖe mɛ can. (1 Kor. 2:14-16) Hweɖewonuɔ, enɔnɔ fafɛɖe mɔ mìado jeshi afɔku ciwo mìaze nɔ, vɔ ɖewo gbɔnnɔnu.

10. Afɔkunu ciwo mìɖo aze nɔɔ?

¹⁰ Afɔku ciwo mìɖo aze nɔ ɖewo yí nyi ŋkuvi ɖoɖo nɔ amɛ, ahamuamɛ sugbɔ nunu, sukanuɖuɖu, enyɔveamɛwo nunu, ayeɖedaɖɛnu ciwo mɛ tamɛsɛnnuwawawo le kpɔkpɔ, mamaɖeɖenuwo kpɔkpɔ koɖo enu nɛnɛhantɔ buwo. (Eha. 101:3) Mìwo ketɔnɔ Legba le agbla ji gashiagamɛ yí jijiɛ enu ciwo azan keŋ adahɛn exlɔnyinyi ci yí le mìwo koɖo Yehowa gblamɛ. (1 Piɛ 5:8) Nɔ mìdele zanŋteɔ, Satana ana yí mìwo susu koɖo mìwo ji aɖɔ koɖo ŋɔku, amɛbleble, egoyiyi, ŋbia, amɛxaxa koɖo amɛleledodɔmɛ. (Gal. 5:19-21) Kaka lɔɔ, mìdakpɔ mɔ enu cɛwo nyi afɔku o. Vɔ nɔ mìdeɖe afɔ kaba yí ɖe adɛn dɔndɔn ŋtɔ́wo so mì mɛɔ, woado ke do mì mɛ shigbe aci vwin nɛ yí akplɔ mì do afɔku mɛ.—Ʒaki 1:14, 15.

11. Afɔku ci wodenyanɔ kaka ci mìɖo aze nɔɔ, yí nyi yí taɖoɔ?

¹¹ Afɔku ci wodenyanɔ kaka ci mìɖo aze nɔ yí nyi ehadodo vwinwo. Sɔɛ mɔ, èwakɔ dɔ koɖo mɛ ɖeka ci yí denyi Yehowa Kunuɖetɔ o. Èji mɔ ao dɔmɛkpena cɛ le ɖo susu nywi do Yehowa Kunuɖetɔwo nu, eyi taɖo èwanɔ xomɛvu yí gbekpenɔdo amɛwo nu. Ètɛnŋ lɔn faa yí aɖu nu koɖo ao dɔmɛkpena lɔ yí le yiyimɛɔ, ètɛnŋ vatɔ enu ɖuɖu koɖi blaŋblaŋ. Hweɖewonuɔ, nɔ míle seŋ kankɔɔ, étɛnŋ nunɔ laganyɔwo yí dejɔnɔ ji nɔ eo kaka lɔ o. Vɔ viviviɔ, nɛnɛ nyɔwo vatɔ mama du yí degbeɖenɔ fun nɔ eo o. Eyi gbeɖeka vasun yí ao dɔmɛkpena lɔ nu nɔ eo mɔ, nɔ yewokpa le dɔmɛɔ, eɔ le va nɔ yewoayi nu aha, yí èlɔn. Eyi le yiyimɛɔ, èvatɔ enuwo kpɔkpɔ shigbe yɛ nɛ. Nɔ evaci ahan ɖe, ajinjin gbɔxwe àvatɔ enu wawa shigbe yɛ nɛa? Nyɔnɔnwi enyi mɔ, mìwanɔ xomɛvu yí bunɔ mɛshiamɛ, vɔ mìɖo aɖo ŋwi mɔ, mɛ ciwo mìzannɔ gamɛ koɖo, nuwanawo tɛnŋ vatɔ ŋsɛn kpɔkpɔ do mì ji. (1 Kor. 15:33) Nɔ mìkpɔnɔ mìwoɖekiwo ji shigbe lé Yesu nui nɔ mì nɛɔ, mìagbe eha ɖekatɔ ciwo yí ana mìami wawa do Yehowa sewo ji dodo. (2 Kor. 6:15) Mìakpɔ afɔku lɔ doŋkɔ yí aze ni.

ZAN AO GAMƐ NYWIÐE

12. Nyi Yesu nukplaviwo awakɔ keŋ asɔ le te kpɔ xexe lɔ vɔvɔnuɔ?

¹² Yesu demɔ ye dokplɔtɔwo apo alɔ do atamɛ yí asɔ le tekpɔ xexe lɔ vɔvɔnu o. Éɖo edɔ ɖeka nɔ wo mɔ wo le wa. Édɔ wo mɔ, wo le dra eŋɛnywi lɔ le “Ʒeruzalɛmu, [yí] a nui nɔ amɛwo pleŋ le Ʒude kanmɛ, Samari kanmɛ koɖo afishafi le xexemɛ.” (Edɔ. 1:6-8) Edɔ gangan ŋtɔteŋ yí le wo ji! Nɔ wosɔ wowoɖekiwo na yí wakɔ ci ji wosun keŋ dradra eŋɛnywi lɔɔ, anyi wozanzan wowo gamɛ nywiɖe.

13. Nyi yí taɖo mìɖo azannɔ mìwo gamɛ nywiɖeɔ? (Kolosetɔwo 4:5)

¹³ Hlɛn Kolosetɔwo 4:5. Gbɔxwe mìatɛnŋ akpɔ mìwoɖekiwo ji nywiɖeɔ, ele mɔ mìanya lé mìzannɔ mìwo gamɛ do. “Enujɔjɔ maɖoŋdonuwo” atɛnŋ ava mɛɖekpokpui ji le mì mɛ. (Ŋun. 9:11, NWT) Mìtɛnŋ vaku le avomɛ.

14-15. Lé mìatɛnŋ azan mìwo gamɛ do nywiɖeɔ? (Ebretɔwo 6:11, 12) (Kpɔ foto lɔ hɛnnɛ.)

¹⁴ Mìazan mìwo gamɛ nywiɖe asɔ wa Yehowa dro yí agbena nɔ exlɔnyinyi ci yí le mìwo koɖo Yehowa gblamɛ asɛnŋ doji. (Ʒan 14:21) Mìɖo anɔ te “sɛnŋsɛnŋɖe le afɔdumɛ. . . . [yí] a yì ŋkɔ doji tɛgbɛɛ le Mawu dɔwawawo mɛ.” (1 Kor. 15:58) Eyi nɔ mìku alo nɔ vɔvɔnu lɔ vaɖo le hweɖekpokpuinu can ɔ, dave nɔ mì mɔ mìdezan gamɛ nywiɖe yí sɔ wa Yehowa dro o.—Mt. 24:13; Rɔm. 14:8.

¹⁵ Egbɛɔ, Yesu kpɔtɔ kplɔkplɔ yi nukplaviwo le Fyɔɖuxu ŋɛnywidradradɔ lɔ mɛ le nyigban lɔ pleŋ ji. Éwa do egbe ci eɖo ji. Yesu totoɔ Yehowa habɔbɔ lɔ ji yí kplakɔ mì lé mìaɖe kunu do yí gbenakɔ edɔwanu ciwo mìʒan asɔ dra eŋɛnywi lɔ. (Mt. 28:18-20) Nɔ mìje agbla yí wakɔ kunuɖeɖe koɖo enukplaviwowawadɔ lɔ yí gbele zanŋte yí le te kpɔ hwenu Yehowa ahɛn xexe vwin cɛ va vɔvɔnuɔ, anyi mìwakɔ enu ci Yesu kpɔkɔ emɔ mɔ mìawa. Nɔ mìwa do enukplamu ci yí le Ebretɔwo 6:11, 12 mɛ jiɔ, ana yí mìwo mɔkpɔkpɔ lɔ asɛnŋ ‘keke ayi vɔvɔnu.’—Hlin.

16. Nyi mìaɖui mɔ mìawaɔ?

¹⁶ Yehowa ɖo ŋkeke koɖo gamɛ ci ji agu Satana xexe cɛ ɖɛ. Nɔ azan lɔ sun ɔ, Yehowa awa do egbe ciwo pleŋ eɖo le yi Nyɔ lɔ mɛ ji. Etɛnŋ wa nɔ mì hweɖewonu mɔ, xexe lɔ vɔvɔnu devava blaŋ o, vɔ Yehowa ŋkeke lɔ “da ji gamɛ o!” (Xab. 2:3) Eyi taɖo mína mìaɖui mɔ, “mìakpɔkɔ emɔ nɔ Yehowa” yí “anɔ te kpɔ Mawu [mìwo] hwlɛngantɔ.”—Mis. 7:7, NWT.