Ano ro Mabulig it Laybrari sa Kingdom Hall?

Gusto mo baea mag-research agud madugangan ro imong kaaeam sa Biblia? Ag may gusto ka nga masayran sa mga teksto, karakter, lugar, o mga nabasahan sa Biblia? Gaisip ka baea kon paano makabulig ro Bisaea it Dyos sa imong personal nga problema? Pwede ka makabisita sa laybrari it Kingdom Hall.

May una ra bulig sa pag-research. Siguro owa ka gid it kompleto nga mga publikasyon nga nabase sa Biblia it mga Saksi ni Jehova sa imo nga linggwahe. Pero ro laybrari it Kingdom Hall hay may una bag-o nga mga publikasyon. May una man ra eain-eain nga bersyon it Biblia, diksyunaryo, ag iba pa nga reperensya nga makabulig kimo. Pwede mo gamiton ro laybrari bago ag pagkatapos it mga miting. Kon may una kompyuter, sigurado gid nga may una ruyon nga Watchtower Library. Raya nga program hay may sueod nga mga koleksyon it amon mga publikasyon nga magamit mo sa pag-research it mga impormasyon sa mga tupiko, tinaga, ag mga teksto.

Makabulig raya sa mga estudyante para sa Miting it Pagkabuhi ag Pagministeryo. Pwede mo man magamit ro Laybrari kon nagatuon ka sa imo nga bahin. Ro nagatatap it Miting sa Pagkabuhi ag Pagministeryo hay ginasaligan nga imaw ro mag-ayos it laybrari. Ginasigurado na gid nga may una ra bag-o nga mga publikasyon. Pwede ka nana mabuligan o ro nagaturo kimo it Biblia sa pag-research it mga impormasyon. Pero indi ra pwede iguwa sa Kingdom Hall. Syempre, dapat gid dahanan ro mga libro ag indi pagkulisan.

Ginhambae it Biblia nga makita ro “ihibaeo it Dyos,” dapat nga handa ka mag-usoy kara kapareho it “natago nga manggad.” (Hulubaton 2:1-5) Makabulig kimo ro laybrari it Kingdom Hall sa pag-research.

• Ano nga bulig sa pag-research ro una sa laybrari it Kingdom Hall?

• Sin-o ro makabulig kimo sa paggamit it laybrari?