Simbaha Ro Dyos

1, 2. Ano ro ikutana mo sa imong sarili, ag ham-an importante ra?

PAAGI sa pagtuon it Biblia, natun-an mo nga abung tawo ro nagaaku nga ginasimba ro Dyos, pero ginaturo o ginaobra nanda ro owa nailai nana. (2 Corinto 6:17) Ngani nagsugo si Jehova katon nga magguwa sa buko’t matuod nga relihiyon, “Bantug nga Babilonia.” (Pahayag 18:2, 4) Ano ing obrahon? Tanan kita makadesisyon, ag kutan-on ro atong sarili, ‘Ginasimba ko baea ro Dyos sa paagi nga nailaan na, o simbahon ko imaw sa paagi nga naanaran ko?’

² Kon gin-aywanan mo eon ro buko’t matuod nga relihiyon, tama ron. Pero sa minatuod, may mga ueobrahon o kustombre ro buko’t matuod nga relihiyon nga nailaan mo gihapon. Tun-an naton ro mga ueobrahon ag kustombre, ag kon ham-an importante ro atong pagtan-aw kara pareho sa pagtan-aw it Dyos.

PAGSIMBA SA IMAHEN AG KATIGUEANGAN

3. (a) Ham-an malisud sa iba nga indi maggamit it imahen kon nagasimba? (b) Ano ro ginahambae it Biblia sa paggamit it imahen sa pagsimba sa Dyos?

³ Dinag-on eon nga nagagamit ro ibang tawo it imahen ag altar sa andang baeay sa pagsimba sa Dyos. Kon may imo kara, basi mangawa ka o magbatyag nga saea ro imong pagsimba sa Dyos kon owa ra. Pero tandai, ginatur-an kita ni Jehova kon paano imaw simbahon. Ag ginasugid it Biblia nga owa imaw naila nga maggamit kita it mga imahen sa pagsimba.​—Basaha ro Exodo 20:4, 5; Salmo 115:4-8; Isaias 42:8; 1 Juan 5:21.

4. (a) Ham-an indi dapat simbahon ro atong mga katigueangan? (b) Ham-an naghambae si Jehova nga indi mag-istorya ro anang mga alagad sa mga patay?

⁴ May ibang tawo nga nagatao it abu nga oras ag kusog agud padunggan ro mga namatay nga katigueangan. Anda pa ra nga ginasimba. Pero natun-an naton nga ro mga namatay indi eon makabulig o makapanakit katon. Owa eon nagakabuhi kon siin. Ngani, delikado gid kon testingan nga mag-istorya kanda tungod ano man nga mensahi ro mabaton naton sa namatay nga pamilya naghalin sa mga demonyo. Ngani nagsugo si Jehova sa mga Israelita nga indi mag-istorya sa patay o mag-intra sa ano man nga klasi it demonismo.​—Deuteronomio 18:10-12; tan-awa ro Endnote 26 ag 31.

5. Ano ro makabulig kimo nga indi eon maggamit it mga imahen sa pagsimba sa Dyos o magsimba sa imong katigueangan?

⁵ Ano ro makabulig kimo nga indi eon maggamit it mga imahen sa pagsimba sa Dyos o magsimba sa imong katigueangan? Dapat mo basahon ro Biblia ag isipon kon ano ro pagtan-aw ni Jehova kara. Raya hay anang “ginakangil-aran” o ginakaugtan. (Deuteronomio 27:15) Mangamuyo kay Jehova kada adlaw nga buligan ka nga tuearon ro anang pagtan-aw sa mga bagay ag masimba imaw sa paagi nga nailaan na. (Isaias 55:9) Masigurado mo gid nga taw-an ka ni Jehova it kusog nga kinahang-ean mo agud maduea ro ano man nga may eabot sa buko’t matuod nga pagsimba.

DAPAT BAEA KITA MAGSELEBRAR IT KRISMAS?

6. Ham-an Disyembre 25 ro ginpili nga adlaw sa pagselebrar it pagkatawo ni Jesus?

⁶ Sa bilog nga kalibutan, isaea ro Krismas sa pinakakilaea nga holiday, ag eaban nga tawo nagaisip nga raya ro selebrasyon it pagkatawo ni Jesus. Pero may eabot ro Krismas sa buko’t matuod nga pagsimba. Ro sang ka encyclopedia nagasugid nga kada Disyembre 25, ginaselebrar it mga pagano sa Roma ro kaadlawan ku adlaw. Gusto ku mga lider it simbahan nga ro mga pagano mangin Cristyano, ngani maskin owa natawo si Jesus it Disyembre 25, ginselebrar nanda ro pagkatawo ni Jesus sa ruyong adlaw. (Lucas 2:8-12) Ro mga disipulo ni Jesus owa nagselebrar it Krismas. Ro sang ka libro naghambae nga sa sueod it 200 ka dag-on pagkatapos natawo si Jesus, “owa it nakasayod, ag sangkiri eang ro interesado kon kan-o gid imaw natawo.” (Sacred Origins of Profound Things) Nag-umpisa rayang selebrasyon ginatos ka dag-on pagkatapos nagkabuhi si Jesus iya sa eugta.

7. Ham-an owa nagaselebrar it Krismas ro matuod nga mga Cristyano?

⁷ Abung tawo ro nakasayod nga ro Krismas o mga tradisyon, kapareho it pagsinadya ag pagtao it regalo naghalin sa mga pagano. Halimbawa, sa England ag sa ibang lugar sa Amerika may panahon nga ginbawaean ro pagselebrar it Krismas. Ginapinahan ro maskin sin-o nga nagaselebrar kara. Pero ku ulihi, ginselebrar it uman ku mga tawo ro Krismas. Ham-an owa nagaselebrar it Krismas ro matuod nga mga Cristyano? Tungod gusto nanda pahamut-an ro Dyos sa tanan nanda nga ginaobra.

DAPAT BAEA KITA MAGSELEBRAR IT BIRTHDAY?

8, 9. Ham-an owa nagaselebrar it birthday ro unang mga Cristyano?

⁸ Sambilog pa sa kilaea nga selebrasyon hay ro birthday. Dapat baea magselebrar it birthday ro mga Cristyano? Ro ginsambit eang nga birthday sa Biblia hay gin-obra it mga owa nagasimba kay Jehova. (Genesis 40:20; Marcos 6:21) Rayang selebrasyon nagapadungog sa buko’t matuod nga mga dyos. Ngani ro unang siglo nga mga Cristyano “nagapati nga maskin anyong birthday ro ginaselebrar ana ra it pagano nga kustombre.”​—The World Book Encyclopedia.

⁹ Kato anay, nagapati ro Romano ag Griego nga may una espiritu ro bag-ong hatawo nga unga ag magaproteksyon ra sa anang bilog nga kabuhi. “Rayang espiritu may misteryoso nga kahilabtanan sa dyos nga may parehong kaadlawan sa tawo nga gin-unga,” hambae it libro nga The Lore of Birthdays.

10. Ham-an indi dapat magselebrar it birthday ro mga Cristyano makaron?

¹⁰ Maisip mo baea nga ginabaton ni Jehova ro mga selebrasyon nga may eabot sa buko’t matuod nga relihiyon? (Isaias 65:11, 12) Owa gid! Ngani owa kita nagaselebrar it mga birthday ag holiday nga may eabot sa buko’t matuod nga relihiyon.

IMPORTANTE GID BAEA RON?

11. Ham-an nagaselebrar it mga holiday ro ibang tawo? Ano dapat ro pinakaimportante kimo?

¹¹ Nakasayod ro ibang tawo nga naghalin ro Krismas ag ro ibang holiday sa pagano, pero padayon gihapon sanda nga nagaselebrar. Para kanda raya ro panahon nga makaibahan ro pamilya. Ruyon man baea ing ginabatyag? Buko’t maeain makaibahan ro imong pamilya. Si Jehova ro nagtukod it pamilya, ag gusto na nga may mayad kita nga relasyon kanda. (Efeso 3:14, 15) Pero, dapat mas eabaw ro atong relasyon kay Jehova kaysa pahamut-an ro mga igbata kon mag-intra sa pagano nga mga selebrasyon. Ngani naghambae si apostol Pablo: “Tinguhaa ninyo nga matun-an kon ano ro nahamut-an ku Ginuo.”​—Efeso 5:10.

12. Ano ro mga holiday nga owa ginabaton ni Jehova?

¹² Abung tawo ro nagabatyag nga buko’t importante kon siin naghalin ro mga holiday, pero iba kay Jehova. Owa na ginabaton ro mga holiday nga halin sa buko’t matuod nga pagsimba o nagapakataas sa mga tawo o mga simbolo it nasyon. Halimbawa, abu nga selebrasyon ro mga taga-Ehipto para sa buko’t matuod nga mga dyos. Pagkatapos maeuwas sa Ehipto, gintuead it mga Israelita ro sambato sa pagano nga selebrasyon ag gintawag “kapyestahan kay Jehova.” Pero ginpinahan sanda ni Jehova sa pag-obra karon. (Exodo 32:2-10) Ginhambae ni propeta Isaias, indi naton dapat “pagbuytan ro maskin ano nga mahigko!”​—Basaha ro Isaias 52:11.

MANGIN MABUOT KON NAGATRATAR SA IBA

13. Ano ing mga pangutana kon owa ka eon gaselebrar it mga holiday?

¹³ Kon magdesisyon ka nga indi eon magselebrar it mga holiday, abu basi ing pangutana. Halimbawa: Ano ro dapat kong obrahon kon kutan-on ako it akong katrabaho kon ham-an owa ako nagaselebrar it Krismas kaibahan nanda? Ano ro dapat nga obrahon kon taw-an ako’t regalo sa Krismas? Ano ro dapat obrahon kon gusto it akong asawa nga magselebrar ako it holiday? Paano ko buligan ro akong mga unga nga indi magkasubo kon owa kami gaselebrar it holiday o birthday?

14, 15. Ano ing obrahon kon may maghambae kimo it happy holiday o taw-an ka it regalo?

¹⁴ Importante nga mag-isip it mayad sa pagdesisyon kon ano ro ihambae ag obrahon sa kada sitwasyon. Halimbawa, kon may naghambae kimo it happy holiday, pwede mo imaw mue-on ag pasaeamatan. Pero kon gusto it iba nga makasayod pa, pwede mo ipaathag kon ham-an owa ka gaselebrar it holiday. Pero pirme mangin mabuot, mayad sa iba, ag matinahuron. Ro Biblia nagahambae: “Ro inyong panghambae kinahang-ean makapahamuot ag mayad-ayad sa gihapon, ag dapat nga kaantiguhan kamo magsabat it nagakaigo sa tanan nga mga tawo.” (Colosas 4:6) Pwede mo hambaeon nga pwede ka makig-imaw sa iba ag makatao it regalo nga owa it eabot sa rayang mga holiday.

¹⁵ Ano ing dapat obrahon kon may magtao kimo it regalo? Owa nagtao ro Biblia it direkta nga mga sugo, pero dapat may malimpyo kita nga konsensya. (1 Timoteo 1:18, 19) Basi owa kasayod ro nagtao kimo it regalo nga owa ka gaselebrar it holiday. O basi hambaeon na, “Sayod ko nga owa ka gaselebrar it holiday, pero gusto ta gihapon regalohan.” Depende kimo kon batunon mo ro regalo o indi. Pero ano man ing desisyon, siguradoha nga may malimpyo ka nga konsensya. Owa kita naila nga ro atong ginaobra may maeain nga epekto sa atong relasyon kay Jehova.

IKAW AG IMONG PAMILYA

16. Ano ing obrahon kon gusto it imong pamilya nga magselebrar it holiday?

¹⁶ Ano ing dapat obrahon kon gusto it imong pamilya nga magselebrar it holiday? Indi ka magbais kanda. Isipa nga may kinamatarung sanda nga magdesisyon sa andang obrahon. Mangin mabuot ag respetuha ro andang ginpili kon gusto mo man nga respetuhon ka nanda. (Basaha ro Mateo 7:12.) Pero kon gusto ku ing pamilya nga makaibahan ka kon holiday, ano ing obrahon? Mangamuyo kay Jehova nga buligan ka nga maobra ro tama nga desisyon. Isipa ro sitwasyon, ag magtuon parti kara. Tandai nga gusto mo pirme pahamut-an si Jehova.

17. Ano ing obrahon kon makita it imong mga unga ro iba nga nagaselebrar it mga holiday?

¹⁷ Ano ing obrahon kon makita it imong mga unga ro iba nga nagaselebrar it mga holiday? Pwede ka mag-obra it mga bagay nga espesyal para kanda. Pwede mo sanda taw-an it regalo. Ro pinakamanami nga regalo nga matao mo kanda hay ro imong oras ag pagpalangga.

OBRAHA RO MATUOD NGA PAGSIMBA

18. Ham-an dapat kita mag-attend sa Cristyanong mga miting?

¹⁸ Agud madayaw si Jehova, dapat aywanan naton ro buko’t matuod nga relihiyon kaibahan ro mga kustombre ag mga holiday nga may eabot kara. Pero dapat naton obrahon ro matuod nga pagsimba. Paano? Ro sang ka paagi hay ro pag-attend sa Cristyanong mga miting. (Basaha ro Hebreo 10:24, 25.) Importante ro mga miting sa matuod nga pagsimba. (Salmo 22:22; 122:1) Kon magtieipon kita mapalig-on ro kada isaea.​—Roma 1:12.

19. Ham-an importante nga isugid sa iba ro imong hatun-an nga kamatuoran sa Biblia?

¹⁹ Ro sang ka paagi it matuod nga pagsimba hay ro pagsugid sa iba it imong hatun-an sa Biblia. Abung tawo ro nagaantus tungod sa maeain nga nagakatabo sa kalibutan. Basi may kilaea ka nga makaron man ro ginabatyag. Sugiri sanda sa manami nga pag-eaum sa paeaabuton. Sa pag-attend mo sa Cristyanong mga miting ag pagsugid sa iba parti sa kamatuoran sa Biblia, mabatyagan mo nga bukon ka eon it kaibahan sa buko’t matuod nga relihiyon ag sa andang mga kustombre. Makasigurado ka gid nga mangin masadya ka ag may mabahoe nga pagpakamaayo kimo si Jehova tungod ginpili mo nga simbahon imaw sa tama nga paagi.​—Malaquias 3:10.