Dapat Baea Ako Magdedikar Sa dyos Ag Magpabautismo?

1. Ano ro maisip mo pagkatapos matun-an rayang libro?

ABU nga kamatuoran sa Biblia ro natun-an mo sa rayang libro, pareho sa promisa it Dyos nga kabuhi nga owa’t katapusan, sitwasyon it mga patay, ag ro pag-eaum nga pagkabanhaw. (Manugwali 9:5; Lucas 23:43; Juan 5:28, 29; Pahayag 21:3, 4) Basi naka-attend ka eon sa miting it mga Saksi ni Jehova ag nagpati nga sanda ro nagaobra it matuod nga pagsimba. (Juan 13:35) Nag-umpisa eon nga mag-eapit ro imong pagpakig-amigo kay Jehova ag gusto mo imaw maalagad. Ngani maisip mo, ‘Ano ang obrahon agud maalagad ro Dyos?’

2. Ham-an gusto it Etiopianhon nga magpabautismo?

² Ruyon man ro naisip it sang ka Etiopianhon sa panahon ni Jesus. Pagkatapos ginbanhaw si Jesus, ro anang disipulo nga si Felipe nagwali sa sang ka eaki. Ginpamatud-an ni Felipe nga si Jesus ro Mesias. Ngani napahueag ro Etiopianhon sa anang natun-an ag naghambae imaw: “Tan-awa, may tubi iya. May kabangdanan baea nga indi ako mabautisohan?”​—Binuhatan 8:26-36.

3. (a) Ano ro sugo nga gintao ni Jesus sa anang mga sumueonod? (b) Paano dapat bautismohan ro sang ka tawo?

³ Klaro nga ginaturo it Biblia nga kon gusto mo alagaron si Jehova, dapat ka magpabautismo. Naghambae si Jesus sa anang mga sumueonod: “Adtuni ninyo ro tanan nga mga tawo sa bilog nga kalibutan ag himoa sanda nga mga disipulo ko. Bautisohi ninyo sanda.” (Mateo 28:19) Nagtao man si Jesus it halimbawa kat nagpabautismo imaw. Gintum-oy gid imaw sa tubi, owa eang ginwisikan ra ueo. (Mateo 3:16) Makaron, kon ro sang ka Cristyano magpabautismo, dapat gid imaw itum-oy sa tubi.

4. Ano ro ginapakita it imong bautismo?

⁴ Kon magpabautismo ka, nagapakita ra sa iba nga gusto mo mangin amigo ro Dyos ag alagaron imaw. (Salmo 40:7, 8) Ngani mangawa ka, ‘Ano ro dapat kong obrahon agud mabautismohan?’

IHIBAEO AG KAMATUORAN

5. (a) Ano ro unang obrahon bago ka magpabautismo? (b) Ham-an importante ro Cristyanong mga miting?

⁵ Bago ka mabautismohan, kinahang-ean mo kilaeahon si Jehova ag si Jesus. Nag-umpisa ra kat nagtuon ka it Biblia. (Basaha ro Juan 17:3.) Pero kueang pa ron. Hambae it Biblia, dapat “masayran ninyo it mayad” ro kabubot-on ni Jehova. (Colosas 1:9) Ro mga miting it mga Saksi ni Jehova makabulig agud mag-eapit ro imong relasyon kay Jehova. Ruyon ro importante nga rason sa pag-attend pirme it mga miting.​—Hebreo 10:24, 25.

6. Mauno’t abu ro dapat mo masayran sa Biblia bago ka magpabautismo?

⁶ Syempre, owa nagaeaum si Jehova nga masayran mo ro tanan sa Biblia bago magpabautismo. Owa imaw nag-eaum sa Etiopianhon nga masayran tanan bago magpabautismo. (Binuhatan 8:30, 31) Ag owa’t katapusan ro atong pagtuon sa Dyos. (Manugwali 3:11) Pero bago mabautismohan, dapat mo masayran ag batunon ro panguna nga mga ginaturo it Biblia.​—Hebreo 5:12.

7. Paano makabulig kimo ro pagtuon sa Biblia?

⁷ Ro Biblia naghambae: “Owa it tawo nga makapahamuot sa Dyos kon owa imaw it pagtuo.” (Hebreo 11:6) Dapat may pagtuo ka bago magpabautismo. Ro Biblia nagasugid nga ro mga tawo kato sa syudad it Corinto nakabati sa mga ginturo it mga sumueonod ni Jesus ag ro resulta, “nagtuo man ag nagpabautiso.” (Binuhatan 18:8) Pareho karon, ro pagtuon sa Biblia makabulig kimo nga magtuo sa promisa it Dyos ag sa gahum it sakripisyo ni Jesus, nga nag-euwas katon sa saea ag kamatayon.​—Josue 23:14; Binuhatan 4:12; 2 Timoteo 3:16, 17.

ISUGID SA IBA RO KAMATUORAN PARTI SA BIBLIA

8. Ham-an gusto mo isugid sa iba ro imong natun-an?

⁸ Sa padayon mo nga pagtuon it Biblia, nabatyagan mo ro bulig sa imong kabuhi ag nagbakod pa gid ing pagtuo. Gusto mo isugid sa iba kon ano ro imong natun-an. (Jeremias 20:9; 2 Corinto 4:13) Pero kanyo mo dapat isugid?

9, 10. (a) Kanyo mo unang isugid ro imong natun-an? (b) Ano ing obrahon kon gusto mo eon mag-preaching kaibahan it kongregasyon?

⁹ Gusto mo gid isugid ro imong natun-an sa imong pamilya, mga amigo, kaeapit-baeay, o katrabaho. Tama ron, pero obraha ra sa manami ag mapinalanggaon nga paagi. Pagkatapos, pwede ka eon ka-preaching kaibahan it kongregasyon. Kon handa ka eon nga obrahon ra, pwede mo istoryahon ro nagaturo kimo it Biblia ag hambaeon nga gusto mo eon mag-preaching kaibahan it kongregasyon. Kon para kana handa ka eon ag nagakabuhi base sa Biblia, magpaeapit kamo sa daywang ka elder it kongregasyon.

¹⁰ Ano ro ginaobra sa ruyong miting? Istoryahon ka it mga elder kon haeubtan ag ginapatihan mo ro mga panguna nga ginaturo it Biblia, kon ginaaplikar mo ra kada adlaw, ag kon gusto mo gid mangin isaea sa mga Saksi ni Jehova. Tandai nga ro mga elder gatatap gid sa tanan nga myembro it kongregasyon, kaibahan ka, ngani indi mahadlok nga mag-istorya kanda. (Binuhatan 20:28; 1 Pedro 5:2, 3) Pagkatapos it miting, hambaeon ka nanda kon pwede ka eon mag-preaching kaibahan it kongregasyon.

11. Ham-an importante mag-obra it pagbag-o bago ka mag-preaching kaibahan it kongregasyon?

¹¹ Ipaathag it mga elder kon may dapat ka pa bag-uhon bago mag-preaching kaibahan it kongregasyon. Ham-an importante ruyong mga pagbag-o? Tungod kon mag-istorya kita sa iba parti sa Dyos, ginarepresentar naton si Jehova ag nagakabuhi paagi sa pagpadungog kana.​—1 Corinto 6:9, 10; Galacia 5:19-21.

MAGHINUESOE AG MAGBAG-O

12. Ham-an dapat maghinuesoe ro tanan nga tawo?

¹² May dapat ka pa obrahon bago mabautismohan. Si apostol Pablo naghambae: “Maghinuesoe kamo ag magbalik sa Dyos agud nga dueaon nana ro inyong mga saea.” (Binuhatan 3:19) Ano ro kahueogan it paghinuesoe? Nagakahueogan ra nga nagakasubo ka gid sa imong saea nga naobra. Halimbawa, kon nagkabuhi ka it imoral, dapat ka maghinuesoe. Ag maskin ginatinguhaan mo nga obrahon ro tama sa bilog mo nga kabuhi, dapat ka gihapon maghinuesoe, tungod tanan kita nagakasaea ag nagakinahang-ean it pagpatawad ku Dyos.​—Roma 3:23; 5:12.

13. Ano ro kahueogan it “magbag-o”?

¹³ Tama baea nga hinuesoean eang ro haobrang saea? Indi. Si Pedro naghambae, dapat ka “magbag-o.” Nagakahueogan ra nga dapat indi mo eon balikan ro dati mong ueobrahon ag obrahon eon ro tama. Sa pag-ilustrar, isipa nga nagaagto ka sa isaea ka lugar nga owa mo pa naagtonan. Pagkatapos, nasayran mo nga saea ro imong ginaagyan. Ano ing obrahon? Dapat maghinay ka anay, magpundo, ag magliso paadto sa tama nga aeagyan. Pareho man sa pagtuon mo it Biblia, matun-an mo nga may una ka pa mga ueobrahon nga kinahang-ean bag-ohon. Kinabubot-on nga “magbag-o” ag obrahon ro tama.

IDEDIKAR RO IMONG KAUGALINGON

14. Paano mo ginadedikar ro imong kaugalingon kay Jehova?

¹⁴ Ro isaea pa ka importante nga paagi bago ka magpabautismo hay ro pagdedikar it imong kaugalingon kay Jehova. Kon nagadedikar ka kana paagi sa pangamuyo, nagapromisa ka nga imaw eang ro imong simbahon ag ro pinakaimportante sa imong kabuhi hay ro pag-obra it anang kabubot-on.​—Deuteronomio 6:15.

15, 16. Ano ro nagapahueag sa sang ka tawo agud magdedikar sa Dyos?

¹⁵ Ro pagpromisa nga si Jehova eang ro simbahon kapareho man sa pagpromisa sa imong palangga nga magaiba kamo hasta’t buhi. Isipa nga nagapangasawa ro sangka eaki sa bayi. Habang gabuhay nga ginakilaea it eaki ro bayi, ginapalangga na ra ag gusto na eon pakaslan. Maskin seryoso ra nga desisyon, handa na nga batunon rayang responsibilidad tungod palangga na ro bayi.

¹⁶ Sa pagtuon mo parti kay Jehova, ginapalangga mo imaw ag gusto mo nga obrahon ro tanan para alagaron imaw. Sa pangamuyo, nagpromisa ka nga alagaron imaw. Ro Biblia nagahambae nga kon sin-o man ro gusto magsunod kay Jesus “lipatan nana ro anang kaugalingon.” (Marcos 8:34) Ano ro kahueogan kara? Nagakahueogan ra nga ginauna mo si Jehova sa imong kabuhi. Ro kabubot-on ni Jehova mas importante pa kaysa sa imong mga handum.​—Basaha ro 1 Pedro 4:2.

INDI MAHADLOK SA KAPASLAWAN

17. Ham-an ro ibang tawo owa nagdedikar it andang kaugalingon kay Jehova?

¹⁷ Ro ibang tawo owa nagdedikar it andang kaugalingon kay Jehova, tungod nahadlok sanda nga indi matuman ro andang promisa nga alagaron imaw. Owa sanda naila nga mapaslaw si Jehova, ag tungod owa nanda gindedikar ro andang kaugalingon kay Jehova, owa kuno sanda it saeabton sa andang ginaobra.

18. Ano ro magabulig kimo nga indi mahadlok nga mapaslaw si Jehova?

¹⁸ Ro pagpalangga kay Jehova magabulig kimo nga indi mahadlok nga mapaslaw imaw. Tungod palangga mo imaw, obrahon mo ro tanan agud tumanon ro imong ginpromisa. (Manugwali 5:4; Colosas 1:10) Indi pag-isipa nga malisud obrahon ro kabubot-on ni Jehova. Nagsueat si apostol Pablo: “Kon nagahigugma kita sa Dyos, kon sayuron nagatuman kita sa anang mga sugo. Ag ro anang mga sugo bukon man it mabudlay para katon.”​—1 Juan 5:3.

19. Ham-an indi ka dapat mahadlok nga idedikar ro imong kaugalingon kay Jehova?

¹⁹ Indi kinahang-ean mangin perpekto para idedikar ro imong kaugalingon kay Jehova. Owa imaw nagapaabot it indi naton kaya. (Salmo 103:14) Buligan ka nana nga obrahon ro tama. (Isaias 41:10) Magsalig kay Jehova sa bug-os mo nga tagipusoon, ag “tadlungon na ro imong mga daean.”​—Hulubaton 3:5, 6.

GINAMITLANG IT BIBIG AG KITA NAEUWAS

20. Pagkatapos mo idedikar ro imong kaugalingon sa Dyos, ano ro masunod mo nga obrahon?

²⁰ Handa ka eon baea nga idedikar ro imong kaugalingon kay Jehova? Pagkatapos mo idedikar ro imong kaugalingon kana, handa ka eon sa masunod nga obrahon. Kinahang-ean mo magpabautismo.

21, 22. Paano ‘ginamitlang it bibig’ ro imong pagtuo?

²¹ Hambaea ro koordenitor ku hubon it mga gulang sa kongregasyon nga gindedikar mo eon ro imong kaugalingon kay Jehova ag gusto mo magpabautismo. Pagkatapos, istoryahon ka it mga elder parti sa panguna nga mga ginaturo it Biblia. Kon magsugot sanda nga handa ka eon, hambaeon ka nanda nga pwede ka eon bautismohan sa masunod nga asembliya o kunbensyon it mga Saksi ni Jehova. Sa asembliya, may pamulong-pulong parti sa bautismo. Ro manoghambae may daywang pangutana sa mga ginabautismohan. Agud masabat ruyong mga pangutana, ‘ginamitlang it bibig’ ro imong pagtuo.​—Roma 10:10.

²² Ngani mabautismohan ka eon. Ro bilog mong eawas itum-oy sa tubi. Ro bautismo nagapakita nga gindedikar mo eon ro imong kaugalingon kay Jehova ag sambilog ka eon sa mga Saksi ni Jehova.

RO GINAPAKITA IT IMONG BAUTISMO

23. Ano ro buot hambaeon it pagbautismo “sa ngaean ku Ama ag ku Unga ag ku baeaan nga espiritu”?

²³ Ginhambae ni Jesus nga ro anang mga disipulo mabautismohan “sa ngaean ku Ama ag ku Unga ag ku baeaan nga espiritu.” (Basaha ro Mateo 28:19.) Ano ro buot hambaeon kara? Nagapakita ra nga ginakilaea mo ro awtoridad ni Jehova ag ro posisyon ni Jesus sa katuyoan it Dyos ag sa paggamit it anang baeaan nga espiritu nga matuman ro anang kabubot-on.​—Salmo 83:18; Mateo 28:18; Galacia 5:22, 23; 2 Pedro 1:21.

24, 25. (a) Ano ro ginapakita it bautismo? (b) Ano ro atong tun-an sa ulihi nga kapitulo?

²⁴ Importante gid ro ginapakita it bautismo. Kon itum-oy ka sa tubi, nagapakita ra nga namatay o gin-aywanan mo eon ro dating pagkabuhi. Pagbutwa mo, nabuhi ka’t uman agud obrahon ro kabubot-on it Dyos. Nagapakita ra nga alagaron mo eon si Jehova. Tandai nga owa ka nadedikar sa tawo, organisasyon, o obra. Gindedikar mo ro imong kabuhi kay Jehova.

²⁵ Ro imong dedikasyon magabulig kimo nga mag-uswag sa ing pagpakig-amigo sa Dyos. (Salmo 25:14) Owa ra nagakahueogan nga maeuwas eon kon mabautismohan. Nagsueat si apostol Pablo: “Magpadayon kamo sa pagpangabudlay nga may kahadlok ag pagkurog sa paghimpit sa inyong kaeuwasan.” (Filipos 2:12) Umpisa paeang ro bautismo. Pero paano ka padayon nga magpaeapit kay Jehova? Sabton rayang pangutana sa ulihi nga kapitulo it rayang libro.